Ei Aerenga Akarongo to Tatou

1. Eaa te tumu i mareka ai a Paulo i tona oraanga?

KUA kite te apotetoro ko Paulo, kare e roa atu ka tamateia aia, inara kua mareka tikai aia i tona oraanga. Karanga a Paulo: “Kua oti toku oro anga, i mou marie na au i te akarongo.” (2 Timo. 4:​6-8) Kua iki aia i te tavini ia Iehova ma te irinaki kua mareka a Iehova iaia. Ka inangaro katoa tatou i te rave i te au ikianga meitaki te ka akamareka ia Iehova. Akapeea tatou me rave i te reira?

2. Ia 2 Korinetia 5:​7, eaa te aiteanga o ta Paulo tuatua ei aerenga akarongo to tatou?

² Kua tuatua a Paulo no runga iaia e te au taeake Kerititiano tiratiratu: “E aerenga akarongo oki to matou, kare i te aerenga kite mata.” (2 Kori. 5:7) Eaa te aiteanga o tana tuatua? Ko te tuatua “aerenga” i roto i te Pipiria, te taiku ra i te aerenga oraanga o tetai tangata. Me aaere tetai tangata ma te kite mata ua, ka rave aia i te au ikianga mei tana i kite, i akarongo, e te manako ra. I tetai tua, ko tetai tangata e aaere ra ma te akarongo, ka akamareka aia ia Iehova na roto i tana au ikianga. Me aru aia i ta Iehova kaveinga Pipiria, ka mataora tona oraanga i teianei e ka tutaki a Iehova iaia a te tuatau ki mua.—Sala. 119:66; Ebe. 11:6.

3. Eaa te au mea meitaki ka tupu me aaere tatou ma te akarongo? (2 Korinetia 4:18)

³ Tetai taime, e rave ana tatou i te au ikianga mei ta tatou i kite, i akarongo e te manako ra. Inara me ka irinaki ua tatou ki runga i teia au ikianga e toru, ka tupu te manamanata. Eaa te tumu? No te mea ka riro te reira i te akavare ia tatou. Pera katoa, ka akakeuia tatou kia iki i te au mea kare a Iehova e mareka. (Kohe. 11:9; Mata. 24:​37-39) Inara me aaere tatou ma te akarongo, ka rave tatou i te au ikianga puapinga te ka ‘akamareka i te Atu.’ (Ephe. 5:10) Ka mataora tatou e ka tupu te ngakau marū me aru tatou i ta Iehova aratakianga. (Sala. 16:​8, 9; Isa. 48:​17, 18) Me aaere ua rai tatou ma te akarongo, ka rauka te ora mutu kore a te tuatau ki mua.—E tatau ia 2 Korinetia 4:18.

4. Akapeea tetai tangata e kite ei te aaere ra aia ma te akarongo me kore ma te kite mata?

⁴ Akapeea tatou e kite ei te aaere ra tatou ma te akarongo me kore ma te kite mata? Akamanako ana i teia au uianga: Eaa te ka tauturu iaku kia rave i te au ikianga meitaki? Te irinaki ra ainei au ki runga i te au mea taku e kite mata ra? Me kore ki runga i ta Iehova aratakianga? Ka uriuri tatou akapeea me aaere ma te akarongo i roto i teia au turanga e toru: me iki i tetai ngai angaanga, me iki i tetai tokorua akaipoipo, e me oronga mai ta Iehova akaaerenga i te aratakianga ou. I teia au turanga tataki tai, ka uriuri tatou i te au mea puapinga kia akamanako i mua ake ka rave ei i te au ikianga.

ME IKI I TETAI NGAI ANGAANGA

5. Eaa ta tatou ka akamanako me iki i tetai angaanga?

⁵ Inangaro ana tatou i te akono i to tatou anoano e to tatou ngutuare tangata. (Kohe. 7:12; 1 Timo. 5:8) Tetai au angaanga, e maata te moni ka ko’i mai. Ka tauturu te reira i te tangata angaanga kia akono i te ngutuare e te akaputu i tetai pae no te tuatau ki mua. Inara te vai ra tetai ngai angaanga, e meangiti te moni tutaki e ka ngatā i te tangata angaanga i te akono i tona ngutuare tangata. No reira, me iki tatou i tetai angaanga e mea meitaki kia akamanako i te moni ka rauka mai. Inara me ko teia ua ta tatou e akamanako ra, penei te akakeuia ra tatou e ta tatou e kite mata ra.

6. I te pae o te angaanga, akapeea tatou me akaari te aaere ra tatou ma te akarongo? (Ebera 13:5)

⁶ Me aaere tatou ma te akarongo, ka akamanako tatou i to tatou pirianga kia Iehova e kia kore e tamanataia. Ka ui tatou: ‘Te tau ra ainei taku angaanga kia Iehova, te ō maira ainei tetai au peu kare Aia e mareka?’ (Mase. 6:​16-19) ‘Ka tamanata ainei teia angaanga i taku akamorianga e ka anoanoia au kia akaruke i toku ngutuare tangata no tetai tuatau roa?’ (Phili. 1:10) Me ka pau koe ae, eiaa e āriki i te reira angaanga noatu ka ngatā i te kimi i tetai angaanga ke. Me aaere tatou ma te akarongo, ka irinaki tatou e ka oronga mai a Iehova i ta tatou e anoano ra.—Mata. 6:33; e tatau ia Ebera 13:5.

7-8. Akapeea tetai taeake i Marike Apatonga, te aaere anga ma te akarongo? (Akara katoa i te tutu.)

⁷ Kua kite a Javier,a e taeake i Marike Apatonga, i te puapinga kia aaere ma te akarongo. Karanga aia: “Kua iki au i tetai angaanga e maata atu taku moni, kare i aite ki taku angaanga o mua ana.” Inara, kua inangaro tikai a Javier i te painia. Akakite aia: “Kua aravei au i te tauturu manitia. I mua ake i te reira, kua pure au no ta Iehova tauturu no te mea kua kite aia i toku anoano. Inangaro au kia maata taku apainga i te angaanga e kia maata katoa te moni, inara ko taku akamorianga ia Iehova te mea puapinga.”

⁸ Karanga a Javier: “I te tuatau o te uiuianga, akakite mai te manitia e ka angaanga au no tetai tuatau roa. Kua akamārama au kiaia, kare e rauka iaku no te mea e rave ana au i taku angaanga tutu aere.” Ae, kare a Javier i āriki i te reira angaanga. E rua epetoma i muri mai, kua akamata aia i te painia. I te reira mataiti, kua kitea mai tetai angaanga ou. Karanga aia: “Kua akarongo a Iehova i taku pure e kua oronga mai i tetai angaanga te ka tauturu iaku kia painia. Mataora au e kua rauka tetai angaanga e kare i tamanata i taku akamorianga kia Iehova e toku au taeake.”

9. Eaa taau i apii mai mei te akaraanga o Trésor?

⁹ Akapeea me te tamanata ra ta tatou angaanga i to tatou pirianga kia Iehova? Akamanako i te akaraanga o Trésor, no Congo mai. Karanga aia: “Inangaro au i teia angaanga ou. Ka ko’i mai au e toru taime te maata o taku moni e kua akangateiteiia au e te tangata.” Inara, kare a Trésor e tae putuputu ana ki te uipaanga no te mea kua patiia aia kia angaanga no tetai tuatau roa. Pera katoa, kua māro tona au oa angaanga iaia kia pikikaa ki te tangata no ta ratou e rave ra i te angaanga. Inangaro a Trésor i te akaruke i tana angaanga, inara kua manata aia kare e kitea mai tetai angaanga ou. Eaa tei tauturu iaia? Karanga aia: “Kua tauturu te irava o Habakuka 3:​17-19 iaku kia kite noatu ka ngere au i taku angaanga, ka meangiti te moni, ka akono ua rai a Iehova iaku. No reira, kua akaruke au i taku angaanga.” Karanga katoa aia: “Manako te au pu angaanga, ka akaatinga te aronga angaanga i tetai ua atu apinga, mei to ratou ngutuare, ta ratou akamorianga kia rauka te angaanga e te moni. Mataora au e kua paruru au i toku pirianga kia Iehova e toku ngutuare. E tai mataiti i muri mai, kua rauka tetai angaanga tei tauturu iaku kia tavini maata ia Iehova. Tetai taime ka meangiti mai te moni inara me tuku tatou ia Iehova na mua, ka akono Aia ia tatou.” No reira, me irinaki tatou ia Iehova e tana au taputou, te aaere ra tatou ma te akarongo e ka akameitaki aia ia tatou.

ME IKI I TETAI TOKORUA AKAIPOIPO

10. Me iki i tetai tokorua akaipoipo, eaa te ka akakeu i tetai kia aaere ma te kite mata?

¹⁰ E apinga aroa te akaipoipo no ko mai ia Iehova, no reira e mea natura i te inangaro kia akaipoipo. Me iki tetai tuaine i te akaipoipo, penei ka akamanako aia i te tutu mata o tetai taeake, tona tu, tana akono anga i tetai ke, tona turanga i te pae moni e me ka akarekareka aia i te tuaine.b E mea puapinga rai teia. Inara me ka akamanako ua te tuaine i teia au mea, penei te aaere ra aia ma te kite mata.

11. Me iki i tetai tokorua akaipoipo, akapeea tatou me aaere ma te akarongo? (1 Korinetia 7:39)

¹¹ Ka mareka a Iehova i te au tuaine e te au taeake me aru ratou i tana aratakianga no te iki anga i tetai tokorua akaipoipo! Ka akamanako ratou i te au kaveinga Pipiria kia “pakari aia” i mua ake ka aere kapiti ei raua e tetai taeake. (1 Kori. 7:36) No reira, ka iki aia i tetai tokorua te akaari ra i te au tu o Iehova te ka akariro iaia ei tane e ei vaine meitaki. (Mase. 31:​10-13, 26-28; Ephe. 5:33; 1 Timo. 5:8) Me ka akameamea tetai tangata kare i te Kite iaia, kia patoi aia i te reira timataanga e kia aru i te kaveinga Pipiria kia akaipoipo ma te ‘tau i te Atu,’ i roto ia 1 Korinetia 7:39. (E tatau.) Me aaere aia ma te akarongo, ka irinaki aia ka akono ua rai a Iehova iaia i te pae ngakau.—Sala. 55:22.

12. Eaa taau i apii mai mei te akaraanga o Rosa?

¹² Akamanako i te akaraanga o Rosa, e painia i Colombia. E angaanga ana aia na runga i te initaneti, kua aravei aia i tetai tangata kare i te Kite tei akameamea iaia. Kua inangaro katoa a Rosa iaia. Karanga aia: “E tangata meitaki aia. E tauturu ana aia i te tangata i tona oire. Kite aia i te akono mai iaku. Reka au i tona au tu inara kare aia i te Kite no Iehova. Ngatā iaku i te akakite kiaia kare maua e meitaki i te aere kapiti. I te reira taime, maromaroa au e kua inangaro au i te akaipoipo, inara kare i kitea tetai tokorua i roto i te tuatua mou.” Kare a Rosa i akamanako ua iaia uaorai. Mari ra kua akamanako aia i tona pirianga kia Iehova, e eaa te ka tupu me aru aia i tera tangata. No reira, kua akamutu aia i te pukapuka ki tera tangata e kua rave maroiroi a Rosa i ta Iehova angaanga. Muri mai, kua aere aia ki te Apii na te Aronga Tutu Evangelia e te painia takake nei aia. Karanga a Rosa: “Mataora au kua akameitaki mai a Iehova iaku.” Noatu e ngatā i te akono i ta Iehova kaveinga no te akainangaro, me ariu ra tatou ki ta Iehova aratakianga ka mataora to tatou oraanga.

ME ORONGA MAI A IEHOVA I TE ARATAKIANGA OU

13. Me oronga mai te akaaerenga i te aratakianga ou, eaa toou tu ki te reira?

¹³ E oronga mai ana te aronga pakari, te akaaere kotinga, te opati Betela e te Pupu Akaaere i te aratakianga te ka tauturu ia tatou kia tavini ia Iehova. Akapeea me kare tatou e mārama i tetai au aratakianga ou? Penei ka manako ekoko tatou i te aru i te reira. Penei ka akara tatou i te tu tarevake o te au taeake e oronga maira i te aratakianga.

14. Me orongaia mai te aratakianga ou, eaa te ka tauturu ia tatou kia aaere ma te akarongo? (Ebera 13:17)

¹⁴ Me aaere tatou ma te akarongo, irinaki tatou e te arataki nei a Iehova i tana akaaerenga e kua kite aia i te meitaki no tatou. No reira, ka mataora tatou i te akarongo e te akono i te au aratakianga ou. (E tatau ia Ebera 13:17.) Me akono tatou i te reira ka vai taokotai te putuputuanga. (Ephe. 4:​2, 3) Kua irinaki tatou noatu e au taeake apa ua te rave ra i te aratakianga, me akarongo tatou ka akameitaki a Iehova ia tatou. (1 Samu. 15:22) E me tauiia tetai aratakianga, ka akapapu a Iehova e kia aru tatou i te reira.—Mika 7:7.

15-16. Kia aaere ma te akarongo, eaa tei tauturu i tetai taeake tei ekoko i te aratakianga ou? (Akara katoa i te tutu.)

¹⁵ Akamanako ana i teia tupuanga meitaki, me aaere tatou ma te akarongo. I Peru, e tuatua ana te katoatoa i te reo Paniora, inara te vai ra tetai au ngutuare te tuatua ra i to ratou uaorai reo enua. Ko te reo Quechua tetai. I te au mataiti i aereia, e kimi ana te au taeake e te au tuaine reo Quechua i te aronga tei tuatua i teia reo. Inara, kia aru i te ture a te kavamani, kua oronga mai te akaaerenga i te au tauianga ou no te angaanga tutu aere. (Roma 13:1) Kua manako te au taeake me ka tamanataia rai te angaanga tutu aere. Inara kua akarongo te au taeake ki te aratakianga ou e kua akameitaki a Iehova i ta ratou kimi anga i te aronga reo Quechua.

¹⁶ E tangata pakari a Kevin i roto i te putuputuanga Quechua tei ekoko i teia aratakianga ou. Karanga aia: “Akapeea matou me kimi i te aronga reo Quechua?” Eaa ta Kevin i rave? Karanga aia: “Kua akamanako au i te irava o Maseli 3:5 e te akaraanga o Mose. Kua akakite a Iehova kia Mose kia arataki i te iti tangata Iseraela ki vao ia Aiphiti ki te Tai Muramura, akaraanga kare ratou e ora mei te nuku vaeau o Aiphiti. Noatu rai, kua akarongo a Mose e kua paruru a Iehova iaia.” (Exo. 14:​1, 2, 9-11, 21, 22) Kua taui a Kevin i tana ka rave me tutu aere. Eaa tei tupu? Karanga aia: “Kua kite tikai au i ta Iehova au akameitakianga. I mua ana e taki tai ua tangata reo Quechua ka aravei matou me tutu aere. I teianei e maata te tangata tei kitea mai. Kua pukapuka matou ki te pu kainga, te au atoro akaou e kua akamataia te au apii Pipiria. E maata te tangata tei tae mai ki te uipaanga.” Ae, me aaere tatou ma te akarongo, ka akameitaki ua rai a Iehova ia tatou.

17. Eaa ta tatou i apii mai mei teia atikara?

¹⁷ Kua uriuri tatou e toru au ikianga puapinga ta Iehova e mareka ra. Ka anoano katoaia tatou kia aaere ma te akarongo, na roto i ta tatou au ikianga mei te akarakara teata, te tamataora, te apii teitei e akapeea me utuutu i te tamariki. Noatu eaa ta tatou au ikianga, kia riro to tatou pirianga kia Iehova, tana kaveinga, tana taputou ei tauturu ia tatou kia aaere ma te akarongo. Me pera tatou, ka rauka ia tatou te ‘aaere ma te ingoa o Iehova, o to Atua, e tuatatau ua tu.’—Mika 4:5.