E te au Metua—Tauturu i ta Kotou Tamariki Kia Akaperepere ia Iehova

1-2. Akamārama mai akapeea te au kaveinga Pipiria me tauturu ia tatou me taui te turanga.

I TO raua rā akaipoipo, ka akarongo meitaki te tane manea e tana vaine purotu ki te akoanga Pipiria no te oraanga akaipoipo. Te au kaveinga tei uriuriia, kare te reira i te mea ou kia raua. Inara mei teia rā e aere ua atu ki mua, ka tauturu te reira akoanga ia raua. Eaa ra? No te mea ka aru raua i te reira ei nga tokorua akaipoipo.

² Aiteite rai me riro te nga tokorua Kerititiano ei nga metua. I te au mataiti i aereia mai, kua rongo ana raua i te au akoanga akapeea me utuutu i te tamariki. I teianei ka tauturu maata te reira au kaveinga ia raua. No te mea ka anau tamariki raua e ka utuutu ia ratou. E apainga maata teia! Papu e me taui to tatou turanga, ka riro te au kaveinga Pipiria ei tauturu ia tatou. Ko teia tetai tumu i tatau ei te aronga akamori ia Iehova i te au Tuatua Tapu, e mei te au ariki o Iseraela kua akakiteia kia ratou, kia akamanako i te reira “i te au rā” o to ratou oraanga.—Deu. 17:19.

3. Eaa ta tatou ka uriuri i roto i teia atikara?

³ E te au metua, tei ia kotou te akameitakianga maata ei au Kerititiano i te apii ia Iehova ki ta kotou tamariki. Inara e maata te ka anoanoia no kotou i te apii ua i te Atua kia ratou. Ka inangaro kotou i te tauturu i ta kotou tamariki kia akaperepere ia Iehova. Eaa ta kotou ka rave kia akatupu i te inangaro ia Iehova ki roto i ta kotou tamariki? I teia atikara, ka uriuri tatou e a kaveinga Pipiria te ka tauturu ia kotou. (2 Timo. 3:16) Ka kite katoa tatou akapeea tetai au metua Kerititiano i te puapinga anga mei te akono anga i te akoanga a te Pipiria.

E A KAVEINGA TE KA TAUTURU I TE AU METUA

4. Eaa tetai kaveinga ka tauturu i te au metua kia akatupu i te inangaro no Iehova ki roto i ta ratou tamariki? (Iakobo 1:5)

⁴ Kaveinga 1: E kimi i ta Iehova aratakianga. E pati kia Iehova no tona pakari ei tauturu ia kotou kia akatupu i te inangaro iaia ki roto i ta kotou tamariki. (E tatau ia Iakobo 1:5.) Koia tei oronga mai i te akoanga meitaki rava atu. Ka akara ana tatou e rua tumu. Te mea mua, e metua kite karape a Iehova. (Sala. 36:9) Te rua, ka puapingaia tatou me akono i tana akoanga.—Isa. 48:17.

5. (a) Eaa ta te akaaerenga a Iehova i oronga mai ei tauturu i te au metua? (e) I roto i te vitio, eaa taau i kite mei te Taeake e te Tuaine Amorim no te akono i ta raua tamariki?

⁵ Na roto i tana Tuatua e te akaaerenga, kua oronga mai a Iehova i te au kai pae vaerua mei roto i te Pipiria ei tauturu i te au metua kia utuutu i ta ratou tamariki kia inangaro Iaia. (Mata. 24:45) Ka kitea te au akoanga tau i roto i teia tuanga o te au atikara tukeke “Tauturu no te Ngutuare Tangata,” tei neneiia no tetai au mataiti i roto i te makatini E Ara! e ka rauka i runga i ta tatou website. Pera katoa te au vitio i runga i te jw.org tei akaari mai i te au uiuianga e te au teata te ka tauturu i te au metua kia akono i ta Iehova akoanga me utuutu i ta ratou tamariki.b—Mase. 2:4-6.

6. Eaa ta tetai metua tane i akakite mai no te tauturu tei rauka ia raua ko tana vaine mei ta Iehova akaaerenga?

⁶ E maata te au metua tei akakite mai i to ratou rekareka no ta Iehova tauturu na roto i tana akaaerenga. Karanga mai tetai metua tane ko Joe: “Kare i te angaanga māmā i te utuutu e toru tamariki i roto i te tuatua mou. E pure ua ana maua ko taku vaine no ta Iehova tauturu. Maata anga o te taime, kua rauka mai te au atikara me kore vitio i te taime tau. E puapinga maata kia maua i te kimi i ta Iehova aratakianga.” Kua kite mai a Joe e tana vaine e kua tauturu teia i ta raua tamariki kia piri vaitata kia Iehova.

7. Eaa i puapinga ai no te au metua kia akaari ua rai i te akaraanga meitaki? (Roma 2:21)

⁷ Kaveinga 2: E apii na roto i toou akaraanga. E akara ua ana te tamariki i to ratou nga metua e ka aru i to ratou tu. E tika, e nga tangata apa ua te au metua. (Roma 3:23) Noatu rai, ka aruaru raua i te akanoo i te akaraanga meitaki no ta raua tamariki. (E tatau ia Roma 2:21.) No te au tamariki, karanga mai tetai metua tane: “Kua aite ratou ki te vavai te ka opu i te au mea ravarai.” I nana ei: “Ka akakite mai ratou me kare to maua akaraanga e rotai ana ki ta maua e apii ra.” No reira, me inangaro tatou i ta tatou tamariki kia akaperepere ia Iehova, kia pakari atu to tatou inangaro iaia e kia akaariia te reira i te au taime ravarai.

8-9. Eaa taau i kite mai mei ta Andrew e Emma i akakite mai?

⁸ E tukeke te au ravenga me apii te au metua i ta ratou tamariki kia akaperepere ia Iehova. Akakite mai te mapu taeake ko Andrew e 17 ona mataiti i teia: “E apii ua ana toku nga metua i te puapinga kia pure putuputu. I te au po ravarai, ka pure kapiti maua ko Tati, noatu kua oti taku pure ko au anake ua. Akakite mai toku nga metua: ‘Ka rauka ia koe i te tuatua kia Iehova i te au taime ravarai.’ Kua riro ta raua apiianga no te pure ei tuanga puapinga i roto i toku oraanga e te mataora nei rai au i te pure kia Iehova e te akamanako iaia ei Metua akaperepere noku.” E te au metua, e akamaara e ka riro to kotou inangaro ia Iehova ei tauturu maata i ta kotou tamariki.

⁹ Akamanako ana i te akaraanga o Emma. I te akaruke anga tona papa ia ratou, kua akaruke mai aia i tetai āka kaiou kia tutaki a mama. Akakite mai a Emma: “E maata te tuatau kare e rava ana ta mama moni, inara ka tuatua mai aia e ka akono ua rai a Iehova i tona au tavini. Kua akaari mai tona oraanga e kua irinaki tikai aia i te reira. Kua akono rai a mama i tana i ako mai.” Eaa te apiianga? Noatu te ngata o te oraanga, ka rauka rai i te au metua i te apii na roto i to ratou akaraanga.—Gala. 6:9.

10. Eaa te au atianga kua rauka i te au metua Iseraela i te tuatua ki ta ratou tamariki? (Deuteronomi 6:6, 7)

¹⁰ Kaveinga 3: E tuatua putuputu ki taau tamariki. Kua akaue a Iehova i to Iseraela kia apii putuputu i ta ratou tamariki no runga Iaia. (E tatau ia Deuteronomi 6:6, 7.) Ka akanoo te au metua i te tuatau no te tuatua putuputu ki ta ratou tamariki e te akatupu i te inangaro ia Iehova i roto i to ratou ngakau. Ei akaraanga, ka akapou te mapu tamaiti Iseraela i te tuatau ki tona papa me tanutanu raua e me kokoti i ta raua i ruru. Ka akapou tona tuaine i tona rā i te tauturu ia mama me tuitui kakau, rangaranga, e te rave i tetai angaanga o te kainga. I te nga metua e te tamariki e angaanga kapiti ra, ka rauka ia ratou i te uriuri i te au manako tukeke. Ei akaraanga, penei ka pukapuka ratou no te tu meitaki o Iehova e akapeea aia i te tauturu anga ia ratou.

11. Eaa tetai atianga ka rauka i te au metua Kerititiano i te pukapuka ki ta ratou tamariki?

¹¹ Kua taui te tuatau. I tetai au enua, kare o te nga metua e te tamariki tuatau no te noo kapiti i te au rā. Penei te angaanga moni ra te nga metua e tei te apii te tamariki. Tei tupu, kua anoanoia te au metua kia akanoo i te tuatau kia tuatua ki ta ratou tamariki. (Ephe. 5:15, 16; Phili. 1:10) Ka oronga mai te tuatau akamorianga a te ngutuare i teia. Akakite mai te taeake mapu ko Alexander e: “E akanoo ua ana a papa i tetai tuatau no te akamorianga a te ngutuare e kare aia e tuku i tetai apinga kia tamanata i te reira. Me oti ta matou apii, ka pukapuka matou.”

12. Eaa ta te upoko ngutuare ka akamaara i te tuatau akamorianga a te ngutuare?

¹² Me e upoko ngutuare koe, eaa taau ka rave kia mataora te tamariki i ta kotou akamorianga ngutuare? Penei e apii i te puka ou Oraanga Mataora e Tuatau Ua Atu! ma taau tamariki. Ka akatupu te reira apii i tetai tuatau maoraora no te pukapuka. Ka inangaro koe i taau tamariki kia akakite mai i to ratou manako e to ratou manamanata, no reira eiaa e akariro i te tuatau akamorianga a te ngutuare ei atianga no te karo ia ratou. Eiaa e riri me akakite mai taau tamariki i to ratou manako kare e rotai ana ki te au kaveinga Pipiria. Mari ra, e akameitaki ia ratou no te akakite mai i to ratou manako e kia akamaroiroi ia ratou kia tuatua ua mai. I reira e rauka ai ia koe i te tauturu i taau tamariki me kite koe eaa to ratou manako.

13. Eaa te au atianga ka rauka i te au metua i te apii i ta ratou tamariki kia piri vaitata kia Iehova?

¹³ E te au metua, e kimi i te au atianga i te au rā no te tauturu i taau tamariki kia piri vaitata kia Iehova. Eiaa e tiaki i te tuatau apii Pipiria kia apii ia Iehova kia ratou. Karanga mai tetai metua vaine ko Lisa e: “Kua tauturu maua i ta maua tamariki kia kite ia Iehova na roto i te au mea angaia. Ei akaraanga, me riro te peu kanga a te puakaoa ei takatakata i te tamariki, ka apii maua e te akatutu maira te reira i te tu mataora o Tei Anga e tona inangaro i te oraanga, mei ia tatou katoa.”

14. Eaa i puapinga ai kia tauturu te au metua i ta ratou tamariki kia iki meitaki i te au oa? (Maseli 13:20)

¹⁴ Kaveinga 4: E tauturu i taau tamariki kia piri ki te au oa meitaki. Te akakite maira te Tuatua a te Atua no runga i te au oa te ka riro ei akakeu anga meitaki me kore kino kia tatou. (E tatau ia Maseli 13:20.) E te au metua, kua kite ainei koe i te au oa o taau tamariki? Kua aravei ana koe ia ratou e kua akapou i te tuatau kia ratou? Eaa taau ka rave kia tauturu i taau tamariki kia piri ki te aronga te inangaro ra ia Iehova? (1 Kori. 15:33) Ka tauturu koe ia ratou kia tuku i te au ikianga meitaki na te patianga i te aronga maroiroi i te pae vaerua kia piri mai ki toou ngutuare.—Sala. 119:63.

15. Eaa ta te au metua ka rave ei tauturu i ta ratou tamariki kia akatupu i tetai pirianga oa meitaki?

¹⁵ Akamanako ana i te akaraanga o te metua tane ko Tony. Kua akamārama mai aia i ta raua i rave no te tauturu i ta raua tamariki kia piri ki te au oa meitaki: “I te au mataiti i aereia mai, kua pati maua ko taku vaine i te au taeake e te au tuaine tukeke te mataiti e to ratou ngai i aere mai, ki to matou kainga. Ka kaikai kapiti matou e ka piri mai ratou ki ta matou akamorianga a te ngutuare. Ko tetai atianga teia no te aravei i te aronga tei akaperepere ia Iehova e te tavini ra iaia ma te rekareka. Kua akameitakiia matou i te noo mai anga te au akaaere kotinga, te au mitinari, e tetai ua atu ki to matou kainga. Kua riro to ratou akaraanga maroiroi e te akaatinga ia ratou uaorai ei akakeu i ta maua tamariki kia piri vaitata kia Iehova.” E te au metua, e tauta pakari i te tauturu i ta kotou tamariki kia rauka te pirianga oa meitaki.

AURAKA E TUKU I TE ‘AU!

16. Eaa taau ka rave me akakite mai taau tamaiti kare aia e inangaro i te tavini ia Iehova?

¹⁶ Noatu taau tautaanga, eaa taau ka rave me akakite mai taau tamaiti kare aia e inangaro i te tavini ia Iehova? Eiaa e manako e kua puapinga kore taau tautaanga. Kua oronga mai a Iehova kia tatou katoatoa—kapiti mai taau tamaiti—te tikaanga kia iki me ka tavini i te Atua e me kare. Me kua iki taau tamaiti e kare aia e tavini ia Iehova, eiaa e tuku i te ‘au e a tetai rā, ka oki mai aia. E akamaara i te akatutuanga o te tamaiti kaimoumou apinga. (Luka 15:11-19, 22-24) Kua aere ke te mapu tane mei te ara o te tuatua tika, e aere ua rai kua oki mai aia. Ka karanga mai tetai pae “e akatutuanga” tena. “Ka tupu ainei te reira?” E tano ei! Kua tupu teia ki te mapu tane ko Elie.

17. Akapeea te akaraanga o Elie i te akamaroiroi anga ia koe?

¹⁷ No tona nga metua, kua akakite mai a Elie: “Kua tauta pakari raua i te apii iaku kia inangaro ia Iehova e tana Tuatua, te Pipiria. Toku mapu tamariki anga kare au e akarongo akaou ana.” Kua rave a Elie i te oraanga tutu ua, kua patoi i te tauturu pae vaerua a tona nga metua. I tona akaruke anga i te kainga, kua rave aia i te au mea kino. Noatu rai, i tetai taime ka puka aia i te Pipiria ki tona au oa. Karanga mai a Elie: “Te maata atu taku tuatua no runga ia Iehova ki toku oa, e maata atu taku akamanakoanga no runga ia Iehova. Aere ua rai, kua tupu akaou mai te tuatua mou Pipiria e vai ua ra ki roto i toku ngakau ta toku nga metua i tauta ana i te akatupu.” I muri maira, kua āriki akaou a Elie i te tuatua mou.c Akamanako ana i te mataora o tona nga metua e kua tauta raua i te apii iaia mei tona tamariki anga kia inangaro ia Iehova!—2 Timo. 3:14, 15.

18. Eaa toou manako i te au metua e tauta ra i te apii i ta ratou tamariki kia akaperepere ia Iehova?

¹⁸ E te au metua, kua orongaia te akameitakianga manea kia kotou kia utuutu i ta kotou tamariki kia akamori ia Iehova. (Sala. 78:4-6) Inara, kare teia i te angaanga māmā e te akameitaki nei matou ia kotou no te tauta anga i te tauturu i ta kotou tamariki! Me maroiroi ua atu kotou i te utuutu i ta kotou tamariki kia inangaro ia Iehova e te akono i tana akoanga, papu e te mareka ra to tatou Metua i te rangi ia kotou.—Ephe. 6:4.