Akapeea me Oronga i te Ako

1. Koai te ka anoanoia kia oronga i te ako, e eaa te tumu?

E REKA ana ainei koe i te oronga i te ako? Tetai pae ka mataora e tetai pae ka emiemi ratou. Noatu ra, ka anoanoia tatou kia oronga i te ako i tetai taime. Eaa te tumu? No te mea karanga a Iesu e ka kiteia tana pipi mou me aroa ratou ia ratou uaorai. (Ioa. 13:35) Ko tetai ravenga ei akapapu i to tatou aroa, na te oronga anga i te ako ki te au taeake e te au tuaine me anoanoia. Karanga te Pipiria e ka tupu te ‘pirianga oa’ mei te “tuatua maru a te tangata.”—Mase. 27:9.

2. Eaa ta te aronga pakari ka anoanoia kia kite, e eaa te tumu? (Akara katoa i te pia “Akoanga i te Uipaanga Epetoma.”)

² Ka anoanoia te aronga pakari kia kite akapeea me oronga i te ako. Kua iki a Iehova e Iesu i te aronga pakari kia akono i te putuputuanga. (1 Pete. 5:​2, 3) Ka oronga ratou i te au akoanga mei te Pipiria. Ka ako katoa te aronga pakari ia tatou tataki tai e te aronga tei akatakakeia mei te putuputuanga, kia oki mai kia Iehova. Akapeea te aronga pakari e tatou katoa me oronga i tetai ako meitaki?

3. (a) Akapeea tatou me oronga i te ako ki tetai ke? (Isaia 9:5; akara katoa i te pia “Aru i te Akaraanga o Iesu me Oronga i te Ako.”) (e) Eaa ta tatou ka uriuri i teia atikara?

³ Ka kite tatou akapeea me oronga i te ako na te apiianga i te akaraanga o tetai i roto i te Pipiria, mei ia Iesu rai. Kua kapikiia aia e ko te ‘Tumu Korero.’ (E tatau ia Isaia 9:5.) I teia atikara, ka uriuri tatou eaa ta tatou ka rave me patiia tatou kia oronga i te ako e eaa ta tatou ka rave noatu kare tatou i patiia mai. Ka uriuri katoa tatou i te puapinga kia oronga i te ako i te taime tau e te tu me oronga i te reira.

ME PATIIA TATOU KIA ORONGA I TE AKO

4-5. Me pati mai tetai i ta tatou ako, eaa ta tatou ka ui? Oronga mai i tetai akaraanga.

⁴ Me pati mai tetai i ta tatou ako, eaa to tatou manako? Penei ka mataora e ka viviki tatou i te tauturu. Inara, e ui kia koe, ‘Me kua tau ainei au kia oronga i te ako?’ No reira, ko te ravenga meitaki ei tauturu i toou oa, koia oki kia pati aia ki tetai tei mārama i tona turanga.

⁵ Ei akaraanga, kua rokoia toou oa piri mou e te maki kino. Ka akakite aia kia koe i tana kimikimi anga no tetai au vairakau e ka pati aia i toou manako. Noatu ka akakite koe i taau vairakau ka inangaro, inara kare koe i te taote e kare koe i kite akapeea me rapakau i te maki. No reira, ko te ravenga meitaki ei tauturu i toou oa ko te kimi i te tauturu a te taote.

6. Eaa te mea meitaki kia rave, i mua ake ka oronga ai tatou i te ako?

⁶ Tetai taime ka manako tatou e kua tau rai tatou i te ako atu i to tatou oa. Inara, penei e mea meitaki eiaa tatou e viviki i te rave i te reira. Karanga a Maseli 15:28 “te kimi ra te ngakau o te aronga tuatua-tika ra i tana e tuatua.” Noatu kua kite tatou eaa te ka tuatua, e mea meitaki kia kimikimi na mua, kia pure, e kia akamanako meitaki i ta tatou ka ako. Na te rave anga i teia, ka rotai ta tatou ako ki to Iehova manako. Akatau ana tatou i te akaraanga o Natana te peroveta.

7. Eaa te apiianga mei te akaraanga o te peroveta ko Natana?

⁷ Akakite te Ariki ko Davida kia Natana i tona inangaro i te pātu i te iero o Iehova. Kua viviki a Natana i te āriki i to Davida manako. Inara, kare tana ako i rotai kia Iehova. Kua anoanoia a Natana kia ui kia Iehova na mua. Eaa te tumu? Kare a Iehova i iki ia Davida kia pātu i tona iero. (1 Para. 17:​1-4) Apii mai teia akaraanga, me pati tetai i ta tatou ako, e mea tau “kia tavarevare [tatou] i te tuatua.”—Iako. 1:19.

8. Eaa tetai tumu kia matakite tatou i mua ake ka oronga ai i te ako?

⁸ Ko teia tetai tumu kia matakite tatou me ako atu i tetai no te mea me tarevake te reira, ka akaapaia tatou. No reira, e mea puapinga kia akamanako meitaki i mua ake ka oronga ai i te ako.

ORONGA I TE AKO NOATU KARE I PATIIA MAI

9. I mua ake ka oronga ai i te ako, eaa ta te aronga pakari ka akapapu? (Galatia 6:1)

⁹ Tetai taime, ka ako te aronga pakari i te au taeake e te au tuaine tei rave i te ara. (E tatau ia Galatia 6:1.) Penei te rave ra tetai tangata i te ikianga tarevake te ka akakeu iaia kia ara. Ka akamaroiroi te aronga pakari i tera tangata kia tavini ua rai ia Iehova e kia ora e tuatau ua atu. (Iako. 5:​19, 20) E puapinga ai te ako, ka akapapu te aronga pakari me kua ara tera tangata. Kua kite ratou noatu e tuke tana ikianga mei ta tetai taeake, kare te aiteanga e te rave ra aia i te kino. (Roma 14:​1-4) Inara, me kua rave te taeake i te tarevake e kua takino i tona pirianga kia Iehova, akapeea te aronga pakari me ako atu iaia?

10-12. Me orongaia te ako noatu kare i patiia mai, eaa ta te aronga pakari ka rave? Akatutu mai. (Akara katoa i te au tutu.)

¹⁰ E ngatā i te aronga pakari i te oronga i te ako, noatu kare i patiia ta ratou tauturu. Eaa te tumu? Akakite a Paulo penei kare te reira tangata i kite i tona tarevake. No reira, i mua ake ka orongaia ai te ako, ka anoanoia te aronga pakari kia aru i teia au takainga.

¹¹ Ei akaraanga: Ka tanu te tangata i te ua kai ki roto i te one marō. I mua ake ka tanu ei, ka uri aia i te one kia paruparu e ka tanu i te ua. E oti, ka pîpî ki te vai kia tupu meitaki. Mei te reira katoa, i mua ake ka oronga ai tetai tangata pakari i te ako, ka rave aia i tetai au takainga puapinga. Ka tiaki aia i te taime tau no te pukapuka kia akamaroiroi atu i te taeake. Me oronga te tangata pakari i te ako na roto i te tu aroa e te takinga meitaki, ka āriki i reira tetai ke i tana ako.

¹² Ia raua e pukapuka ra, te akaparuparuia ra te one, koia oki kia marū te ngakau o te taeake e te akapapu kiaia e rave ana te katoatoa i te tarevake e ka anoanoia te ako. (Roma 3:23) Na roto i te reo marū e te akangateitei, ka akaari te tangata pakari i te au Irava kia kite te taeake i tona tarevake. Me āriki aia, te tanu ra te tangata pakari i te ua, na te akamārama anga i tana ka anoanoia kia rave no te akatanotano i tona turanga. I te openga, ka pîpî te tangata pakari i te ua na te akameitakianga i te taeake e te pure kapiti kiaia.—Iako. 5:15.

13. Akapeea te aronga pakari me akapapu e kua mārama te taeake i te ako?

¹³ Tetai taime, ko ta te tangata pakari e tuatua ra penei kare te taeake e akarongo ra i mārama. Eaa ta te aronga pakari ka rave? Na roto i te tu marū, ka ui ratou i te au uianga puapinga kia kite e kua mārama te taeake i te ako e eaa tana ka anoanoia kia rave.—Kohe. 12:11.

ORONGA I TE AKO I TE TAIME TAU E TE TU ME ORONGA I TE REIRA

14. Ka oronga ainei tatou i te ako me kua riri tatou? Akamārama mai.

¹⁴ E aronga apa ua tatou, no reira ka rave e ka tuatua tatou i te au apinga te ka tamamae atu i tetai ke. (Kolo. 3:13) Akapapu te Pipiria e ka akariri rai tatou i tetai ke. (Ephe. 4:26) No reira, eiaa tatou e riri me oronga atu i te ako. No teaa ra? No te mea “kare oki te riri o te tangata e akatupu i te tuatua-tika a te Atua.” (Iako. 1:20) Me ako tatou ma te riri ka akatupu te reira i te kino. Kare te aiteanga e kare tatou e akakite i to tatou au manako ki tei akariri mai ia tatou. Mari ra, kia tiaki e kia marū tatou ka ako atu ei i te taeake. Ka apii tatou i te akaraanga o Eliu tei oronga i te ako meitaki kia Iobu.

15. Eaa ta tatou ka apii mei te akaraanga o Eliu? (Akara katoa i te tutu.)

¹⁵ Kua akarongo ua a Eliu kia Iobu iaia e akatikatika ra i te au akaapaanga a tona au taeake pikikaa. Kua tangi a Eliu ia Iobu. Inara, te akaapaanga a Iobu ia Iehova, kua riri a Eliu. Noatu ra, kua tiaki a Eliu i te taime tau no te ako marū atu ia Iobu. (Iobu 32:2; 33:​1-7) No reira, e apiianga puapinga ta tatou ka kite mai mei ia Eliu. Kia oronga i te ako ma te aroa i te taime tau e na roto i te tu marū.—Kohe. 3:​1, 7.

E ORONGA E TE ĀRIKI I TE AKO

16. Eaa te apiianga mei ia Salamo 32:8?

¹⁶ Karanga a Iehova: “E ako atu au ia koe; ei runga ia koe toku mata.” (E tatau ia Salamo 32:8.) Ko tera te aiteanga, ka ako ua rai a Iehova ia tatou. Kua taputou mai aia e ka tauturu aia ia tatou kia taangaanga i tana Tuatua. E akaraanga meitaki aia no tatou! Me patiia mai tatou kia oronga i te ako ki tetai ke, kia aru tatou ia Iehova na te akamaroiroi anga e te tauturu i te au taeake kia rave i te au ikianga meitaki.

17. Me oronga te aronga pakari i te ako mei te Pipiria, eaa ta ratou ka akapapu? Akamārama mai. (Isaia 32:​1, 2)

¹⁷ I teianei, ka anoanoia tatou kia oronga e kia āriki i te ako. (2 Timo. 3:1) Ko te aronga pakari tei oronga i te ako mei te Pipiria, kua aite ratou “mei te au vai ta’e i te ngai keremarō.” (E tatau ia Isaia 32:​1, 2.) Ka akameitaki tatou i te au oa tei oronga mai i te ako tei anoanoia. Kua aite ta ratou ako “mei te lemoni auro i roto i te vairanga ario.” (Mase. 25:11) No reira, kia apii ua rai tatou akapeea me oronga e te āriki i te ako tei tau kia Iehova.