Akapeea e Rauka Ai ia Koe te Ora Mutu Kore?

1. Eaa tetai aronga i manako ei kare e rauka te ora mutu kore?

E MAATA te tangata te tauta ra i te kai i te au kai memeitaki e te akaetaeta i to ratou kopapa, kia maroiroi ratou. Noatu ra te reira, ka ruaine te tangata e ka mate rai ratou. No reira, kua manako ratou penei kare e rauka te ora mutu kore. Inara, kua akakite a Iesu e ka rauka te “ora mutu kore,” mei tei taikuia i roto ia Ioane 3:16 e te 5:24.

2. Eaa ta Ioane pene 6 e akakite ra no te ora mutu kore? (Ioane 6:​39, 40)

² Kua rave a Iesu i tetai semeio, kua angai aia i te tauatini ua atu tangata ki te manga e te ika.a Inara, ko tana i tuatua ki te tangata tei kimi iaia i Kaperenauma, e mea umere te reira. Kua akakite aia ka akatuakaouia te aronga tei mate e ka rauka ia ratou te ora mutu kore. (E tatau ia Ioane 6:​39, 40.) Akamanako ana eaa te aiteanga no toou au oa e toou ngutuare tangata tei mate. Kua akapapu a Iesu e e tuakaouanga tetai, ka rauka ia koe e toou akaperepere te ora mutu kore. Inara ko ta Iesu i tuatua i roto i te au irava o te pene 6 o Ioane, kua ngatā i te tangata i te mārama e tae mai ki teia tuatau. Eaa ta Iesu i tuatua?

3. Eaa ta Iesu i tuatua i roto ia Ioane 6:51?

³ I muri mai te angai anga a Iesu i te urupu tangata, kua maara ia ratou te māna ta Iehova i oronga ki to ratou ui tupuna i te metepara. Kua kite te tangata i te māna i roto i te Irava e ko te “kai no te rangi” mai. (Sala. 105:40; Ioa. 6:31) I teianei, kua akamārama a Iesu i tetai apii puapinga no runga iaia e te māna. Noatu e kai semeio te māna, ko te aronga tei kai i te reira kua mate ratou. (Ioa. 6:49) Inara kua tuatua a Iesu nona uaorai: “Ko au te kai ora, ko tei eke mai mei te rangi: ko te ka kai i teianei kai, ka tika ïa i te ora anga e tuatau ua atu.” (E tatau ia Ioane 6:51.) Kua riri te ngati Iuda. Kare ratou i mārama i ta Iesu tuatua e koia te “kai” tei aere mai mei te rangi, e e meitaki atu te reira kai i te māna ta te Atua i oronga ki to ratou ui tupuna. Karanga a Iesu: “Ko taku kai e oronga atu, ko toku ïa kopapa.” Eaa te aiteanga o tana tuatua? E mea puapinga kia mārama tatou no te mea ka rauka te ora mutu kore ia tatou e to tatou aronga akaperepere. Ka akara ana tatou i te aiteanga o te reira.

EAA TE AITEANGA O TA IESU TUATUA, TE KAI ORA E TONA KOPAPA?

4. Eaa tetai aronga i poitirere ei i ta Iesu tuatua?

⁴ Kua poitirere te tangata i te akarongo anga i ta Iesu tuatua, kia kai ratou i tona “kopapa, ko taku ïa e oronga atu ei ora no to te ao.” Kua manako ainei ratou e te māro maira a Iesu kia kai ratou i tona kopapa? (Ioa. 6:52) No te mea kua karanga a Iesu: “Kia kore kotou e kai i te kopapa o te Tamaiti a te tangata nei, e kia kore oki kotou e inu i tona toto, kare ïa e ora i roto ia kotou.”—Ioa. 6:53.

5. Akapeea tatou i kite ei kare a Iesu i māro i te tangata kia inu i tona toto?

⁵ I to Noa tuatau, kua akakite te Atua ki te tangata auraka e kai i te toto. (Gene. 9:​3, 4) I muri mai, kua tuatua akaou a Iehova i te reira i roto i tana Ture ki to Iseraela. Ko tetai ua atu tangata ka kai i te toto “ka tipu keia” aia. (Levi. 7:27) E kua apii a Iesu i te ngati Iuda kia akono katoa i te au ture a te Atua. (Mata. 5:​17-19) No reira, kare a Iesu e māro i te iti tangata ngati Iuda kia kai i tona kopapa e te inu katoa i tona toto. Noatu ra, na te taiku anga i teia au tuatua tuke ua ake rai, te akakite ra a Iesu i tetai apiianga puapinga e akapeea e rauka ai ia ratou te “ora mutu kore.”—Ioa. 6:54.

6. Akapeea tatou e kite ei i roto ia Ioane 6:​53, te apii ra a Iesu na roto i te akatutuanga?

⁶ Eaa te aiteanga o ta Iesu tuatua? Akaraanga te apii nei a Iesu na roto i te akatutuanga. Kua apii ana aia i tetai akatutuanga ki te vaine Samaria, karanga aia: “Kareka te ka inu i te vai e orongaia atu e au nei, kare rava atura aia e kaki akaou; ka riro ra taua vai e orongaia atu e au nana ra, ei vai pupui ua i roto iaia, e tika i te pupui anga, e tae ua atu ki te ora mutu kore.”b (Ioa. 4:​7, 14) Kare a Iesu i apii ana e ka rauka te ora mutu kore i te vaine Samaria me inu ua aia i te vai mei te vaarua. Kua aiteite katoa ki tana tuatua anga ki te urupu tangata i Kaperenauma, kare e rauka ia ratou te ora mutu kore me kai ratou i to Iesu kopapa e te inu i tona toto.

TE MEA TUKE I ROTOPU I TEIA NGA ATIANGA

7. Eaa ta tetai pae i irinaki no runga i ta Iesu i tuatua ia Ioane 6:53?

⁷ No runga ia Ioane 6:​53, karanga tetai pae te akamārama ra a Iesu i ta tetai ka rave i ko i te Kaikai Anga Aiai a te Atu no te mea kua taiku aia i te au tuatua aiteite. (Mata. 26:​26-28) Karanga tetai pae e ka kai te katoatoa tei tae atu ki te Kaikai Anga Aiai a te Atu, i te varaoa opue kore e te wina me tu’aia te reira. E tika ainei te reira? E mea puapinga kia kimi tatou i te pauanga, no te mea e mirioni ua atu tangata i teianei ao e piri mai ana ki te akamaaraanga. Ka akara ana tatou i te aiteanga o ta Iesu tuatua ia Ioane 6:53 e tana i tuatua i ko i te Kaikai Anga Aiai a te Atu.

8. Eaa te au tuke anga i rotopu i te nga atianga e rua? (Akara katoa i te tutu.)

⁸ Akara tatou eaa te mea tuke i rotopu i teia nga atianga. Ko te mea mua, i naea a Iesu i tuatua ai i te reira ia Ioane 6:​53-56, e teiea aia? Kua tuatua aia i te reira ki te ngati Iuda i Galilea i te 32 T.N. E tai mataiti i mua ake ka akono ei aia i te Kaikai Anga Aiai a te Atu i Ierusalema. Te rua, te tuatua ra aia kiaai ma? Ki te aronga tei inangaro ua i te manga, kare e kia apii no runga ia Iehova e tona Patireia. (Ioa. 6:26) No reira, te tuatua anga a Iesu i tetai apii kare ratou i mārama, kua akamutu ratou i te akarongo iaia. Kua akaruke katoa tetai au pipi iaia. (Ioa. 6:​14, 36, 42, 60, 64, 66) Kare teia aronga i aite ki te 11 apotetoro tiratiratu tei piri kia Iesu e tai mataiti i muri mai i te 33 T.N., no te Kaikai Anga Aiai a te Atu. I te reira atianga, kua piri atu te 11 apotetoro kiaia noatu kare ratou i mārama i ta Iesu apii. Tuke ratou ki te au tangata i Galilea, kua irinaki tana apotetoro, ko Iesu te Tamaiti a te Atua tei aere mai mei te rangi. (Mata. 16:16) Kua akameitaki a Iesu ia ratou: “Ko kotou ko te aronga e noo tamou i vaitata iaku i toku au timataanga nei.” (Luka 22:28) Akapapu mai teia kare i aiteite tana i tuatua ia Ioane 6:​53, ki tana i tuatua i ko i te Kaikai Anga Aiai a te Atu. E au tumu ke atu tetai.

TE AITEANGA O TA IESU TUATUA KIA KOE

9. Te tuatua ra a Iesu kiaai ma i ko i te Kaikai Anga Aiai a te Atu?

⁹ I te tuatau o te Kaikai Anga Aiai a te Atu, kua oronga a Iesu i te varaoa opue kore ki tana au apotetoro e kua akakite aia kia ratou te akatutu nei teia i toku kopapa. E oti, kua oronga atu aia i te wina e kua tuatua te akatutu ra teia i toku ‘toto no te koreromotu.’ (Mare. 14:​22-25; Luka 22:20; 1 Kori. 11:24) Ko tana i tuatua no runga i te koreromotu e mea puapinga. Kua kapiki aia i te reira ko te ‘koreromotu ou,’ tei papauia i rotopu ia Iehova e te “ngutuare o Iseraela,” te aronga te ka tutara kapiti ma Iesu i roto i te Patireia. (Ebe. 8:​6, 10; 9:15) Kare te au apotetoro i mārama meitaki, kare e roa atu ka akatainuia ratou ki te vaerua tapu e ka riro ratou e ko tetai i roto i te koreromotu ou, i te pae ia Iesu i te rangi.—Ioa. 14:​2, 3.

10. Eaa tetai mea tuke ta Iesu i tuatua i ko i te Kaikai Anga Aiai a te Atu e tana i tuatua ki te urupu i Galilea? (Akara katoa i te tutu.)

¹⁰ Ko ta Iesu i taiku i ko i te Kaikai Anga Aiai a te Atu, te tuatua ra aia ki tana “anana iti.” Ko tana au apotetoro tiratiratu te aronga mua o teia pupu meangiti. (Luka 12:32) Ko ratou ta Iesu i oronga i te varaoa kia kai e te wina kia inu i te reira aiai. Ka piri atu tetai aronga ke o teia pupu a muri mai, e ka anoano katoaia ratou kia kai i te varaoa e te inu i te wina, me akamaara ratou i te Kaikai Anga Aiai a te Atu. E ngai to ratou i te rangi ma Iesu. Ko teia tetai mea tuke i rotopu i te Kaikai Anga Aiai a te Atu e tana i tuatua ki te urupu i Galilea. No reira, te tuatua ra a Iesu ki tetai pupu tangata meangiti, i ko i te Kaikai Anga Aiai a te Atu.

11. Eaa ta Iesu i tuatua i Galilea te akaari maira kare aia e tuatua ra ki tetai pupu meangiti?

¹¹ Ia Iesu i Galilea i te 32 T.N., te tuatua ra aia ki te urupu ngati Iuda tei inangaro ua i te manga kai. Inara kua akamārama a Iesu ki te tangata e e apinga puapinga atu tetai ka rauka ia ratou. Koia oki, ko te ora mutu kore. Kua tuatua a Iesu no te aronga tei mate, ka akatuakaouia mai ratou e ka ora e tuatau ua atu. I roto i te pene 6 o Ioane, kare a Iesu i tuatua i teia akameitakianga ki tetai pupu meangiti. Mari ra, ki tetai urupu tangata. Karanga aia: “Ko te ka kai i teianei kai, ka tika ïa i te ora anga e tuatau ua atu: ko taku kai e oronga atu, ko toku ïa kopapa, ko taku ïa e oronga atu ei ora no to te ao.”—Ioa. 6:51.c

12. Eaa te ka anoanoia kia rauka te ora mutu kore?

¹² Ko te aiteanga ainei o ta Iesu tuatua, e ka rauka i te au tangata ravarai te ora mutu kore? Kare, ko te aronga anake te “ka kai i teianei kai” ko te aronga tei akarongo kiaia, te ka puapingaia. E maata te tangata tei tuatua e te irinaki ra ratou ia Iesu e kua kapiki iaia ei akaora no ratou. (Ioa. 6:29) Inara, kare e rava ua te reira. I Galilea, e maata te tangata tei akarongo kia Iesu e i muri mai kua akaruke ratou iaia. Eaa te tumu?

13. Eaa te ka anoanoia kia riro ei pipi mou na Iesu?

¹³ Kua aru ua te maata anga o te tangata ia Iesu no te mea kua oronga mai aia i ta ratou e anoano ra. Kua inangaro ratou iaia kia akaora ia ratou, angai ia ratou e te apii i te au mea ta ratou e reka ra. Inara, kua akakite a Iesu kare aia i aere mai i te akatupu i to ratou inangaro. Mari ra, kia apii ia ratou eaa ta ratou ka rave ei pipi mou na Iesu. Ka anoanoia ratou kia “aere mai” kiaia, kia akono i tana apiianga.—Ioa. 5:40; 6:44.

14. Eaa ta tatou ka rave kia puapingaia mei te kopapa e te toto o Iesu?

¹⁴ Kua apii a Iesu i te urupu tangata e na roto i te akaatinga anga i tona kopapa e te akamaringi anga i tona toto, ka rauka te ora mutu kore ia ratou. Ka anoanoia ratou kia akarongo i te tuatua mou. E mea puapinga teia ki te ngati Iuda, e pera kia tatou i teia tuatau. (Ioa. 6:40) Ko ta Iesu i tuatua i roto ia Ioane 6:53 ka anoanoia te akarongo ki roto i te atinga oko o Iesu e rauka ai te ora mutu kore. Kua orongaia teia akameitakianga ki te tangata ravarai.—Ephe. 1:7.

15-16. Eaa te apiianga puapinga ka kite mai tatou i roto i te pene 6 o Ioane?

¹⁵ I roto i te pene 6 o Ioane, kua kite mai tatou i te au apiianga puapinga ka akamaroiroi ia tatou. Kua akaaroa a Iesu i te tangata. Iaia i Galilea, kua rapakau aia i te aronga maki, kua apii aia i te Patireia ki te tangata e kua oronga i te kai na ratou. (Luka 9:11; Ioa. 6:​2, 11, 12) Te mea maata, kua apii aia ki te tangata e koia “te kai e ora’i.”—Ioa. 6:​35, 48.

¹⁶ Ko tana aronga i kapiki e ko te “mamoe ke,” kare ratou e kai i te varaoa e te inu i te wina i ko i te Kaikai Anga Aiai a te Atu. (Ioa. 10:16) Noatu rai, ka puapinga katoaia ratou mei ta Iesu akatutuanga no tona kopapa e tona toto. Ka anoanoia ratou kia akarongo ki roto i te atinga oko o Iesu. (Ioa. 6:53) Kareka te aronga ka kai i te varaoa e te inu i te wina, ka akaari ratou e ko ratou tetai i roto i te koreromotu ou e ka tutara ratou i te Patireia i te rangi. Noatu me ko tatou tetai o te aronga akatainuia me kore te mamoe ke, e mea puapinga kia kite tatou i te apiianga i roto i te pene 6 o Ioane. Kia akarongo ki roto i te atinga oko o Iesu e rauka ai te ora mutu kore.