‘E Aroa Atu i te au Taeake Katoa’

Vaitata rai e rua tauatini mataiti i topa, te tataia anga teia au tuatua akauruia. (1 Pete. 2:17) Inara ka anoano maataia tatou kia taangaanga i taua au tuatua i teianei! Akapeea e rauka ai ia tatou i te akaari i te aroa no tetai apinga maata mei teia rai te tu no te taokotaianga taeake i te ao katoa nei? E no te aroa kore i roto i teianei ao, ka akapeea tatou te akapapu anga e kare to tatou aroa e meangiti mai? (Mata. 24:12) Akara ana me ka rauka ia koe i te pau i te au uianga ka aru mai ia koe e akara ra i te vitio Our Whole Association of Brothers.

(1) Inaea tatou i riro mai ei ei tuanga no ta tatou taokotaianga taeake Kerititiano? (2) Eaa te au angaanga e toru ta tatou e matau ana i te rave ma te taokotaianga taeake i te ao katoa nei? (3) Akapeea to tatou au taeake te akaari anga i te tu aruaru tikai kia tutu aere (a) i te au ngai mamao i Alaska, (e) i runga i te au pai i Europa, e (ng) i te au ngai mamao i roto i te vao rakau i Peru? (4) Eaa ra tatou ka kore ei e manako e kare te angaanga tutuanga e puapinga ana? (5) Oronga mai i tetai au akaraanga o te Au Kite o Iehova te akapumaana e te tauturu anga i tetai e tetai (a) i muri ake i tetai ngaruerue enua, (e) i muri ake i tetai uriia, e (ng) i te tuatau tamakianga a tetai iti tangata? (6) Eaa te au mataara no tatou pouroa kia akaari i te akairo maata, no te akataka i to tatou taokotaianga taeake Kerititiano? (Ioa. 13:35) (7) Eaa te au akameitakianga ka rauka mai me angaanga kapiti i te akatu anga i to tatou au Are Uipaanga Patireia? (8) Akapeea te au taeake i Europa Itinga e i Rutia te akamou anga i to ratou pirianga vaitata kia Iehova te araiia anga te angaanga tutu? (9) Eaa te tautaanga umere tikai ta tetai Au Kite e manganui e rave ana kia tae ki te au uruoaanga, e eaa te tumu? (10) Akapeea teia vitio te akaketaketa anga i toou akakoroanga (a) kia akamori ia Iehova i ko i te au uipaanga Kerititiano ma to kotou taokotaianga taeake, (e) kia tauturu i etai ke i te tuatau ka anoanoia, e (ng) kia tutu ma te tiratiratu i te taime ua atu e te mataara ka rauka ia koe? (11) Akapeea tatou me taangaanga i teia vitio i roto i te angaanga orometua, e eaa te taime tau?

Te tumu maata i riro mai ei tatou ei tuanga no te taokotaianga taeake Kerititiano, koia oki to tatou aroa no Iehova. No reira tatou e inangaro ana i te apii no runga iaia e te apii atu i etai ke. E aroa ana tatou i te aronga ta Iehova e aroa ra. Me tauturu tatou ia ratou i te taime e anoano maataia ra, kare tatou e tapapa e kia akameitaki mai te Atua ia tatou. Mari ra, ka akameitaki tatou i te Atua no te mea e akaperepere ana tatou i te taokotaianga taeake Kerititiano mei ko mai iaia. I te au ra openga o teia ao aroa kore e ope atura, e mea tau kia akaari ua rai tatou i te aroa no te au taeake katoa!