Kia Āriki Akaaka i Taau Kare i Kite

1. Eaa ta Iehova i oronga mai no tatou, e no teaa ra?

KUA anga a Iehova ia tatou ma te umere, kia akamanako meitaki, kia apii i te au mea ou e kia taangaanga i te reira. Eaa aia i anga ei ia tatou ma teia tu? Te inangaro ra aia kia “rauka ia koe te kite i te Atua,” e kia akamori iaia ma te tu tau.—Mase. 2:​1-5; Roma 12:1.

2. (a) Eaa to tatou au kotinga? (Iobu 37:​23, 24) (Akara katoa i te tutu.) (e) Eaa i puapinga ai kia āriki tatou e kua kotingaia to tatou kite?

² E manganui ta tatou ka kite, inara kua kotingaia te reira. (E tatau ia Iobu 37:​23, 24.) Akamanako i te akaraanga o Iobu. Kua ui a Iehova i te au uianga kiaia kia kite e iti ua tona mārama. Kua taakaaka te reira ia Iobu e kua akatano aia i tona aerenga manako. (Iobu 42:​3-6) E āriki katoa tatou e kua kotingaia to tatou kite. No reira, kia irinaki tatou e ka akakite a Iehova i te au mea e anoano tikai ra tatou kia rave no te au ikianga meitaki.—Mase. 2:6.

3. Eaa ta tatou ka uriuri i roto i teia atikara?

³ I roto i teia atikara, ka uriuri tatou i tetai au mea kare tatou i kite e te au manamanata ta tatou ka na roto. Ka apii katoa tatou eaa i meitaki ei e kua kotingaia to tatou kite. No reira, ka tauturu teia apii ia tatou kia irinaki e na Iehova, ko tei rauka iaia te “kite katoatoa,” e akakite mai i ta tatou ka anoanoia kia kite.—Iobu 37:16.

KARE TATOU I KITE AEA TE OPENGA E TAE MAI EI

4. Ia Mataio 24:​36, eaa ta tatou kare i kite?

⁴ E tatau ia Mataio 24:36. Kare tatou i kite aea te openga e tae mai ei. Ia Iesu i te enua nei, kare katoa aia i kite i “te reira rā e te reira ora.”a Kua akapapu ra aia ki tana au pipi e ko Iehova anake tei kite i te taime tau. (Anga. 1:​6, 7) Kua akanoo a Iehova i te ora no te openga o teia ao, e no reira kare tatou e anoanoia kia kite aea te reira e tupu ei.

5. No te mea kare tatou i kite aea te openga e tae mai ei, eaa ta tatou ka akamanako?

⁵ Kia tau ki ta Iesu tuatua, kare tatou i kite eaa te roa e tae mai ei te openga. No reira, me kua roa koe i te tiaki anga i te rā o Iehova, penei ka manako taitaia koe e ka timataia toou akarongo. Me kore ka ngatā ia tatou i te akakoromaki i te au tuatua akakino a te kopu tangata e tetai ke. (2 Pete. 3:​3, 4) Ka manako katoa tatou e naringa kua kite tatou i te ora e tae mai ei te openga, ka rauka i reira ia tatou i te tiaki marie e te akakoromaki i te au timataanga.

6. Eaa i meitaki ei e kare tatou i kite aea te openga e tae mai ei?

⁶ No te mea kare a Iehova i akakite mai aea e tae mai ei te openga, e atianga teia kia akaari i to tatou akaperepere e te irinaki iaia. Ka inangaro tatou i te tavini ia Iehova e tuatau ua atu, kare no te au rā openga ua. No reira, eiaa e akamanako aea e tae mai ei “te rā o te Atua,” mari ra kia akamou ki te au mea meitaki ka tupu a te reira rā. Me pera tatou, ka akavaitata tera ia tatou kia Iehova, ka irinaki iaia e ka rave i te au mea ei akamareka iaia.—2 Pete. 3:​11, 12.

7. Eaa ta tatou i kite?

⁷ E mea puapinga kia akamanako ki runga i ta tatou i kite. Kite tatou e kua akamata te au rā openga i te 1914. Kua oronga mai a Iehova i te au totou Pipiria kia akapapu i te reira mataiti e kua akakite katoa aia i te au tupuanga. No te mea kua tupu teia, te akapapu maira kia tatou e “kua vaitata te rā maata o Iehova.” (Zepha. 1:14) Kua kite tatou i ta Iehova e anoano maira kia rave tatou, koia oki kia “tutu aereia te evangelia o te basileia.” (Mata. 24:14) Te raveia nei teia i roto i te 240 au enua e kua tere atu i te 1,000 au reo. No reira, kare tatou e anoanoia kia kite i “te reira rā e te reira ora” no te rave i teia angaanga puapinga.

KARE TATOU I KITE EAA TA IEHOVA KA RAVE

8. Eaa “ta te Atua ra angaanga” e akataka ra e ka rave aia? (Koheleta 11:5)

⁸ Kare tatou i kite pouroa i “ta te Atua ra angaanga.” (E tatau ia Koheleta 11:5.) Akataka ra tera tuatua i ta Iehova ka rave no te akatupu i tona anoano. Kare tatou i kite tikai eaa a Iehova i akatika ai i teia kia tupu, me kore eaa tana ka rave ei tauturu ia tatou. (Sala. 37:5) Kua akaaiteia tana angaanga ki te tupuanga o tetai pepe ou i roto i te kopu o te mama, kare te aronga kite i mārama meitaki i te reira. Inara, ko Iehova anake tei kite.

9. Kare tatou i kite akapeea tikai a Iehova me tauturu ia tatou, inara eaa ta tatou ka akamanako?

⁹ Kare tatou i kite akapeea tikai a Iehova me tauturu ia tatou, no reira ka ngatā rai i te rave i te au ikianga tau. Penei ka apiapi tatou i te rave maata atu i te angaanga tutu aere, mei te akamāmā i te oraanga e te neke ki tetai ngai te anoanoia ra te tauturu. Penei, ka ekoko tatou me te mareka ra te Atua me kare e taeria ta tatou au akakoroanga pae vaerua, me te puapinga ra ta tatou angaanga pakari no te tutu aere, me kore me tupu te manamanata mei te angaanga pātu are.

10. No te mea kare tatou i kite tikai eaa ta Iehova ka rave, eaa te nga tu ka akaari tatou?

¹⁰ No te mea kare tatou i kite tikai eaa ta Iehova ka rave, ka rauka ra ia tatou i te akaari i te au tu manea mei te tu akaaka e te tau. Kua kite tatou e teitei atu to Iehova manako e tona au aerenga ki to tatou. (Isa. 55:​8, 9) Kua apii katoa tatou kia irinaki papu ia Iehova, nona oki i manuia ai tatou. Me puapingaia ta tatou angaanga tutu aere e te angaanga pātu are, ka akapaapaa ua rai tatou ia Iehova. (Sala. 127:1; 1 Kori. 3:7) Me kare e tupu ta tatou i inangaro, e akamaara te kite maira a Iehova. (Isa. 26:12) Ka rave tatou i ta tatou ka rauka e kia irinaki e ka tauturu ua rai a Iehova ia tatou. Noatu kare aia e taangaanga ana i te au semeio mei te tuatau Pipiria, papu e ka arataki a Iehova ia tatou.—Anga. 16:​6-10.

11. Eaa te au mea puapinga ta tatou i kite?

¹¹ Kua kite tatou e tu aroa, tau e te pakari to Iehova. Te akaperepere ra aia i ta tatou e rave ra nona e no to tatou au taeake e te au tuaine. E kua papu ia tatou e ka akameitaki ua rai a Iehova i te aronga tei vai tiratiratu kiaia.—Ebe. 11:6.

KARE TATOU I KITE EAA TE KA TUPU APOPO

12. Eaa ta tatou i apii mai mei ia Iakobo 4:​13, 14?

¹² E tatau ia Iakobo 4:​13, 14. Kare tatou i kite eaa te ka tupu kia tatou apopo. I roto i teianei ao, karanga te irava “e tuatau ra, e te manuia ua, to te tangata.” (Kohe. 9:11) No reira, kare tatou i kite me ka tupu rai ta tatou au parani e me ka ora ua atu tatou i te kite i te reira.

13. Eaa to tatou manako no te mea kare tatou i kite eaa te ka tupu a te tuatau ki mua?

¹³ Ka riro ta tatou kare i kite i te akateiaa ia tatou. Akapeea ra? Penei ka manamanata tatou eaa te ka tupu e kare tatou e mataora. Ka tupu te mamae ngakau e te taitaia kia tatou no te au tumatetenga poitirere e te au mea manako koreia. E me kare e akatupuia ta tatou e inangaro ra, ka riri e ka manako paruparu tatou.—Mase. 13:12.

14. Eaa ta tatou ka anoanoia kia rave e mataora ai? (Akara katoa i te au tutu.)

¹⁴ Noatu eaa te ka tupu i roto i to tatou oraanga, ka tavini tatou ia Iehova no to tatou akaperepere iaia. Akakite te Pipiria eiaa tatou e manako e ka paruru a Iehova ia tatou mei te au timataanga katoatoa e kare aia i akanoo takere eaa te ka tupu i roto i to tatou oraanga. Kua kite aia e ka mataora tatou, noatu kare tatou i kite eaa te ka tupu a te tuatau ki mua. Kia irinaki ra tatou i tana aratakianga e kia akarongo kiaia. (Iere. 10:23) No reira, me uri tatou kiaia me rave i te au ikianga, te karanga ra tatou: “Kia tika [ia Iehova] ra, e kia roa to tatou a’o, e rave ïa tatou i teia, e i tera.”—Iako. 4:15.

15. Eaa ta tatou i kite no te tuatau ki mua?

¹⁵ Kare tatou i kite eaa te ka tupu i te au rā ka aereia, inara kua taputou a Iehova i te ora mutu kore i te rangi e i te enua. Kua kite tatou e kare aia e pikikaa e ka akatupu ua rai i tana au taputou. (Tito 1:2) Koia anake tei ‘akakite i te openga mei muatangana mairai, e mei te au tuatau taito mairai i te au mea e kare i tupu.’ Ko tera tei tupu i te tuatau taito e ka tupu katoa te reira a te tuatau ki mua. (Isa. 46:10) Kua papu katoa ia tatou e kare rava tetai apinga e akataka ke ia tatou mei to Iehova aroa. (Roma 8:​35-39) Ka oronga mai aia i te pakari, te pumaana e te maroiroi kia rauka ia tatou i te akakoromaki. E mea papu ka tauturu e ka akameitaki a Iehova ia tatou.—Iere. 17:​7, 8.

KITE MEITAKI TIKAI A IEHOVA IA TATOU

16. Ia Salamo 139:​1-6, eaa ta Iehova i kite no runga ia tatou, e eaa to tatou manako?

¹⁶ E tatau ia Salamo 139:​1-6. Kua kite meitaki a Iehova ia tatou. Kite aia i to tatou tu e ta tatou e manako ra. Ta tatou ka tuatua e te au mea i roto i to tatou ngakau. Kite pouroa aia i te au mea ta tatou e rave ra e te tumu i rave ei tatou i te reira. Akakite te Ariki ko Davida e kua papa ua a Iehova i te tauturu ia tatou. E mea pumaana tikai e te akaperepere nei te Atua Ngateitei o te ao katoa, ko Iehova Tei Anga i te rangi e te enua ia tatou! Karanga a Davida: “E mea taka ke ïa iaku taua kite ra; kare e taea e au i te teitei.”—Sala. 139:6.

17. Eaa i ngatā ai ia tatou i te āriki e kua kite meitaki a Iehova ia tatou?

¹⁷ Penei no to tatou tupuanga, ta tatou peu e te irinakianga i mua ana, kua ngatā ia tatou i te kite e te inangaro maira a Iehova ia tatou. E penei kua manako tatou e no te au ara kino i rave ei tatou i mua ana, kare a Iehova e inangaro ia tatou kia manako e mamao aia, kua pera rai a Davida. (Sala. 38:​18, 21) Me kore ko tetai tangata tei taui i tona oraanga kia akamareka i te Atua, penei ka ui aia, ‘Me kua kite meitaki te Atua iaku, eaa aia i anoano ei kia taui au i toku oraanga kia tau kiaia?’

18. Eaa i puapinga ai ia tatou kia āriki e kua kite meitaki tikai a Iehova ia tatou? (Akara katoa i te au tutu.)

¹⁸ Kua kite meitaki tikai a Iehova ia tatou e ta tatou angaanga meitaki e rave ra. Inara, te kite katoa ra aia i to tatou au tarevake, kua mārama aia i te tumu i pera ai tatou e te akaperepere maira ia tatou. (Roma 7:15) Me mārama tatou e te kite meitaki ra a Iehova i to tatou tu, ka akaketaketaia tatou kia tavini tiratiratu iaia ma te rekareka.

19. Eaa tei akapapu mai e kua kite tatou ia Iehova?

¹⁹ Kua kite tatou e ko te Atua oki te aroa. E mea papu tikai te reira. (1 Ioa. 4:8) Kite tatou i tana au kaveinga tuatua tika e akaari ra no tona akaperepere ia tatou e kia mataora to tatou oraanga. Inangaro aia kia rauka te ora mutu kore e tuatau ua atu. No te mea kua mate a Iesu no tatou, te akapapu maira tera e noatu to tatou tu apa, ka rauka ia tatou i te tavini ia Iehova ma te akamareka iaia. (Roma 7:​24, 25) Kua kite katoa tatou: “E maata te Atua i to tatou ngakau, e kua kite aia i te au mea katoa.” (1 Ioa. 3:​19, 20) No reira, kua kite meitaki a Iehova i te au mea pouroa no runga ia tatou, e kua papu iaia e ka maroiroi tatou i te rave i tona anoano.

20. Eaa te ka tauturu ia tatou kia kore e manamanata i te au mea kare tatou i kite?

²⁰ Te akakite maira a Iehova i te au mea pouroa ta tatou ka anoanoia kia kite. No reira, kare tatou e manamanata i te au mea kare tatou i kite. Mari ra, kia akamou tatou ki runga i te au mea puapinga tikai. Me pera tatou, te akaari ra tatou e tu akaaka e te irinaki papu to tatou ia Iehova, ko “tei karape i te kite.” (Iobu 36:4) Noatu kare tatou i mārama i tetai au mea i teianei, kua kite ra tatou e ka apii mai a Iehova i te au mea ou. No reira, ka mataora tatou no te au mea ou ta tatou ka apii no runga i to tatou Atua Ngateitei.—Kohe. 3:11.