Au Uianga a te Aronga Tatau
Eaa te “manako” ta Iehova ka tuku ki roto i te ngakau o te au kavamani a teia au tuatau ki mua?
Karanga a Apokalupo 17:16, 17 no runga i te akamataanga o te mate maata: “E nga tara okotai ngauru taau i akara ra, e te puaka taae ra, e akaviivii ïa i taua vaine akaturi ra, e e pou oki aia ia ratou i te āru, e e noo apinga kore ua aia, e e kai i tona kopapa, e e tutungi iaia ki te ai. Kua tuku oki te Atua i te manako ki roto i to ratou ngakau kia rave ratou i tona anoano, e kia tau ratou, kia oronga i to ratou mana ariki ki te puaka taae ra.” I mua ana, kua akamārama ta tatou au puka e ko te “manako” ta Iehova ka tuku ki roto i te ngakau o te au kavamani, koia oki kia takoreia te akonoanga pikikaa.
Inara e akamārama anga ou tetai. Ko te “manako” ta Iehova ka tuku ki roto i te ngakau o te au kavamani, koia oki ‘kia oronga ratou i te mana ariki ki te puaka taae.’ Kia mārama akapeea teia me akatupuia, ka pau tatou i teia au uianga.
Koai ma tei taikuia i roto i teia totou? Kua kapiki katoaia “te vaine akaturi” ko “Babulonia Maata,” te akatutu maira aia i te akonoanga pikikaa o teianei ao. Te akatutu maira te “puaka taae kutekute” i te United Nations. Kua akamataia i te 1919 kia akatupu i te ’au i teianei ao e kua kapikiia i mua ana e ko te League of Nations. (Apo. 17:3-5) Te akatutu maira te ‘tai ngauru tara’ i te au kavamani o teianei ao te turuturu nei i te puaka taae.
Eaa te pirianga i rotopu i te vaine akaturi e te puaka taae kutekute? Te “noo ra” te vaine akaturi ki runga i te puaka taae. Ko te aiteanga, te turuturu ra te vaine akaturi e te tauta ra aia i te akatere i te puaka taae.
Eaa te ka tupu ki te vaine akaturi? Ka rikarika te puaka taae e te tai ngauru tara i te “vaine akaturi.” Ka rave ratou i tana au apinga e ka akaari i tona kino ki te katoatoa. E oti, ka takore ratou iaia mei ta Iehova i tuatua. (Apo. 17:1; 18:8) Ko te openga teia o te akonoanga pikikaa. Inara i mua ake ka tupu ei te reira, ka akakeu a Iehova i te pa enua kia rave i tetai apinga kare rava i tupu i mua ana.
Eaa ta Iehova ka akakeu i te pa enua kia rave? Ka tuku aia i tona “manako” ki roto i te ngakau o te au kavamani kia ‘oronga i to ratou mana e te maroiroi ki te puaka taae [kutekute]’ ko te United Nations. (Apo. 17:13) Akamanako i te aiteanga o teia. Ka iki ainei te au kavamani i te oronga ua i to ratou mana e te maroiroi ki te puaka taae? Kare! Te akakite maira te totou e na te Atua e akakeu ia ratou kia rave i te reira. (Mase. 21:1; akaaite kia Isaia 44:28.) Ka tupu marie ainei teia? Kare! Ka viviki e ka tupu poitirere ua. Aru mai, ka takore takiri te puaka taae i te au akonoanga pikikaa.
Eaa ta tatou ka tapapa atu? Kare tatou e anoanoia kia akara i te nuti kia kite i te au kavamani e turu ra i te United Nations. Ko teia ta tatou ka tapapa atu. Ma te poitirere, ka akakeu a Iehova i te au kavamani kia oronga i to ratou mana ki te United Nations. Me tupu te reira, ka kite tatou e kua vaitata te akamataanga o te mate maata. No reira, kia vai ara ua tatou e kia matakite no te mea ka tupu viviki te au tauianga!—1 Tesa. 5:6.