Apokalupo—Te Aiteanga Noou i Teia Rā

1-2. Eaa tetai tumu kia akara tatou i te puka o Apokalupo?

KUA patiia ainei koe kia akara i tetai puka tutu na tetai taau i kite? Ia koe e akara ra i te au tutu, kua kite koe e maata te aronga kare koe i matau. Inara, okotai tutu kua kite koe. Eaa te reira? Tei roto koe i tera tutu. Ia koe e akara ra i te reira, ka akamaara koe e inaea e te ngai i neneiia ai te reira. Kua tauta katoa koe i te akara i te katoatoa i roto i te tutu. Okotai rai tutu e mea puapinga kia koe.

² Kua aite te puka o Apokalupo mei te reira tutu rai. No teaa ra? E rua tumu. Mea mua, kua tataia teia puka Pipiria no tatou. I te akamataanga o te irava mua, ka tatau tatou: “Te eeuanga a Iesu Mesia, ta te Atua i tuku mai iaia ra, kia akakite atu aia i tona au tavini i te au mea e vaitata i te tupu ra.” (Apo. 1:1) No reira, kare teia puka i tataia no te katoatoa, mari ra no tatou te iti tangata akatapuia o te Atua. Ei iti tangata no te Atua, kare tatou e poitirere e te ō nei tatou ki roto i te akatupuanga o te au totou i roto i teia puka. Mei tera te tu, ka kite tatou ia tatou uaorai i roto “i te tutu.”

3-4. Kia tau ki te puka o Apokalupo, aea teia au totou e akatupuia ai, e akapeea te reira me akakeu ia tatou?

³ Te rua, te ō maira i te tuatau i akatupuia ai teia au totou. Kua akakite mai te apotetoro ko Ioane aea te reira tuatau i tona tuatua anga: ‘I riro au i te vaerua i te rā o te Atu ra.’ (Apo. 1:10) I te tataanga a Ioane i teia tuatua i te 96 T.N., tei mua roa “te rā o te Atu.” (Mata. 25:14, 19; Luka 19:12) Inara kia tau ki te totou Pipira, kua akamata te reira rā i te 1914 i te akaterono angaia a Iesu ei Ariki i te rangi. Mei te reira tuatau e aere ua atu, kua akamata te au totou o Apokalupo i te akatupuia, kapiti mai i te iti tangata o te Atua. Ae, te noo nei tatou i “te rā o te Atu”!

⁴ No te mea te ora nei tatou i teia tuatau mataora, ka anoanoia tatou kia akarongo meitaki ki te akoanga pumaana tei tataia ia Apokalupo 1:3: “E ao tona to tei tatau, e to te aronga e akarongo i teianei tuatua totou, e tei akono i tei tataia ki roto ra: kua vaitata oki te tuatau.” Ka anoanoia tatou kia tatau maata e kia akarongo ki teia au tuatua totou e te akono i te reira. Eaa te reira?

AKAPAPU E KUA TAU TAAU AKAMORIANGA

5. Akapeea te puka o Apokalupo i te akaari anga mai i te puapinga kia akapapu e te mareka ra a Iehova i ta tatou akamorianga?

⁵ Mei te pene mua o Apokalupo, ka apii tatou e kua kite a Iesu i te au angaanga e raveia ra i roto i te putuputuanga. (Apo. 1:12-16, 20; 2:1) Te akaari maira ta Iesu karere ki te putuputuanga e itu i Asia Minora e kua kite aia eaa te tupu ra. Kua oronga mai aia i te akoanga tau ei tauturu i te au Kerititiano i te anere mataiti mua kia akapapu e te mareka ra a Iehova i ta ratou akamorianga. Kua tau katoa tana karere ki te iti tangata o te Atua i teia tuatau. Eaa te apiianga no tatou? Kua kite to tatou arataki ko Iesu Karaiti i to tatou turanga i te pae vaerua. Te arataki ra a Iesu, te paruru ra e te kite maira aia e eaa te tupu nei. Kua kite aia i tei anoanoia kia akamareka ia Iehova. Eaa tana akakiteanga kia akono tatou i teia rā?

6. (a) Ia Apokalupo 2:3, 4, eaa te manamanata ta Iesu i akakite ki te putuputuanga o Ephesia? (e) Eaa te apiianga no tatou?

⁶ E tatau ia Apokalupo 2:3, 4. Auraka e vaoo ke i to tatou inangaro mua ia Iehova. Kua akaari mai ta Iesu karere ki te putuputuanga o Ephesia i to ratou tu akakoromaki, e kua tavini ratou ia Iehova noatu te au manamanata tukeke. Inara, kua vaoo ke ratou i to ratou inangaro mua. Kua umuumuia ratou kia akaoraora i to ratou inangaro mua kia ārikiia ta ratou akamorianga. Pera katoa i teia tuatau, kare e rava ua e kia akakoromaki tatou. Ka anoanoia tatou kia akakoromaki marie ma te au tumu tau. Inangaro to tatou Atua i te kite e eaa ta tatou e rave ra e no teaa ra tatou i rave ei i te reira. Ka inangaro aia i ta tatou akamorianga kia akatumuia ki runga i te aroa akaperepere e te ngakau tae.—Mase. 16:2; Mare. 12:29, 30.

7. (a) Ia Apokalupo 3:1-3, eaa te manamanata ta Iesu i kite mai i roto i te putuputuanga i Saradi? (e) Eaa ta tatou ka rave?

⁷ E tatau ia Apokalupo 3:1-3. Kia vai araara ua tatou e kia matakite. E tuke te manamanata o te au taeake i te putuputuanga o Saradi. Noatu kua maroiroi ratou i te pae vaerua i mua ana, kua akamata ratou i te akaparuparu i ta ratou tavinianga i te Atua. No reira, kua akakite a Iesu kia ratou “kia matakite.” Eaa te akamatakite anga no tatou? Kare a Iehova e akangaropina i ta tatou angaanga i rave ana. (Ebe. 6:10) Inara, kare e rava ua kia irinaki tatou i ta tatou i rave ana i roto i ta Iehova angaanga. Noatu e e maata to tatou kotinga i teianei, ka anoanoia tatou kia rave maroiroi i “te angaanga a te Atu,” kia vai araara e kia matakite e tae ua atu ki te openga.—1 Kori. 15:58; Mata. 24:13; Mare. 13:33.

8. Eaa ta tatou i kite mei te au tuatua ki te au taeake i Laodikea ia Apokalupo 3:15-17?

⁸ E tatau ia Apokalupo 3:15-17. Kia maroiroi e kia ngakau katoa i ta tatou akamorianga. I roto i ta Iesu karere ki to Laodikea, kua akakite mai aia i to ratou manamanata. E ‘pumaana ua, kare i anu, kare oki i maana’ ta ratou akamorianga. No to ratou inangaro kore, karanga a Iesu “e mate maata [to ratou], e mei te mea e aroaia ra, e te puapinga kore” to ratou turanga. Ka anoanoia ratou kia akamatutu i to ratou inangaro ia Iehova e tana akamorianga. (Apo. 3:19) Eaa te apiianga no tatou? Me kua paruparu tatou, ka anoanoia tatou kia akamatutu i to tatou inangaro i te au mea pae vaerua. (Apo. 3:18) Kare rava tatou e tuku i te anoano o te oraanga kopapa kia tavarenga ia tatou e kia akaruke i te au mea pae vaerua.

9. Mei ta Iesu i akakite ki te au Kerititiano i Peregamo e Tuatira, eaa te kino ka kopae tatou?

⁹ E patoi tatou i te au apiianga tarevake. Kua ako a Iesu i to Peregamo no te au apiianga tarevake. (Apo. 2:14-16) Kua akameitaki aia i to Tuatira no te kopaeanga i te “tuatua oonu a Satani,” e kua akamaroiroi aia ia ratou kia “mou piri tikai” i te tuatua mou. (Apo. 2:24-26) Kua anoanoia te au Kerititiano paruparu tei akarongo e tei akavareia e te au apiianga pikikaa kia tataraara. Akapeea tatou i teia rā? Kia kopae tatou i te au apiianga tei patoi i to Iehova aerenga manako. Te aronga tei apii i teia au mea e “tutu akono i te atua” to ratou, inara “kua akakore ratou i te reira.” (2 Timo. 3:5) Ka māmā ia tatou i te kite e te patoi atu i te au apiianga pikikaa me apii putuputu tatou i te Tuatua a te Atua.—2 Timo. 3:14-17; Iuda 3, 4.

10. Eaa atu tetai apiianga ka kite mai tatou mei ta Iesu tuatua ki to Peregamo e Tuatira?

¹⁰ Auraka tatou e piri, e āriki, e akatika ua i te au peu akaturi. Te vai katoa ra tetai kino i Peregamo e Tuatira. Kua akaapa a Iesu i tetai pae i roto i te putuputuanga no te kore i patoi i te au peu akaturi. (Apo. 2:14, 20) Eaa te apiianga no tatou? Kare a Iehova e āriki i tetai ua atu angaanga tau kore ka rave tatou noatu kua tavini tatou iaia no tetai au mataiti e te rave nei i tetai atu au angaanga memeitaki. (1 Samu. 15:22; 1 Pete. 2:16) Te tapapa maira aia ia tatou kia akono i tana au kaveinga meitaki i roto i te Pipiria, noatu te kino o teianei ao.—Ephe. 6:11-13.

11. Eaa ta tatou i kite mai? (Akara i te pia “Apiianga no Tatou i Teia Rā.”)

¹¹ Eaa ta tatou i kite mai i teianei? Kua kite mai tatou i te puapinga kia akapapu tatou e te mareka ra a Iehova i ta tatou akamorianga. Me te rave ra tatou i tetai apinga te ka akaviivii i ta tatou akamorianga, ka anoanoia tatou kia taui viviki. (Apo. 2:5, 16; 3:3, 16) Inara, te akakite maira a Iesu i tetai manako ke i roto i tana karere ki te putuputuanga. Eaa te reira?

AKAKOROMAKI I TE TAKINOKINOANGA

12. Eaa ta Iesu i tuatua ki te au taeake i Semurina e Philadelaphia? (Apokalupo 2:10)

¹² Ka akamanako ana tatou i teianei, i ta Iesu karere ki to Semurina e Philadelaphia. Kua akakite aia ki te au Kerititiano i reira e auraka e mataku i te takinokinoanga, no te mea ka tutakiia to ratou tu tiratiratu. (E tatau ia Apokalupo 2:10; 3:10) Eaa te apiianga no tatou i teia rā? E tapapa atu e ka takinokinoia tatou e kia puareinga ua i te akakoromaki. (Mata. 24:9, 13; 2 Kori. 12:10) Eaa i puapinga ai teia akamaaraanga?

13-14. Eaa tei tupu ki te iti tangata o te Atua no te au mea tei akatakaia ia Apokalupo pene 12?

¹³ Te akakite maira te puka o Apokulapo no te iti tangata o te Atua e ka takinokinoia ratou i teia rā—“te rā o te Atu.” Te akakite maira a Apokalupo pene 12 e kua tupu tetai tamaki i te rangi i te akamanaia anga te Patireia o te Atua. Kua tamaki atu a Mikaela—a Iesu Karaiti tei akakakaia—ma tana au angera, ia Satani e tana demoni. (Apo. 12:7, 8) Tei tupu, kua upokotu e kua uriia te au enemi o te Atua ki runga i te enua nei, i te akatupu anga i te kino ki runga i te enua e te tangata katoa. (Apo. 12:9, 12) Inara eaa ta teia i akatupu ki te iti tangata o te Atua?

¹⁴ Akaari maira te puka o Apokalupo, e eaa ta Satani i rave. Kua araiia aia i te rangi no reira kua aere atu aia i te tamaki i te toenga o te aronga akatainuia, ko ratou te mata o te Patireia o te Atua i te enua nei “i te mou marie i te tuatua akakite a Iesu Mesia.” (Apo. 12:17; 2 Kori. 5:20; Ephe. 6:19, 20) Akapeea teia totou i te akatupuia anga?

15. Koai mā te “nga kite tokorua” i roto ia Apokalupo pene 11, e eaa tei tupu kia ratou?

¹⁵ Kua akakeu a Satani i tona enemi kia tamaki i te au taeake akatainuia tei rave i te aratakianga no te angaanga tutu aere i te Patireia. Ko ratou te aronga maata tei akatutuia e te “nga kite tokorua” tei tamateia.b (Apo. 11:3, 7-11) I te 1918, e varu au taeake tei rave i te aratakianga kua akaapaia ma te pikikaa, e kua akautungaia ratou tataki tai no tetai tuatau roa ki roto i te are auri. I te akaraanga, kua “mate takiri” te angaanga a teia au taeake akatainuia.

16. Eaa tei tupu kare i manakoia ana i te 1919, inara eaa ta Satani i rave mei te reira taime?

¹⁶ Akakite katoa te totou ia Apokalupo pene 11 no te “nga kite tokorua” e ka akaoraia i muri ake i tetai tuatau poto. I te akatupuanga i te reira, kua tupu tetai mea umere i te mataiti ia ratou i roto i te are auri. I te 1919 kua tukunaia te au taeake akatainuia ki vao e kua takoreia ta ratou utunga. Kua akamata te au taeake i te rave maroiroi i te angaanga Patireia. Inara, kare te reira i tāpu ia Satani no te takinokino i te iti tangata o te Atua. Mei te reira taime mai, kua akatupu a Satani i te takinokinoanga mei te “vai puke” rai ki runga i te iti tangata o te Atua. (Apo. 12:15) Ae, ka anoanoia tatou tataki tai kia “akakoromaki.”—Apo. 13:10.

RAVE MAROIROI I TA IEHOVA ANGAANGA

17. Eaa tetai au tauturu tei orongaia ki te iti tangata o te Atua noatu e kua riro ratou ei takete na Satani?

¹⁷ Te akakite maira a Apokalupo pene 12 e ka tauturuia te iti tangata o te Atua. Mei tera te tu e kua amama akera “te enua” i tona vaa e kua inu kia pou te “vai puke ra,” koia oki te takinokinoanga. (Apo. 12:16) Ko teia akera tei tupu. I tetai taime, kua riro tetai au akaaereanga o Satani, mei tetai tuanga o te ture, i te tauturu i te iti tangata o te Atua. E maata te taime, kua autu te au tavini o Iehova i ta ratou akavaanga tei akarangatira ia ratou. Eaa ta ratou i rave? Kua akapou meitaki ratou i te tuatau no te rave i ta Iehova angaanga. (1 Kori. 16:9) Eaa te ō maira ki roto i teia angaanga?

18. Eaa ta tatou angaanga maata e rave nei i te rā openga?

¹⁸ Kua totou a Iesu no tona iti tangata ka tutu aere ratou i “te evangelia o te basileia [o te Atua]” i te ao katoa i mua ake ka tae mai ei te openga. (Mata. 24:14) Ia ratou e rave ra i teia, ka puapingaia ratou mei te tauturu a tetai angera me kore te au angera “ma te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata.”—Apo. 14:6.

19. Eaa atu tetai karere ka tutu aere te aronga inangaro ia Iehova?

¹⁹ Ko te evangeria o te Patireia tetai karere e tutu aere ra te iti tangata o Iehova. Te tauturu katoa ra ratou i te angaanga a te au angera tei akatakaia ia Apokalupo pene 8 ki te 10. Kua akakite teia au angera i te au manamanata te ka tupu ki te aronga tei patoi i te Patireia o te Atua. No reira, te akakite ra te Au Kite o Iehova i te karere akavaanga tei aite mei te ‘ua toka e te ai’ te tu o te akavaanga a te Atua ki runga i te au akaaereanga tukeke o to Satani ao. (Apo. 8:7, 13) Ka anoanoia te tangata kia kite e te vaitata maira te openga e kia taui i to ratou oraanga kia ora i te rā riri o Iehova. (Zepha. 2:2, 3) Kare ra teia karere e ārikiia ana. Ka anoanoia te tu ngakau toa no te tutu aere i te reira. I te tuatau o te mate maata, ka akakiteia te karere akavaanga te ka akariri i te tangata.—Apo. 16:21.

AKONO I TEIANEI AU TUATUA TOTOU

20. Eaa ta tatou ka uriuri i te nga atikara ka aru mai?

²⁰ Ka anoanoia tatou kia akono “i teianei tuatua totou” no te mea te ō nei tatou ki roto i te akatupuanga i ta tatou e tatau ra i roto i te puka o Apokalupo. (Apo. 1:3) Akapeea ra tatou me akakoromaki ma te tiratiratu i te takinokinoanga e te rave ua atu ma te mataku kore i te tutu aere i teia karere? Ka akamaroiroiia tatou e teia nga manako e rua: te mea mua, ta te puka o Apokalupo e akakite maira no te au enemi o te Atua, te rua, no te au akameitakianga a te tuatau ki mua ka rauka i te aronga tei vai tiratiratu. Ka uriuri tatou i teia tumu manako i te nga atikara te ka aru mai.