ORAANGA KERITITIANO
Akameitaki Atura a Paulo i te Atua, e Maroiroi Atura
Te rongo anga te putuputuanga i Roma e te aere mai nei a Paulo, kua aere tetai au taeake mei tetai 40 maire (64 kiromita) i te aravei iaia. Eaa tei tupu kia Paulo? “Kite akerā Paulo ia ratou, akameitaki atura i te Atua, e maroiroi atura.” (Anga. 28:15) Noatu e peu matau na Paulo i te akamaroiroi i te au taeake tana ka atoro, i teia atianga ra, koia tei akamaroiroiia.—2 Kori. 13:10.
I teia rā te atoro nei te au akaaere kotinga i te au putuputuanga i te akamaroiroi i te au taeake. Mei te au tavini katoatoa o Iehova, e roiroi ana ratou, e manamanata, e te mirimiri ngata. Me atoro mai te akaaere kotinga e tana vaine i taau putuputuanga, eaa taau ka rauka i te rave ei akamaroiroi ia raua, kia pumaana oki koe e raua katoa?—Roma 1:11, 12.
Aere ki te angaanga tutu evangeria. Ka akamaroiroiia te akaaere kotinga me aere te au taeake i te tutu aere i te tuatau o tana atoroanga. (1 Tesa. 1:2, 3; 2:20) E akamanako i te rave i te angaanga painia tauturu no te reira marama. Ka rauka ainei ia koe i te angaanga kapiti kia raua ko tana vaine, me kore e apai i tetai o raua ki taau apii Pipiria? Ka mataora raua i te angaanga kapiti ki te au taeake, pera katoa te au taeake ou me kore tetai au taeake ka inangaro tauturu kia karape ratou i te tutu aere.
Akaari i te tu aroa taeake. Ka oronga ainei koe i tetai ngai noo anga no raua me kore kia kaikai kapiti kotou? Ka akaari te reira i to tatou inangaro ia raua. Kare e anoanoia kia maata taau ka oronga.—Luka 10:38-42.
Akarongo e te aru i tana akamaroiroi anga. Ka akaari mai te akaaere kotinga i tetai ravenga no te tauturu ia tatou i roto i te angaanga orometua. Tetai taime, ka pakari tana ako ia tatou. (1 Kori. 5:1-5) Ka mataora ra aia me akarongo tatou, e te kauraro i te aratakianga.—Ebe. 13:17.
Akaari i toou rekareka. Akakite ki te akaaere kotinga e tana vaine akapeea raua i riro ei i te akamaroiroi ia koe. Ka rauka ia koe te akakite kia raua me kore tata i tetai reta.—Kolo. 3:15.