Nga Ravenga ou no te Akakitekite i te Ngai Tangata
1. Eaa te akaraanga ta te au Kerititiano i te anere mataiti mua i akanoo?
1 Kare te au Kerititiano i te anere mataiti mua e tutu aere ua ana mei tera are ki tera are. E tutu katoa ana ratou i te ngai tangata. (Anga. 20:20) Ei akaraanga, e aere ana ratou ki ko i te iero, no te mea e maata te tangata ka kite ratou i reira. (Anga. 5:42) Iaia i Atene, e tutu aere ana te apotetoro a Paulo ki te au tangata i ko i te makete i te au ra ravarai. (Anga. 17:17) Teia tuatau, ta tatou mataara maata e akatotoa ana i te tuatua meitaki, te raveia nei rai mei tera are ki tera are. E aere katoa ana tatou ki te au ngai paka motoka, te au ngai pitiniti, te au ngai tamataora e te tarekareka e tetai au ngai ke atu, i te tutu aere ki te tangata i te ngai ua atu ka kite tatou ia ratou. I te mea te akamaroiroiia nei te au papuritia kia piri ki te tutu aere anga i te ngai tangata, e maata te ka rauka i te taangaanga i nga ravenga ou e rua no te tutu aere.
2. Eaa te ravenga ou tei akamataia i roto ia Noema 2011?
2 Akakitekiteanga Takake ki te au Urupu Tangata i Roto i te au Oire Mamaata: Mei tei ripotiia mai i te kapi 16 e te 17 o te 2013 Yearbook, kua akamataia te tutu aere ki te au urupu tangata i New York City, i roto ia Noema 2011. Kua akakoroia rai kia akanoo i te au kaingakai puka e te au pereoo puka i roto i te au reo tukeke, ki teia au ngai i roto i te oire no te mea e maata atu te tangata i reira. Te au ra ravarai, manotini ua atu tangata e na reira mai ana, pera katoa te manganui e noo ana i roto i te au apatimani kare e akatikaia te atoro, e te aronga kare i te kainga. E mea umere tikai te maata o te tangata tei inangaro i ta tatou au puka. E tai rai marama, e 3,797 makatini, kapiti mai e 7,986 puka tei orongaia ki te tangata. E maata te aronga i na reira mai tei pati mai i tetai apii Pipiria na ratou. I te mea e ko te akamata i tetai au apii Pipiria te akakoroanga maata, i na kua tuku vivikiia atu te ingoa e te ngai nooanga o te aronga tei inangaro, ki te au putuputuanga i taua au ngai ra kia atoro atu i teia aronga.
3. Te akapeea nei teia ravenga te akatotoa angaia?
3 No te mea kua puapingaia teia ravenga, teianei te akatotoaia atura te reira i te ao katoa nei, e ki te au ngai e manganui te tangata e noo ra. Ka akakite mai te au opati manga i roto i teia au ngai e ko teea au oire mamaata te ka tau. I roto i teia au oire kua akatakaia tetai au ngai tapuanga no te au rerue e te au bus i te tari tangata. No te mea e maata te au opati e te au apatimani mamaata i roto i teia au oire, e maata rai te tangata e na raro ua ana me aere. Muri ake i reira, ka tata te opati manga ki te au putuputuanga ka piri mai, i te akakite e eaa atu tetai ka anoanoia ratou kia rave. Tei matauia ko te au painia tamou e te au painia takake te tukuia ana, i roto ra i tetai au ngai e piri katoa ana te au painia tauturu ki roto i teia angaanga.
4. E akapeea ana te rave anga i te akakitekiteanga takake ki te au urupu tangata i roto i te au oire mamaata?
4 Te tu e Raveia Ana Teia Angaanga: Te aronga e piri ana ki teia ravenga no te akakitekiteanga takake ki te au urupu tangata i roto i te au oire mamaata, e tiaki ana ratou kia aere mai tetai tangata ki ko i te kaingakai e te pereoo no te au puka. Me aere mai tetai tangata, ka patiia aia kia apai i tetai ua atu puka tana ka inangaro. Tetai ua atu uianga ka uiia mai, e akaari ana te au painia i te pauanga mei roto i te Pipiria. Me ka apai aia i tetai puka, kare te painia e taiku atu i te moni tauturu. Me ka ui mai ra aia e e akapeea ana te tutaki anga i ta tatou angaanga, i reira aia ka akakite atu ei e e tukuia ana te moni tauturu ki te ngai nooanga tei akakiteia i roto i te puka. Me te inangaro ra aia, e ui te painia e: “Ka inangaro koe i tetai tangata kia aere atu i te atoro ia koe i te kainga?” me kore “Kua kite koe e e oronga katoa ana matou i tetai apii Pipiria kare e tutaki?”
5. Akapeea te pirianga ki roto i teia ravenga ou i te riro anga ei akakeuanga ririnui ki runga i tetai tokorua akaipoipo?
5 E ravenga uua tikai teia. Akaraanga, kua tata tetai tokorua akaipoipo e: “I te akara ua anga i te tauatini ua atu tangata e na ko maira i te kaingakai puka i te au ra ravarai, kua riro ei akamaara mai kia maua i te pararauare maata o teia angaanga e raveia nei kia taeria te tangata takapini i teia ao katoa. Te kite anga i te au urupu tangata, e te akamanako anga no runga i to Iehova inangaro i te tangata, kua riro te reira ei akaketaketa i to maua inangaro kia akariro i te angaanga orometua ko te mea maata roa atu i roto i to maua oraanga. I roto i to maua manako te kite ra maua ia Iehova e akara matatio maira i te ngakau o te aronga e na ko maira i te kaingakai puka, i te kimi i te aronga tei tau. Kite tikai maua e te tauturu maira te au angera.”
6. (a) Eaa tetai ravenga ke mai no te akakitekiteanga ki te katoatoa e akanooia nei i roto i te au putuputuanga tukeke, e eaa te tuke o te reira mei te akakitekiteanga takake ki te au urupu tangata i roto i te au oire mamaata? (e) Akapeea te au putuputuanga te taokotai anga me piri ki roto i te akakitekiteanga ki te katoatoa?
6 Akakitekiteanga ki te Katoatoa e Akanooia Nei i Roto i ta Tatou Ngai Tutuanga: Kapiti atu ki te akakitekiteanga takake ki te au urupu tangata i roto i te au oire mamaata, e ravenga ou ke mai tetai e akanooia nei e te au pupu aronga pakari i roto i ta ratou ngai tutuanga. Ka tuku te au papuritia i tetai kaingakai me kore i tetai pereoo no te au puka, ki tetai ngai e maata te tangata e na reira mai ana, i roto i ta ratou ngai tutuanga a te putuputuanga. Tuke rai teia mei te akakitekiteanga takake ki te au urupu tangata i roto i te au oire mamaata, e tukuia ana i te au taeake mei roto i te au putuputuanga tukeke, kia tutu aere i roto i taua au oire mamaata tei ikiia e te opati manga.—Akara i te pia “Anoanoia Kia Taokotai.”
7. Akapeea te aronga pakari me akanoo i tetai porokaramu akakitekiteanga na te katoatoa i te ngai e tutu ra ratou?
7 Ka akara te aronga pakari e me e au ngai tetai i roto i te ngai tutuanga a te putuputuanga e maata te tangata e aere ana, e oti akara e me ka tau kia raveia tetai akakitekiteanga na te katoatoa i reira. Te au ngai ka tau no tetai kaingakai e te pereoo no te au puka, ka kapiti mai i te au ngai tapuanga rerue e te au bus tari tangata, te au makete, te au ngai tamataora e te tarekareka i vao i te ngai atea, te au mataara aere putuputuia e te tangata, te au ngai toa mamaata, te au koreti, e te ngai akatoanga pairere. E mea puapinga kia tuku i te kaingakai ki taua ngai rai, taua au ra rai, e i taua au taime rai. Kua kiteaia mai e e maata atu te au puka e apaiia ana mei ko i te au kaingakai i akanooia i ko i te au ngai toa mamaata. Tetai au ngai i te pae mataara, penei ka tano ake no te au pereoo puka. Ka rauka i te aronga pakari i te kopi mai mei roto i ta tatou Web Site tetai au tutu no te Punanga Tiaki e te Awake!, pera katoa te puka ta te Pipiria e Apii Maira. Kua akapapaia teia au tutu no teia tu akakitekiteanga. Te aronga ka piri ki roto, ka aite rai ta ratou rave anga i teia angaanga ki te tu e rave ra te au taeake i roto i te akakitekiteanga takake ki te au urupu tangata i roto i te au oire mamaata, e kia aru meitaki ratou i te aratakianga a te akaaere tavini. Me rauka mai ia ratou te ingoa e te ngai nooanga o tetai tangata kare e noo ana i roto i ta ratou ngai tutuanga, e akaki vave ratou i te pepa Please Follow Up (S-43), e oti oake ki te tekeretere.
8. Me kare a toou putuputuanga porokaramu no te akakitekiteanga ki te katoatoa, eaa te au atianga ke ka rauka ia koe kia tutu aere ki te katoatoa?
8 Akakitekiteanga ki te Katoatoa i Roto i Taau Uaorai Angaanga Orometua: I roto i te ngai tutuanga a tetai au putuputuanga, penei kare e anoanoia kia akanoo i tetai kaingakai e te pereoo puka, no te mea kare e maata ana te tangata i reira. Inara, te akamaroiroiia atu nei rai te au papuritia i roto i taua au putuputuanga kia kapiti atu i teia ravenga ki roto i ta ratou uaorai porokaramu no te angaanga orometua. E ngai okooko ainei tetai, me kore e toa aere putuputuia e te tangata i roto i taau ngai tutuanga? E ngai ainei tetai e aere mai ana te tangata i te tamataora e te tarekareka? E au akakoroanga mamaata ainei tetai e raveia ana i roto i taau ngai tutuanga? Me koia ia, penei ka rauka rai ia koe i te akakitekite ki te katoatoa.
9. No teaa tatou ka akamanako meitaki ei no runga i te tutu atu anga ki te tangata i te ngai ua atu ka aravei tatou ia ratou?
9 Te ‘inangaro ra a Iehova i te tangata katoatoa kia ora, e kia rauka te kite i te tuatua-mou.’ (1 Timo. 2:4) Te tauta nei tatou kia taeria te tangata e manganui e te karere o te Patireia i mua ake ka tae mai ei te openga. (Mata. 24:14) I roto i te au ngai e manganui, e ngata i te kimi i te tangata. Inara, penei ka rauka ia tatou i te tuatua kia ratou me aravei ia ratou i te ngai tangata. Penei ko te mataara ua rai e rauka ai tetai tikaanga no te tangata kia akarongo i te tuatua mou, koia oki me akakitekite tatou kia ratou i te ngai tangata. No reira, penei ka rauka ia tatou i te rave akaope takiri i ta tatou angaanga orometua na te tutu atu anga ki te tangata i te ngai ua atu ka aravei tatou ia ratou.—2 Timo. 4:5.
[Pia i te kapi 5]
Anoanoia Kia Taokotai
Kua ripotiia mai e e aere mai ana te au papuritia no te au putuputuanga i vao mai, i te tutu aere i runga i te mataara, te ngai paka motoka, te au ngai pitiniti, e te ngai tapuanga rerue e te bus tei akatakaia na tetai putuputuanga ke. Kua vaoo te au papuritia no te au putuputuanga tukeke mai i ta ratou makatini ki roto i te ngai tiakianga mei te ngai o te taote te tu e te vai atura, me kore i te ngai pua kakau, e kua aere katoa tetai pae i te tutu atu ki taua au pitiniti rai. Kua riro teia ei akariri i te aronga pitiniti e te tangata. No reira, e mea meitaki kia noo rai ki roto i te ngai tutuanga tei akatakaia no ta kotou putuputuanga me akakitekite aere ki te katoatoa.
Me ka inangaro te au papuritia i te akakitekite aere ki te katoatoa i te ngai tutuanga a te putuputuanga i te pae mai, kia tuatua atu ratou ki te akaaere tavini. Nana i reira e tuatua atu ki te akaaere tavini o tera putuputuanga kia oronga mai i tetai tikaanga i mua ake ka aere ei te au mema o tana putuputuanga. Me kua tukuia tetai putuputuanga reo ke kia tutu aere i roto i taua ngai rai, kia akapapu meitaki te akaaere tavini e kia komunikeiti ratou ki tetai e tetai kia kore e tamanamanata puapinga kore ua i te tangata. Me taokotai meitaki te katoatoa, ka rauka ua i te ‘rave i te au mea ravarai ma te tika e te manea.’—1 Kori. 14:40.
[Tutu i te kapi 6]
[Tutu i te kapi 6]