E Akakakā ia Iehova

1. Eaa ta te manganui e akamanako ra i teia rā?

KUA kite ana koe i tetai tangata e akamanako ra iaia uaorai? Ei akaraanga, e manganui te taangaanga ra i te social media no te akapaapaa ia ratou uaorai e ta ratou e rave ra. Te mea akaaroa, e iti ua te tangata i teia rā te akakakā ra ia Iehova. I teia atikara, ka uriuri tatou i te aiteanga kia akakakā ia Iehova e te tumu ka akakakā ai tatou iaia. Pera katoa, ka apii tatou akapeea me akakakā ia Iehova e akapeea aia i te akakakā anga i tona ingoa a te tuatau ki mua.

EAA TE AITEANGA KIA AKAKAKĀ IA IEHOVA?

2. I te Maunga i Sinai, akapeea a Iehova i te akaari anga i tona kakā? (Akara katoa i te i te kapi mua.)

² Eaa te kakā? I roto i te Pipiria, te tuatua “kakā” te akataka maira i te tu ngateitei e te mekameka o Tetai. Kua akaari a Iehova i tona kakā i te akaora anga aia i tona iti tangata Iseraela mei ia Aiphiti. Akamanako ana i teia: Kua taokotai te mirioni ua atu tangata Iseraela i raro i te Maunga i Sinai no te akarongo ki te Atua. A runga i te maunga kua koropiniia e te au tumurangi poiri kerekere. Mei te auai umu te tu, kua ngaueue te enua, kua aruru te mangungu e kua rapa te uira, kua akarongoia te tangi anga pu maata. (Exo. 19:​16-18; 24:17; Sala. 68:8) Kua umere te iti tangata Iseraela i te kite atu i te mana kakā o Iehova.

3. Eaa te aiteanga kia akakakā ia Iehova?

³ Akapeea ra te au tangata? Ka rauka ainei ia tatou i te akakakā ia Iehova? Ae. Na te akakiteanga i tona mana kakā e tona au tu pumaana ki tetai tangata. Ka akakakā tatou ia Iehova na te akameitaki anga iaia no te maroiroi i te rave i tona anoano. (Isa. 26:12) Ko Davida tetai akaraanga meitaki. I roto i tana pure ki te iti tangata o Iseraela, karanga a Davida ki te Atua: “Tei ia koe, e Iehova, te maata, e te mana, e te kakā, e te autu, e te tapunui: to runga i te rangi ra, e to runga i te enua, noou anake ïa.” Te akaoti anga a Davida i tana pure, kua ‘akameitaki atura taua uipaanga katoa ia Iehova.’—1 Para. 29:​11, 20.

4. Akapeea a Iesu te akakakā anga ia Iehova?

⁴ Ia Iesu i te enua, kua akakakā aia i tona Metua na te akakite anga ki te tangata e kua oronga mai a Iehova i te mana kiaia kia rave i te au semeio. (Mare. 5:​18-20) Kua apii aia ki te tangata no runga ia Iehova e tona inangaro e te akono ia ratou. I tetai atianga, te apii ra a Iesu i ko i te sunago. Te akarongo ra tetai vaine maki tei ōia e te temoni no tetai 18 mataiti. Kua mingi tona kopapa e kua mamae tikai aia! Kua tangi a Iesu iaia e kua tuatua marū atu: “E maine, kua ora koe i toou maki.” Kua tuku a Iesu i tona rima ki runga i taua vaine, tu tika maira aia, e kua “akakakā atura i te Atua,” no te mea kua ora aia i tona maki! (Luka 13:​10-13) E tumu anga meitaki ta teia vaine no te akakakā ia Iehova e pera katoa tatou.

EAA TE TUMU KA AKAKAKĀ AI TATOU IA IEHOVA?

5. Eaa te au tumu ka akangateitei tatou ia Iehova?

⁵ Ka akakakā tatou ia Iehova no to tatou inangaro i te akangateitei iaia. E maata te tumu ka akangateitei tatou iaia. E Atua mana maata a Iehova tei taangaanga i tona mana no te akatupu i tona anoano. (Sala. 96:4-7) Ka kitea tona tu pakari i roto i te au mea tana i anga. Kua oronga mai aia i te ora kia tatou e te au mea tei anoanoia no te oraanga. (Apo. 4:11) E Atua tiratiratu aia. (Apo. 15:4) Ka tupu ua rai te meitaki mei tana ka rave e tana i taputou. (Iosu. 23:14) Karanga te peroveta ko Ieremia no Iehova: “Kare oki tetai, i to ratou aronga pakari katoa i te pa enua ra, e to ratou au basileia katoa, e aite kia koe”! (Iere. 10:6, 7) No reira, e maata te au tumu kia akangateitei tatou i to tatou Metua i te rangi. E maata tona au tu manea tei akakeu ia tatou kia akaperepere iaia.

6. Eaa tatou ka inangaro ei i te akaperepere ia Iehova?

⁶ Ka akakakā tatou ia Iehova no to tatou inangaro i te akaperepere iaia. Ka akaperepere tatou ia Iehova no tona au tu manea. E Atua aroa aia e te tangi ia tatou. (Sala. 103:13; Isa. 49:15) Me mamae tatou ka mamae katoa aia. (Zeka. 2:8) Ka tauturu aia ia tatou kia kite no runga iaia e kia riro tatou ei Oa nona. (Sala. 25:14; Anga. 17:27) Ka taakaaka aia, ‘iaia uaorai i te akara anga mai ki raro, ki runga i te au rangi, e ki runga i te enua. Te akateitei ra aia i te akaaka ra no raro mai i te one.’ (Sala. 113:​6, 7) No teia au tumu, ka inangaro tatou i te akakakā i to tatou Atua maata.—Sala. 86:12.

7. Eaa te tikaanga manea tei orongaia mai kia tatou?

⁷ Ka akakakā tatou ia Iehova no to tatou inangaro kia kite te tangata iaia. Manganui te tangata kare i kite i te tika no runga ia Iehova. Eaa te tumu? No te mea kua pikikaa a Satani no runga ia Iehova e kua irinaki te tangata i te reira. (2 Kori. 4:4) Kua irinaki katoa te tangata e e Atua makitakita a Iehova, kare aia e manako mai ana ia tatou, e nana i akatupu i te au tumatetenga i teianei ao. Inara kua kite tatou i te tika no runga i to tatou Atua! Tei ia tatou te tikaanga, kia akakite aere i te au tu manea o Iehova ki te tangata ei tauturu ia ratou kia akakakā katoa Iaia. (Isa. 43:10) Kua akamou te tata Salamo 96 ki runga i te akakakā anga ia Iehova. Ka apii tatou mei teia Salamo, akapeea tatou me akakakā ia Iehova e kua tau rai aia kia akangateiteiia.

AKAPEEA TATOU ME AKAKAKĀ IA IEHOVA TEI TAU KIAIA?

8. Akapeea tatou me akakakā ia Iehova? (Salamo 96:​1-3)

⁸ E tatau ia Salamo 96:​1-3. Ka akakakā tatou ia Iehova na roto i ta tatou ka tuatua no runga iaia. I roto i teia au irava, te pati maira a Iehova i tona iti tangata e “imene ia Iehova,” e “akameitaki i tona ingoa,” e “akakite i te ora nana,” e kia “akakite i tona kakā i rotopu i te au etene.” E au ravenga teia ka rauka ia tatou i te akakakā i to tatou Metua i te rangi. Kua akakite aere te au tavini o Iehova i mua ana no runga i tona au tu manea e tana au angaanga meitaki i rave. (Dani. 3:​16-18; Anga. 4:29) Akapeea tatou me aru i to ratou akaraanga?

9-10. Eaa taau ka apii mai mei te akaraanga o Angelena? (Akara katoa i te tutu.)

⁹ Akamanako ana i tei tupu kia Angelena,a e tuaine te noo ra i Marike. Kua akakite aia i te tika ma te ngakau toa no runga i to Iehova ingoa meitaki ki te ngai angaanga. Koi akamata ua atura aia i te angaanga e kua patiia aia kia akakite mai i tona oraanga kia ratou. I ko i ta ratou uipaanga ka akakite mai te aronga angaanga i ta ratou e rave ana. Kua akapapa a Angelena no te akaari i te au tutu no runga i tona oraanga mataora ei Kite no Iehova. Inara, i mua ake iaia kua tu mai tetai oa angaanga e kua akakite mai e kua utuutuia aia ei Kite no Iehova. Inara, kua akakino aia i te Au Kite o Iehova e to ratou irinakianga. Karanga a Angelena: “Kua tukituki toku pukuatu. E kua akamanako au: ‘Ka akaruke ainei au i teia tangata kia pikikaa no runga ia Iehova? Me ka akakite au i te tika no runga ia Iehova?’”

¹⁰ Te akamutu anga tona oa angaanga i te tuatua, kua pure muteki a Angelena. I reira, kua tuatua marū aia ki te oa angaanga: “Kua aiteite to taua tupuanga. Kua utuutu katoa ia au ei Kite no Iehova e te tavini nei rai au Iaia.” Noatu tana au tuatua akakino, kua marū ua a Angelena. Kua akaari aia i te au tutu nona e tona nga oa i ko i te uruoaanga e kua akakite a Angelena i tona irinakianga. (1 Pete. 3:15) Eaa tei tupu? Te akaoti anga a Angelena i te tuatua, kua marū tona oa. E kua akakite mai i tona taime mataora ei Kite no Iehova. Karanga a Angelena: “Kua tau rai a Iehova kia paruruia. Kia akakiteia te tika no runga iaia.” Ka rauka katoa ia tatou i te akapaapaa ia Iehova e te akakakā iaia noatu ka akakino te tangata iaia.

11. Akapeea te au tavini o mua ana i te taangaanga anga i te kaveinga o Salamo 96:8?

¹¹ E tatau ia Salamo 96:8. Ka akakakā tatou ia Iehova na roto i ta tatou au apinga. E akangateitei ana te au tavini o Iehova Iaia na teia ravenga. (Mase. 3:9) Ei akaraanga, kua oronga to Iseraela i te moni tauturu no te pātu i te iero e te akonokono i te reira. (2 Ari. 12:​4, 5; 1 Para. 29:​3-9) Kua oronga katoa te au pipi a Iesu i ta “ratou apinga” no te akono iaia e tana au apotetoro. (Luka 8:​1-3) I te anere mataiti mua, kua oronga te au Kerititiano i te apinga tauturu no to ratou au taeake e te au tuaine. (Anga. 11:​27-29) I teia rā, ka rauka katoa ia tatou i te akakakā ia Iehova na roto i ta tatou moni oronga.

12. Akapeea ta tatou moni oronga me akakakā ia Iehova? (Akara katoa i te tutu.)

¹² Akamanako ana i tetai akaraanga akapeea ta tatou moni oronga me akakakā ia Iehova. I te 2020, kua marō te enua i Zimbabwe no tetai tuatau roa. E mirioni ua atu tangata tei onge e kua tupu katoa teia ki te tuaine ko Prisca. Noatu tona turanga ngatā, kua tutu aere a Prisca ma te maroiroi i te Ruitoru e te Varaire e i te tuatau tanutanu katoa. Kua aviri tona tangata tupu iaia no tana angaanga tutu aere e kare i tanu i tetai kai nana karanga ratou kiaia, “Ka mate koe i te onge.” Kua pau atu a Prisca, “Kare rava a Iehova e akaruke i tona au tavini.” E tei tupu, kua tae mai tana apinga tauturu na roto i ta tatou akaaerenga. Kua rauka teia ia Prisca, no ta tatou moni oronga. Umere tikai to Prisca tangata tupu e kua karanga ratou kiaia, “Kare rai toou Atua i akaruke ia koe, ka inangaro matou i te kite no runga iaia.” Kua aere mai e itu ia ratou ki te uipaanga.

13. Akapeea to tatou tu me akakakā ia Iehova? (Salamo 96:9)

¹³ E tatau ia Salamo 96:9. Ka akakakā tatou ia Iehova na roto i to tatou tu. Ka anoanoia te au taunga tei tavini ia Iehova i ko i tona iero, kia vai mā i te pae kopapa. (Exo. 40:​30-32) Ka anoano katoa ia tatou kia vai mā i te pae kopapa e kia patoi i te au mea te rikarika ra a Iehova. (Sala. 24:​3, 4; 1 Pete. 1:​15, 16) Akakite te Pipiria e kia akaruke tatou i te “tangata taito” e e kia “akatangata ou.” Ko tera te aiteanga ka tauta tatou i te patoi i te au tu e te au angaanga viivii, kare a Iehova e mareka ana. Ka anoanoia tatou kia aru i to Iehova manako e kia akarotai i to tatou oraanga kia tau kiaia. (Kolo. 3:​9, 10) Na roto i ta Iehova tauturu, ka taui tetai tangata kino i tona oraanga e kia akatangata ou iaia.

14. Eaa taau i kite mai mei te akaraanga o Jack? (Akara katoa i te tutu.)

¹⁴ Akamanako ana i te akaraanga o Jack, e tangata rotoriri e te kino e kua kapikiia aia e ko te Temoni. No tana angaanga kino i rave, kua akautungaia a Jack kia tamateia. Iaia e tiaki ra, kua āriki a Jack i tetai apii Pipiria mei tetai taeake tei atoro mai i te aronga mouauri i roto i te are auri. Noatu tona oraanga kino kua akamutu a Jack i te reira, kua taui i tona oraanga e kua tau aia no te papetito. E ākā tauianga ta Jack i rave e kia tae ki te rā ka tamateia aia, kua aue te au tiaki mouauri. Karanga tetai tangata tiaki mouauri: “Ko Jack tetai mouauri kino tikai i konei. I teianei, koia tetai tangata meitaki rava atu.” E tai epetoma i muri mai te tamateia anga a Jack, kua aere te au taeake no te rave i te uipaanga i roto i te are auri e kua aravei ratou i tetai mouauri no te taime mua. Eaa tei akakeu iaia kia tae ki te uipaanga? Umere tikai aia e kua taui a Jack i tona tu e kua inangaro aia i te kite eaa tana ka rave kia akamori ia Iehova. Ae, ka rauka i to tatou tu i te akakakā ia Iehova!—1 Pete. 2:12.

AKAPEEA A IEHOVA ME AKAKAKĀ I TONA INGOA A TE TUATAU KI MUA?

15. Akapeea a Iehova me akakakā i tona ingoa a te tuatau ki mua? (Salamo 96:​10-13)

¹⁵ E tatau ia Salamo 96:​10-13. Te akamārama maira te au irava openga o Salamo 96, ia Iehova ei Akava e ei Ariki tuatua tika. Akapeea a Iehova me akakakā i tona ingoa a te tuatau ki mua? Na roto i tana akavaanga. Kare e roa atu, ka takore aia ia Babulonia Maata no te mea kua rave te au akonoanga pikikaa i te au angaanga kino e kua apii i te pikikaa no runga ia Iehova. (Apo. 17:​5, 16; 19:​1, 2) Me takoreia a Babulonia Maata, penei ka ariu mai tetai tangata i te akamori ia Iehova. Ia Aramagido ka takore a Iehova i ta Satani akatereanga, te aronga tei patoi iaia, tei pikikaa e tei akakino i tona ingoa. Kareka ra te aronga tei akaperepere e tei akarongo kiaia, ka akaora a Iehova ia ratou no te mea kua akakakā ratou Iaia. (Mare. 8:38; 2 Tesa. 1:​6-10) A te openga o te Tutara Anga Tauatini Mataiti a Iesu, ka akatapuia to Iehova ingoa. (Apo. 20:​7-10) Ka ‘akakiia te enua nei ki te kite i te kakā o Iehova, mei te moana i ki i te tai.’—Haba. 2:14.

16. Eaa taau ka tauta i te rave? (Akara katoa i te tutu.)

¹⁶ E tuatau mataora tikai i te kite i te tangata te akakakā anga i to Iehova ingoa! I teianei, ka tauta tatou i te tutu aere no runga i to tatou Atua e te rave i te au angaanga te ka akapaapaa Iaia. Ei tauturu ia tatou kia akamanako i teia apainga puapinga, kua iki te Pupu Akaaere i ta tatou irava mataiti 2025, mei roto ia Salamo 96:8 e: “O atu kia Iehova i te kakā e tau ki tona ra ingoa.”