Tauturu i Tetai Kia Akakoromaki i te au Tuatau Ngatā

1. Akapeea a Iehova me pau ana i te pure a tona au tavini?

KUA kite ainei koe e ka rauka ia Iehova i te taangaanga ia koe kia pau i te pure akatenga a tetai? Tika rai te reira me e tangata pakari koe, e tavini tauturu, e painia, e e papuritia i roto i te putuputuanga. Tika katoa me e mapu koe e tangata pakarikari e e taeake me kore e tuaine. Me pati tetai te akaperepere ra ia Iehova i te tauturu, ka taangaanga a Iehova i te aronga pakari e tetai ua atu taeake tiratiratu kia “akapumaana” i te reira tangata. (Kolo. 4:11) E akameitakianga i reira kia tavini ia Iehova e to tatou au taeake na teia mataara! Penei ka rauka ia tatou te tauturu me tupu mai te maki totoa, te tumatetenga, e te takinokino anga.

TAUTURU I TETAI I TE TUATAU O TE MAKI TOTOA

2. Eaa ra ka ngatā ai i te tauturu i tetai i te tuatau o te maki totoa?

² Ka akatupu te maki totoa i te turanga ngatā kia tatou no te tauturu i tetai e tetai. Ei akaraanga, penei ka inangaro tatou i te atoro i to tatou au oa, inara kare e meitaki te reira. Ka inangaro tatou i te pati i te aronga te taitaia ra i te pae o te moni kia kaikai kapiti, kare rai teia e meitaki. Penei ka inangaro tatou i te tauturu i tetai ke, kare ra e rauka no te mea te taitaia ra rai to tatou ngutuare tangata. Noatu te reira, te inangaro ra tatou i te tauturu i to tatou au taeake, e ka mareka a Iehova me rave tatou i tei rauka ia tatou. (Mase. 3:27; 19:17) Eaa ta tatou ka rave?

3. Eaa ta tatou ka kite mai mei te aronga pakari o te putuputuanga tei roto a Desi? (Ieremia 23:4)

³ Ta te aronga pakari ka rave. Me e tangata pakari koe, e akamatau i te kite meitaki i te au mamoe. (E tatau ia Ieremia 23:4.) Karanga mai a Desi, te tuaine tei taikuia i te atikara o mua ake e, “Kua piri mai te aronga pakari i roto i to matou pupu tutu aere kiaku e tetai pae i roto i te angaanga tutu aere e tetai atu au angaanga tarekareka.”b No te mea kua rave teia aronga tiaki i te reira kua māmā ua ia ratou i te tauturu ia Desi i te tupuanga te maki kino COVID-19 e kua mate tetai o tona ngutuare i te maki.

4. Eaa i rauka ai i te aronga pakari te tauturu ia Desi, e eaa te apiianga?

⁴ Akamārama maira a Desi e, “No te mea kua mātau au i te aronga pakari ei au oa, kua māmā ua iaku i te akakite i toku tu e taku e taitaia ra kia ratou.” Eaa te apiianga ki te aronga pakari? E akono meitaki i te aronga i raro ake i ta kotou aratakianga i mua ake ka tupu ei te kino. Kia riro ei oa kia ratou. Me tupu mai tetai maki totoa tei arai ia koe kia aravei i tetai, e tamata i tetai au ravenga ke. “Tetai au taime ka ringi mai te aronga pakari iaku me kore ka tuku karere mai i te reira rā,” i na Desi ei. “Kua pakia toku ngakau i te au irava ta ratou i tatau mai, noatu e kua kite au i te reira.”

5. Akapeea te aronga pakari e kite ei i te tu o te au taeake e te au tuaine e kia rauka ia ratou te tauturu?

⁵ Ko tetai mataara e kite ei koe i te tu o toou au taeake e te au tuaine na te ui i te au uianga te ka akakeu i tetai kia tuatua mai i tona manako. (Mase. 20:5) Kua rava ainei ta ratou kai, te vairakau e tetai atu au apinga? Ka ngere ainei ratou i ta ratou angaanga e to ratou kainga? Ka inangaro tauturu ainei ratou akapeea me pati tauturu ki te kavamani? Kua rauka ia Desi te tauturu i te pae kopapa mei te au taeake. Inara ko te tauturu i te pae vaerua e te manako ngakau a te aronga pakari tei tauturu maata iaia kia akakoromaki i tona taitaia. Karanga mai aia: “Kua pure te aronga pakari noku. Noatu kare i maara iaku ta ratou tuatua, kua maara iaku toku tu. Kore ake rai te karanga maira a Iehova, ‘Kare ko koe anake ua.’”​—Isa. 41:10, 13.

6. Eaa ta te manganui i roto i te putuputuanga ka rave kia tauturu i tetai? (Akara i te tutu.)

⁶ Ta tetai pae ka rave. Ka tapapa rai tatou i te aronga pakari kia rave i te aratakianga. Inara te akakite maira a Iehova kia tatou katoatoa kia akamaroiroi e kia tauturu i tetai. (Gala. 6:10) Noatu te meangiti o ta tatou ka rave ei aroa taeake ka riro te reira ei akamaroiroi i tetai tei makimaki. Ka rauka i tetai tamaiti meangiti i te tuku i tetai kāti me kore tutu torōia ei akamaroiroi i tetai taeake. Ka rauka i tetai mapu te angaanga na tetai tuaine me kore i te oko apinga nana. Akapeea i te tunu i te au kai e te akaruke atu ki te kainga o tetai tei makimaki? E tika, me totoa tetai maki, ka anoano te katoatoa i roto i te putuputuanga i te akamaroiroianga. Penei me akaoti te uipaanga ka noo roa atu tatou i te tuatua ki te au taeake e te au tuaine i reira e ki runga i te vitio karangaranga. Ka anoano katoa te aronga pakari i te akamaroiroianga. Kua tuku tetai Au Kite i te pepa akameitaki ki te aronga pakari, no te maata o ta ratou angaanga e rave ana i te tuatau o te maki totoa. E mea meitaki rai i te rave i ta tatou tuanga ‘akapumaana tetai ki tetai, e akatupu i te meitaki tetai ki tetai’!​—1 Tesa. 5:11.

TAUTURU I TETAI ME ROKOIA E TE TUMATETENGA

7. Eaa te manamanata ka tupu i muri ake i tetai tumatetenga?

⁷ Ka akatupu te tumatetenga i te manamanata ki tetai tangata. Ka ngere ratou i ta ratou au apinga, to ratou kainga, e to ratou aronga akaperepere. Ka tupu katoa teia tumatetenga ki to tatou au taeake e te au tuaine Kerititiano. Eaa ta tatou ka rave kia tauturu?

8. Eaa ta te aronga pakari e te upoko ngutuare ka rave i mua ake ka tupu ei tetai tumatetenga?

⁸ Ta te aronga pakari ka rave. E te aronga pakari, e tauturu i toou au taeake kia akapapa i mua ake ka tupu ei te tumatetenga. E akapapu e kua kite te katoatoa i roto i te putuputuanga e eaa te ka rave kia noo maru e kia tuatua ki te aronga pakari. Karanga mai a Margaret, tei taikuia i roto i te atikara o mua ake e: “Kua oronga mai to matou aronga pakari i tetai tuanga o te uipaanga, i te akamatakite anga mai ia matou e te tupu ra rai te aʼi kā i roto i te vaorakau i to matou ngai. Karanga mai ratou me akakite mai te aronga akaaere kia akaruke i to matou ngai e me tupu te kino, e akaruke viviki rai matou.” E akakiteanga tau te reira no te mea kua tupu mai tetai aʼi kā e rima epetoma i muri akera. I te tuatau o te akamorianga a te ngutuare, ka rauka i te upoko i te uriuri ki te ngutuare i ta ratou ka rave. Me papa koe e taau tamariki, ka ngoie ua koe i te noo maru me tupu ake te tumatetenga.

9. Akapeea te aronga pakari me akapapa na mua e i muri ake i tetai tumatetenga?

⁹ Me e akaaere koe, auraka e tiaki kia tupu tikai te tumatetenga kia akapapu e kua rauka ia koe te numero e te ngai nooanga o te katoatoa i roto i toou pupu. E tata i te reira e te akapapu e kua tano rai. Me tupu te tumatetenga, ka rauka ia koe i te tuatua ki te au papuritia tataki tai kia tauturu ia ratou. E tuku i teia karere ki te taeake tauturu o te pupu aronga pakari, te ka tuku atu i te reira ki te akaaere kotinga. Ka tupu te meitaki me taokotai te katoatoa. Muri mai i te aʼi kā, kua ara ua te akaaere kotinga o Margaret ma, no tetai 36 ora, i te tuatua ki te aronga pakari kia aravei e kia akono i te 450 au taeake e te au tuaine tei rokoia e te tumatetenga. (2 Kori. 11:27) Kua orongaia i reira te ngai akaruru anga no te aronga tei ngere ra.

10. Eaa te aronga pakari i manako ei i te tuatau akamaroiroi i te au taeake ei mea puapinga? (Ioane 21:15)

¹⁰ Te oronga katoa maira te aronga pakari i te tauturu i te pae vaerua e te ngakau. (1 Pete. 5:2) Me rokoia e te tumatetenga, ka akapapu te aronga pakari e te meitaki ua ra tetai taeake e tetai tuaine, e e kai ta ratou, kakau, e te ngai akaruruanga. I muri mai i nga marama, ka anoano te aronga i ora mai i te tauturu i te pae vaerua e te ngakau. (E tatau ia Ioane 21:15.) “Ka anoanoia te tuatau kia meitaki akaou te turanga,” i na Harold ei, te tavini ra e ko tetai taeake tauturu no te Kumiti Opati Betela e tei aravei i te au taeake e te au tuaine e manganui tei rokoia e te tumatetenga. “Penei ka āriki mai ratou i tei ngere ia ratou, kareka ra te au manako o te aronga akaperepere tei takake, tetai apinga akaperepereia o te ngutuare, e kua ora mai i te tumatetenga ka vai rai no tetai tuatau roa. Ka akatupu akaou teia au manako i te au manako ngakau taitaia e te mamae. E tu tangata ua teia e ka tupu rai, kare e kua paruparu te akarongo.”

11. Eaa te au mea tei anoano uaia rai e te au ngutuare?

¹¹ Te akamanako ra te aronga pakari i te akoanga kia “aue katoa oki i te aronga e aue ra.” (Roma 12:15) Ka anoano te aronga tei ora mai i te tumatetenga i te reo akapumaana e te akaperepere ra a Iehova ia ratou e te au taeake Kerititiano katoa. Ka tauturu te aronga pakari i te au ngutuare kia akono i to ratou turanga i te pae vaerua, te pure, te apii, te aere anga ki te uipaanga e te rave i te angaanga tutu aere. Ka rauka i te aronga pakari i te akamaroiroi i te au metua kia tauturu i ta ratou tamariki kia akamou ki runga i te au mea kare e takoreia e te tumatetenga. E te au metua, e akamaara ki taau tamariki e ka riro ua rai a Iehova ei Oa no ratou e ka tauturu aia ia ratou. E akamārama kia ratou e e tuanga ratou no te ngutuare o te au taeake e te au tuaine i te ao katoa, tei papa ua i te tauturu.​—1 Pete. 2:17.

12. Eaa ta tetai ka rave ei tauturu me tupu mai te tumatetenga? (Akara i e tutu.)

¹² Ta tetai pae ka rave. Me tupu te tumatetenga i te pae mai, e pati ki te aronga pakari i taau ka rave. Penei ka rauka ia koe te akono i tetai ngai akaruruanga no tetai tuatau poto ua ki te aronga kare o ratou ngai me kore ki te aronga tei aere mai i te pātu are. Penei ka rauka ia koe te kave i te kai e tetai au apinga ki te au papuritia te anoano ra i te reira. Me tupu ra te tumatetenga i te enua mamao, ka rauka katoa ia koe i te tauturu. Akapeea? Na te pure anga no te aronga tei rokoia e te kino. (2 Kori. 1:8-11) Penei ka tauturu koe na roto i te moni tauturu oronga ua no te angaanga i te ao katoa. (2 Kori. 8:2-5) Me ka rauka ia koe te teretere ki te ngai tumatetenga i te tauturu, e akakite ki te aronga pakari akapeea koe me tauturu. Me patiia mai koe, penei ka tereniia koe kia rauka ia koe i te tauturu noatu kiea e aea me anoanoia te reira.

TAUTURU I TE AU TAEAKE KIA AKAKOROMAKI I TE TAKINOKINO ANGA

13. Eaa te au turanga ngatā tei tupu ki to tatou au taeake i te au enua kua araiia te angaanga?

¹³ I te au enua kua araiia te angaanga, ka akatupu te takinokino anga i te manamanata. Ka tupu rai te turanga ngatā i te pae moni ki te au taeake i reira, ka makiia, e ka takake te aronga tei akaperepereia. No te araianga, ka kotingaia te aronga pakari i te tauturu e te tuatua ki te au taeake te anoano ra i te akamaroiroi anga. Kua tupu teia kia Andrei, tei taikuia i roto i te atikara o mua ake. Te taitaia ra tetai tuaine i te pae moni i roto i tana pupu tutu aere. E oti kua o atu te tuaine ki roto i te u anga motoka. Kua anoanoia kia vaiia aia e kare e rauka i te angaanga. Noatu e te tupu ra te au araianga e te maki totoa, kua rave te au taeake i ta ratou i rauka i te tauturu e te akara maira a Iehova.

14. Akapeea te aronga pakari me akaari e te irinaki ra ratou kia Iehova?

¹⁴ Ta te aronga pakari ka rave. Kua pure a Andrei e kua rave i tana ka rauka. Eaa ta Iehova i rave? Kua oronga mai aia i te au taeake tauturu. Kua apai tetai pae i te tuaine kia aravei i te taote. Kua oronga tetai i te moni tauturu nana. Kua akakeu a Iehova ia ratou kia tauturu, e kua akameitaki aia i to ratou tu ngakau toa e te taokotai. (Ebe. 13:16) E te aronga pakari, me araiia te angaanga tutu aere e pati i te tauturu ki tetai ke. (Iere. 36:5, 6) Tei maata rava, e irinaki kia Iehova. Ka tauturu aia ia koe kia akatupu i te anoano o te au taeake e te au tuaine.

15. Akapeea tatou me akono i to tatou tu taokotai anga Kerititiano me takinokinoia?

¹⁵ Ta tetai pae ka rave. I raro ake i te araianga, penei ka kotinga to tatou kapitianga ki tetai pupu meangiti. No reira e mea puapinga i teianei i te akatupu i te pirianga ’au ki tetai. E tamaki ia Satani, kare i tetai e tetai. E akakore i te au ara a to taeake, e te akatikatika viviki i tetai manamanata. (Mase. 19:11; Ephe. 4:26) E rave i taau ka rauka i te tauturu i tetai e tetai. (Tito 3:14) Te tauturu tei orongaia ki te tuaine tei rokoia e te tumatetenga, kua riro ei akamaroiroi anga i te au taeake. Kua piri vaitata ratou mei tetai pamiri rai.​—Sala. 133:1.

16. Ia Kolosa 4:3, 18, akapeea tatou me tauturu i to tatou au taeake e te au tuaine tei takinokinoia?

¹⁶ E tai ngauru ua atu tauatini o to tatou au taeake e te au tuaine Kerititiano te tavini ra ia Iehova noatu te au araianga a te kavamani. Kua tapekaia tetai ki roto i te are auri no to ratou akarongo. Ka pure tatou no ratou, no to ratou ngutuare, e te aronga tei tauturu ua atu i te au taeake e te au tuaine i te pae vaerua, pae kopapa, e te pae ture.c (E tatau ia Kolosa 4:3, 18.) Auraka e ekoko i te tauturu maata a te pure!​—2 Tesa. 3:1, 2; 1 Timo. 2:1, 2.

17. Akapeea koe me akapapa i teianei no te takinokino anga?

¹⁷ Ka rauka ia koe e toou ngutuare i te akapapa i teianei no te takinokino anga. (Anga. 14:22) Auraka e tamanako ua i te au mea kino pouroa ka tupu. Mari ra, e akamatutu i toou pirianga kia Iehova e taau tamariki katoa. Me ka taitaia ra koe, e akakite i toou manako ki te Atua. (Sala. 62:7, 8) Ei ngutuare, e uriuri kapiti i te au tumu i irinaki ei kotou iaia.d Me tupu mai te tumatetenga, ka akatupu taau akapapa anga e te irinaki ia Iehova i te tu ngakau toa e te ’au ki taau tamariki.

18. Eaa te tuatau ki mua ta tatou e tapapa atura?

¹⁸ Ka akatupu te ’au o te Atua i te manako tinamou kia tatou. (Phili. 4:6, 7) Ka tamaru a Iehova i to tatou ngakau noatu te au maki, te au tumatetenga, e te takinokino anga e tupu nei i teia rā. Ka taangaanga aia i te aronga pakari no te akono ia tatou. E kua oronga mai aia i te akameitaki anga kia tatou kia tauturu i tetai e tetai. Te ’au ta tatou e kite nei ka akapapa ia tatou kia akakoromaki i te au timataanga ka tupu i te “mate maata.” (Mata. 24:21) A te reira taime, ka anoanoia tatou kia noo ’au ua e kia tauturu i tetai kia pera katoa. I muri ake i te reira, kare rava tatou e taitaia akaou. Ka rekareka i reira tatou i ta Iehova i inangaro no tatou​—te ’au nuingangare e tuatau ua atu.​—Isa. 26:3, 4.