Au Imene ou no te Akamorianga!
1 I roto ia Okotopa rā 4, 2014, i ko i te uipaanga mataiti a te Watch Tower Bible and Tract Society of Pennsylvania, kua akakiteia mai e ka tauiia tetai au ngai i roto i ta tatou puka imene ou. E nuti mataora tikai teia! Kua akamaaraia ki te katoatoa i te tuanga puapinga o te au imene Patireia i roto i ta tatou akamorianga.—Sala. 96:2.
2 Penei ka manako koe e, ‘Eaa i anoanoia ai kia taui i tetai au ngai i roto i te puka imene?’ Teia tetai au tumu. Te mea mua, te meitaki atura to tatou mārama no runga i te au Tuatua Tapu, e te riro ra te reira ei akatuke i te aerenga tuatua o ta tatou au imene. (Mase. 4:18) Te rua: E maata te au aerenga tuatua i roto i ta tatou puka imene tei raveia mai mei roto i te urianga i mua ake i teia urianga ou o te New World Translation. No reira i anoanoia ai i te akatanotano i te au tuatua i roto i te puka imene kia tau ki te aerenga manako o te urianga ou o te New World Translation. No teia angaanga maata ka raveia, kua kapitiia mai tetai au imene ou ki roto i te puka imene.
3 Ka tiaki roa ainei tatou kia neneiia tetai puka imene ou i mua ake ka imene tatou i te au imene ou? Kare. Te mataora nei matou i te akakite e ka tukuia mai tetai au imene ou ki runga i ta tatou Web site, jw.org i te au marama e tu mai nei. Me tukuia mai tetai imene ou, ka imene tatou i te reira i te openga o te Uipaanga Tavini Anga e ka akakiteia mai e e “imene ou” teia.
4 Peea me Tamou i te au Imene Ou: Kare i te mea māma i te tamou i tetai imene ou. Tera ra, mei te tata taramo rai, kare tatou e inangaro kia “muteki” ua, mari ra kia imene i ko i te au uipaanga putuputuanga. (Sala. 30:12) Kia rauka i te tamou i tetai imene ou, e aru i teia au takainga.
Akarongo putuputu ki te akatangianga imene a te piani i runga i ta tatou Web site. Me akarongo putuputu koe ki te akatangianga, ka māma ia koe i te akamaara i te reira.
Apii i te au tuatua imene, e oti tauta kia mou ngakau ia koe.
Imene kapiti atu ki te akatangianga imene, kia mou ngakau ia koe.
I te tuatau o te Akamorianga a te Ngutuare, e apiipii i te au imene ou kia matau toou ngutuare tangata i te reira.
5 I te au marama ka aereia, me akanooia kia imene i tetai imene ou i te openga o te Uipaanga Tavini Anga, ka na mua te putuputuanga i te akarongo ki te akatangianga piani. E oti ka imene kapiti te katoatoa ki te akatangianga piani, mei ta tatou i matau ua ana.
6 Me akamanako koe i te reira, ka riro te imene anga i ko i ta tatou au uipaanga ei apai mai i te mataora i te akapaapaa anga kapiti ia Iehova. No reira, eiaa e akamatau i te akaruke i toou ngai nooanga me akakiteia mai te imene i ko i ta tatou au uipaanga.
7 E mataara ke atu tetai ka rauka ia tatou i te akaari i te tu akangateitei no ta tatou au imene. I ko i te au akaputuputuanga e te au uruoaanga, e akatangiia mai ana tetai imene i mua ake ka akamata ai te uipaanga. Tetai au taeake e te au tuaine mei te ao katoa nei, e tutaki ana ratou i te aere ki Patterson i New York e rua taime i te mataiti, i te maani mai i te au imene manea no te akamorianga ia Iehova. No reira, me pati mai te vaa tuatua kia noo tatou ki raro kia akarongo ki te imene akatangi, kia akarongo rai tatou. Me akapera tatou, ka riro teia ei tauturu ia tatou kia akonokono i to tatou ngakau no te au akakiteanga ka aru mai.—Ezera 7:10.
8 Ka akaoti tatou i ta tatou uipaanga i teia po na te imene anga i te imene, “Kia Tae Mai te Patireia!” Kua atuia teia imene ei akamaaraanga i te 100 mataiti i akamata ai te Patireia o te Atua i te tutara e kua akatangiia i ko i te uipaanga mataiti.
9 E au imene “meitaki” tikai teia au imene no ko mai ia Iehova. (Mata. 12:35a) No reira kia tauta pakari tatou kia tamou i teia au imene ou, e kia imene mei roto mai i to tatou ngakau, i te akangateitei anga e te akapaapaa anga i to tatou Atua!—Sala. 147:1.