Eaa ta Tatou i Kite no ta Iehova Akavaanga a te Tuatau ki Mua?

1. Eaa tatou i karanga ai e te noo nei tatou i te tuatau mataora?

TE NOO nei tatou i roto i te tuatau mataora! I te au rā, te kite nei tatou i te au totou e akatupuia nei. Ei akaraanga, te putoto nei “te ariki i apatonga” e “te ariki no apatokerau” kia tutara raua i teianei ao. (Dani. 11:40) Te tutu aereia nei te nuti meitaki o te Patireia o te Atua i teianei ao e e mirioni ua atu tangata te tavini nei ia Iehova. (Isa. 60:22; Mata. 24:14) E maata te au kai pae vaerua te tu’aia nei i “te ora mou.”—Mata. 24:​45-47.

2. Eaa ta tatou i papu, inara eaa ta tatou ka kite mai?

² Ka tauturu ua rai a Iehova ia tatou kia mārama i te au tupuanga puapinga a te tuatau ki mua. (Mase. 4:18; Dani. 2:28) Papu ia tatou me tupu te mate maata, ka rauka ia tatou i te akakoromaki e kia vai taokotai i tera tuatau ngatā. Inara, ka anoanoia tatou kia kite e ko tetai au mea ka tupu a te tuatau ki mua, kare tatou i kite. I teia atikara, ka uriuri tatou eaa ta tatou ka akamanako akaou no runga i tera au tupuanga. E oti, ka uriuri tatou i tetai au mea ta tatou i kite no te tuatau ki mua e akapeea to tatou Metua i te rangi me rave i tana akavaanga.

TA TATOU KARE I KITE

3. Eaa ta tatou i tamanako no ta Iehova ka rave me akamata te mate maata, e eaa tatou i manako akapera ai?

³ I mua ana, kua karanga tatou me akamata te mate maata kare te aronga tei kore i kite ia Iehova e ora mai me tupu a Aramakito. Kua tamanako matou i tei tupu i te tuatau o te Vaipuke e totou te reira no te tuatau ki mua. Ei akaraanga, i te topirianga a Iehova i te ngutupa o te araka, kare e tangata e tomo ki roto. Mei te reira rai, no te au tangata kare e irinaki ana ia Iehova kare ratou e ora me akamata te mate maata.—Mata. 24:​37-39.

4. Eaa ta tatou i tamanako no te tupuanga o te Vaipuke? Akamārama mai.

⁴ Ka tamanako ainei tatou i te tupuanga o te Vaipuke ei totou no te tuatau ki mua? Te pauanga kare. No teaa ra? No te mea kare te Pipiria i akakite ana no runga i teia.a Kua akaaite a Iesu i ‘te rā o Noa’ ki tona aerenga mai, inara kare aia i tuatua ana e pouroa te au mea tei tupu i te tuatau o Noa ka akatupuia a te tuatau ki mua; mei te topirianga a Iehova i te ngutupa o te araka. Inara e au apiianga tetai ka kite mai tatou mei ia Noa e te Vaipuke.

5. (a) Eaa ta Noa i rave i mua ake i te Vaipuke? (Ebera 11:7; 1 Petero 3:20) (e) Kia tau ki te angaanga tutu aere, eaa te turanga o teia rā tei aite ki to Noa tuatau?

⁵ Te rongo anga a Noa i te akamatakiteanga a Iehova, kua akaari aia i tona irinaki na te pātu anga i tetai araka. (E tatau ia Ebera 11:7; 1 Petero 3:20.) Mei te reira katoa, ka akarongo te tangata i te nuti meitaki no runga i te Patireia o te Atua e ka anoanoia ratou kia rave i te au tauianga. (Anga. 3:​17-20) Kua kapiki a Petero ia Noa e ‘tangata ako i te tuatua-tika.’ (2 Pete. 2:5) Inara, mei tei uriuriia i te atikara i mua ana kare tatou i kite me kua tutu aere ana a Noa i te nuti meitaki ki te au tangata ravarai i te enua i mua ake ka tupu ei te Vaipuke. I teia rā, te tauta nei tatou i te tutu aere ma te maroiroi ki te au tangata ravarai i te ao nei. Noatu e te tauta pakari nei tatou kare rai e taeria te aronga katoatoa e te nuti meitaki i mua ake ka tae mai ei te openga. No teaa ra?

6-7. Eaa tatou ka tamanako ei kare e taeria te au tangata ravarai e te nuti meitaki i mua ake ka tae mai ei te openga? Akamārama mai.

⁶ Akamanako ana eaa ta Iesu i tuatua no runga i ta tatou angaanga tutu aere. Kua totou aia e ka tutu aereia te nuti meitaki o te Patireia e “kako rava ake te ao katoa nei; ei kite no te pa enua ravarai.” (Mata. 24:14) I teia tuatau te akatupuia nei teia totou. Kua neneiia te karere Patireia i roto i te 1,000 au reo, e na roto i te jw.org website, ka rauka i te au tangata ravarai i te apii i te nuti meitaki o te Patireia o te Atua.

⁷ Inara, kua akakite katoa a Iesu ki tana au pipi e “kare e kako te au oire,” i te tutu aere ki te katoatoa i mua ake ka tae mai ei aia. (Mata. 10:23; 25:​31-33) E mea tika katoa te au tuatua a Iesu no tatou i teia rā. E mirioni ua atu tangata e noo nei ki te au ngai te araiia nei te angaanga tutu aere. Kapiti mai, e anere ua atu au pepe e anauia nei i te au rā ravarai. Ka aruaru tatou i te itae i te au tangata mei “te pa enua katoa, e te au kopu, e te au reo” ki te nuti meitaki. (Apo. 14:6) Inara ko te tika, kare e taeriaia te nuti meitaki ki te au tangata ravarai i mua ake ka tae mai ei te openga.

8. Eaa te uianga ta tatou ka ui no ta Iehova akavaanga i te tangata a te tuatau ki mua? (Akara katoa i te au tutu.)

⁸ No reira te ui nei te uianga: Eaa te ka tupu ki te aronga kare i rongo ana i te nuti meitaki i mua ake ka akamata ai te mate maata? Akapeea a Iehova e tana Tamaiti me akava ia ratou? (Ioa. 5:​19, 22, 27; Anga. 17:31) Karanga te tumu irava o teia atikara e “kare rava [a Iehova] i anoano e kia mate atu tetai kia rauka katoatoa ra te tataraara.” (2 Pete. 3:9; 1 Timo. 2:4) Noatu kua kite tatou i teia no runga ia Iehova kare ra aia i akakite mai akapeea aia me akava i te tangata kare i rongo ana i te nuti meitaki. E tika kare aia e anoanoia kia akakite mai eaa tana ka rave.

9. Eaa ta Iehova e akakite maira kia tatou i roto i te Pipiria?

⁹ I roto i tana Tuatua, te akaari maira a Iehova kia tatou i tetai au mea tana ka rave. Ei akaraanga, akakite te Pipiria e ka akatu mai a Iehova i te “aronga tuatua-tika kore” tei kore i rongo ana i te nuti meitaki e kua taui i to ratou tu. (Anga. 24:15; Luka 23:​42, 43) Penei ka ui tatou i tetai au uianga puapinga.

10. Eaa tetai au uianga ka ui tatou?

¹⁰ Ka takoreia ainei te aronga tei mate i te tuatau o te mate maata e kare e akatuakaouia mai? Te akataka maira te au Irava no te aronga tei patoi ia Iehova e tei takoreia i roto i te tamaki o Aramakito, kare ratou e akatuia mai. (2 Tesa. 1:​6-10) Ei akaraanga, akapeea te au tangata tei mate no te maki, te pakarikari e kua tamateia i roto i tetai tumatetenga me kore e tetai tangata ke? (Kohe. 9:11; Zeka. 14:13) Penei ko ratou tetai pae o te “aronga tuatua-tika kore” te ka akatuia mai i te ao ou? Kare tatou i kite.

TA TATOU I KITE

11. Akapeea te tangata me akavaia i te tuatau ia Aramakito?

¹¹ Kua kite tatou i tetai au mea ka tupu a te tuatau ki mua. Ei akaraanga, i te tuatau ia Aramakito, ka akavaia te au tangata no runga i ta ratou akono anga i te au taeake o Karaiti. (Mata. 25:40) Ko te aronga tei akavaia ei mamoe, ka turuturu ratou i te au taeake akatainuia o Karaiti. Kua kite katoa tatou me akamata te mate maata, ka vai rai te au taeake akatainuia o Karaiti i te enua e kare ratou i apainaia ake ki te rangi, kia akamata roa te tamaki o Aramakito. I te tuatau e noo ra te au taeake o Karaiti i te enua nei, ka turuturu te aronga ngakau tae ia ratou e ta ratou angaanga e rave ra. (Mata. 25:​31, 32; Apo. 12:17) Eaa teia i puapinga ai?

12-13. Eaa ta tetai pae ka manako me kite ratou i te takoreia anga o “Babulonia maata”? (Akara katoa i te au tutu.)

¹² I muri mai me akamata te mate maata, ka kite tetai pae me takoreia a “Babulonia maata.” Penei ka maara ia ratou e kua akakite ana te Au Kite o Iehova e ka tupu te reira. Ka irinaki ainei tetai pae ia Iehova me kite ratou i te takore anga o Babulonia Maata i te tuatau mate maata?—Apo. 17:5; Eze. 33:33.

¹³ Kua aite rai ki tei tupu i te tuatau o Mose i Aiphiti. E akamaara e maata “te tangata ke ke” tei kapiti atu kia Iseraela i te akaruke anga ia Aiphiti. Kua irinaki ratou ia Iehova te tupuanga te au akamatakiteanga a Mose no te Mate Ngauru. (Exo. 12:38) Me tupu tetai turanga aiteite i muri ake i te takoreia anga a Babulonia Maata, ka manako ainei tatou e kare i te mea tau no te tangata kia piri mai kia tatou i mua ake ka tae mai ei te openga? Kare! Ka inangaro tatou i te akaari i te tu o to tatou Metua i te rangi, “e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou.”b—Exo. 34:6.

14-15. Ka akatumuia ainei te ora mutu kore o tetai tangata ki runga i tona mate anga me kore te ngai e noo ra aia? Akamārama mai. (Salamo 33:​4, 5)

¹⁴ Me rongo tatou i te tuatua a tetai, “E mea meitaki kia mate tetai o toku ngutuare i mua ake i te mate maata kia akatuakaouia mai aia.” E akakoroanga meitaki to ratou no teia au tuatua. Ko te ora mutu kore o tetai kare i akatumuia ki runga i te mate anga o tetai tangata. E akava meitaki a Iehova e ka rave aia i te tika ma te tau. (E tatau ia Salamo 33:​4, 5.) E mea papu e ka rave “te Akava i to te ao katoa nei” i te tika.—Gene. 18:25.

¹⁵ Ko tetai mea katoa ko te ora mutu kore o tetai tangata kare i akatumuia ki te ngai e noo ra aia. Kare a Iehova e akava i te mirioni ua atu tangata ei “puakanio” no te mea ua nei te noo ra ratou ki te au enua kare e tutu aereia ana te karere Patireia. (Mata. 25:46) Te akaperepere ra te Akava tuatua tika o te ao katoa i teia aronga. Kare tatou i kite eaa ta Iehova ka rave i te tuatau o te mate maata. Penei ka rauka i tetai pae te tuatau i te apii no runga ia Iehova e te iki i te tavini iaia me akatapuia tona ingoa ki mua i te katoatoa.—Eze. 38:16.

16. Eaa ta tatou i kite mai no runga ia Iehova? (Akara katoa i te tutu.)

¹⁶ Na roto i te apii Pipiria, kua kite tatou i to Iehova akaperepere maata i te oraanga o te tangata. Kua akaatinga aia i te oraanga o tana Tamaiti no tatou kia ora e tuatau ua atu. (Ioa. 3:16) Kua kite meitaki tatou i to Iehova aroa takinga meitaki. (Isa. 49:15) Kua kite aia ia tatou tataki tai e to tatou ingoa. Te tika, kua kite aia ia tatou e me mate tatou, ka akatuakaou mai aia ia tatou ma te au mea tataki tai ta tatou i rave e to tatou au tupuanga! (Mata. 10:​29-31) E tumuanga meitaki ta tatou kia irinaki e ka akava to tatou Metua aroa i te rangi ia tatou tataki tai ma te tu pakari, tuatua tika e te aroa ua.—Iako. 2:13.

17. Eaa ta tatou ka uriuri i roto i te atikara ka aru mai?

¹⁷ Ka riro teia au akamāramaanga ou ei tauturu ia tatou kia rave rapurapu i ta tatou angaanga tutu aere. Eaa tatou i tuatua akapera ai? E eaa tei akakeu ia tatou kia tutu aere ua atu i te nuti meitaki? Ka uriuri tatou i te pauanga i roto i te atikara ka aru mai.