Ka Kitea te ’Au i te au Tuatau Taitaia

1. Eaa “te au o te Atua,” e akapeea tatou e puapinga ai mei te reira? (Philipi 4:6, 7)

TE VAIRA tetai ’au kare to teianei ao i kite. Ko “te au [ïa] o te Atua,” e tu maru tei rauka mai mei tetai pirianga tumanava ma to tatou Metua i te rangi. Me rauka ia tatou te ’au o te Atua, ka tinamou te oraanga. (E tatau ia Philipi 4:6, 7.) Mataora tatou i te piri vaitata ki te aronga te inangaro ra iaia. E kua rauka tetai pirianga vaitata ki “te Atua au.” (1 Tesa. 5:23) Me kite tatou, irinaki, e te akarongo ki to tatou Metua, ka tamaru te ’au o te Atua i to tatou ngakau mirimiri ngatā me tupu te manamanata.

2. Eaa i papu ei ia tatou e ka kitea te ’au o te Atua?

² Ka kitea ainei te ’au o te Atua me tupu te taitaia kia tatou, mei te maki totoa, te tumatetenga, te ta tangata, e te takinokino anga? Ka mataku rai tatou i teia au manamanata. Kua ako a Iesu i tana au pipi: “Eiaa e taitaia to kotou ngakau, auraka oki e mataku.” (Ioa. 14:27) Ma te mataora, kua aru te au taeake e te au tuaine i ta Iesu ako. Ma te tauturu a Iehova, kua kitea e ratou te ’au ia ratou e akakoromaki ra i te au timataanga kino.

KA KITEA TE ’AU I TE TUATAU MAKI TOTOA

3. Akapeea tetai maki totoa me tamanata i to tatou ’au?

³ Ka tupu te tauianga o te oraanga mei tetai maki totoa. Akamanako ana i tei tupu ki te manganui mei te maki kino COVID-19. I roto i tetai kimikimi anga, e tere atu i te apa o te tangata tei akakiteia mai e kare i moe meitaki ana i te tuatau o te maki totoa. Kua akatupu te reira i te manako mirimiri ngatā, te taitaia, te kai kava e te apinga akakona, te ta tangata i roto i te ngutuare, e te tamate i tetai uaorai. Me e maki totoa tetai i toou ngai, akapeea koe me tamaru i toou manako apiapi e kia kitea te ’au o te Atua?

4. Akapeea te kite anga i ta Iesu totou no te au rā openga i akatupu ei i te ’au kia tatou?

⁴ Totou a Iesu i te au rā openga, ka tupu te maki totoa e te au maki kino, “i tera ngai i tera ngai.” (Luka 21:11) Akapeea te kite anga i teia me akatupu i te ’au kia tatou? Kare tatou e poitirere me kua tupu te au maki totoa. Kua kite tatou e te tupu nei teia au mea mei ta Iesu i tuatua. E tumu anga tau i reira ta tatou kia akono i ta Iesu akoanga ki te aronga e ora ra i te tuatau openga: “Eiaa kotou e taitaia.”​—Mata. 24:6.

5. (a) Ia Philipi 4:8, 9, eaa ta tatou ka pure me tupu te maki totoa? (e) Akapeea te akarongo anga ki te au rekoti anga autio o te Pipiria me tauturu ia koe?

⁵ Ka akatupu te maki totoa i te manako oripu ua e te mataku. Kua tupu te reira ki te tuaine ko Desi.b Te mate anga tona angakara, cousin, e tetai taote mei te maki kino COVID-19, kua mataku aia e ka makiia aia e ka piri atu ki tona metua vaine pakarikari. Kua akatupu katoa te maki totoa i te turanga ekoko no tana angaanga, manako aia akapeea me tutaki i tana kai e tona are. Kua taitaia maata aia e kare e varea i te moe i te po. Inara kua kitea e Desi te ’au. Akapeea? Kua pure aia kia Iehova kia tauturu mai iaia kia noo maru e kia akamanako i te au mea papu. (E tatau ia Philipi 4:8, 9.) Kua akarongo aia kia Iehova ki tana “tuatua” na roto i te au rekoti anga autio o te Pipiria. Karanga mai aia, “Te reo maru o te tangata tatau kua akapumaana mai i toku manako taitaia e kia akamaara i to Iehova aroa iaku.”​—Sala. 94:19.

6. Akapeea taau apii naau uaorai e te au uipaanga me tauturu ia koe?

⁶ Ka tamanata te tupuanga o tetai maki totoa i te au mea tei matauia e tatou, inara auraka e tuku i te reira kia tamanata i taau apii naau uaorai e te aere anga ki te uipaanga. Te akamaara maira te au tupuanga i roto i ta tatou au puka e te au vitio e te vai tiratiratu ra to tatou au taeake e te au tuaine noatu kua aiteite te au manamanata. (1 Pete. 5:9) Ka tauturu te au uipaanga ia koe kia akamanako ua rai i te au Irava akamaroiroi. E ka oronga mai i te tuatau kia koe kia akapumaana i tetai e koe katoa. (Roma 1:11, 12) Ia koe e akamaara ra ia Iehova e tauturu ra i te au taeake tei rokoia e te maki, te mataku, te tu maromaroa ka akamatutuia toou akarongo e papu ia koe ka rauka rai te tauturu.

7. Eaa te apiianga ka kite koe mei te apotetoro ko Ioane?

⁷ E tauturu ua atu i toou au taeake e te au tuaine. Ka akatupu te maki totoa e kia akatakake tatou ia tatou tataki tai mei tetai au taeake. A te reira taime, penei ka aite toou tu mei to te apotetoro rai ko Ioane. Kua inangaro aia i te kite atu i tona oa ko Gaio. (3 Ioa. 13, 14) Inara kua mārama a Ioane e kare e rauka iaia i te aravei ia Gaio. No reira, kua rave a Ioane i tei rauka iaia; kua tata atu i tetai reta kia Gaio. Me kare e rauka ia koe te aravei i toou au taeake e te au tuaine, e ringi atu ia ratou, e karangaranga na runga i te vitio me kore e tuku imere. Me tauta koe i te aravei i te au taeake Kerititiano, ka tupu te tu tinamou e te ’au kia koe. E pati tauturu ki te aronga pakari me taitaia koe, e e āriki i ta ratou akamaroiroianga.​—Isa. 32:1, 2.

KA KITEA TE ’AU I TE TUATAU TUMATETENGA

8. Akapeea tetai tumatetenga me tamanata i toou ’au?

⁸ Me kua tupu ana te vaipuke kia koe, te ngaruerue enua, me kore te ai ka, penei ka vai rai te taitaia maata no tetai tuatau roa. Me kua takake toou au akaperepere e kua takoreia taau apinga, penei kua taitaia rai koe, ka manako puapinga kore e ka tupu te riri. Kare te aiteanga e e tangata manako apinga koe me kore kua paruparu toou akarongo. Ka tupu rai te manamanata, e penei ka tapapa mai tetai kia manako ekoko rai koe. (Iobu 1:11) Inara noatu te au turanga taitaia, ka kitea rai e koe te ’au. Akapeea?

9. Akapeea a Iesu i te akateateamamao ia tatou no te au tupuanga kino?

⁹ E akamaara i ta Iesu i totou. Kare tatou i aite mei to teianei ao tei manako e kare rava te tumatetenga e tupu kia ratou, ka tapapa tatou e ka tupu rai te au tumatetenga kia tatou. Kua akakite a Iesu ki tana au pipi e ka tupu te “ngaruerue maata i te enua” e tetai atu au tumatetenga i mua ake ka tae mai ei te openga. (Luka 21:11) Kua totou katoa aia e ka tupu ‘maata te kino,’ mei te tā ua, te tā tangata, e te tā anga tamataku. (Mata. 24:12) Kare rava a Iesu i tuatua ana e ka tupu teia au tumatetenga ki te aronga tei akaruke ia Iehova. Te tika, ka tupu rai teia au tumatetenga ki te maata anga o te au tavini tiratiratu o Iehova. (Isa. 57:1; 2 Kori. 11:25) Penei kare a Iehova e paruru temeio ia tatou mei te au tumatetenga pouroa, inara ka oronga mai aia i ta tatou e anoano ra kia noo maru ua e te ’au.

10. Eaa i riro ei e akairo no te akarongo kia akapapa na mua i teianei, no te tumatetenga? (Maseli 22:3)

¹⁰ Ka noo maru ua tatou me tupu poitirere mai te tumatetenga e kua akateateamamao tatou na mua ake. Te akaari maira ainei teia akapapa anga e kare o tatou irinaki anga ia Iehova? Kare. Te akapapa anga i teianei no te tuatau tumatetenga te akaari maira e te irinaki ra tatou i to Iehova rima tauturu. Akapeea? Te ako maira te Tuatua a te Atua e kia akapapa tatou na mua no te au tumatetenga te ka tupu. (E tatau ia Maseli 22:3.) Na roto i te au atikara makatini, te au uipaanga putuputuanga, e te tuatua akakite, kua akamaroiroi mai ta te Atua akaaerenga ia tatou kia akapapa na mua no te au tumatetenga.c Irinaki ainei tatou ia Iehova? Me koia ia, ka rave tatou i teia akoanga i teianei​—i mua ake ka tupu ei te tumatetenga.

11. Eaa taau i kite mai mei te akaraanga o Margaret?

¹¹ Akamanako i te akaraanga o te tuaine ko Margaret. Kua akakiteia kiaia e kia akaruke i tona kainga i te tupuanga tetai ai ka i roto i te vaorakau i tona ngai. No te maata o te tangata e oro ra, kua piritia te mataara i te au motoka e kare e ngai e aere. Kua tupu te auai kerekere takapini, iaia e tiaki ua ra i roto i tona motoka. Inara, kua ora mai a Margaret i te reira tumatetenga no te mea kua akapapa aia na mua ana. I roto i tana kete te vaira tetai mapu ka kimi aia i tetai mataara ke e oro ai. E akaoro ana aia na runga i te reira mataara i mua ana e no reira kua rauka iaia i te aru akaou me tupu ake te tumatetenga. No te mea kua akapapa aia na mua ana, kua ora mai a Margaret i te reira.

12. Eaa ra tatou ka aru ei i te au aratakianga kia ora?

¹² Kia paruru ia tatou e kia akatupu i te tu mako, penei ka akakite mai te aronga mana kia aru tatou i te au ture, kia akaruke i to tatou ngai, e kia aru i te au aratakianga tau tei orongaia mai. E marie tetai pae i te akarongo e ka tavarevare no to ratou inangaro i ta ratou au apinga. Akapeea te au Kerititiano me ariu? Te akakite maira te Pipiria: “E kauraro i te au taoonga katoa o te tangata i te Atu ra; i te ariki ra ei runga rava atu ïa; E te au tutara ra, ei aronga ungaia mai e ia.” (1 Pete. 2:13, 14) Te oronga katoa maira ta te Atua akaaerenga i te aratakianga kia paruru ia tatou. Te akamaara putuputuia maira tatou kia oronga i to tatou numero e te ngai nooanga ki te aronga pakari kia rauka ia ratou i te tuatua mai kia tatou me tupu te tumatetenga. Kua rave koe i te reira? Penei ka orongaia mai te aratakianga kia akaruru ki tetai ngai meitaki, kia akaatea, e kia akaputu i te au apinga tei anoanoia me kore akapeea e aea me tauturu i tetai pae. Me kare tatou e akarongo, ka tuku tatou ia tatou ki roto i te kino e pera katoa te aronga pakari. E akamaara e te akono maira teia aronga tiratiratu ia tatou. (Ebe. 13:17) Karanga mai a Margaret, “Kua irinaki pu tikai au i te aru anga i te aratakianga a te aronga pakari e te akaaerenga i ora mai ei au.”

13. Eaa tei apai mai i te rekareka e te ’au ki te au Kerititiano tei ngere i te ngai?

¹³ E maata te au taeake e te au tuaine tei ngere i te ngai no te tumatetenga natura, te tamaki, e te kai tamaki a te tangata, kua akatanotano i to ratou oraanga ki to ratou turanga ou e kua rave viviki i te au angaanga i te pae vaerua. Mei te au Kerititiano o mua ana tei totoa aere ki te au ngai ke ke no te takinokino anga, kua rave ua atu ratou i te “akakite aere i te tuatua.” (Anga. 8:4) Kua tauturu te angaanga tutu aere ia ratou ki akamou te manako ki runga i te Patireia e kare ki to ratou au turanga ou. No te reira, kua rauka ia ratou te rekareka e te ’au.

KA KITEA TE ’AU I TE TUATAU TAKINOKINO ANGA

14. Akapeea te takinokino anga me tamanata i to tatou turanga ’au?

¹⁴ Ka tamanata te takinokino anga i to tatou turanga ’au. Ka mataora tatou e te merengo ua me uipa kapipiti, me tutu aere, e te rave ra i ta tatou angaanga ma te kore e mataku e ka tapekaia tatou. Me takoreia te reira turanga, penei ka tupu te taitaia kia tatou, te mataku anga e eaa te ka aru mai. E au tu natura ua teia. Inara, kia vai matakite ua tatou. Kua akakite mai a Iesu e ka turori tana au pipi no te takinokino anga. (Ioa. 16:1, 2) Akapeea i reira tatou me noo ’au ua noatu te takinokino anga?

15. Eaa tatou ka kore ei e mataku i te takinokino anga? (Ioane 15:20; 16:33)

¹⁵ Te akakite maira te Tuatua a te Atua: “E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” (2 Timo. 3:12) Kua ngatā i te taeake ko Andrei i te āriki i teia i te araiia anga te angaanga i tona enua. Akamārama mai aia: ‘E maata te Au Kite i konei. Akapeea te aronga mana te opu anga ia matou katoatoa?’ Kua riro teia manako ei akataitaia tikai ia Andrei, e kare aia i noo ’au ua ana. Kua akaruke tetai au taeake i tei tupu kia Iehova, kare i manako ana e kare ratou e opuia. Kua āriki ratou e penei ka tapekaia rai ratou, no reira kare ratou i apiapi mei ia Andrei rai. Kua iki a Andrei i te aru i to ratou tu e kua irinaki pu tikai ki te Atua. Aere ua rai kua rauka akaou tona turanga ’au, kua rekareka aia i teianei noatu te manamanata. Ka tika rai te reira kia tatou. Noatu kua akakite mai a Iesu e kia tapapa tatou i te takinokino anga, kua akamaroiroi katoa mai aia e ka rauka ia tatou kia vai tiratiratu.​—E tatau ia Ioane 15:20; 16:33.

16. Eaa te aratakianga kia kauraro tatou me tupu te takinokino anga?

¹⁶ Me araiia e me patoi pakariia ta tatou angaanga, penei ka rauka mai te aratakianga mei te opati Betela e te aronga pakari. E paruruanga teia ia tatou, kia rauka rai te au kai pae vaerua, e kia tauturu ia tatou kia tutu aere i te au ngai ka rauka. E aru meitaki i te aratakianga me orongaia mai kia koe, noatu me kare koe i mārama tikai i te tumu. (Iako. 3:17) E tetai katoa, auraka e akakite i te au tuatua no to tatou au taeake e te au tuaine me kore no te au angaanga a te putuputuanga ki te aronga kare o ratou tikaanga ki te reira.​—Kohe. 3:7.

17. Mei te au apotetoro rai o te anere mataiti mua, eaa ta tatou ka tauta ua atu i te rave?

¹⁷ Ko tetai tumu maata i tamaki ei a Satani i te iti tangata o te Atua no te mea ko ratou “tei mou marie i te tuatua-akakite a Iesu Mesia ra.” (Apo. 12:17) Auraka e tuku ia Satani e tona ao kia tamataku ia koe. Ka akatupu te tutu aere anga e te apiianga noatu te takinokino anga i te rekareka e te ’au kia tatou. I te anere mataiti mua i te ako anga te au arataki ngati Iuda i te au apotetoro kia akamutu i te tutu aere, kua iki teia aronga tiratiratu i te akarongo ki te Atua. Kua tutu aere ua atu ratou, e kua mataora ratou i te reira. (Anga. 5:27-29, 41, 42) Inara me araiia ta tatou angaanga, kia matakite tatou me rave i te reira. (Mata. 10:16) Me rave tatou i tei meitaki ia tatou, ka rauka ia tatou te ’au mei te akamareka anga ia Iehova e te tutu aere anga i te karere akaora.

“E NOO TE ATUA AU RA KI O KOTOU”

18. Eaa ta tatou kia akamaara no te Tumu o te ’au?

¹⁸ Kia papu e i te tuatau kino tikai, ka rauka rai ia tatou te ’au. A te reira taime, ka anoanoia tatou kia akamaara e ko te ’au tei inangaroia koia oki ko te ’au o te Atua, te ’au no ko mai ia Iehova. E irinaki pu kiaia me tupu kia koe te maki kino, tetai tumatetenga, e te takinokino anga. E piri vaitata ki tana akaaerenga. E akara mamao ki te tuatau manea ki mua. Ia koe e pera ra, “e noo [ïa] te Atua au ra ki o kotou.” (Phili. 4:9) I te atikara ka aru mai, ka uriuri tatou akapeea me tauturu i te au taeake Kerititiano tei rokoia e te kino kia kitea e ratou te ’au o te Atua.