Puapinga Anga Mei Taau Pupu Tutuanga
1. Eaa te au akameitakianga o te Apii Puka a te Putuputuanga e vai nei rai na roto i ta tatou pupu tutuanga?
1 E mii ana ainei koe i tetai au tuanga o te Apii Puka a te Putuputuanga? Rikiriki ua te au pupu e te tau ua te turanga i roto i te ngutuare. Mama ua i te akaoaoa atu ei akamaroiroi ia tatou i te pae vaerua. (Mase. 18:24) Kua kite ua te akaaere o te pupu apii i to tatou au turanga tukeke e ka rauka ua iaia te akamaroiroi mai ia tatou tataki tai. (Mase. 27:23; 1 Pete. 5:2, 3) Teia au akameitakianga te vai nei rai na roto i ta tatou pupu tutuanga.
2. Akapeea tatou me rave i te takainga mua i te akatupu i te au pirianga oa i roto i ta tatou pupu tutuanga ei akamaroiroi ia tatou i te pae vaerua?
2 Rave i te Takainga Mua: Aiteite ua te maata o te au pupu tutuanga, e te au pupu apii puka. Na te “uapou anga” me kore te angaanga kapitianga ki etai ke, ka tupu te pirianga vaitata. (Phili. 1:27) Eia aronga i angaanga kapiti ana koe i roto i toou pupu? Ka rauka ainei ia koe i te ‘akamaora’ atu? (2 Kori. 6:13) Penei i tetai taime e pati atu i tetai i roto i to tatou pupu kia piri mai ki ta tatou Akamorianga a te Pamiri i te aiai, me kore kia kaikai kapiti e tatou. Roto i tetai au putuputuanga, e ta tuatau ana te au pupu tutuanga i te angai kapiti i te vaa tuatua ka atoro mai. Te epetoma tei akanooia no ratou, ka akaputuputu mai te pupu kia kaikai kapiti, e ka akamaroiroi i tetai e tetai noatu ka tae mai te vaa tuatua e me kare.
3. Eaa tetai au atianga no tatou kia atoro mai te akaaere i ta tatou pupu tutuanga?
3 Noatu e rua rai taime e uipa kapiti ana te putuputuanga, kare mei te mea e ka iti mai te taime ka atoro te tiaki i te au papuritia. Kua ikiia te au akaaere no te pupu tataki tai, kia akamaroiroi e kia tereni i te au taeake no te angaanga orometua. Me kare toou akaaere no te pupu i angaanga kapiti ake kia koe i roto i te angaanga orometua, kore ei e pati iaia kia angaanga korua? Tetai katoa, ka angaanga kapiti te akaaere tavini ki tetai pupu ke, e tai taime i te openga epetoma o te au marama. Roto i te au putuputuanga meangiti e tokoiti ua au pupu tutuanga, penei ka akanoo aia kia atoro i te au pupu e rua taime i te mataiti. E akatano ana ainei koe i taau papaanga, kia aere ki te angaanga orometua me aere mai aia ki toou pupu?
4. (a) E akapeea ana te akanoo anga i te au uipaanga tutuanga? (e) Eaa ra tatou ka akamanako ei te akatuera i to tatou ngutuare no te au uipaanga tutuanga?
4 E puapingaia ana te au pupu me uipa tataki tai no te angaanga tutuanga i te au openga epetoma. Me maata te ngai ka uipa no te tutuanga i te ora tei akanooia, ka mama ake i te au papuritia kia aere ki reira e oti ki te ngai tutu anga. Ka viviki ua i te akaaere kia rauka i te au papuritia i te aere vave ki te ngai tutuanga. Mama katoa i te au akaaere o te pupu kia akono meitaki i tona pupu. Inara kia tau ki te au turanga, penei e meitaki atu i reira kia takirua me kore kia maata atu te pupu ka uipa kapiti. Me uipa kapiti te putuputuanga no te tutuanga i te Maanakai mua o te marama me kore i muri ake i te Apii Punanga Tiaki, maata te taime e mea meitaki no te au pupu tataki tai kia noo kapiti, e kia tuku i tetai nga miniti no te akaaere o te pupu kia akanoonoo i tana pupu i mua ake ka akaoti ei te uipaanga tutuanga na roto i te pure.—Akara i te pia “Ka Rauka Ainei ia Koe te Akatuera i Toou Ngutuare?”
5. Noatu kua akakoreia te akanoonooanga no te Apii Puka a te Putuputuanga, eaa te mea tei papu ia tatou?
5 Noatu kua akakoreia te akanoonooanga no te Apii Puka a te Putuputuanga, te oronga ua maira a Iehova i te au mea ka anoanoia no tatou kia rave i tona anoano. (Ebe. 13:20, 21) Raro ake i ta Iehova paruruanga, kare rava tatou e ngere. (Sala. 23:1) Maata te au akameitakianga ka rauka na roto i ta tatou pupu tutuanga. Me rave tatou i te takainga mua e ka ‘ruru ma te akaperepere kore ra, ka maata ta tatou ka kokoti.’—2 Kori. 9:6.
[Pia i te kapi 8]
Ka Rauka Ainei ia Koe te Akatuera i Toou Ngutuare?
Tetai au putuputuanga e kapiti ana ratou i te au pupu no te tutuanga i te openga epetoma, no te mea kare e rava ana te au ngutuare no te uipaanga. Te au uipaanga no te tutuanga, e tuanga no te akanoonooanga a te putuputuanga, no reira e tikaanga ngateitei kia rave i teia au uipaanga i roto i to tatou au ngutuare. Ka rauka ainei ia koe i te akatuera mai i toou ngutuare? Eiaa e emiemi no te mea e tau ua toou ngutuare. Ka akara te aronga pakari i te ngai tei reira toou kainga e tetai au mea ke atu tei aite rai ki ta ratou au ngai i iki no te apii puka. Me ka inangaro koe i te akatuera i toou ngutuare, e akakite atu ki te akaaere o toou pupu.