E Tai Anere Mataiti te Akakite Anga i te Patireia!
1. No te tai anere mataiti i topa, eaa ta te iti tangata o Iehova i akamaroiroiia kia rave?
1 “I na, te tutara nei te Ariki! Ko kotou tona aronga akakitekite. No reira e akakite, e akakite, e akakite i te Ariki e tona patireia.” Na roto i teia au tuatua akamaroiroi a te Taeake Rutherford mei te tai anere mataiti i topa, kua akamaroiroiia te iti tangata o Iehova kia akakite i te karere o te Patireia ki te au tangata ravarai. E ko te reira ta tatou i rave ana! Mei ta te au Kerititiano mua i rave, kua tutu aere tatou i te tuatua meitaki o te Patireia “ki te tangata ravarai i raro ake i teianei rangi.” (Kolo. 1:23) Me oki tatou i te akamanako i te anere mataiti i topa, eaa ta tatou i rauka i te rave i te akakitekite i te Patireia o te Atua? Ka akapeea tatou i te akakitekite no runga i te reira ia tatou e vaitata ra ki te akamaaraanga i te 100 mataiti mei te taime mai i akanooia te Patireia?
2. Akapeea ta tatou au puka i te akakite anga i te Patireia o te Atua?
2 Akamanako i te Tuatau i Topa: No te raungauru mataiti, kua riro ta tatou au puka ei akakite i te Patireia o te Atua. Mei te mataiti 1939, ta tatou makatini e taangaanga ua ana ko Te Punanga Tiaki Akakiteanga i te Patireia o Iehova. E tuatua ua ana teia makatini no runga i te Patireia e ta te reira ka akatupu. Te tuatua katoa ra te makatini Awake! no runga i te Patireia o te Atua e ko te manakonakoanga anake te reira no te tangata. E mea tau rai e ko teia te nga makatini tei uriia e tei tuʼaia i te ao katoa nei!—Apo. 14:6.
3. Eaa tetai au ravenga ta tatou i taangaanga i te akakite i te Patireia?
3 E maata te au ravenga a te iti tangata o Iehova i taangaanga i te akakite i te Patireia. I mua ana, kua taangaanga tatou i te au motoka i te akatangi i te karere, te ratio e te ponikarapu. Kua riro tera au ravenga ei tauturu ia tatou kia akatotoa i te nuti meitaki ki te pa enua katoa i te tuatau kare e maata ana te aronga akakite i te Patireia. (Sala. 19:4) I te au mataiti i topa akenei, kua tukuia atu te au akakiteanga ki runga i te jw.org Web site, e kua riro te reira ei akakiteanga i te Patireia ki te mirioni ua atu tangata—kapiti katoa i te aronga e noo ra i roto i te au enua e araiia ra te angaanga tutu aere.
4. Eaa tetai au ravenga ou ta tatou e taangaanga nei no te angaanga tutu aere?
4 Kua taangaanga katoa te iti tangata o Iehova i te au ravenga ou i te akatotoa i te karere Patireia. Ei akaraanga, i rotopu i te mataiti 1990, kua tauta tatou i te akamaata atu i te angaanga orometua na te tutu anga i te au ngai tangata, ngai paka anga motoka e te au ngai pitiniti. Kare i roa akenei, kua akanoo tatou i te angaanga tutuanga i roto i te au oire mamaata takapini i teianei ao. Pera katoa, e maata te au putuputuanga e taangaanga ra i te au pereoo puka e te au kaingakai puka i roto i te au ngai e maata te tangata e na reira ana. E tika, ko te ravenga maata no tatou i te tutu aere no runga i te Patireia koia oki, mei tera are ki tera are.—Anga. 20:20.
5. I te mataiti tavinianga ou, eaa te ka rauka i te maataanga ia tatou kia rave?
5 Akara ki Mua: I roto ia Tepetema i te akamataanga o te mataiti tavinianga ou, e maata te ka akamata i te tavini ei au painia tamou. Ka rauka ainei ia koe i te kapiti atu kia ratou? Me kore, ka rauka ainei ia koe i te painia tauturu i tetai au taime? Me ka rauka ia koe i te painia e me kare, ka akameitaki rai a Iehova i toou tu akaatinga kia piri maroiroi ki roto i te akakiteanga i te Patireia.—Mala. 3:10.
6. Eaa ra ka riro ei te marama o Okotopa 2014 ei atianga puapinga tikai?
6 Ko te marama o Okotopa 2014 te akamaaraanga o te 100 mataiti mei te taime mai i akanooia te Patireia. No reira, ko Te Punanga Tiaki o Noema-Titema, no runga te reira i te Patireia o te Atua. E tauta pakari tatou i te oronga i teia makatini ki te tangata e manganui. Ia tatou e akara ra ki mua, kia rauka ia tatou tataki tai i te tuatua “i te tuatua meitaki o te basileia o te Atua” ki te katoatoa te ka akarongo mai.—Anga. 8:12.