Kua Papa Ainei Taau Tamariki?

1. Eaa ra ka anoanoia ai te tamariki apii kia papa ua?

¹ Me akamata te au tuatau o te apii, kare ekoko ka kite mai taau tamariki i te au akaaoanga e te au taomianga ou. Ka rauka katoa ia ratou te au atianga meitaki kia “akakite i te tuatua-mou.” (Ioa. 18:37) Kua papa ainei ratou?

2. Kia rauka i te akapapa, eaa ta taau au tamariki ka anoano i te kite?

² Kua marama tikai ainei taau tamariki eaa te piri atura ki te au peu akaepaepa anga enua, au orote peikani e te tarevake i te piri atu ki te reira? Kua papa ainei ratou no te au taomianga kia aruaru i te au apii teitei, kia akameamea, e kia inu i te kava e te kai i te au apinga akakona? Ka tuatua ua ainei ratou e te patoi ra ta ratou akonoanga i tetai au peu, me kore kare ratou e kite akapeea me akamarama i ta ratou e irinaki ra?​—1 Pete. 3:15.

3. Akapeea te au metua me taangaanga i ta ratou Akamorianga a te Ngutuare i te aiai kia akapapa i ta ratou tamariki?

³ Taangaanga i te Akamorianga a te Ngutuare i te Aiai: E tika, kua uriuri ana kotou i te au mataiti o te tuatau apii no runga i te au manamanata i tupu mai ana. Na te akamanako meitaki anga i te au manamanata i te apii mua ake ka akamata ai te tuanga mua o te apii, te mataiti ou e tetai apii ou, ka tauturu i te tamariki kia manako papu. Eaa ka kore ei e taangaanga e tai me kore e rua aiai no te Akamorianga a te Ngutuare no teia tuanga? Penei ka ui koe ki taau tamariki e, eaa te akataitaia maata ra ia ratou e manako ra ratou i te aere ki te apii. Te au manamanata taau i akamanako ana i te au mataiti i topa kia uriuri akaouia i teianei no te mea kua pakarikari mai te tamariki e kua maata atu te marama. (Sala. 119:95) E kapiti mai ki roto i te au tuatau apiipii anga tetai akatutuanga e ko koe te puapii, te tangata tauturu i te apii, me kore te oa apii. Apii i taau tamariki akapeea me pau no roto mai i te Pipiria e te taangaanga i te au puka Reasoning e te Young People Ask. Kua taangaanga tetai metua i te tuatau apiipii i te akapapa i tana tamariki kia aravei i te au puapii ou i te akamataanga o te apii i te au mataiti, kia akakite e e Au Kite ratou no Iehova.​—Akara i Te Punanga Tiaki, Titema 15, 2010, kapi 3-5.

4. Eaa ta te au metua pakari ka rave?

⁴ Ko te au akaaoanga ta te au mapu Kerititiano e aro atura i teia tuatau openga, te “kino maata” ua atura. (2 Timo. 3:1) E mea tau no te au metua manako pakari kia akamanako atu i te reira. (Mase. 22:3) E rave i ta kotou ka rauka i te tauturu i ta kotou tamariki kia papa.