Akapeea te Ngutuare Tangata e Mataora Ai?​—Tuanga 2

E apinga aroa te tamariki na Iehova. Te anoano maira aia i te au metua kia akono meitaki i teia apinga aroa. Kua oronga mai a Iehova i te au akoanga meitaki ki te au metua. Ka tauturu tana akoanga i te tamariki kia akatupu i te mataora i roto i te ngutuare.

1. Eaa ta Iehova akoanga ki te au metua?

Te anoano maira a Iehova i te au metua kia akaperepere i ta ratou tamariki e kia akapou i tetai tuatau kia ratou. Inangaro aia i te au metua kia paruru i ta ratou tamariki mei te kino e kia tereni ia ratou ma te au kaveinga Pipiria. (Maseli 1:8) Karanga aia ki te au metua tane: “E apii [i ta kotou tamariki] kia pakari ma te ako a te Atu.” (E tatau ia Ephesia 6:4.) Mataora a Iehova me aru te au metua i tana akauenga no te utuutu i ta ratou tamariki e eiaa e oronga i teia apainga ki tetai ke.

2. Eaa ta Iehova akoanga ki te tamariki?

Akaue a Iehova i te tamariki: “E akarongo i to kotou au metua.” (E tatau ia Kolosa 3:20.) Me akangateitei te tamariki e te akarongo i to ratou nga metua, ka mataora a Iehova e te au metua. (Maseli 23:​22-25) Kua oronga mai a Iesu i te akaraanga meitaki i tona meangiti anga. Noatu tona tu apa kore, kua akarongo aia e kua kauraro i tona nga metua.​—Luka 2:​51, 52.

3. Akapeea kotou me akavaitata ki te Atua ei ngutuare tangata?

Me e metua koe, ka inangaro koe i taau tamariki kia akaperepere ia Iehova. Akapeea koe me rave i teia? Karanga te Pipiria: “Ka apii tamou tikai koe i [ta Iehova au tuatua] ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra.” (Deuteronomi 6:7) Kia “apii tamou” te aiteanga kia apii ma te taokioki ua. Kia ripiti koe i taau tuatua kia maara i te tamariki. Te aiteanga o teia irava ka akara koe i te au tuatau no te tuatua ia Iehova ki taau tamariki. E akanoo i te tuatau i te epetoma no te akamori kapiti ei ngutuare. Me kare e tamariki, ka puapingaia koe me akanoo i te tuatau i te epetoma no te apii i te Tuatua a te Atua.

KIMI OONU

4. Tereni i taau tamariki ma te aroa

Ka ngata rai i te tereni i taau tamariki. Akapeea te Pipiria me tauturu? E tatau ia Iakobo 1:​19, 20, e oti uriuri i teia au uianga:

• Akapeea te au metua me akaari i te aroa me pukapuka ki ta ratou tamariki?

• Eaa te tumu auraka tetai metua e ako i tana tamaiti me riri aia?a

5. Paruru i taau tamariki

Kia paruru i taau tamariki, e mea puapinga maata kia tuatua ki taau tamaiti no te pirianga āinga. Penei ka emiemi koe i te tuatua i teia. Akatangi i te VITIO, e oti uriuri i te au uianga ka aru mai.

VITIO: Paruru i ta Kotou Tamariki Mei te au Mea Kino (2:58)

• Eaa te au metua i tapupu ei i te apii i ta ratou tamariki no te pirianga āinga?

• Akapeea tetai au metua te akamārama anga i te pirianga āinga ki ta ratou tamariki?

Mei tei totouia, te tupu maata atura te kino ki teianei ao o Satani. E tatau ia 2 Timoteo 3:1, 13, e oti uriuri i teia uianga:

• Tetai o te aronga kino tei taikuia i te irava 13 te kanga ra i te tamariki ma te peu viivii o te āinga. No reira, eaa i puapinga ai kia apii te au metua i ta ratou tamariki no runga i te pirianga āinga e te paruru ia ratou mei te aronga kanga tamariki?

Kua kite ainei koe?

Kua oronga mai te Au Kite o Iehova i te au tauturu ki te au metua no te apii i ta ratou tamariki no runga i te pirianga āinga e te paruru ia ratou kia kore e kangaia e te aronga peu viivii o te āinga. Ei akaraanga, akara i te:

• Paruru i Taau Tamariki (vitio)

• Apii Mei te Puapii Maata, pene 10 e te 32

• “Apii i Taau Tamariki no te Pirianga Āinga” (E Ara! Nu. 5 2016)

6. Akangateitei i toou nga metua

VITIO: Akapeea au me Tuatua ki Toku Nga Metua? (2:19)

• Eaa i puapinga ai no tetai mapu kia tuatua maru ki tona nga metua?

• Akapeea tetai mapu me tuatua ki tona nga metua na roto i te tu ngateitei?

E tatau ia Maseli 1:8, e oti uriuri i teia uianga:

• Eaa te tu o tetai mapu me tuatua tona nga metua kiaia kia rave i tetai angaanga?

7. Akamori ia Iehova ei ngutuare tangata

E akanoo ana te ngutuare tangata o te Au Kite o Iehova i tetai tuatau i te au epetoma no te akamori kapiti. Mei teaa rai te tu o teia akamorianga a te ngutuare? Akatangi i te VITIO, e oti uriuri i teia au uianga ka aru mai.

VITIO: Akamorianga a te Ngutuare​—Au Manamanata e te Au Akameitakianga (8:04)

• Akapeea tetai ngutuare me akanoo i tetai tuatau no te Akamorianga a te Ngutuare?

• Eaa ta te au metua ka rave kia tupu te mataora e te apiianga tau i te tuatau akamorianga a te ngutuare?​—Akara i te tutu mua o teia apii.

• Eaa ka ngata ei no kotou kia apii kapiti?

I te tuatau i Iseraela, kua umuumu a Iehova i te au ngutuare kia uriuri putuputu i te au Tuatua Tapu. E tatau ia Deuteronomi 6:6, 7, e oti uriuri i teia uianga:

• Akapeea koe me taangaanga i teia kaveinga?

Ravenga tauturu no te akamorianga a te ngutuare:

• Akapapa no te au uipaanga.

• Tatau e te uriuri i tetai tua Pipiria kia mataora toou ngutuare.

• Me e tamariki tetai, kopi e te nenei i te au ravenga apii no te tamariki i runga i te jw.org.

• Me e mapu tetai, uriuri i tetai atikara no te au mapu i runga i te jw.org.

• Akatutu i tetai tua Pipiria ki taau tamariki.

• Akara e te uriuri i te vitio i runga i te jw.org.

APIIANGA

Inangaro a Iehova i te au metua kia aroa, tereni, e te paruru i ta ratou tamariki; e te tamariki kia akangateitei e kia kauraro i to ratou au metua; e te au ngutuare tangata kia akamori kapiti iaia.

Uriurianga

• Akapeea te au metua me tereni e te paruru i ta ratou tamariki?

• Akapeea te tamariki me akangateitei i to ratou nga metua?

• Eaa i puapinga ai i te akanoo i tetai tuatau i te epetoma ravarai kia akamori kapiti ei ngutuare?

KIMI KIMI

Eaa te au apiianga ka akapapa i taau tamariki me tupu mai ei aronga mamaata?

“E Ono Apiianga Puapinga na te Tamariki” (E Ara! Nu. 2 2019)

Apii i te akoanga tau a te Pipiria no te aronga akono i te aronga pakarikari.

“Eaa ta te Pipiria e Karanga ra no te Akono i te Nga Metua Pakarikari?” (Web atikara)

Akara akapeea tetai tane kare i kite i te utuutu tamariki i riro ei ei metua tane meitaki.

Apiiia e Iehova Akapeea me Akono i te Ngutuare (5:58)

Akara akapeea te au metua tane me akamatutu i to ratou pirianga ki ta ratou tamariki tamaroa.

“Akapeea te Au Metua Tane me Akapiri Vaitata Ua ki ta Ratou Tamariki Tamaroa?” (Te Punanga Tiaki, Tianuare 2012)