Akariro i Teia Tuatau Akamaaraanga ei Mea Mataora!
1. Eaa tetai mataara no te akamaata atu i to tatou mataora i teia tuatau Akamaaraanga?
1 Ka inangaro ainei koe kia maata atu toou mataora i roto ia Mati, Aperira e Me? Tetai mataara no teia koia oki, kia akamaata atu i taau ka rave i roto i te angaanga orometua e me ka rauka, kia painia tauturu. Akapeea ra teia i te akamaata atu anga i toou rekareka?
2. Te akamaata atu anga i ta tatou ka rave i roto i te angaanga orometua, akapeea te reira te akatupu anga i te mataora maata?
2 Akamaata Atu i Toou Mataora: Anga mai a Iehova ia tatou kia mataora e kia mareka ua i te akamori anga iaia ia tatou e akatupu ra i to tatou anoano pae vaerua. (Mata. 5:6) I maani katoa mai aia ia tatou kia rauka te mataora i te oronga atu ki etai ke. (Anga. 20:35) Na roto i te angaanga orometua, rauka ia tatou te rave i nga mea e rua—te akamori i te Atua e te tauturu i te tangata. Te tau ua ra e me maata atu ta tatou ka rave, ka maata roa atu rai to tatou mataora. Tetai, ko te maata atu i ta tatou tutu aere, te maata atu ïa to tatou karape. Me rauka ia tatou te karape, ka tukatau atu tatou e kare tatou e ru. E maata ua atu te au atianga no tatou kia akakitekite e kia akamata i tetai au apii Pipiria. Ka akamaata atu teia au mea pouroa i to tatou mataora i roto i te angaanga orometua.
3. No teaa ka riro ei a Mati e Aperira ei nga marama meitaki no te painia tauturu?
3 E nga marama meitaki tikai a Mati e Aperira no te painia tauturu no te mea ka rauka ia tatou kia angaanga e 30 me kore e 50 ora. Tetai, akamata i te Maanakai o Mati 22, e tae ua atu ki te Akamaaraanga a te Monite, Aperira 14, ka piri atu tatou ki tetai angaanga puapinga i te pati aere i te tangata kia tae mai ki te Akamaaraanga. Ka mataora te au putuputuanga no te mea e maata te ka piri mai ki te rave anga i te angaanga “ma te manako okotai,” kia maata te au ngai ka kapi i roto i te tuatau tei akatakaia.—Zepha. 3:9.
4. Me ka inangaro tatou i te painia tauturu, eaa ra ta tatou ka rave?
4 Akapapa i Teianei: Me kare koe i rave ake, akara akaou i taau papaanga kia kite eaa taau ka akatano kia rauka ia koe te akamaata atu i toou taime ki roto i te angaanga orometua i roto i te okotai marama me kore kia maata atu. E pure kia tauturu mai a Iehova. (Iako. 1:5) Tuatua atu no runga i te reira ki toou pamiri e ki etai ke i roto i te putuputuanga. (Mase. 15:22) Penei ka kite koe e noatu te turanga makimaki me kore te angaanga moni, ka mataora rai koe te painia tauturu.
5. Eaa te ka tupu me akamaata atu tatou i to tatou taime ki roto i te angaanga orometua i teia tuatau Akamaaraanga?
5 Inangaro a Iehova kia mataora tona au tavini. (Sala. 32:11) Na te tauta pakari anga kia akamaata atu i to tatou taime ki roto i te angaanga orometua i teia tuatau Akamaaraanga, ka maata roa atu to tatou mataora e ka rekareka katoa to tatou Metua i te rangi.—Mase. 23:24; 27:11.