Pia Uianga

◼ Ka tau ainei kia aao tetai tuaine i te tapoki upoko me rave i tetai apii Pipiria i ko i te ngutupa, me e papuritia tane tetai i aru mai iaia?

Me rave tetai tuaine i tetai apii Pipiria tei akatakaia no te au epetoma, e tei reira tetai papuritia tane, ka tau ainei te tuaine kia tapoki i tona upoko. (1 Kori. 11:3-10) Te akamarama maira Te Punanga Tikai o Tiurai 15, 2002, kapi 27 e: ‘Kua akanoo ke ia ana teia tuanga no te apii, na te tangata e rave ra i te apii e akaaere i te reira. I raro i teia au turanga nei, kua riro taua apii ra ei tuanga no te putuputuanga. Me na tetai tuaine kua papetitoia e rave i taua apii ra, e kua aru atu tetai Kite tane iaia, ka tau tera tuaine kia tapoki i tona upoko.’ Ko teia rai te tu me ka raveia te apii i roto i tetai kainga, i ko i te ngutupa, me kore i tetai ngai ke atu.

I tetai tua, me kare tetai apii Pipiria i te ngutupa i tinamou ake, kare te tuaine e anoanoia kia tapoki i tona upoko me e papuritia tane tetai i reira, noatu te akakoroanga e kia akatutu i tetai apii Pipiria, me kore kia uriuri i tetai atikara i roto i tetai puka apii. I te mea e ka roa rai e tinamou ei te au apii Pipiria i ko i te ngutupa na roto i te oki ua anga i te atoro, ka anoanoia te papuritia kia akamanako meitaki e mei teaa te tu, e kia akara e eaa te taime tau no te aao i te tapoki upoko.