“E Akataka Ana Kotou . . . i ta Kotou e Akamori”

1. Eaa ta tatou ka rave e mataora ai, e eaa te tumu? (Isaia 48:​17, 18)

AKAPEREPERE maata a Iehova ia tatou, inangaro Aia kia mataora tatou i teianei e a te tuatau ki mua. (Kohe. 3:​12, 13) Kua anga a Iehova ia tatou ma te au tu meitaki. Inara, kare Aia i anga ia tatou kia tutara ki rungao i tetai e kia rave i te au ikianga no te meitaki e te kino. (Kohe. 8:9; Iere. 10:23) E mataora ai tatou, ka anoanoia tatou kia akamori iaia e te akono i tana au kaveinga.—E tatau ia Isaia 48:​17, 18.

2. Eaa ta Satani i inangaro kia irinaki tatou, inara eaa ta Iehova i rave?

² Te inangaro ra a Satani ia tatou kia irinaki e te tāpu ra a Iehova i te meitaki mei ia tatou e ka rauka i te tangata i te akaaere iaia. (Gene. 3:​4, 5) Kia akapapu e pikikaa a Satani, kua oronga a Iehova i te tuatau ki te tangata kia tutara. I teia rā, te kite nei tatou e puapinga kore te tutaraanga a te tangata. I tetai tua, te taiku ra te Pipiria i te au akaraanga o te au tane e te au vaine tei mataora i te tavini ia Iehova. Ko Iesu Karaiti tetai akaraanga. I roto i teia atikara, ka apii tatou i te tumu i tavini ei a Iesu ia Iehova. Aru mai, ka uriuri tatou i te tumu i tau ei a Iehova kia akamoriia. Te mea openga, ka uriuri tatou i te tumu i iki ei tatou i te tavini ia Iehova.

TE TUMU I TAVINI EI A IESU IA IEHOVA

3. Eaa ta Satani i oronga kia Iesu, e eaa ta Iesu i iki?

³ Ia Iesu i te enua nei, kua anoanoia aia kia iki e koai tana ka akamori. I muri mai i tona papetitoia anga, kua timata a Satani ia Iesu kia akamori iaia, na te oronga anga i te au patireia o te enua kia Iesu. Kua pau atu a Iesu: “E aere ke atu koe e Satani, kua oti oki i te tataia, ‘Ko toou Atua ra ko Iehova taau e akamori, e koia anake rai taau e akarongo.’” (Mata. 4:​8-10) Eaa a Iesu i rave ei i teia ikianga? Akamanako ana i teia.

4-5. Eaa tetai au tumu i iki ei a Iesu i te tavini ia Iehova?

⁴ Te tumu i tavini ei a Iesu ia Iehova, no tona inangaro maata i tona Metua e kua akaperepere Iaia. (Ioa. 14:31) Pera katoa, kua tavini a Iesu ia Iehova no te mea kua tau rai te kakā kia Iehova. (Ioa. 8:​28, 29; Apo. 4:11) Kua kite aia e ko Iehova te Tumu o te ora, ka irinakiia e ka oronga mai Aia i te au mea memeitaki. (Sala. 33:4; 36:9; Iako. 1:17) E akakite ua ana a Iehova i te tika kia Iesu e kua oronga mai i tana i anoano. (Ioa. 1:14) Kareka ra a Satani, kua akatupu aia i te mate ki te tangata. Koia te metua pikikaa e te noinoi. (Ioa. 8:44) Kua kite meitaki a Iesu i te tu o Iehova e te tu o Satani. Kare aia e inangaro kia aite mei ia Satani tei patoi ia Iehova.—Phili. 2:​5-8.

⁵ Ko tetai tumu i tavini ei a Iesu ia Iehova, no te mea kua kite aia e ka tupu te au mea meitaki ki te aronga tiratiratu. (Ebe. 12:2) Me vai tiratiratu a Iesu, ka akatapu aia i te ingoa o tona Metua e ka akaoraia te tangata mei te ara e te mate.

TE TUMU I TAU EI A IEHOVA KIA AKAMORIIA

6-7. Eaa te tumu i kore ei te manganui i akamori ia Iehova, inara eaa aia i tau ei kia akamoriia?

⁶ E manganui te tangata i teia tuatau kare e tavini ana ia Iehova, no te mea kare ratou i kite i tona au tu manea e tana au mea meitaki i rave. Kua aite ratou ki te aronga ta Paulo i ako i Atene. Kare katoa ratou i kite i te Atua.—Anga. 17:​19, 20, 30, 34.

⁷ Akakite a Paulo ki te iti tangata o Atene no runga i te Atua mou “koia uaorai oki tei oronga mai i te ora, e te a’o, e te au mea katoa.” Kua taiku katoa aia: “Nona oki to tatou ora, e i aaere ei, e i noo ei.” Ko te Atua koia Tei Anga “i te tangata i te pa enua katoa nei i te toto okotai ra,” no reira kua tau rai aia kia akamoriia e tatou.—Anga. 17:​25, 26, 28.

8. Eaa ta Iehova kare e rave? Akamārama mai.

⁸ No te mea koia Tei Anga e koia te Tutara Ngateitei i te ao katoa, kare a Iehova e māro i te tangata kia akamori iaia. Kare, kare rava. Mari ua na roto i tana au mea i anga, ka kitea tona au tu manea e tona akaperepere ia tatou. Kua inangaro aia i te tangata kia riro ei oa nona. (1 Timo. 2:​3, 4) No reira, kua tereni a Iehova ia tatou kia apii i tetai ke no runga i tona akakoroanga e te au mea meitaki tana ka rave no te tangata. (Mata. 10:​11-13; 28:​19, 20) Na roto i te au putuputuanga, kua oronga mai aia i te aronga pakari kia tauturu ia tatou.—Anga. 20:28.

9. Akapeea a Iehova te akaari anga i tona aroa?

⁹ Ka kiteaia to Iehova aroa, na te akono anga i te aronga kare e irinaki ana Iaia. Akamanako ana i teia: E tauatini mataiti i aereia mai, kua rave te maata anga o te tangata i te tika e te tarevake e kare i akarongo kia Iehova. Noatu ra, kua oronga a Iehova i te au apinga tei anoanoia kia ora e kia mataora te tangata. (Mata. 5:​44, 45; Anga. 14:​16, 17) Na roto iaia, ka rauka te au oa e te au ngutuare tei inangaro ia ratou, te anau tamariki, te angaanga moni e tetai oraanga mataora. (Sala. 127:3; Kohe. 2:24) Te akapapu maira teia e te akaperepere ra to tatou Metua i te rangi i te au tangata ravarai. (Exo. 34:6) I teianei, ka akamanako tatou i tetai au tumu akapeea a Iehova me akameitaki i te aronga e tavini ra iaia.

TE TUMU I IKI EI TATOU I TE TAVINI IA IEHOVA

10. (a) Eaa te tumu puapinga i tavini ei tatou ia Iehova? (Mataio 22:37) (e) Akapeea koe e puapingaia ai mei to Iehova tu akakore anga ara? (Salamo 103:​13, 14)

¹⁰ Mei ia Iesu rai, te tavini nei tatou ia Iehova no to tatou inangaro iaia ma te ngakau katoa. (E tatau ia Mataio 22:37.) Ka akavaitata tatou kia Iehova me apii tatou i tona au tu. Ei akaraanga, ka puareinga ua aia i te akakore i ta tatou ara. Te akarongo kore anga a Iseraela, kua pati akatenga a Iehova: “E ariu mai kotou, ko te tangata katoa i tona uaorai aerenga kino.” (Iere. 18:11) Kua kite a Iehova e aronga apa ua tatou e kua aite tatou mei te one pueu. (E tatau ia Salamo 103:​13, 14.) Me akamanako oonu koe i to Iehova tu akakore anga ara e tona au tu manea, kare ainei ka akakeuia koe kia tavini iaia e tuatau ua atu?

11. Eaa tetai au tumu i iki ei tatou i te tavini i to tatou Metua ko Iehova?

¹¹ Ka akakeu katoaia tatou kia tavini ia Iehova, no te mea kua tau rai te reira. (Mata. 4:10) Kua kite tatou me tavini tiratiratu tatou ia Iehova, ka rauka te au akameitakianga. Ka tauturu te reira ia tatou kia akatapu i to Iehova ingoa, akapapu e pikikaa te Tiaporo e kia akamareka i to tatou Metua. No reira, me iki tatou i te tavini ia Iehova i teia rā, ka rauka te ora mutu kore e tuatau ua atu!—Ioa. 17:3.

12-13. Eaa ta tatou ka apii mai mei te akaraanga o Jane e Pam?

¹² Ia tatou e tamariki ra, ka apii tatou i te akaperepere ia Iehova e kia akaketaketa ua atu i te reira me pakarikari mai tatou. Teia tei tupu kia Jane e Pam.a E 11 mataiti o Jane e e 10 o Pam mataiti, te apiianga raua i te Pipiria. Noatu kare to raua nga metua i apii ana, kua akatika raua ia Jane e Pam kia kapiti atu ki te Au Kite o Iehova inara, kia aere katoa raua ki te pure a te ngutuare tangata. Karanga a Jane, “Ko taku i apii mai mei te Pipiria, kua paruru iaku kia kore e kai i te au apinga akakona e kia kore e piri ainga ki te au oa.”

¹³ To raua mapu anga mai, kua riro raua ei papuritia. I muri mai, kua akamata raua i te painia e kua akono i to raua nga metua. Me akamanako au i to maua tupuanga, karanga a Jane: “Kua kite au e te akono nei a Iehova i tona au oa e mei ta 2 Timoteo 2:19 e akakite ra, ‘Kua kite te Atu i tona uaorai.’” E mea papu, te akono ra a Iehova i te aronga tei tavini iaia!

14. Akapeea tatou me paruru ia Iehova? (Akara katoa i te au tutu.)

¹⁴ Ka inangaro tatou i tetai ke kia kite i te tika no runga ia Iehova. Akamanako i teia akatutuanga: E oa piri mou toou e tu meitaki tona, oronga ua e te akakore i te ara. I tetai rā, kua akakino tetai tangata i toou oa ma te tuatua e e tangata kino e te pikikaa aia. Eaa taau ka rave? Ka paruru koe iaia. Mei te reira katoa, me rongo tatou i te au tuatua pikikaa no runga ia Iehova, ka paruru tatou Iaia na te akakite anga i te tika. (Sala. 34:1; Isa. 43:10) Na roto i ta tatou au tuatua e te angaanga, ka tavini ua rai tatou ia Iehova ma te ngakau katoa.

15. Eaa ta Paulo i rave no te akatanotano i tana au akakoroanga? (Philipi 3:​7, 8)

¹⁵ Ka akatanotano tatou i ta tatou au akakoroanga kia tavini maata atu ia Iehova. Ei akaraanga, kua akaruke te apotetoro ko Paulo i tona taoonga teitei i roto i te akonoanga ngati Iuda. Kua aru katoa aia ia Iesu e kua tavini ia Iehova. (Gala. 1:14) Tei tupu mai, kua rauka te au akameitakianga iaia mei te tavini anga ia Iehova e ka tutara aia ma Karaiti i te rangi. Kare aia i tataraara ana i tana ikianga kia tavini ia Iehova, e pera katoa tatou.—E tatau ia Philipi 3:​7, 8. 

16. Eaa ta tatou i apii mai mei te akaraanga o Julia? (Akara katoa i te au tutu.)

¹⁶ Me tuku tatou i te tavini anga ia Iehova ko te mea puapinga, ka akameitaki a Iehova ia tatou i teianei e a te tuatau ki mua. Akamanako i te akaraanga o Julia. I mua ake ka apii ei aia i te Pipiria, e imene ana a Julia i ko i tana pure mei tona tamariki anga. No te karape iaia i te imene kua tereniia a Julia kia tukatau e kua imene aia i ko i tetai au ngai rongonui. Te aere anga aia ki te apii, kua pukapuka raua ko tetai oa no runga i te Atua e kua taiku tona oa i te ingoa o te Atua, ko Iehova. Mei reira mai, kua apii a Julia i te Pipiria e rua taime i te epetoma. Kare i roa ana, kua iki aia i te tavini ia Iehova e kua akaruke i te imene. Kare i te ikianga māmā. Karanga aia: “Tuatua akakino mai te tangata e kua nenevaia au no tei akaruke i te imene e te tavini ia Iehova, inara kua iki au i te tavini ia Iehova.” I teia rā, eaa tona manako no tana ikianga i rave e 30 mataiti i topa? Akakite aia: “Pumaana tikai e kua iki au i te tavini ia Iehova e ka oronga mai aia i taku e anoano ra no te tuatau ki mua.”—Sala. 145:16.

E TAVINI UA RAI IA IEHOVA

17. Eaa i puapinga ai kia tavini te tangata ia Iehova i teia tuatau rapurapu?

¹⁷ E tuatau rapurapu tikai teia. Kua tata a Paulo: “Kia roa poto ake oki, e tae mai ei te ka tae mai, e kare rava e tavare.” (Ebe. 10:37) Eaa ta tatou ka rave? Te poto nei te tuatau no te tangata kia iki me ka tavini ratou ia Iehova. (1 Kori. 7:29) Me kua iki takere tatou i te tavini i te Atua, ka akakoromaki tatou i te au timataanga, no te mea e tuatau poto te reira.

18. Eaa ta Iesu e Iehova e inangaro maira ia tatou kia rave?

¹⁸ Kua akamaroiroi a Iesu i te tangata kia riro ei au pipi nana e kia aru ua rai iaia. (Mata. 16:24) No reira, me kua tavini ana tatou ia Iehova no tetai au mataiti, auraka e tuku i te ’au. Ka angaanga pakari tatou i te tavini ua rai ia Iehova. Noatu e ngatā te reira, ka mataora tatou i te au akameitakianga no te tavini iaia i teia tuatau tikai!—Sala. 35:27.

19. Eaa te apiianga mei te akaraanga o Gene?

¹⁹ Kua irinaki tetai pae me tavini ratou ia Iehova, kare ratou e mataora. Me e mapu koe, e ngatā ainei ia koe i te rave i te reira? Akakite tetai mapu taeake ko Gene: “Iaku kare au e mataora no te mea e Kite au no Iehova. Te maata anga o te au tamariki taku e kapiti ana e reka ana ratou i te inu kava, te akainangaro i tetai ke, te kanga i te au vitio kino, ko au ra ka aere au ki te au uipaanga e te tutu aere.” Akapeea teia te akaparuparu anga ia Gene? Karanga aia “Kua rave au i te au mea kino ta te au mapu e rave ana e kua reka au i te reira. Inara e mea puapinga kore e kare au i mataora. Kua akamanako au i te au mea meitaki me akarongo au kia Iehova e kua iki au i te tavini Iaia ma te ngakau katoa. Mei reira mai, te pau nei a Iehova i taku au pure.”

20. Eaa ta tatou ka anoanoia kia iki?

²⁰ Kua imene te tata salamo kia Iehova: “E ao to te tangata i ikiia e koe, e kua akavaitataia mai e koe kia noo i roto i toou ra au paepae.” (Sala. 65:4) No reira, kia tavini tiratiratu ua rai tatou ia Iehova mei ta Iosua i akakite: “Kareka au e toku ra ngutuare, e akamori ïa matou ia Iehova.”—Iosu. 24:15.