“E Aere Rai Tatou ki Mua i te Pakari Mou”

1. Eaa ta Iehova e inangaro maira?

ME ANAU ta raua pepe, ko tetai tuatau mataora rava atu teia no tetai tane e te vaine akaipoipo. Noatu to raua inangaro maata i ta raua pepe anau ou, kare raua e inangaro iaia kia vai pepe ua. Ka manata raua me kare ta raua pepe e tupu mai. Mei te reira rai, ka mataora a Iehova me akamata koe i te apii no runga iaia. Inara kare Aia e inangaro kia akamutu koe ki reira. (1 Kori. 3:1) Ka inangaro aia ia koe kia riro mai ei Kerititiano “pakari.”—1 Kori. 14:20.

2. Eaa ta tatou ka uriuri i roto i teia atikara?

² Eaa te tu o tetai Kerititiano pakari? Akapeea tatou e riro mai ei ei Kerititiano tukatau? Akapeea te kai pakari pae vaerua me akamatutu i to tatou pirianga kia Iehova? Eaa tatou ka kopae ei i te irinaki ia tatou uaorai? I teia atikara, ka pau tatou i teia au uianga.

EAA TE TU O TETAI KERITITIANO PAKARI?

3. Akapeea tatou e riro mai ei ei Kerititiano pakari?

³ I roto i te Pipiria, ko te tuatua Ereni tei uriia no te “pakari,” ka aite katoa te reira ki te tu “karape e te tukatau.”a (1 Kori. 2:6) Ka riro mai tatou ei Kerititiano pakari me kore tukatau me tupu ua atu rai to tatou pirianga kia Iehova. Noatu ka rauka ia tatou taua akakoroanga ra, auraka e akamutu i te tupu i te pae vaerua. (1 Timo. 4:15) Ka rauka ia tatou e pera te au mapu kia riro mai ei Kerititiano pakari. Eaa te akapapu maira e kua rauka tetai Kerititiano te tu pakari?

4. Eaa te akataka maira i tetai Kerititiano tukatau?

⁴ Ko tetai Kerititiano tukatau, ka rave aia i te au mea katoatoa ta te Atua e umuumu maira. Kare aia e iki e ko teea tana ka inangaro. E tika ei tangata ara, ka rave aia i te au tarevake. Noatu te reira, kia tauta ua rai aia i te rave i ta te Atua e inangaro maira. Kua kopae aia i te tu tangata taito e ka aru aia i te aerenga manako o Iehova. (Ephe. 4:​22-24) Kua apiiia aia kia rave i te au ikianga pakari tei tau ki ta Iehova au ture e te kaveinga, e kare aia i inangaro i tetai au ture ke i te akaaere i tana au ikianga. Me rave aia i tetai ikianga, ka tauta aia i te akatupu i te reira.—1 Kori. 9:​26, 27.

5. Eaa te ka tupu me kare tetai Kerititiano i tukatau? (Ephesia 4:​14, 15)

⁵ Ko tetai Kerititiano ra kare i tukatau, ka māmā ua aia i te akavareia e te au “ravenga a te tangata” e te “ravenga tini o te pikikaa” e ka irinaki ua aia ki te au tua maani ua a te aronga tei akaruke ia Iehova.b (E tatau ia Ephesia 4:​14, 15.) Penei ka vareae aia i tetai ke, ka taumāro atu, ka riri ua, me kore ka rave i te kino me timataia aia.—1 Kori. 3:3.

6. Akapeea koe me akatutu i to tatou tupu anga i te pae vaerua? (Akara katoa i te tutu.)

⁶ Mei tei taikuia i mua ana, kua akaaiteia te tupu anga i te pae vaerua ki te tupu anga o tetai tamaiti meangiti ki te tangata mamaata. E maata te apinga kare te tamaiti meangiti i kite, no reira ka anoano aia i tetai tangata mamaata kia arataki e kia paruru iaia. Ei akatutuanga, ka mou tetai metua vaine i te rima o tana tamaine me tikoti raua i te mataara. Me maata mai aia, ka tuku te metua vaine iaia kia tikoti koia anake ua inara, ka akamaara aia i tana tamaine kia akara i te au motoka i mua ake ka aere ei. Me pakari mai te tamaine, ka rauka ua iaia i te kopae i te au kino. Mei te reira rai, ka anoano katoa te au Kerititiano kare i tukatau i te tauturu a te au Kerititiano pakari kia kopae i te au kino i te pae vaerua e te rave i te au ikianga tau. No reira me ka rave tetai Kerititiano tukatau i tetai ikianga, ka akamanako aia i te au kaveinga Pipiria kia kite i to Iehova aerenga manako e oti, ka rave i te reira.

7. Ka anoano ainei tetai Kerititiano tukatau i te tauturu a tetai ke?

⁷ Ko te aiteanga ainei e kare tetai Kerititiano tukatau e anoano i te tauturu a tetai ke? Kare. I tetai au atianga, ka pati katoa te aronga tukatau i te tauturu. Inara ko tetai kare i tukatau ake i te pae vaerua, penei ka anoano aia i tetai ke kia akakite eaa tana ka rave e kia rave i tana au ikianga. Ko tetai Kerititiano tukatau ra, ka pati aia i te tauturu a tetai ke tei maata atu to ratou tu pakari e te kite e kua mārama katoa aia e te anoano maira a Iehova iaia kia apai i tana uaorai “apainga.”—Gala. 6:5.

8. Akapeea te au Kerititiano tukatau te tuke anga mei tetai e tetai?

⁸ Mei te aronga mamaata e tuke to ratou tutu mata e to ratou akaraanga, e tuke katoa te tu pae vaerua o tetai Kerititiano tukatau mei te tu pakari, te ngakau toa, te oronga ua e te tangi aroa. No reira me rave te nga Kerititiano tukatau i tetai ikianga, penei ka tuke te reira inara, kua rotai ki te au kaveinga Pipiria. Ka tupu teia me akatumuia ta raua ikianga ki runga i to raua akava ngakau. No te reira, kare raua e akaapa i te ikianga a tetai e tetai mari ra ka vai taokotai ua raua.—Roma 14:10; 1 Kori. 1:10.

AKAPEEA TATOU E RIRO MAI EI EI KERITITIANO TUKATAU?

9. Ka tupu ua ainei tatou i te pae vaerua? Akamārama mai.

⁹ I te tuatau ka aereia, ka tupu tetai tamaiti i te pae kopapa inara kare tetai tangata e tupu ua i te pae vaerua. Ei akaraanga, kua āriki te au taeake e te au tuaine i Korinetia i te nuti meitaki, kua papetito, kua akatainuia e te vaerua tapu e kua puapingaia mei te au apiianga a te apotetoro ko Paulo. (Anga. 18:​8-11) Inara, i tetai au mataiti i muri ake i to ratou papetitoanga, kare rai ratou i tukatau. (1 Kori. 3:2) Akapeea tatou me akapapu e kare teia e tupu kia tatou?

10. Eaa ta tatou ka rave kia tukatau tatou? (Iuda 20)

¹⁰ Kia riro mai ei Kerititiano tukatau, ka anoanoia tatou i te akatupu i te inangaro na mua. Ko te “aronga kite kore,” koia oki te aronga tei inangaro kia vai tamariki ua i te pae vaerua, kare rava ratou e tukatau. (Mase. 1:22) Kare tatou e inangaro kia aite mei tetai aronga mamaata tei irinaki ua ki to ratou au metua. Mari ra, ka inangaro tatou i te akapapu e te tupu ra to tatou pirianga kia Iehova. (E tatau ia Iuda 20.) Me te tauta ra koe kia karape, e pure kia Iehova kia oronga mai i te “inangaro e te rave” i taau e akakoro ra.—Phili. 2:13.

11. Eaa te ka tauturu ia tatou kia riro mai ei au Kerititiano tukatau? (Ephesia 4:​11-13)

¹¹ Kare a Iehova e tapapa ia tatou kia tukatau ma te kore e tauturu. Kua oronga mai aia i te aronga pakari e te au puapii i roto i te putuputuanga Kerititiano i te tauturu ia tatou kia riro mai ei ‘au tangata pakari’ i te pae vaerua, e “kia taea te aite ra i te ki o te Mesia i te maata.” (E tatau ia Ephesia 4:​11-13.) Kua oronga katoa mai a Iehova i tona vaerua tapu i te tauturu ia tatou kia rauka te “ngakau o te Mesia.” (1 Kori. 2:​14-16) E pera, kua oronga mai te Atua i te au Evangeria e ā kia akaari mai i to Iesu manako, tana i tuatua e tana i rave i tona tuatau i te enua nei. Na te aru anga i to Iesu aerenga manako e tana i rave, ka riro mai koe ei Kerititiano tukatau.

TE TUANGA A TE KAI PAKARI PAE VAERUA

12. Eaa “te tuatua mua o te Mesia”?

¹² Kia riro mai ei Kerititiano tukatau, ka anoano katoaia tatou kia apii maata atu “i te tuatua mua o te Mesia,” koia oki te au apiianga mua no runga i te Mesia. Te kapiti maira te tataraara, te akarongo i te Atua, te papetito e te tuakaouanga. (Ebe. 6:​1, 2) Ko teia te au apiianga puapinga te irinaki ra te au Kerititiano. Ko teia ta te apotetoro ko Petero i akakite ki te urupu tangata i te tuatau o te Penetekote. (Anga. 2:​32-35, 38) Kia riro mai ei pipi na Iesu, ka anoanoia tatou kia āriki i teia au apiianga. Kua akamatakite a Paulo e ko tetai tei patoi i te apiianga no te tuakaouanga, te patoi katoa ra aia i te katoaanga o te au apiianga. (1 Kori. 15:​12-14) No reira, auraka tatou e noo ua ki runga i te au apiianga mua o te tuatua mou.

13. Eaa ta tatou ka rave kia puapingaia mei te kai pakari pae vaerua tei taikuia ia Ebera 5:14? (Akara katoa i te tutu.)

¹³ Tei tuke ki te apiianga mua, ko te kai pakari pae vaerua te kapiti maira i te ture a Iehova e tana au kaveinga te ka tauturu ia tatou kia mārama i tona aerenga manako. Kia puapingaia mei teia kai pakari, ka anoanoia tatou kia apii i te Pipiria, akamanako oonu i ta tatou i apii mai e oti taangaanga i te reira. Me pera tatou, te apii ra tatou i te rave i te au ikianga te ka akamareka ia Iehova.c—E tatau ia Ebera 5:14.

14. Akapeea a Paulo te tauturu anga i tona au taeake i Korinetia kia tukatau?

¹⁴ E ngatā ana no tetai Kerititiano kare i tukatau ake i te rave i tetai ikianga meitaki me kare e ture no te reira i roto i te Pipiria. Penei ka manako tetai pae e ka rauka ua ia ratou i te rave i ta ratou i inangaro. Penei ka pati tetai pae no tetai ture. Ei akaraanga, kua pati ana te au Kerititiano i Korinetia ia Paulo kia akanoo i tetai ture me ka akatikaia ratou i te kai i te au kai tei akaatingaia ki te au itoro. Kare a Paulo i akakite eaa ta ratou ka rave mari ra, kua akaari aia e ka rauka ia ratou i te iki i te “au mea tika” tei tau ki to ratou akava ngakau. Kua taiku aia i te au kaveinga Pipiria ei tauturu ia ratou kia rauka te akava ngakau meitaki e kia kore ratou e akaturori i tetai ke. (1 Kori. 8:​4, 7-9) Na teia tu, te tauturu nei a Paulo i te au taeake i Korinetia kia tupu i te pae vaerua, kia kore e irinaki ki tetai tangata e kia kore e kimi i tetai au ture.

15. Akapeea a Paulo te tauturu anga i te au Kerititiano Ebera kia tupu i te pae vaerua?

¹⁵ E apiianga puapinga ta tatou ka kite mai mei ta Paulo i tata ki te au Kerititiano Ebera. Kare tetai pae i tupu ana i te pae vaerua; “kua riro io nei [ratou] mei te aronga e tau ia ratou te u, eiaa te kai pakari.” (Ebe. 5:12) Kare ratou i āriki i te au mea ou ta Iehova i apii mai na roto i te putuputuanga. (Mase. 4:18) Ei akaraanga, e maata te ngati Iuda te akono nei rai i te Ture a Mose noatu kua takore te atinga o Iesu i te reira i tetai 30 mataiti i mua atu ana. (Roma 10:4; Tito 1:10) I tera 30 mataiti, tikaanga tikai ka mārama te au Kerititiano e kare ratou e anoanoia kia akono i te Ture! Ko tetai ua atu ka tatau i ta Paulo reta ki to Ebera, ka kite mai e te apii nei aia i te au tuatua mou. Kua tauturu tana reta ia ratou kia kite i te akanoonooanga ou ta Iehova i tuku mai no te akamori iaia e kia rauka ia ratou te tu ngakau toa me tutu aere noatu te patoianga a te ngati Iuda.—Ebe. 10:​19-23.

KOPAE I TE IRINAKI IA KOE UAORAI

16. Eaa atu ta tatou ka rave kia riro mai ei Kerititiano tukatau?

¹⁶ Kia tauta tatou kia riro mai ei Kerititiano tukatau e pera kia tamou i te reira. Te aiteanga, auraka tatou e manako kare tatou e inga. (1 Kori. 10:12) E “akara matariki” ia tatou uaorai kia akapapu e te tupu ua ra tatou i te pae vaerua.—2 Kori. 13:5.

17. Akapeea ta Paulo reta ki to Kolosa te akaari anga i te puapinga kia vai tamou ua ei Kerititiano tukatau?

¹⁷ I roto i tana reta ki te au taeake i Kolosa, akakite akaou a Paulo e ka anoanoia ratou kia vai tamou ua ei au Kerititiano tukatau. Noatu e au Kerititiano tukatau ratou, kua akamatakite a Paulo auraka ratou kia akavareia e to teianei ao. (Kolo. 2:​6-10) Kua pure putuputu katoa a Epaphera no teia au taeake “kia mou apa kore,” me kore kia vai tukatau ua ratou. (Kolo. 4:12) Eaa te apiianga? Kua mārama a Paulo raua ko Epaphera e ka anoanoia te tautaanga maata e te tauturu a te Atua e rauka ai te tukatau. Kua inangaro raua i te au taeake i Kolosa kia vai tamou ua ei au Kerititiano tukatau noatu te au manamanata ka tupu.

18. Eaa te ka tupu ki tetai Kerititiano tukatau? (Akara katoa i te tutu.)

¹⁸ Kua akamatakite a Paulo i te au taeake i Ebera e penei ka ngere ratou i ta te Atua akameitakianga. Me patoi tetai Kerititiano i te akarongo kia Iehova, ka ngatā iaia i te tataraara e kia akakoreia mai tana ara e te Atua. Te mea mataora, kare te reira i tupu ana ki tera au taeake Ebera. (Ebe. 6:​4-9) Akapeea te aronga i teia tuatau kua paruparu me kore kua akaateaia mei te putuputuanga e kua tataraara i muri mai? Ka akaari mai to ratou tu akaaka e tuke ratou mei te aronga ta Paulo e akataka ra. E tika me oki mai ratou kia Iehova, ka anoano ratou i tana tauturu. (Eze. 34:​15, 16) Ka pati te aronga pakari i tetai taeake me kore tuaine tukatau kia tauturu i te akamatutu akaou i to ratou pirianga kia Iehova.

19. Eaa ta tatou ka tauta ua rai i te rave?

¹⁹ Me te tauta ra koe i te riro mai ei Kerititiano tukatau, ka taeria e koe te reira akakoroanga! E apii ua rai i te au kai pakari pae vaerua e te akatano i toou aerenga manako kia tau ki to Iehova. E me riro mai koe ei Kerititiano tukatau, e rave tamou ua rai i te reira.