Akamataanga i te Au Apii Pipiria i te Ngutupa e na Runga i te Terepaoni
1, 2. Akapeea e rauka ai ia tatou i te akatanotano i ta tatou porokaramu no te apii Pipiria i te tauturu atu i te au tangata e maata ua te angaanga?
1 Maata ua atu te au angaanga a te au tangata i teia tuatau nei. Inara, e inangaro to te manganui i roto i te au apinga pae vaerua. Akapeea tatou i te tauturuanga ia ratou i te akamerengo i to ratou anoano i te pae vaerua? (Mata. 5:3) E manganui te papuritia tei rauka i te apii i te Pipiria ki te au tangata i to ratou ngutupa me kore na runga i te terepaoni. Ka rauka ainei ia koe i te akamaata atu i taau angaanga orometua na roto i teia mataara?
2 Kia akamata i te au apii Pipiria, ka inangaroia tatou kia papa ua i te akaari i tetai apii Pipiria me kiteaia mai te atianga. Akapeea e kiea teia i te raveia anga?
3. No teaa ra ka akaari atu ei i tetai apii Pipiria i te araveianga mua, e akapeea teia i te raveia anga?
3 I te Ngutupa: Me aravei koe i tetai tangata te inangaro ra i te pukapuka no runga i te Pipiria, eeu ua koe ki tetai parakarapa taau i akapapa i mua atu ana, penei te parakarapa mua o te apii 1 o te poroutia Umuumu, e akamata atu i reira. Tatau i te parakarapa, akamanako i te uianga, e uriuri e tai me kore e rua irava tei taikuia mai. Putuputu te taime ka rauka teia i te raveia i te ngutupa tikai i roto i te rima ki te tai ngauru miniti. Me te rekareka ra te tangata i te uriurianga, maani i tetai akanooanga kia akamanako i te parakarapa tei aru mai me kore te rua a tetai tuatau ke.—Tetai atu au tamanako anga i te taangaanga anga i te araveianga tika ua i te akamata anga i te au apii ka kiteaia i roto i te Tianuare 2002 Our Kingdom Ministry, kapi 6.
4. Akapeea tatou i te akamataanga i tetai apii Pipiria i te ngutupa me te akono ra i te au atoro akaou anga?
4 Ka rauka katoa tetai araveianga aiteite ua i te taangaangaia i te akamata atu i te au apii Pipiria me te akono ra i te au atoro akaou anga. Ei akaraanga, penei ka akaari atu koe i te poroutia Umuumu e ka akakite atu i to te Atua ingoa, taangaanga anga i te apiianga 2, parakarapa 1-2. I tera mai atoro anga, ka rauka ia koe i te uriuri eaa ta te Pipiria e akakite maira no runga i to Iehova au tu, taangaanga anga i te parakarapa 3-4. No te uriurianga te ka aru mai, ka rauka ia koe i te uriuri i te au parakarapa 5-6 e te tutu i te kapi 5 i te akaari e akapeea te apiianga i te Pipiria e tauturu mai ia tatou kia kite ia Iehova. Ka rauka pouroa teia i te raveia ia tatou e tu ra i te ngutupa.
5, 6. (a) No teaa ra tetai pae tangata e inangaro atu i te apii i te Pipiria na runga i te terepaoni? (e) Eaa tetai araveianga ka rauka ia tatou i te taangaanga i te oronga anga i tetai apii na runga i te terepaoni?
5 Na te Terepaoni: Penei ka inangaro tetai au tangata i te apii i te Pipiria na runga i te terepaoni e kia apii i mua tikai i tetai tangata. Akamanako ana i te tupuanga tei aru mai: Iaia e tutu aere ra mei tera are ki tera are, kua aravei atu tetai tuaine i tetai vaine mapu e e metua vaine aia e e vaine angaanga ua i te ngai angaanga. Mei te mea e kare i rauka ana i te tuaine i te aravei akaou iaia i te kainga, kua manako mai aia i te ringi atu iaia. Kua akamarama mai te vaine mapu e kare tikai ona taime i te uriuri i te Pipiria. Kua karanga atu te tuaine: “I roto ua i te 10 me kore 15 miniti, ka kite mai koe i tetai apinga ou, i runga katoa i te terepaoni.” “Aue, me na runga, i reira, i te terepaoni, AE!” i pau mai ei te vaine. Kare i roa ana, kua akono putuputuia tetai apii na runga i te terepaoni.
6 Ka inangaro ainei tetai pae aronga taau e atoro ana i te apii na runga i te terepaoni? Penei ka rauka ia koe i te tamata i te araveianga akakiteia ua akenei, me kore ka rauka ua ia koe i te karanga e: “Me ka inangaro koe, ka rauka ia taua i te uriuri i te Pipiria na runga i te terepaoni. Ka meitaki atu ainei tera kia koe?” Na te akatanotanoanga i ta tatou porokaramu no te apii Pipiria ki te au turanga o tetai ke, penei ka rauka ia tatou i te tauturu ia ratou kia ‘rauka te kite i te Atua.’—Maseli 2:5; 1 Kori. 9:23.