Kite Ainei Koe i te Puapinga Kia Mareka Ua?

1. Eaa te aiteanga kia mareka ua tatou i ta tatou i rauka?

TE MAREKA ra ainei koe i taau i rauka? Ka mataora e ka tupu te ’au ki te aronga tei āriki i ta Iehova i oronga kia ratou. Kare e riri no tei ngere i te apainga. Noatu ra, kare te aiteanga e kare tatou e akamanako i to tatou turanga. Ei akaraanga, ka inangaro tetai taeake i te rave maata atu i ta Iehova angaanga. (Roma 12:1; 1 Timo. 3:1) No reira, kia mareka ua tatou noatu kare i rauka tetai apainga.

2. Eaa te au mea kino ka tupu me kare tatou e akaari i te tu mareka ua?

² Me kare tatou e mareka ua i tei rauka, ka akakeuia tatou kia rave i te au ikianga tarevake. Ei akaraanga, ka angaanga roa tetai pae no te oko i te au apinga kare i anoanoia. Te mea maromaroa, kua keia tetai au Kerititiano i te moni e te au apinga ta ratou i inangaro. Karanga ratou, ‘Naku teia apinga,’ ‘Inangaro au i teia,’ me kore ‘Ka tutaki atu au i te reira a tetai rā.’ Inara, e rikarika ana a Iehova i te aronga keia. (Mase. 30:9) Kua akamutu tetai pae i te tavini ia Iehova no te mea kare a ratou angaanga i orongaia i roto i te putuputuanga. (Gala. 6:9) Eaa ra tetai tavini o Iehova i manako pera ai? No te mea, kua ngere aia i te akaari i te tu mareka ua.

3. Eaa te apiianga puapinga mei ia Philipi 4:​11, 12?

³ Ka rauka ia tatou i te akaari i te tu mareka ua. Tata te apotetoro ko Paulo e “kua kite au i te akakoromaki i te au mea ravarai i rokoia mai ei au nei.” (E tatau ia Philipi 4:​11, 12.) Kua tata aia i te reira iaia i roto i te are auri. Noatu ra, kare aia i maromaroa. Kua akakoromaki aia i te au mea ravarai. No reira, me apiapi tatou, e akamaara i te akaraanga o Paulo kia mareka ua tatou. Eiaa e manako e māmā ua i te akaari te tu mareka ua. Mari ra, ka anoanoia tatou kia apii akapeea me akaari i te tu mareka ua. Akapeea ra? I teia atikara ka uriuri tatou eaa te ka tauturu ia tatou kia akaari i te tu mareka ua.

AKAARI I TE TU AKAMEITAKI

4. Akapeea te tu akameitaki me tauturu ia tatou kia mareka ua? (1 Tesalonia 5:18)

⁴ Ko tetai tei akaari i te tu akameitaki, ka mareka ua aia. (E tatau ia 1 Tesalonia 5:18.) Ei akaraanga, me mareka ua tatou i tei rauka, kare tatou e taitaia no te au mea kare i rauka. Me mareka ua tatou i te tavini ia Iehova, ka akamanako tatou i te rave meitaki i tana angaanga e kare kia aruaru i te au apainga ou. No reira te au Irava i akamaroiroi ei ia tatou kia akameitaki ua rai ia Iehova na roto i te pure! Me e tu akameitaki to tatou ka rauka ia tatou “te au o te Atua, ko tei maata ua atu i te kite tangata.”—Phili. 4:​6, 7.

5. Eaa te au tumu kia akameitaki to Iseraela ia Iehova? (Akara katoa i te tutu.)

⁵ Akamanako i tei tupu ki to Iseraela. E maata te taime, kua kopekope ratou kia Iehova kare e rava ana te kai mei ta ratou i matau i Aiphiti. (Nume. 11:4-6) E tika, e oraanga ngatā to ratou i te metepara. Inara eaa te ka tauturu ia ratou kia mareka ua? Ka anoanoia ratou kia akamaara i ta Iehova au angaanga meitaki i rave i Aiphiti. No te mea kua takinokinoia ratou, kua apai mai a Iehova i te maki mate e tai ngauru ei akaora ia ratou. Te akaruke anga ratou ia Aiphiti, kua oronga ratou i te ario, te auro e te kakau ki to Iseraela. (Exo. 12:​35, 36) Te arumakiia anga to Iseraela, kua aaere ratou na roto i te Tai Muramura ma te tauturu a Iehova. I te metepara, kua angaiia ratou ki te au māna i te au rā ravarai. Eaa te manamanata? Kua ngere ratou i te akaari i te tu akameitaki.

6. Eaa te ka tauturu ia tatou kia akaari i te tu akameitaki?

⁶ Eaa te ka tauturu ia koe kia akaari i te tu akameitaki? Te mea mua, e akamanako i te au mea e mataora ana koe. E tata ki raro e rua me kore e toru apinga taau i mareka. (Aue. 3:​22, 23) Te rua, e akameitaki atu i tetai ke. Me rave ratou i tetai angaanga naau, ka akameitaki koe ia ratou. Te mea puapinga, kia akameitaki ua rai tatou ia Iehova. (Sala. 75:1) Te toru, e iki i te au taeake tei akaari i te tu akameitaki. Me akameitaki tatou ia ratou, ka akakeuia ratou kia akaari katoa i te tu akameitaki. (Deu. 1:​26-28; 2 Timo. 3:​1, 2, 5) No reira, me akameitaki ua rai tatou i tetai ke, kare tatou e maromaroa no te au mea kare i rauka ia tatou.

7. Eaa tei tauturu ia Aci kia akaari i te tu mareka ua, e eaa tei tupu?

⁷ Akamanako i tei tupu kia Aci, i Indonesia. Karanga aia: “I te tuatau o te maki COVID-19, kua akaaite au i toku turanga ki tetai au taeake. No te reira, kua maromaroa au.” (Gala. 6:4) Eaa tei tauturu iaia kia taui i tona manako? Karanga a Aci: “Kua akamanako au i te au akameitaki anga ta Iehova i oronga mai kiaku i te au rā e te au mea meitaki tei rauka iaku mei tana akaaerenga. E oti, kua akameitaki au ia Iehova. Kua tauturu teia iaku kia mareka ua.” Me maromaroa koe i toou turanga, e aru i te akaraanga o Aci kia akaari i te tu mareka ua.

AKAMOU I TOOU MANAKO KIA IEHOVA E KIA AKAAKA

8. Eaa tei tupu kia Baruka?

⁸ Kua tupu te maromaroa kia Baruka, te tangata tata o Ieremia. E angaanga ngatā ta Baruka i rave no te tauturu ia Ieremia kia akakite aere i te karere pakari a Iehova ki to Iseraela. I tetai atianga, kua manako a Baruka i tona anoano e kare i akamou ki runga i ta Iehova i inangaro iaia kia rave. Na roto ia Ieremia, kua akakite a Iehova kia Baruka: “Te kimi ra ainei koe i te meitaki maata noou uaorai? Auraka e kimiia.” (Iere. 45:​3-5) Tera te aiteanga: “Kia mareka ua koe i taau i rauka.” No reira, kua āriki a Baruka i ta Iehova ako e kua mareka ua aia.

9. Eaa ta tatou ka apii mai mei ia 1 Korinetia 4:​6, 7? (Akara katoa i te au tutu.)

⁹ Penei, ka manako tetai tavini o Iehova e kia orongaia te apainga kiaia. No te mea e tu karape tona, te angaanga pakari e kua tavini aia ia Iehova no tetai tuatau roa. Inara, kua orongaia te reira apainga ki tetai ke. Eaa te ka tauturu iaia kia kore e riri? E akamanako aia i ta Paulo i tata ia 1 Korinetia 4:​6, 7. (E tatau ia.) No ko mai ia Iehova to tatou kite e te karape i te rave i tana angaanga. No reira, kare i tau ia tatou teia apinga aroa. Mari ra, na Iehova i oronga mai i teia no tona inangaro ia tatou.—Roma 12:​3, 6; Ephe. 2:​8, 9.

10. Akapeea tatou me akaari i te tu akaaka?

¹⁰ Ka rauka ia tatou te akaari i te tu akaaka na te aru anga i te akaraanga o Iesu. Akamanako i tei tupu i te po i orei ei aia i te vaevae o tana au apotetoro. Tata te apotetoro ko Ioane: “Kua kite anā Iesu e, [1] kua tuku mai te Metua i te au mea katoa tei tona rima, [2] e mei ko mai aia i te Atua ra, [3] e te oki atu rai oki aia ki te Atua ra, . . . kua orei atura i te vaevae o te au pipi.” (Ioa. 13:​3-5) Penei ka manako a Iesu e nona te vaevae kia oreiia. Inara kare aia i manako e no te mea e Tamaiti aia na te Atua ka rauka iaia te are manea, te moni e kia puapinga tona oraanga. (Luka 9:58) Mari ra, e tu akaaka e te mareka ua to Iesu. Kua oronga mai aia i te akaraanga no tatou.—Ioa. 13:15.

11. Akapeea te tu akaaka te tauturu anga ia Dennis kia mareka ua?

¹¹ Akakite mai a Dennis e taeake no te Netherlands, kua tauta aia i te aru i to Iesu akaraanga akaaka. Karanga aia: “Ka riri au, me orongaia tetai angaanga taku i inangaro ki tetai ke. Te tupuanga te reira, kua apii au akapeea me akaari i te tu akaaka. I runga i te JW Library^® app, ka tag au i te au irava no runga i te tu akaaka kia māmā iaku i te kimi e te tatau i te reira. E akarongo ana au i te au ako no te tu akaaka i runga i taku tereponi.a Apii mai au e kia akakakāia a Iehova no te au mea pouroa ka rave tatou. Noatu e apainga ta tatou tataki tai, na Iehova ra te reira e akamanuia.” Me ka riri koe no te mea kua ngere koe i tetai apainga taau i inangaro, e taangaanga i te tu akaaka. Ka akaketaketa teia i toou pirianga kia Iehova e ka tauturu ia koe kia mareka ua.—Iako. 4:​6, 8.

AKAMOU KI TO TATOU MANAKONAKOANGA

12. Eaa te au taputou no te tuatau ki mua ka tauturu ia tatou kia mareka ua? (Isaia 65:​21-25)

¹² Ka mareka ua tatou me akamanako ana i ta Iehova au taputou no te tuatau ki mua. I roto i te puka o Isaia, akakite mai a Iehova e kua mārama aia i to tatou turanga. Inara kua taputou a Iehova e ka takore aia i teia au manamanata. (E tatau ia Isaia 65:​21-25.) Ka noo tatou ki roto i te au are manea. Ka mataora tatou i te angaanga, e ka maata atu te au kai memeitaki. Kare tatou e taitaia i to tatou oraanga e ta tatou au tamariki. (Isa. 32:​17, 18; Eze. 34:25) Mea papu e ka tupu teia au taputou no te tuatau ki mua.

13. Eaa te au turanga ngatā e tupu nei, e akapeea to tatou manakonakoanga me tauturu ia tatou?

¹³ Eaa i puapinga ai kia akamou tatou ki runga i te manakonakoanga no te tuatau ki mua? No te mea tei roto tatou i te “tuatau openga” e e maata te au kino e tupu nei. (2 Timo. 3:1) Ka tauturu a Iehova ia tatou kia akakoromaki na roto i tana ako e tona maroiroi. (Sala. 145:14) Pera katoa, ka tauturu te manakonakoanga ia tatou me tupu te tumatetenga. Penei ka angaanga pakari koe no te oko i te kai, te kakau e te ngai nooanga no toou ngutuare. Ko te aiteanga ainei e ka ngatā ua rai toou oraanga? Kare! Kua taputou a Iehova i te oronga mai i taau i anoano no te Parataito. (Sala. 9:18; 72:​12-14) Penei ka na roto koe i tetai mamae kopapa i te au rā, te taitaia e tetai ua atu maki kino. Ko toou oraanga ainei teia e kare atu e ravenga ke? Kare, kare rava. Kare e maki, kare e mate i to te Atua ao ou. (Apo. 21:​3, 4) Ka tauturu teia manakonakoanga ia tatou kia kore e maromaroa e te riri. Ka mareka ua tatou ma te ’au noatu te au takinokinoanga, te mate, te maki e tetai ua atu tumatetenga. No teaa ra? Noatu te oraanga ngatā i teianei, kua kite tatou e “mea ngiti poto” ua te reira e ka apai mai te ao ou i te oraanga mataora e tuatau ua atu.—2 Kori. 4:​17, 18.

14. Akapeea tatou me akaketaketa i to tatou akarongo no te manakonakoanga?

¹⁴ No te mea ka tauturu to tatou manakonakoanga ia tatou kia mareka ua, eaa te akapapuanga e ka tupu ta Iehova taputou? Mei tetai tangata tei aao i te titia mata kia kite meitaki aia i te ngai mamao, ka tauturu to tatou manakonakoanga kia kite ia tatou i roto i te Parataito. Ei akaraanga, me manamanata ua rai tatou no runga i te moni, ka akamanako tatou i te oraanga i te ao ou, kare e kaiou e kare e putaua. Ka riri tatou me kare i orongaia mai tetai angaanga ta tatou i inangaro, inara e mea puapinga kore teia me akaaiteia ki te oraanga mataora a te tuatau ki mua. (1 Timo. 6:19) No te maata o te manamanata e tupu nei ka ngatā i te akamanako i te au taputou a Iehova. Inara me akamou tatou ki te manakonakoanga no te tuatau ki mua, ka marū e ka mareka ua tatou.

15. Eaa taau i apii mai mei te akaraanga o Christa?

¹⁵ Ka apii tatou mei te akaraanga o Christa, te vaine a Dennis tei taikuia i mua ana. Karanga aia: “E maki kino toku te ka akaparuparu i te uaua. Kare au e rauka i te aere e ka taangaanga ua rai au i te wheelchair. E mamae ua ana au i te au rā. Akakite te taote e kare e meitaki toku maki. Inara kua kite au, ‘Kare e aiteite ana to maua manako no te tuatau ki mua.’ E manakonakoanga toku tei apai mai i te ’au kiaku. I teia rā, ka akakoromaki au i toku turanga e ka tapapa atu i te ao ou ma te mataora!”

“KARE OKI E NGERE ANGA TO TE ARONGA I MATAKU IAIA”

16. Eaa te Ariki ko Davida i tata ei e ko te aronga tei mataku ia Iehova kare ratou e ngere i te apinga?

¹⁶ Noatu ka mareka ua tatou ka tupu rai te au manamanata. Akamanako i te Ariki ko Davida e toru ana tamariki i mate. Kua akaapaia aia, kua pikikaaia e kua tauta tetai ariki i te kimi e te tamate iaia. Noatu teia au turanga ngatā, kua mareka ua a Davida. Kua tuatua aia no Iehova: “Kare oki e ngere anga to te aronga i mataku iaia.” (Sala. 34:​9, 10) Eaa aia i tuatua akapera ai? No te mea kua kite a Davida e noatu kare a Iehova e paruru iaia mei te au manamanata, ka oronga mai ra Aia i tana i anoano. (Sala. 145:16) Mei ia Davida, e mea papu ka tauturu a Iehova ia tatou kia akakoromaki. Ka tupu te ’au e te rekareka noatu te au tumatetenga.

17. Eaa koe i inangaro ei kia mareka ua?

¹⁷ Inangaro a Iehova ia koe kia mareka ua. (Sala. 131:​1, 2) No reira e rave i te au mea ravarai ma te rekareka. Me tauta koe i te akaari i te tu akameitaki, akamou i to manako kia Iehova e kia akaaka, kia akaketaketa i toou manakonakoanga, ka tuatua koe: Ae “te meitaki nei au.”—Sala. 16:​5, 6.