ORAANGA KERITITIANO
Taokotai i te Tutu Aere i te au Ngai Tuke ke te Reo
E āriki ana te tangata i te tuatua meitaki o te Patireia me akarongo ratou i roto i to ratou uaorai reo. Penei ko te tumu teia i te Penetekote 33 T.N., i akanoo ai a Iehova i te au tangata ngati Iuda “no te pa enua ravarai i raro ake i teianei rangi” kia akarongo ratou i te nuti meitaki i roto i to ratou uaorai “reo,” noatu te tuatua ra ratou i te reo tei matauia, mei te reo Epera me kore te reo Ereni. (Anga. 2:5, 8) Roto i te au ngai e tuke ke te reo, e rave ana te au putuputuanga i tetai uipaanga i roto i te reo tei tau ki te ngai ka tutu aere ratou. Akapeea te au taeake e te au tuaine mei te au putuputuanga me angaanga taokotai i te tutu aere i roto i te reira ngai e kia kore ratou e oki akaou e akariri i te reira au ngutuare?
Uriuri Manako (Mase. 15:22): Ka uriuri manako te au akaaere tavini mei tetai au putuputuanga ke mai e kia akanoo i tetai ravenga meitaki no te tutu aere i te reira ngai. Me kare e rava ana te ngai tutu aere, tetai au putuputuanga e tutu aere ana i tetai reo ke, penei ka inangaro e na ratou e tutu aere ki te au ngutuare i roto i to ratou ngai. Inara, me kare e taeria putuputuia te tangata i te reira ngai no te mamao, ka anoanoia rai koe kia tutu aere i reira inara kia akakite ki te putuputuanga e akono ra i te reira ngai, e te inangaro ra tetai tangata i te tuatua mou. (od 93 ¶37) Me kore ka pati mai ratou i te tauturu mei taau putuputuanga me kiteaia tetai aronga e tuatua ra i toou reo, e tata i to ratou ngai noo anga ki raro. (km 7/12 5, pia) E akamanako katoa, i tetai taime e maata te reo e tuatua ia ana i roto i te ngutuare. Te au akanoonooanga kia kapi te au ngai tutu aere, ka anoanoia kia aruia te ture no te paruru i te pu ngutuare.
Taokotai (Ephe. 4:16): E aru meitaki i te aratakianga mei ko mai i toou akaaere tavini. Te rave ra ainei koe i tetai apii Pipiria ki tetai tangata e tuatua ra i tetai reo ke e kare i te reo i roto i taau putuputuanga? Ka maroiroi te tangata apii Pipiria me oronga atu koe iaia ki tetai putuputuanga i te pae mai me kore i tetai pupu e tuatua ra i tona reo.
Akapapa (Mase. 15:28; 16:1): Me aravei koe i tetai pu ngutuare i tona ngai e te tuatua ra i tetai reo ke, e tauta i te oronga i te nuti meitaki. Kia akapapa koe no te au reo tuke ke i toou ngai e te kopi i te puka Pipiria e te vitio ki runga i taau tereponi apaipai e te tablet. E taangaanga katoa i te JW Language app no te apii atu i tetai au tuatua akaaravei anga i roto i te au reo.