Apokalupo—Te Aiteanga no te au Enemi o te Atua

1. Eaa ta te puka o Apokalupo e akakite ra no te iti tangata o te Atua?

TE AKAARI ra te puka o Apokalupo e kua akanooia te Patireia o te Atua i te rangi e kua tiriaia mai a Satani ki vao. (Apo. 12:1-9) Kua ‘au to te au rangi inara kua tupu te manamanata kia tatou. Eaa ra? No te mea kua akamou a Satani i tona riri ki runga i te aronga te tavini tiratiratu ra ia Iehova i te enua nei.—Apo. 12:12, 15, 17.

2. Eaa te ka tauturu ia tatou kia vai tiratiratu?

² Akapeea tatou me vai tiratiratu me tamaki mai a Satani ia tatou? (Apo. 13:10) Me kite tatou eaa te ka tupu a te tuatau ki mua, ka riro te reira ei tauturu ia tatou. I roto ia Apokalupo, te akakite ra te apotetoro ko Ioane i te au akameitakianga ka rekareka tatou. Ko tetai akameitakianga, ka takoreia te au enemi o te Atua. Ka akara tatou akapeea a Apokalupo te akatutu anga i teia au enemi e eaa te ka tupu kia ratou.

AKATUTUIA TE AU ENEMI O TE ATUA NA ROTO I “TE AU AKAIRO”

3. Eaa tetai au akairo tei akakiteia i roto ia Apokalupo?

³ I te irava mua, te akakite ra a Apokalupo e ka orongaia mai te au mea ta tatou ka tatau na roto i “te au akairo” koia oki te tuatua akatutuanga. (Apo. 1:1, NW) Kua akatutuia mai te au enemi o te Atua ei au puaka taae. Ei akaraanga, e “puaka taae [tetai] te kake anga ki runga mei raro i te moana.” E “itu ona mimiti, raungauru oki tara.” (Apo. 13:1) Aru mai i te reira ko “tetai puaka taae i te aere anga mai mei raro mai i te enua nei.” Tona reo mei to te taae rai e ka akatopa mai aia i “te ai no runga i te rangi ki raro i te enua nei.” (Apo. 13:11-13) E oti, ka kite atu tatou i “tetai puaka taae kutekute,” e te vaine akaturi i runga. Te akatutu ra teia puaka taae e toru i te au enemi o te Atua ko Iehova e tona Patireia. No reira, e mea puapinga kia akataka tatou koai ratou.—Apo. 17:1, 3.

4-5. Akapeea Daniela 7:15-17 me tauturu ia tatou kia mārama i te aiteanga o teia au akairo?

⁴ I mua ake ka apii ei tatou koai teia au enemi, ka anoanoia tatou kia mārama eaa teia au tuatua akatutuanga. Te mea puapinga, ka tuku tatou na te Pipiria e akamārama mai i te reira. E maata te au akatutuanga i roto ia Apokalupo tei akamārama takereia i roto i tetai au puka ke o te Pipiria. Ei akaraanga, kua moemoea te peroveta ko Daniela e kua kite atu i te “nga puaka nunui e a mei raro mai i te tai ra.” (Dani. 7:1-3) Kua tata aia i to ratou aiteanga. Te akatutu ra teia au puaka nunui, i te “puke ariki” e a, me kore au kavamani. (E tatau ia Daniela 7:15-17.) Na teia akatakaanga e tauturu ia tatou kia mārama e ko te au puaka taae i roto ia Apokalupo, te akatutu katoa ra i te au mana poritiki.

⁵ Ka akara matatio tatou i teianei tetai au akairo tei akatutuia i roto ia Apokalupo. Ka akara tatou akapeea te Pipiria te tauturu anga ia tatou kia mārama i te aiteanga o teia au akairo. Ka akamata tatou ki te au puaka taae tukeke. Te mea mua, ka akara tatou koai ma ta ratou e akatutu ra. E oti, ka uriuri tatou eaa te ka tupu ki teia au puaka taae. Te openga, ka uriuri tatou eaa te aiteanga o teia au tupuanga no tatou.

AKATAKAIA MAI E KOAI TE AU ENEMI O TE ATUA

6. Eaa te aiteanga o te puaka taae e itu mimiti tei taikuia i roto ia Apokalupo 13:1-4?

⁶ Eaa te puaka taae e itu ona mimiti? (E tatau ia Apokalupo 13:1-4.) Kite tatou e kua aite te akaraanga o teia puaka taae mei te nemera rai te tu, e tona vaevae mei te daba e tona vaa mei te riona, e tai ngauru ona tara. Kua aite katoa teia ki te au puaka taae e a i roto ia Daniela pene 7. Inara, i roto i te puka o Apokalupo, ka kiteaia teia au tu ki roto i te okotai puaka taae, kare i roto i te puaka taae e a. Kare teia puaka taae e akatutu ra okotai ua kavamani me kore patireia i te ao katoa. Kua karangaia e kua tutara te reira i “te au kopu katoa, e te au reo, e i te pa enua.” No reira, e maata atu tona mana i to te kavamani okotai. (Apo. 13:7) Te akatutu ra teia puaka taae i te au mana poritiki te tutara ra i te tangata i te ao katoa.b—Kohe. 8:9.

7. Koai te akatutu ra i te mimiti tataki tai e itu o te puaka taae?

⁷ Eaa te akatutu ra i te au itu mimiti tataki tai? Ka kitea te pauanga ia Apokalupo pene 17, tei akakite mai i te tu o te puaka taae tei taikuia ia Apokalupo pene 13. Kua akakiteia mai kia tatou i roto ia Apokalupo 17:10 e: “Ko nga ariki toko itu ra oki ratou: kua mate akenei e toko rima, te vai nei tetai, e kare rai tetai i tae mai; e kia tae mai oki aia ra, e noo anga poto rai tona e tikaʼi.” No te au mana tutara poritiki katoatoa ta Satani i taangaanga, e itu tei tu maata mei tetai “mimiti” te tu. Ko te au patireia teia o te ao katoa tei tutara ki rungao i te iti tangata o te Atua. Te tae anga ki te tuatau o te apotetoro ko Ioane, e rima o teia, tei tutara i te ao katoa: ko Aiphiti, Asura, Babulonia, Madai-Peresia, e Ereni. Te ono, ko Roma, te tutara ra i te tuatau i rauka ai ia Ioane teia apokalupo. Koai te itu mana tutara openga i te ao katoa, me kore mimiti?

8. Koai te akatutu ra i te itu mimiti o te puaka taae?

⁸ Mei ta tatou ka kite, ka tauturu te au totou i te puka o Daniela ia tatou kia akataka e koai te itu e te mimiti openga o te puaka taae. Koai te mana tutara o te ao katoa te tutara ra i teia tuatau openga, me kore i “te rā o te Atu ra”? (Apo. 1:10) Ko te United Kingdom e te United States of America, koia oki, ko te Mana Tutara Peritane-Marike. Ka karanga tatou ko te itu mimiti teia o te puaka taae i roto ia Apokalupo 3:1-4.

9. Eaa te akatutu ra i te puaka taae e “rua ona tara, mei te mea e e punua mamoe”?

⁹ Kua akakite katoa mai a Apokalupo pene 13 e ko teia itu mimiti, koia oki te Mana Tutara Peritane-Marike, te akatutu katoa ra aia i te puaka taae “e rua ona tara, mei te mea e e punua mamoe ra mei to te taae ra tona reo.” E “au akairo maata tana e rave, e e topa mai te ai no runga i te rangi ki raro i te enua nei iaia ki mua i te aroaro o te tangata nei.” (Apo. 13:11-15) Ia Apokalupo pene 16 e te 19, te akatutuia ra teia puaka taae ei “peroveta pikikaa.” (Apo. 16:13; 19:20) Kua akakite katoa a Daniela e ka rave te Mana Tutara Peritane-Marike i te ‘akapouanga umereia.’ (Dani. 8:19, 23, 24) Kua tupu rai te reira i te Tamaki II o te Ao. Na te nga atomic bomb a te aronga taieni o Peritane e Marike i akakore i te tamaki i te Patipika. Mei tera te tu, na te Mana Tutara Peritane-Marike, i akatopa mai i “te ai no runga i te rangi ki raro i te enua nei.”

10. Eaa te akatutu maira i “te tu o te puaka taae”? (Apokalupo 13:14, 15; 17:3, 8, 11)

¹⁰ Aru mai ka kite tatou i tetai puaka taae ke mai. Kua aite ki te puaka taae e itu mimiti inara e puaka taae kutekute teia. Kua kapikiia ko “taua tutu o te puaka taae” e kua akatutuia ko ‘te tokovaru ïa ariki.’c (E tatau ia Apokalupo 13:14, 15; 17:3, 8, 11.) Teia ‘ariki’ kua karangaia e kua akamata, e oti kua akamutu, e oti kua akamata akaou. Kua tano teia akatutuanga ki te akaaereanga United Nations, tei turuturu i te akakoroanga o te akatereanga poritiki i te ao katoa! Kua akamata teia e ko te League of Nations. E oti kua akamutu te reira i te tuatau o te Tamaki II o te Ao. I muri mai, kua akamata akaou e tae mai ki teia tuatau.

11. Eaa ta te au puaka taae mana poritiki ka akakeu, e eaa te tumu kare tatou e mataku ia ratou?

¹¹ Na roto i ta ratou tuatua pikikaa, kua akakeu te au puaka taae mana poritiki i te au tangata kia patoi ia Iehova e tona iti tangata. Na roto i te akatutuanga, te akaputu ra ratou i te “ui ariki o te ao katoa nei” ki te tamaki o Aramagido, koia oki ko “taua rā maata o te Atua mana katoatoa.” (Apo. 16:13, 14, 16) Inara kare tatou e mataku. Ka akaora viviki to tatou Atua maata ko Iehova i te aronga tei turuturu i tana tutaraanga.—Eze. 38:21-23.

12. Eaa te ka tupu ki te au puaka taae pouroa?

¹² Eaa te ka tupu ki te au puaka taae pouroa? Te pau ra a Apokalupo 19:20 e: “Opukia atura taua puaka taae ra, e te peroveta pikikaa katoa ko tei rave i te au akairo ki mua iaia, i vare ei iaia te aronga i āriki i te akairo a te puaka taae ra, e tei akamori i tona tutu. I uri oraoraia atura raua ravarai ki roto i te roto ai e te teio e ka ua ra.” Ia ratou e angaanga ra, ka takoreia te au enemi poritiki o te Atua.

13. Eaa te manamanata ta te au kavamani ka akatupu no te au Kerititiano?

¹³ Eaa te aiteanga o teia no tatou? Ei au Kerititiano, ka vai tiratiratu tatou ki te Atua e tona Patireia. (Ioa. 18:36) Ka anoanoia tatou kia vai takake i roto i te au angaanga poritiki o teianei ao. Ka ngata rai te vai takake, no te mea ka māro mai te au kavamani o teianei ao kia turuturu tatou ia ratou na roto i ta tatou ka tuatua e ka rave. Me ariu ua atu tatou ki ta ratou māroanga, ka ira mai te akairo o te puaka taae ki runga ia tatou. (Apo. 13:16, 17) Ko tetai ua atu tei āriki i te reira akairo, kare a Iehova e mareka ia ratou e ka ngere ratou i te ora mutu kore. (Apo. 14:9, 10; 20:4) Mea puapinga tikai, kia vai takake tatou, noatu te māroanga kia turuturu ia ratou!

AKAPOU TAKIRIIA TE VAINE AKATURI MAATA

14. Eaa te mea poitirere ta te apotetoro ko Ioane i kite, tei akatutuia ia Apokalupo 17:3-5?

¹⁴ Kua taiku te apotetoro ko Ioane e kua “va maata ua atu” aia i tana i kite. Eaa te reira? E vaine te akaoro ra i tetai o teia au puaka taae kikino. (Apo. 17:1, 2, 6) Kua akatutuia aia ei “vaine akaturi maata” ko “Babulonia Maata.” Kua rave aia i tana “akaturianga” ki “te au ariki o te enua nei.”—E tatau ia Apokalupo 17:3-5.

15-16. Koai a “Babulonia Maata,” akapeea tatou e kite ei?

¹⁵ Koai a “Babulonia Maata”? Kare teia vaine e akatutu i tetai akaaereanga poritiki, mari ra kua akakiteia e kua akaturi aia ki te au arataki poritiki o teianei ao. (Apo. 18:9) No te mea tei runga aia i te puaka taae, te tauta ra aia i te akatere i teia au mana poritiki. Pera katoa, kare aia i te tuanga o te akatereanga kimi puapinga o to Satani ao. Te akatutuia ra ratou e ko “te aronga oko o te ao nei.”—Apo. 18:11, 15, 16.

¹⁶ I roto i te au Tuatua Tapu, te tuatua “vaine akaturi” te karangaia ra no te aronga te tavini ra i te Atua, inara kua piri ratou ki te au peu akamori itoro e kua riro ei oa no teianei ao. (1 Para. 5:25; Iako. 4:4) Kare i aite ki te aronga akamori tiratiratu i te Atua, e aronga “viivii kore” tei kapikiia e e “paretenia.” (2 Kori. 11:2; Apo. 14:4) Ko Babulonia taito te ngai o te akamorianga pikikaa. No reira a Babulonia Maata i akatutuia ai ko te au akamorianga pikikaa katoatoa. Koia te au akonoanga pikikaa o teianei ao.—Apo. 17:5, 18; akara i te Web atikara i runga i te jw.org “Eaa a Babulonia Maata?”

17. Eaa te ka tupu kia Babulonia Maata?

¹⁷ Eaa te ka tupu kia Babulonia Maata? Te pau ra a Apokalupo 17:16, 17 e: “Te nga tara okotai ngauru taau i akara ra, e te puaka taae ra, e akaviivii ïa i taua vaine akaturi ra, e e pou oki aia ia ratou i te āru, e e noo apinga kore ua aia, e e kai i tona kopapa, e e tutungi iaia ki te ai. Kua tuku oki te Atua i te manako ki roto i to ratou ngakau kia rave ratou i tona anoano.” Ae, ka akakeu a Iehova i te au pa enua kia taangaanga i te puaka taae kutekute, koia oki, te United Nations, kia takore takiri i te au akonoanga pikikaa o teianei ao.—Apo. 18:21-24.

18. Akapeea tatou me akapapu kare tatou e piri atu kia Babulonia Maata?

¹⁸ Eaa te aiteanga o teia no tatou? Ka anoanoia tatou kia “akono mou i te Atua e te kino kore i mua i te aroaro o te Atua.” (Iako. 1:27) Auraka tatou e aru i te au apiianga pikikaa, te au tarekareka anga peu tupuna, te au turanga tau kore, e te au angaanga purepure a Babulonia Maata! E ka akamatakite tatou i te au tangata kia ‘aere ke mai ki vao,’ kia kore ratou e akaapaia e te Atua.—Apo. 18:4.

TE AKAVAANGA O TE ENEMI MAATA O TE ATUA

19. Koai te “taae maata muramura”?

¹⁹ Te akatutu katoa ra te puka o Apokalupo “i tetai taae maata muramura.” (Apo. 12:3) Te tamaki ra teia taae ia Iesu e tana au angera. (Apo. 12:7-9) Te tamaki ra te reira i te iti tangata o te Atua, e te oronga ra i te mana ki te au puaka taae poritiki. (Apo. 12:17; 13:4) Koai teia taae? Ko “taua ovi taito ra ïa, ko tei karangaia i te diabolo ra, e ko Satani.” (Apo. 12:9; 20:2) Koia te akatere ra i to Iehova au enemi katoatoa.

20. Eaa te ka tupu ki te taae?

²⁰ Eaa te ka tupu ki te taae? Te akamārama ra a Apokalupo 20:1-3 e ka titiri tetai angera ia Satani ki roto i te vaarua takere kore, mei te areauri te tu. I roto i teia areauri, ‘kare a Satani e pikikaa akaou i te pa enua, e kia ope rava te okotai tausani mataiti.’ I te openga ra, ka takoreia a Satani e tana au temoni me titiriia ratou ki roto i “te roto ai e te teio ra.” (Apo. 20:10) Akamanako ana i tetai ao kare a Satani e tana au temoni. Mei teaa atura te mataora!

21. Eaa tatou ka mataora ai i ta tatou i tatau i roto i te puka o Apokalupo?

²¹ Ka akamaroiroiia tatou me mārama i te aiteanga o teia au akairo i roto i te puka o Apokalupo! Kua kite tatou koai te au enemi o Iehova e eaa te ka tupu kia ratou. Ae, “e ao tona to tei tatau e to te aronga e akarongo i teianei tuatua totou”! (Apo. 1:3) Me takoreia te au enemi o te Atua, eaa te au akameitakianga ka rauka i te aronga tiratiratu? Ka uriuriia te reira i te atikara openga o teia tuanga.