Aru i te Akaraanga o te au Peroveta—Habakuka
1. Eaa ra to tatou manako ka aiteite ei ki to te peroveta ko Habakuka?
1 Me aro atu tatou i te au kino e maata ua atura i teia tuatau, penei ka aite to tatou manako ki to Habakuka tei ui kia Iehova e: “Eaa ra oki koe i akakite mai ei iaku nei i te kino, akara uaʼi koe i te mate nei?” (Haba. 1:3; 2 Timo. 3:1, 13) Te akamanako anga i te karere a Habakuka e tona akaraanga tiratiratu, ka tauturu te reira ia tatou kia akakoromaki, ia tatou e tapapa atura i te rā akavaanga o Iehova.—2 Pete. 3:7.
2. Eaa ta tatou ka rave kia vai tiratiratu ua rai i teia tuatau?
2 Kia Vai Tiratiratu e Ora Ai: Kare a Habakuka i akariro ana i tetai turanga kino ei akaparuparu iaia, mari ra kua vai matakite ua aia i roto i te tuatua mou e kua rave maroiroi i te reira. (Haba. 2:1) Akapapu a Iehova kiaia e ka akatupuia Tana i totou i te taime i akanooia, e “ko te tangata tuatua-tika i te akarongo ra ka ora ia.” (Haba. 2:2-4) Eaa te aiteanga o te reira no te au Kerititiano e noo nei i teia tuatau openga? Puapinga atu kia irinaki papu tikai e ka tae mai te openga i to te kite e aea te reira e tae mai ei. Ka akakeu to tatou akarongo ia tatou kia vai matakite e kia tuku na mua i te angaanga orometua i roto i to tatou oraanga.—Ebe. 10:38, 39.
3. Eaa tatou ka tavini ei ia Iehova ma te rekareka?
3 Rekareka ia Iehova: Ka timataia to tatou akarongo me takinokino mai a Goga o Magoga i te iti tangata o Iehova. (Eze. 38:2, 10-12) Ka akatupu te takinokino i te tu taitaia, e ki te aronga katoa te ka autu. Penei kare e maata akaou te kai, ka ngere koe i taau au apinga, e penei ka ngatā te turanga o te oraanga. Eaa ta tatou ka rave me tupu teia au manamanata? Kua kite a Habakuka e ka tupu te tu taitaia, no reira kua iki aia i te tavini ia Iehova ma te rekareka. (Haba. 3:16-19) Ka riro te ‘rekareka ia Iehova’ ei tauturu ia tatou kia akakoromaki i te au timataanga a te tuatau ki mua.—Nehe. 8:10; Ebe. 12:2.
4. Eaa ta tatou ka rave kia rekareka ua atu i teia tuatau e te tuatau ki mua?
4 Te aronga ta Iehova ka akaora mai i tona rā akavaanga, ka apiiia ratou kia kite no runga i te Atua. (Haba. 2:14) Ka apii katoaia te aronga tei akatuakaouia mai no runga ia Iehova. No reira, kia taangaanga tatou i te au atianga ravarai i te tuatua no runga ia Iehova e tana au angaanga umereia!—Sala. 34:1; 71:17.