Kite Ratou i te Aroa

KO YOMARA e tona nga tungane​—ko Marcelo e Hiver—​e noo ana ratou i tetai oire meangiti i Guatemala. Kua akamata a Yomara i te apii i te Pipiria ki te Au Kite, e kua piri mai tona nga tungane ki roto i te apii. Inara e manamanata tetai. E matapo ratou tokotoru e kare ratou e kite i te tatau i te braille. No reira, ka tatau to ratou puapii Pipiria i te apii e te au irava Pipiria kia ratou.

E ngata katoa ia ratou i te aere ki te uipaanga putuputuanga. E 40-miniti te mamao te aere ki te Are Uipaanga Patireia vaitata e ka anoano ratou i te tauturu. Inara, kua akanoonoo te au taeake o te putuputuanga kia tae ratou ki te au uipaanga pouroa. Te akamataanga ratou i te rave maroiroi i te apii angaanga orometua o te epetoma, kua tauturu te au taeake ia ratou kia tamou i ta ratou tuanga apii.

Ia Me 2019, kua akamataia te au uipaanga putuputuanga i roto i to ratou oire. I teia tuatau, kua neke mai tetai nga tokorua painia tamou ki to ratou oire. Kua akamou raua kia apii i teia tokotoru kia kite i te tatau e te tata braille, noatu kare teia tokorua e kite ana i te reira. Kua aere raua ki tetai runanga puka no te apii i te braille e akapeea me apii atu i te reira.

I roto i nga mārama ua, kua kite mai teia tokotoru i te tatau braille, e kua akamata ratou i te tere ki mua i te pae vaerua.a I teia taime, a Yomara, Marcelo, e Hiver, e au painia tamou ratou. E tavini tauturu a Marcelo. E rave maroiroi ua ana ratou i te au angaanga pae vaerua i te au epetoma. E maoraora tikai to ratou tu oraora.

Te akameitaki atu nei teia tokotoru i te aroa tauturu o te putuputuanga. “Mei to matou aravei mua anga i te Au Kite, kua akaari mai ratou i te tu aroa Kerititiano,” i karanga ai a Yomara. “E au taeake meitaki tikai to matou i roto i te putuputuanga, e e taokotaianga taeake matou ma te aroa i te ao katoa,” i na Marcelo ei. Te tapapa atu nei a Yomara e tona nga tungane i te tuatau me kite ratou i te enua ei parataito.​—Sala. 37:10, 11; Isa. 35:5.