Aru i te Akaraanga o te au Peroveta—Mika
1. Eaa te uianga ta Mika i akamanako, inara eaa ra kare tana angaanga orometua i puapinga kore ana?
1 ‘Aea ra te openga o teia akatereanga kino e ope ei?’ Penei kua akamanako ana rai te peroveta ko Mika i taua uianga ra, iaia e akakite aere ra i te karere a Iehova no te akava i te patireia o Iseraela e to Iuda. Inara kare tana angaanga orometua i puapinga kore ana. I te mataiti 740 M.T.N., te tuatau e ora ra a Mika, kua akatupuia ta Iehova tuatua no runga ia Samaria. (Mika 1:6, 7) I muri mai, kua takoreia a Ierusalema i te mataiti 607 M.T.N. (Mika 3:12) Akapeea ra tatou me aru i te akaraanga a Mika ia tatou e tapapa ra i ta Iehova akavaanga i to tatou nei tuatau?
2. Ia tatou e tapapa ra i te ra o Iehova, akapeea tatou te akakoromaki anga e no teaa ra?
2 Akakoromaki: Kua tata a Mika: “E akara ra au ia Iehova, e tapapa au i te Atua o toku nei ora.” (Mika 7:7) Kare ra oki a Mika i noo ua ana i te tiaki kia tae mai te openga. Kua rave ua atu rai aia i tana tuanga angaanga ei peroveta. No reira ia tatou e tapapa ra i te ra o Iehova, kia piri katoa tatou ki te au angaanga tapu, e te akono i te Atua. (2 Pete. 3:11, 12) No to Iehova akakoromaki i rauka ai tetai tuatau no te tangata kia tataraara. (2 Pete. 3:9) No reira kia akono tatou i te ako a te Pipiria kia aru i te akaraanga o te au peroveta i te akakoromaki.—Iako. 5:10.
3. No teaa tatou ka pati akatenga ai kia Iehova no tona vaerua tapu?
3 Irinaki Kia Iehova no te Maroiroi: Noatu te ngata i te angaanga a Mika, kua irinaki aia kia Iehova no te maroiroi kia rauka i te rave i te reira. (Mika 3:8) Te akakite maira a Iehova na roto i tana Tuatua, kia irinaki tatou Kiaia no te maroiroi. Te oronga ua maira aia i te maroiroi no te aronga tei paruparu, kia rauka ia ratou i te akatupu i ta ratou au apainga teokaratiki. (Sala. 84:5, 7; Isa. 40:28-31) Kua kite ana ainei koe i teia i roto i toou uaorai oraanga i te tavini anga ia Iehova? Te pati putuputu ra ainei koe kia tauturu mai a Iehova ia koe na roto i tona vaerua tapu?—Luka 11:13.
4. Eaa te akaraanga meitaki ta Mika i akanoo no tatou i teia tuatau?
4 Ko te rave i te anoano o te Atua te mea puapinga rava atu i roto i to Mika oraanga. Noatu kua koropiniia aia e te aronga angaanga tau kore, kua vai tiratiratu rai aia. Te timataia nei rai to tatou tu tiratiratu i te au ra ravarai. No reira kia ‘aaere tatou i te ingoa o Iehova, o to tatou Atua, e tuatatau ua atu.’—Mika 4:5.