Apokalupo—Te Aiteanga Noou i te Tuatau ki Mua

1. Eaa te ikianga puapinga ta te tangata ka anoanoia kia rave?

E IKIANGA puapinga ta te tangata ka rave i teia rā. Ka turu ainei ratou i te Atua ko Iehova ei Tutara i te ao rangi e pini ua ake, me ka turu ainei ratou i tona enemi ko Satani te Tiaporo? Kare e noo ua ma te kore e ikianga. Ka riro te reira ei ora mutu kore me kore ei mate. (Mata. 25:31-33, 46) I te tuatau o “te mate maata,” ka kitea me ka ora ratou e me kare.—Apo. 7:14; 14:9-11; Eze. 9:4, 6.

2. (a) Eaa ta Ebera 10:35-39 e akamaroiroi maira ia tatou kia rave? (e) Akapeea te puka o Apokalupo me tauturu ia tatou?

² E tatau ia Ebera 10:35-39. Me kua iki koe i te turu i ta Iehova tutara anga, e ikianga meitaki taau i rave. I teianei te aruaru ra koe i te tauturu i te tangata kia rave katoa i teia ikianga. Ka rauka ia koe i te taangaanga i teia akakiteanga o te puka o Apokalupo ei tauturu ia ratou. Te akaari maira teia puka umere e eaa te ka tupu ki te aronga tei patoi ia Iehova, e te au akameitakianga no te aronga tei turu tiratiratu i tana tutara anga. E apii meitaki tatou i teia au tuatua mou puapinga. Ka akamaroiroi teia ia tatou kia tavini ua atu ia Iehova. E kia taangaanga i ta tatou i apii ei tauturu i tetai ke kia rave i te ikianga meitaki.

3. Eaa ta tatou ka uriuri i teia atikara?

³ I teia atikara, ka uriuri tatou i teia nga uianga: Eaa te ka tupu ki te aronga tei turu i te tutara anga a te Atua? Eaa te ka tupu ki te aronga tei turu i te puaka taae kutekute, tei akatutuia i roto i te puka o Apokalupo?

TE KA TUPU KI TE ARONGA TIRATIRATU

4. Eaa te pupu mua ta te apotetoro ko Ioane i kite?

⁴ I roto i te orama, kua kite te apotetoro ko Ioane e rua pupu tei turu i te tutara anga a Iehova e kua rauka te akameitakianga no te ora mutu kore. Te pupu mua, ko te 144,000. (Apo. 7:4) No te enua mai ratou e ka riro ei tuanga no te kavamani, me kore Patireia, te ka tutara ma Iesu i te rangi. Ka tutara ratou ki rungao i te enua. (Apo. 5:9, 10; 14:3, 4) I roto i te orama, kua kite a Ioane ia ratou e tu ra i te pae ia Iesu i te Maunga Ziona i te rangi.—Apo. 14:1.

5. Kare e roa atu ana, eaa te ka tupu ki te toenga o te 144,000?

⁵ I te au anere mataiti i aereia mai, e tauatini ua atu tei ikiia ei tuanga no te 144,000. (Luka 12:32; Roma 8:17) Inara, kua akakiteia kia Ioane, e toenga ua me kore e iti ua ratou e ora ra i te enua i te au rā openga. Ka “akairoia” teia “toenga” e Iehova i mua ake ka akamata ai te mate maata. (Apo. 7:2, 3; 12:17) I te tuatau o te mate maata, ka akaputuia ratou ki te katoaanga o te 144,000 i te rangi, tei mate takere ma te tiratiratu. Ka tutara ratou ma Iesu i te Patireia o te Atua.—Mata. 24:31; Apo. 5:9, 10.

6-7. (a) Eaa te pupu rua ta Ioane i kite, e eaa ta tatou i apii mai? (e) Eaa te tumu ka inangaro te nga pupu tavini o te Atua i te kite maata atu ia Apokalupo pene 7?

⁶ I muri ake i te kite anga i te pupu no te rangi, kua kite atu a Ioane i te “aronga maata rava.” Kare teia pupu i aite ki te 144,000, no te mea e aronga kare takiri e pou i te tatauia. (Apo. 7:9, 10) Eaa te apiianga no tatou? Akakite a Ioane: “Ko te aronga teia i aere mai mei roto i te mate maata, e kua orei i to ratou kakau, e kua akateatea i te toto o te Punua-mamoe.” (Apo. 7:14) Me ora mai ratou i te mate maata, ka noo teia “aronga maata rava” i te enua e ka mataora ratou i te au akameitakianga.—Sala. 37:9-11, 27-29; Mase. 2:21, 22; Apo. 7:16, 17.

⁷ Me kua ikiia tatou no te rangi me kore no te enua, te kite ra ainei tatou ia tatou uaorai i roto i teia akatutuanga o Apokalupo pene 7? E tano ei. Mei teaa atura te rekareka o teia nga pupu tavini o te Atua! Rekareka rava tatou kua iki tatou i te turu i te tutara anga a Iehova. Eaa atu ta te puka o Apokalupo e akakite maira no runga i te mate maata?—Mata. 24:21.

TE KA TUPU KI TE ARONGA TEI PATOI I TE ATUA

8. Akapeea te mate maata me akamata, e eaa te tu o te manganui?

⁸ Mei tei taikuia i te atikara i mua ake, kare e roa atu ka anga te au mana poritiki ki runga ia Babulonia Maata, te au akonoanga pikikaa o teianei ao. (Apo. 17:16, 17) Ka akamata teia i te mate maata. Ka akakeu ainei teia i te aronga e manganui kia akamori ia Iehova? Kare. Mari ra, te akakite maira a Apokalupo pene 6 e i taua tuatau ra, ka kimi pouroa taua au tangata kare i tavini ana ia Iehova i te paruru anga a te au mana poritiki e te akatereanga kimi puapinga o teianei ao, tei akaaiteia ki te au maunga. No te mea kare taua au tangata e turu i te Patireia o te Atua, kua manako a Iehova e kua patoi ratou iaia.—Luka 11:23; Apo. 6:15-17.

9. Akapeea te iti tangata o Iehova i te akara anga tuke ei i te tuatau o te mate maata, e eaa te ka tupu?

⁹ Ae, i te tuatau ngata o te mate maata, ka akara anga tuke te au tavini tiratiratu o Iehova. Ko ratou anake ua te pupu tangata te tavini ra i te Atua ko Iehova e kua patoi i “te puaka taae.” (Apo. 13:14-17) Ka akariri ta ratou ikianga ngaueue kore i te aronga tei patoi ia Iehova. Te ka tupu, ka tamaki te au pupu enua i te iti tangata o te Atua i te ao katoa. Kua akatutuia teia tamaki anga makitakita e ko te tamaki a Goga o Magoga.—Eze. 38:14-16.

10. Tei akakiteia ia Apokalupo 19:19-21, eaa ta Iehova ka rave me tamakiia tona iti tangata?

¹⁰ Eaa ta Iehova ka rave me tupu teia tamaki kikino? Akakite maira aia kia tatou: “E kake katoa mai ïa toku riri otooto ki toku nei mata.” (Eze. 38:18, 21-23) Akakite mai a Apokalupo pene 19 i te ka tupu. Ka tono mai a Iehova i Tana Tamaiti no te paruru i Tona iti tangata e te takore i to ratou enemi. Ka aru mai “te au nuku o te rangi” ia Iesu—te au angera tiratiratu e te 144,000. (Apo. 17:14; 19:11-15) Eaa te ka tupu? Ka takore takiriia te au akaaereanga a te tangata tei patoi ia Iehova!—E tatau ia Apokalupo 19:19-21.

MURI AKE I TE TAMAKI, E AKAIPOIPO TETAI

11. Eaa te tupuanga manea ka raveia i te openga o te puka o Apokalupo?

¹¹ Akamanako ana i te tu o te aronga tiratiratu tei ora mai me takore takiriia te au enemi o te Atua! Mei teaa atura to ratou mataora! Noatu ka maeva maata to te rangi me takoreia a Babulonia Maata, e apinga ke atu tetai te ka akatupu i te mataora maata atu. (Apo. 19:1-3) Ko te tupuanga puapinga roa atu o te puka o Apokalupo—“te akaipipo anga a te Punua-mamoe.”—Apo. 19:6-9.

12. Mei tei akakiteia ia Apokalupo 21:1, 2, aea te akaipoipo o te Punua Mamoe?

¹² Aea te akaipoipo e tupu ei? Tei te rangi te katoaanga o te 144,000 i mua ua ake i te tamaki o Aramagido. Kare ko te taime te reira no te akaipoipo o te Punua Mamoe. (E tatau ia Apokalupo 21:1, 2.) Ka tupu te akaipoipo o te Punua Mamoe i muri ake i te tamaki o Aramagido, me takoreia te au enemi katoatoa o te Atua.—Sala. 45:3, 4, 13-17.

13. Eaa tikai te aiteanga o te akaipoipo o te Punua Mamoe?

¹³ Eaa tikai te aiteanga o te akaipoipo o te Punua Mamoe? Mei te akaipoipo o te tane e te vaine, ka taokotai teia akaipoipo anga i te Ariki ko Iesu Karaiti ki tana ‘vaine akaipoipo,’ te 144,000. Ka akatinamou te reira i te kavamani ou te ka tutara ki rungao i te enua no te 1,000 mataiti.—Apo. 20:6.

TE OIRE KAKĀ E TOOU TUATAU KI MUA

14-15. Kua akaaite a Apokalupo pene 21 i te 144,000 ki teaa? (Akara i te tutu i te kapi mua.)

¹⁴ Aru mai, kua akaaite a Apokalupo pene 21 i te 144,000 ki tetai oire manea tikai tei kapikiia ko “Ierusalema Ou.” (Apo. 21:2, 9) Kua akanooia teia oire ki runga i te 12 toka tei tataia “te ingoa o te au aposetolo a te Punua-mamoe tino ngauru ma rua ki rungao.” Eaa a Ioane i umere ei i te reira? No te mea kua tataia tona ingoa ki runga i tetai o te au toka. Mei teaa atura te akameitakianga manea!—Apo. 21:10-14; Ephe. 2:20.

¹⁵ Teia oire, kare i aite ki tetai ua atu. E mataara auro tona, e 12 ngutupa poe, kua akamaneaia tona au patu e te au tango ki te au toka memeitaki—e e tau ua tona vaito. (Apo. 21:15-21) Inara, e mea ke atu tetai te ngere ra! Akara i ta Ioane i akakite mai kia tatou: “E kare rava e nao i kitea e au i roto; ko te Atu ra oki ko te Atua mana katoatoa ra, e ko te Punua-mamoe, ko tona ïa nao. E kare oki e tau i te reira oire te rā, e te marama, ei akamārama i roto; na te kakā no ko i te Atua ra i akamārama i te reira, ko te Punua-mamoe oki to reira mārama.” (Apo. 21:22, 23) Te aronga o te Ierusalema Ou, tei mua ratou i te aroaro o Iehova. (Ebe. 7:27; Apo. 22:3, 4) No reira, ko Iehova e Iesu te nao i roto i te reira oire.

16. Eaa ta te tangata ka kite i te tuatau o te Tutaraanga Tauatini Mataiti o te Patireia o te Atua?

¹⁶ Ka rekareka te aronga akatainuia i te akamanako i teia oire. E tumu katoa ta te aronga e manakonakoanga to ratou no te enua kia rekareka i te reira. I te tuatau o te Tutaraanga Tauatini Mataiti o te Patireia o te Atua, ka apai mai a Ierusalema Ou i te au akameitakianga maata. Kua kite a Ioane i teia au akameitakianga i te taʼe anga mei te “vai ora, e vai taʼe oki.” I nga tua o te kauvai, ko “te rakau ora” ma te au rau “rapakau ïa i to te pa enua.” (Apo. 22:1, 2) Ka puapingaia te au tangata katoatoa e ora ra mei teia au akameitakianga. Aere ua rai, ka rauka i te au tangata akarongo i te tu apa kore. Kare e maki, kare e mamae, e kare katoa e roimata.—Apo. 21:3-5.

17. Mei ta Apokalupo 20:11-13 e akaari maira, koai ma ka puapingaia mei te Tutaraanga Tauatini Mataiti?

¹⁷ Koai te ka puapingaia mei teia au akameitakianga manea? Te mea mua, ko te aronga maata rava tei ora mai ia Aramagido, e tetai ua atu tamariki tei anauia i roto i te ao ou. Kua taputou katoa mai a Apokalupo pene 20 e ka akatuia mai te aronga tei mate. (E tatau ia Apokalupo 20:11-13.) Pouroa te aronga tiratiratu “te aronga tuatua-tika” tei mate, e “te aronga tuatua-tika kore”—kare i rauka ana i te apii no runga ia Iehova—ka akaoraia mai ratou i te enua nei. (Anga. 24:15; Ioa. 5:28, 29) Ko te aiteanga ainei e ka akatuia mai te katoatoa kia ora i te enua nei i te tuatau o te Tutaraanga Tauatini Mataiti? Kare. Te aronga tei patoi kino i te tavini ia Iehova i mua ake ka mate ei, kare ratou e akatuia mai. Kua rauka ana ia ratou te tuatau e kua akaari mai ratou e kare ratou e inangaro kia ora e kia noo i te enua Parataito.—Mata. 25:46; 2 Tesa. 1:9; Apo. 17:8; 20:15.

TE TIMATAANGA OPENGA

18. Eaa te turanga o te enua me tae ki te openga o te 1,000 mataiti?

¹⁸ Me tae ki te openga o te 1,000 mataiti, pouroa te aronga e noo ra i te enua kua rauka ia ratou te oraanga apa kore. Kare e tu ara e iri mai ki runga i te tangata mei ia Adamu. (Roma 5:12) Kua takoreia ta Adamu ara. Ka “ora akaou” te aronga i te enua nei ei au tangata apa kore i te openga o te 1,000 mataiti.—Apo. 20:5.

19. Eaa i anoanoia ai tetai timataanga openga?

¹⁹ Kua kite tatou e kua patoi a Iesu i ta Satani timata anga kia tiratiratu kore aia. Kua vai tiratiratu a Iesu i raro ake i te timataanga. Inara ka puareinga ua ainei te au tangata apa kore kia vai tiratiratu me orongaia tetai tuatau no Satani kia timata ia ratou? Na te tangata tataki tai e pau i teia uianga me tukuia mai a Satani mei te vaarua takere kore i te openga o te 1,000 mataiti. (Apo. 20:7) Te aronga te ka vai tiratiratu i teia timataanga openga, ka rauka ia ratou te ora mutu kore e ka rekareka i te tu rangatira mou tikai. (Roma 8:21) Te aronga tei patoi, ka takoreia ratou e tuatau ua atu, e pera katoa te Tiaporo e tana au temoni.—Apo. 20:8-10.

20. Eaa toou manako i te au totou manea i roto i te puka o Apokalupo?

²⁰ Eaa toou manako i teia uriurianga poto no te puka o Apokalupo? Kare ainei i te mea mataora te kite ia koe uaorai i roto i teia au totou manea? Kare ainei teia e akakeu ia koe kia pati i tetai kia piri mai ki te akamorianga mou i to tatou Atua? (Apo. 22:17) No te mea kua pakia to tatou ngakau e te manako no teia au tupuanga, papu e ka akakeuia tatou kia tuatua mei te apotetoro ko Ioane: “Amene. Koia ïa, ka aere mai, e te Atu, e Iesu e.”—Apo. 22:20.