Au Uipaanga Tutu Aere ei Akamaroiroi, Akapapa, Akanoonoo

1. Eaa te akakoroanga o te au uipaanga tutu aere?

¹ I tetai atianga kua uipa mai a Iesu e tana au pipi e 70 i mua ake ka aere ei ka tutu aere. (Luka 10:1-11) Kua akamaroiroi aia ia ratou na te akamaara anga atu e na Iehova “te Atu o te mou,” e arataki ia ratou. Kua oronga aia i te aratakianga ei akapapa ia ratou i te rave i te angaanga e kua ‘tataki rua’ i te akanoo anga ia ratou. Teia tuatau, me uipa tatou i mua ake ka aere ei ka tutu aere, ko te akakoroanga rai ïa​—ei akamaroiroi, akapapa, e te akanoonoo ia tatou.

2. Eaa ra te roa me uipa no angaanga tutu aere?

² Teia taime, e 10 ki te 15 miniti te roa me akanoonoo i te au pupu, te ngai ka tutu e te pure. Inara, ka taui te reira. Akamata i roto ia Aperira, e rima ki te itu miniti te roa o te uipaanga. Inara, me ka raveia i muri tika ake i te uipaanga a te putuputuanga, kia akapoto roa mai i te reira. Ka maata atu i reira te taime no te tutu aere. I tetai au taime ke atu, mei te mea e kua akamata ke ana te au painia e te au papuritia i ta ratou angaanga orometua i mua ake i te uipaanga, ka rauka i reira ia ratou kia oki vave i te tutu aere.

3. Akapeea me akanoo i te uipaanga tutu aere na roto i te mataara te ka mama ua no te au papuritia?

³ Kia akanooia te uipaanga tutu aere na roto i te mataara te ka mama ua no te au papuritia. Roto i te au putuputuanga, e meitaki atu kia uipa takake te au pupu tataki tai i to te kapiti ki te ngai okotai. Mama atu no te au papuritia kia aere ki te ngai ka uipa no te angaanga orometua e ki te ngai tutu. Ka rauka i te akaaere kia akanoonoo viviki i te au papuritia e kia akapapu e te mako ra te katoatoa. Kia akara te aronga pakari e eaa te ngai ka tau kia uipa no te angaanga tutu. I mua ake ka rave ei i tetai pure poto, kua kite ua te katoatoa e ka aere kiea e koai to ratou tokorua.

4. Eaa te uipaanga tutu aere i kore ei i tuke ki te au uipaanga a te putuputuanga?

⁴ Kare i Tuke e te au Uipaanga a te Putuputuanga: Te au uipaanga tutu aere, e tauturu te reira i te aronga ka aere i te angaanga tutu noatu e kare te katoatoa e aere mai. Inara, kare teia uipaanga i tuke ki te au uipaanga a te putuputuanga. Te au uipaanga pouroa e au akanoonooanga anake te reira na Iehova kia rauka te akamaroiroi, te aroa i tetai e tetai e te rave i te au angaanga meitaki. (Ebe. 10:24, 25) No reira kia akapapa meitaki te taeake akaaere, kia riro tana akamaroiroianga ei akangateitei ia Iehova e ei tauturu i te aronga tei tae mai. Te au papuritia e inangaro ra i te aere i te tutu aere, tauta kia tae mai.

5. (a) Eaa te tuanga a te akaaere tavini no te akanoonoo i te au uipaanga tutu aere? (e) Akapeea tetai tuaine me akaaere i te uipaanga tutu aere?

⁵ Ta te Taeake Akaaere ka Akapapa: No tetai kia papa meitaki no tana tuanga no te uipaanga, ka anoanoia aia kia kite i mua ake e eaa tana tuanga apii ka rave. Aiteite ua teia ki te au uipaanga tutu aere. E tika, me uipa takake te au pupu, na te taeake akaaere me kore na tona tauturu e rave i te uipaanga. Me uipa kapiti ra te putuputuanga no te tutu aere, na te akaaere tavini e iki i tetai tangata kia rave i te reira. Na te akaaere tavini e maani i tetai papaanga no te au taeake ka rave i te uipaanga tutu aere e kia tuku aia i tetai kopi ki runga i te ngai no te tuatua akakite. Me tata aia i te papaanga, kia akamaara rai e ka inangaroia te au taeake akaaere kia kite e ka akapeea me tauturu e me akanoonoo i te au taeake. Me kare e tangata pakari, tavini tauturu, me kore e taeake papetitoia ei akanoonoo i te pupu i tetai au rā, kia tuku aia na tetai tuaine papetitoia e rave i tera apainga.​—Akara i te atikara “Me na Tetai Tuaine e Rave.”

6. No teaa i puapinga ai kia akapapa meitaki te taeake akaaere?

⁶ Me oakeia mai ta tatou tuanga no te Apii Orometua Teokaratiki me kore te Uipaanga Tavini Anga, ka akapapa meitaki tatou. Kare tatou e tiaki e kia aere roa ki te uipaanga e akamanako ei e eaa ta tatou ka tuatua. Kia akapera rai te taeake akaaere i te uipaanga tutu aere, kia akapapa meitaki. I na ka poto mai te taime no te uipaanga tutu aere i teianei, e mea puapinga kia akapapa meitaki aia kia mārama te au taeake eaa ta ratou ka rave e kia oti vave te uipaanga. Te o katoa maira te akapapa meitaki anga i te mapu no te au ngai tutuanga i mua ake i te uipaanga.

7. Eaa tetai au apinga ta te taeake akaaere ka uriuri?

⁷ Te ka Uriuri: No te mea e tukeke te turanga i te au ngai pouroa, kare “te tavini akono meitaki” i oronga mai i tetai papaanga no te au uipaanga ravarai. Roto i te pia, “I te Taime o te Uipaanga Tutu Aere, Penei e Akamanako,” te akakite maira te papaanga i tetai au mataara. Tei matauia, e uriurianga te raveia ana i roto i te uipaanga. Tetai taime penei ka kapiti mai i tetai akatutuanga me kore i tetai vitio no roto i te jw.org. Me akapapa no te uipaanga tutu aere, kia akamanako te taeake akaaere eaa te ka akamaroiroi e te ka tauturu i te aronga ka aere ki te angaanga tutu i tera rā.

8. Eaa te mea meitaki roa atu kia uriuri i ko i te au uipaanga tutu aere i te au Maanakai e te au Tapati?

⁸ Ei akaraanga, i te au Maanakai e oronga ana te au papuritia i Te Punanga Tiaki e te Awake! E maata te aere ana i te Maanakai kare e aere ana i te au rā ke mai, penei kare e maara ana ia ratou te tuatua akamataanga tei tamoumou ratou i ko i te Akamorianga a te Ngutuare. No reira, e mea meitaki kia uriuri akaou te taeake akaaere i te akatutuanga i te kapi openga o Ta Tatou Angaanga Patireia. Tetai ravenga ke, kia uriuri akapeea me kapiti mai i tetai nuti, angaanga puapinga me kore orote ki roto i te akamataanga tuatua, e eaa te ka tuatua ki te pu ngutuare i te akapapa no te oki akaou. Me kua taangaanga ke ana tetai pae i te makatini e orongaia ra, e pati te taeake akaaere ia ratou kia akakite mai akapeea ratou te rave anga i te reira. I te au Tapati, penei ka inangaro te taeake akaaere i te rave i tetai mea mei te reira rai no te puka ka orongaia i tera marama. Te poroutia Nuti Meitaki e te puka ta te Pipiria e Apii Maira, ka tau kia orongaia i tetai ua atu rā, no reira kia uriuri te akaaere e ka akapeea me oronga i tetai o teia nga puka.

9. Eaa te ka tau kia uriuriia i te openga epetoma me piri ki roto i tetai akakoroanga takake?

⁹ Me e akakoroanga takake ta te putuputuanga i te openga epetoma, kia akara te akaaere e akapeea me oronga kapiti i te makatini ou e te patianga, kapiti mai te aenga pepa me kore, kia uriuri eaa te ka rave me āriki mai tetai tangata. Tetai, kia akakite mai i te au mea mataora tei tupu i te akaari mai i te puapinga o teia akakoroanga.

10, 11. Eaa i puapinga ai kia akapapa meitaki te au papuritia kia mako te akanooanga i te uipaanga tutu aere?

¹⁰ Ta te au Papuritia ka Akapapa: Kia akapapa meitaki katoa te au papuritia no te uipaanga tutu aere. Na te akapapa anga na mua ake, penei i te taime o ta ratou akamorianga ngutuare, ka rauka ia ratou i te oronga atu i tetai manako tauturu ki te au taeake i reira. Akapapa meitaki i te au makatini, au puka i mua ake ka tae ei ki te uipaanga tutu aere kia akaruke vave no te ngai tutu.

¹¹ E mea puapinga katoa kia tae vave i mua ake ka akamata ai te uipaanga. E tauta ana rai tatou kia tae vave ki te au uipaanga pouroa a te putuputuanga. Tera ra me taroaroa tatou, ka tamanamanataia te katoatoa me tae atu tatou. Mei teaa te tu? E maata ta te taeake akaaere ka akamanako i mua ake ka akanoo ei i te pupu. Me e tokoiti ua tei tae mai, penei ka tuku aia ia ratou ki tetai ngai ka rava ua na ratou. Me kua na raro ua tetai aronga ki te uipaanga e ka mamao te ngai tutuanga penei, ka tuku aia ia ratou kia aru i te aronga motoka. Me e maata te kino i te ngai ka tutu aere, penei ka tuku aia i tetai au taeake kia angaanga kapiti e te au tuaine me kore ki tetai ngai vaitata ua mai. Penei ka tukuia te au papuritia pakipakitai ki te au mataara tikatika ua kare e maata te ngai kakekake anga o te au kainga. E ka tukuia te au papuritia ou kia angaanga kapiti e te aronga tukatau. Inara, me tureiti te au papuritia, ka anoanoia i reira kia taui me kore kia akanoo akaouia te pupu. Tetai taime, penei e tumuanga tau tetai i tureiti ei tatou. Tera ra me e tureiti ua ana tatou, e ui kia tatou rai e me te manako ra tatou e kare e puapinga roa ana te uipaanga tutu aere, me kare rai tatou i akateateamamao ana i mua ake.

12. Me naau rai e maani ana i taau akanoonooanga no te tutu aere, eaa taau ka akamanako?

¹² Ka rauka i te au papuritia i te akanoo e koai ta ratou ka angaanga i mua ake ka akamata ai te uipaanga tutu aere me kore, ka tukuia tetai tokorua no ratou. Me naau rai e maani ana i taau akanoonooanga, ka rauka ainei ia koe ‘kia akamaora atu’ ki tetai papuritia ke i to te angaanga ua ki taua tangata rai? (2 Kori. 6:11-13) Ka rauka ainei ia koe i te angaanga e tetai papuritia ou i tetai taime i te tauturu iaia kia akatupu i te tu karape i te apii? (1 Kori. 10:24; 1 Timo. 4:13, 15) Akarongo meitaki ki te au tuatua ka akakiteia pera katoa ki te aratakianga no runga i te ngai ka aere ka tutu e me oti te uipaanga, eiaa e taui i tei akanoonooia e kia aere tika ki te ngai tutu.

13. Me rave te katoatoa i ta ratou tuanga, akapeea te au uipaanga tutu aere te tauturu anga ia tatou?

¹³ Muri ake i ta ratou tutu anga, ‘kua oki akaou maira te itu ngauru ma te rekareka.’ (Luka 10:17) Na te aratakianga a Iesu i mua ake ka aere ei ki te tutu aere, i tauturu ia ratou i te akatupu i ta ratou tuanga angaanga. Teia tuatau, ka puapingaia rai tatou mei te au uipaanga tutu aere. Me rave te katoatoa i ta ratou tuanga, ka riro te uipaanga tutu aere ei akamaroiroi ia tatou, ei akapapa, e ei akanoonoo ia tatou kia rauka i te akatupu i te akauenga kia akakite i te evangeria ki “te pa enua ravarai.”​—Mata. 24:14.