Aru i te Tu Maroiroi o Iesu me Tutu Aere

1. Eaa tei akatakake i te au tavini o Iehova mei te aronga tei karanga e Kerititiano ratou?

E MATAORA ana te au tavini o Iehova i te tutu aere i te nuti meitaki, te rave ra ratou i te reira ma te maroiroi.a Na te angaanga tutu aere e akatakake i te au tavini o Iehova mei te aronga tei karanga e Kerititiano ratou. (Tito 2:14) Inara, i tetai taime penei ka ngatā ia koe te tutu aere ma te maroiroi. Karanga tetai tangata pakari, “Tetai taime kare au e maroiroi ana i te tutu aere.”

2. Eaa i ngatā ai ia tatou i te tutu aere ma te maroiroi?

² E mataora ana tatou i te rave i tetai au angaanga ke na Iehova e mei te angaanga tutu aere. No teaa ra? I roto i te angaanga pātu are, te akono i te Are Uipaanga Patireia, tauturu i te au taeake tei tumatetengaia e te akamaroiroi ia ratou, ka kite tatou i te au mea meitaki tei tupu e ka mataora i te reira. Me angaanga kapiti tatou ki te au taeake, tupu te inangaro e te rekareka i tetai e tetai. Mareka ua te au taeake i ta tatou i rave no ratou. I tetai tua, penei kua roa tatou i te tutu aere anga ki tetai ngai inara e takitai ua ake tangata ka akarongo mai ki te karere Pipiria. No te mea te vaitata mai nei te openga ka makitakitaia rai tatou e te tangata. (Mata. 10:22) Eaa i reira, te ka tauturu ia tatou kia tutu aere ma te maroiroi?

3. Eaa ta tatou i apii mai no Iesu mei te akatutuanga i roto ia Luka 13:​6-9?

³ Ka rauka te maroiroi me apii tatou i te akaraanga o Iesu. Iaia i te enua nei, kua tutu aere aia i te evangeria ma te maroiroi. Kua angaanga pakari aia koi rauka ai iaia. (E tatau ia Luka 13:​6-9.) Na roto i tetai akatutuanga, kua akaaite a Iesu i tana angaanga ki tetai tangata tanutanu tei tanu i te suke no tetai toru mataiti, inara kare te reira i ua mai. Mei te reira katoa, kua akapou a Iesu e toru mataiti i te tutu aere ki te tangata ngati Iuda, inara kare te maata anga o ratou i āriki i tana karere. Noatu rai, kare a Iesu i tuku ana i te ’au. Mei te tangata tanutanu rai tei tapapa ka ua mai te suke, kua tutu aere ua a Iesu ma te maroiroi no te tauturu i te ngati Iuda kia āriki i te nuti meitaki.

4. Eaa te au tauturu e ā ka uriuri tatou mei to Iesu akaraanga?

⁴ I teia atikara, ka uriuri tatou i to Iesu tu maroiroi no tana angaanga tutu aere i tona ono marama openga. (Akara “After these things” au mea ke mai i roto ia Luka 10:1.) Ka maroiroi katoa tatou me aru i to Iesu akaraanga. Ka uriuri tatou e ā tauturu: (1) Kua akamou aia i te rave i to Iehova anoano, te (2) kua akamanako aia i te au totou Pipiria, te (3) kua irinaki aia e ka tauturu a Iehova iaia, e te (4) kua tapapa aia e ka akarongo mai te tangata.

AKAMOU AIA I TE RAVE I TO IEHOVA ANOANO

5. Akapeea a Iesu te akaari anga kua akatupu aia i to Iehova anoano?

⁵ Kua rave maroiroi a Iesu i te tutu i “te evangelia o te basileia o te Atua,” no tona inangaro i te akatupu i to Iehova anoano. (Luka 4:43) Ko te angaanga maata ïa i roto i to Iesu oraanga. E tae ua atu ki te au marama openga o tana evangeria, kua tutu aere a Iesu i “roto i te au oire e te au vila,” te apiianga i te tangata. (Luka 13:22) Kua tereni katoa aia i tana au pipi akapeea ratou me tutu aere.—Luka 10:1.

6. Eaa te pirianga o te angaanga tutu aere ki tetai angaanga ke a Iehova? (Akara katoa i te tutu.)

⁶ Teia tuatau, inangaro katoa a Iehova e Iesu ia tatou kia tutu aere i te nuti meitaki. (Mata. 24:14; 28:​19, 20) Eaa te pirianga i rotopu i te angaanga tutu aere e tetai au angaanga ke na Iehova? Ei akaraanga, ka pātu tatou i te au are opati Betela kia akaaere i te angaanga tutu aere. Ka tauturu tatou i te au taeake e te au tuaine tei rokoia e te tumatetenga, kia maroiroi ratou i te akamori akaou ia Iehova e te rave i te angaanga tutu aere. Me akamaara tatou e ko te angaanga tutu aere te mea maata kia Iehova no reira ka rave tatou i te reira. Karanga a János, e tangata pakari no Hungary, “Ka akakite au kiaku uaorai ko te angaanga tutu aere te mea maata, kare ko tetai angaanga ke na Iehova.”

7. Eaa a Iehova i inangaro ei ia tatou kia tutu aere ma te maroiroi? (1 Timoteo 2:​3, 4)

⁷ Ka maroiroi tatou i te tutu aere me akamanako tatou i te tangata mei ia Iehova rai. Inangaro aia i te tangata kia akarongo e kia āriki i te nuti meitaki. (E tatau ia 1 Timoteo 2:​3, 4.) No reira, kua tereni aia ia tatou kia tukatau i te tutu aere i te karere ora ki te tangata. Ei akaraanga, i roto i te poroutia Akaperepere i te Tangata—E Akariro Ei Pipi ka kitea te tauturu akapeea me pukapuka ki te tangata e te akariro ia ratou ei pipi. Noatu me kare te tangata e āriki mai i teianei, penei ka āriki aia i mua ake ka ope ei te mate maata. Ko ta tatou ka pukapuka kia ratou penei ka akakeu ia ratou kia āriki i te nuti meitaki a te tuatau ki mua. Inara, ka tupu te reira me maroiroi tatou i te tutu aere.

AKAMANAKO AIA I TE AU TOTOU PIPIRIA

8. Eaa te au totou Pipiria tei tauturu ia Iesu kia akapou meitaki i tona tuatau?

⁸ Kua kite a Iesu akapeea te au totou Pipiria me akatupuia. Mārama aia e kia raveia tana angaanga tutu aere i roto i te toru e te apa mataiti. (Dani. 9:​26, 27) Kua kite aia i tei totouia e akapeea aia me tamateia. (Luka 18:​31-34) No reira, kua akapou meitaki a Iesu i tona tuatau. Kua maroiroi aia i te tutu aere no te akatupu i te anoano o tona Metua.

9. Mei te au totou Pipiria, eaa tatou i akakeuia ai kia tutu aere ma te rapurapu?

⁹ Me akamanako tatou i te au totou Pipiria e akatupuia nei e a te tuatau ki mua, ka maroiroi tatou i te angaanga tutu aere. Kite tatou e ka ope teia akatereanga. Kua totou te Pipiria i te tu o te tangata e te au mea ka tupu i te tuatau openga, irinaki tatou e te tupu nei teia. Akakite katoa te totou e ka putoto te ariki i apatonga e te ariki no te apatokerau e “tae ra ki te tuatau openga.” (Dani. 11:40) Te kite nei tatou i teia putotoanga i rotopu i te Mana Tutara Peritane-Marike e Rutia e tona au tauturu. E ko te vaevae o te tiki maata i roto ia Daniela 2:​43-45, te akatutu ra te reira i te Mana Tutara Peritane-Marike. Irinaki tatou e ka takore te Patireia o te Atua i teia au kavamani. No te mea, te vaitata mai nei te openga o te tuatau openga, e akapou meitaki i te tuatau i te tutu aere ma te rapurapu.

10. Eaa te au totou Pipiria tei akakeu ia tatou kia tutu aere ma te maroiroi?

¹⁰ Oronga katoa mai te au totou Pipiria i te au karere kia tutu aereia. Karanga a Carrie, te tavini ra i Dominican Republic, “Me akamanako au i ta Iehova ka rave a te tuatau ki mua, kua akamaroiroiia au kia akakite aere i te tuatua mou ki tetai ke. Me kite au i te au manamanata e tupu nei ki te tangata, inangaro au i te akakite kia ratou i ta Iehova taputou pumaana.” Akaari maira te au totou Pipiria te tauturu ra a Iehova i te angaanga tutu aere no reira e akamaroiroi. Karanga a Leila, te noo ra i Hungary: “Akamaroiroi mai te irava o Isaia 11:​6-9 iaku kia akakite aere i te nuti meitaki ki te aronga taku i manako kare e akarongo mai. Kite au e na Iehova ratou e tauturu.” Karanga a Christopher, e taeake no Zambia: “Totou a Mareko 13:10 e ka akatotoaia te nuti meitaki ki teianei ao, e akameitaki anga ngateitei kiaku kia turuturu i te reira.” Eaa te au totou Pipiria tei akakeu ia tatou kia tutu aere ma te maroiroi?

IRINAKI AIA E KA TAUTURU A IEHOVA IAIA

11. Eaa a Iesu i irinaki ei kia Iehova kia tutu aere ua atu? (Luka 12:​49, 53)

¹¹ Irinaki a Iesu ka tauturu a Iehova iaia kia tutu aere. Noatu kua tuatua marū a Iesu ki te tangata kua kite aia ka riri e ka patoi te tangata i te karere Pipiria. (E tatau ia Luka 12:​49, 53.) Kua kite ana a Iesu i teia tu, no te mea kua tauta te au arataki akonoanga i te tamate iaia. (Ioa. 8:59; 10:​31, 39) Inara kua tutu aere a Iesu e kua papu tei iaia a Iehova. Karanga aia: “Kare oki e ko au anake teia, ko au ra ma te Metua katoa, ko tei tono mai iaku nei. . . . Kare te Metua i akaruke ua iaku nei ko au anake ra; kare oki au i tukumoe i te rave i te mea e mareka mai ei aia.”—Ioa. 8:​16, 29.

12. Akapeea a Iesu te tauturu anga i tana au pipi noatu ka takinokinoia ratou?

¹² Akamaara katoa a Iesu ki tana au pipi e ka tauturu a Iehova ia ratou. Noatu ka takinokinoia ratou, kua akapapu aia e ka paruru a Iehova ia ratou. (Mata. 10:​18-20; Luka 12:​11, 12) Kua ako aia ia ratou kia akaari i te tu matakite. (Mata. 10:16; Luka 10:3) No reira, kua apii a Iesu auraka ratou e māro i te karere Pipiria ki te aronga kare e akarongo mai. (Luka 10:​10, 11) Akakite aia kia oro me takinokinoia ratou. (Mata. 10:23) Noatu e tu maroiroi to Iesu, kua irinaki aia kia Iehova e kare i tuku iaia ki roto i te kino.—Ioa. 11:​53, 54.

13. Eaa koe i papu ei e ka tauturu a Iehova ia koe?

¹³ I teia tuatau, ka anoanoia ta Iehova tauturu kia tutu aere ua atu rai noatu te takinokinoanga. (Apo. 12:17) Akapeea koe e papu ei ka tauturu a Iehova ia koe? Akamanako i ta Iesu pure i roto ia Ioane pene 17. Pure aia kia paruru a Iehova i tana au apotetoro. Akaari mai te puka o Angaanga akapeea a Iehova te paruruanga i te au apotetoro kia tutu aere ma te ngakau toa. Roto katoa i tana pure, kua pati a Iesu kia tiaki a Iehova i te aronga tei akarongo ki te au apotetoro. E pera katoa koe. Te pau nei rai a Iehova i ta Iesu pure; ka tauturu Aia ia koe mei Tana tauturu anga i te au apotetoro.—Ioa. 17:​11, 15, 20.

14. Eaa koe i papu ei ka rauka te maroiroi i te tutu aere? (Akara katoa i te tutu.)

¹⁴ I te openga e vaitata mai nei, ka ngatā ia tatou te rave i te angaanga tutu aere. Inara kua akapapu a Iesu ka rauka ia tatou te tauturu kia vai maroiroi. (Luka 21:​12-15) Mei ia Iesu rai e tana au pipi, kua tuku ratou i te tangata kia iki i ta ratou ikianga e auraka e tauetono. Noatu me ka araiia te angaanga tutu aere e te kavamani, ka tutu aere ua tatou i te nuti meitaki ma te tauturu a Iehova. Mei te anere mataiti mua, kua oronga a Iehova i te tauturu ki tona au tavini e ka tauturu katoa aia ia tatou kia “kitea ravaia te tuatua i ako aereia.” (2 Timo. 4:17) No reira, e irinaki kia Iehova kia maroiroi koe i te tutu aere.

TAPAPA AIA E KA AKARONGO TE TANGATA KIAIA

15. Eaa tei akaari e te tapapa ra a Iesu i te au tupuanga meitaki no tana angaanga tutu aere?

¹⁵ Kua tapapa a Iesu e ka akarongo mai te tangata i tana karere. Kua tauturu te reira iaia kia mataora ua i te tutu aere. Ei akaraanga, i te openga o te 30 T.N., kite atu a Iesu e maata tei akarongo mai ki tana angaanga tutu aere, kua akaaite aia ia ratou ki te koro kua teatea e kia kokotiia. (Ioa. 4:35) E tai mataiti i muri mai, akakite aia ki tana au pipi: “Maata ua nei te mou.” (Mata. 9:​37, 38) Muri mai karanga aia: “Te maata ua nei te mou . . . E pure kotou i te Atu o te mou, kia unga mai aia i tetai aronga ei rave i taua mou nana.” (Luka 10:2) Kua papu ia Iesu e ka akarongo te tangata i te nuti meitaki e kua mataora aia.—Luka 10:21.

16. Eaa te apiianga mei te nga akatutuanga a Iesu, kia tapapa i te meitaki? (Luka 13:​18-21) (Akara katoa i te tutu.)

¹⁶ Apii katoa a Iesu i tana au pipi kia tapapa i te meitaki no te angaanga tutu aere. Akamanako ana i tana nga akatutuanga. (E tatau ia Luka 13:​18-21.) Kua akaaite a Iesu i te karere Patireia ki te ua sinapi tei tupu ei pu rakau maata. Te aiteanga, ka maata te tangata ka āriki i te nuti meitaki kare e apinga e arai ia ratou. Te rua o te akatutuanga, kua akaaite a Iesu i te karere Patireia ki te varaoa opue. Ka tutu aereia te karere Patireia ki te ao katoa e ka akakeu i te tangata kia taui i to ratou oraanga. No reira kua akamaroiroi a Iesu i tana au pipi, kia kite e ka tauturu te angaanga tutu aere i te tangata e manganui.

17. Eaa te au tumu ka tapapa tatou i te meitaki no te angaanga tutu aere?

¹⁷ Te akakeuia nei tatou kia maroiroi i te angaanga tutu aere, na te akamanako anga i tei tupu i teia tuatau. I te au mataiti ravarai, e mirioni ua atu tangata tei tae mai ki te Akamaaraanga e te apii ra i te Pipiria. E anere tauatini ua atu tei papetitoia e te rave katoa ra i te angaanga tutu aere. Kare i papu ia tatou eia ka āriki i te nuti meitaki, inara kua kite tatou te akaputu nei a Iehova i te urupu maata te ka ora i te mate maata e vaitata maira. (Apo. 7:​9, 14) Te tapapa ra te Pu o te mou e ka āriki te tangata i te nuti meitaki, no reira e tutu aere tatou ma te maroiroi.

18. Eaa ta tatou ka inangaro i te tangata kia kite?

¹⁸ Kua matauia ta Iesu pipi no te rave maroiroi i te angaanga tutu aere. Te kite anga te tangata i te tu karape o te au apotetoro, “umere atura ratou, e kite atura oki e, ia Iesu katoa ra” ratou. (Anga. 4:13) Me akara mai te tangata ia tatou e tutu aere ra i te nuti meitaki, penei ka tuatua ratou te aru ra tatou i te akaraanga maroiroi o Iesu.