Au Uianga a te Aronga Tatau

Karanga te tata o Maseli 30:​18, 19 ko “te akonoanga o te tangata i te paretenia” e ‘mea kitea koreia.’ Eaa te aiteanga o tana tuatua?

E maata te tangata kare i mārama i teia nga irava, e pera te aronga kite. Akakite te New World Translation no teia irava: “Te vaira e toru au mea tei riro ei mea umere roa kiaku, e e a kare au i kite ake: te aerenga o tetai aeto i te au rangi ra, te aerenga o tetai ovi na runga i te toka, te aerenga o tetai pai na rotopu i te tai e te aerenga o tetai tangata matutu ra ma tetai vaine ou.”—Mase. 30:​18, 19.

I mua ana, kua mārama tatou i te aerenga manako “te akonoanga o te tangata i te paretenia” e au angaanga kino te reira. Eaa te tumu? Te taiku katoa ra tetai atu au irava i te au peu kino. (Mase. 30:​15, 16) I te irava 20, karanga te “vaine akaturi” kare aia e rave ana i te kino. No reira, kua manako tatou e te taiku ra teia nga irava i te au angaanga kino a tetai tangata e rave ra. Mei te aeto e rere ra i te mareva, me kore te ovi e totoro ra na runga i te toka, te paî e teretere ra i te moana e tetai tangata e rave muna ra i tana au angaanga. No te reira, kua irinaki tatou e te taiku ra “te akonoanga o te tangata i te paretenia” i te au angaanga kino a tetai mapu tane no te akavare i tetai mapu vaine kia piri ainga raua.

Inara, e au tumu tetai kia irinaki tatou e te akataka ra teia au irava i tetai angaanga meitaki. Te akakite ra te tata o Maseli i te au mea umere tana i kite.

Te akapapu maira te au tataanga o te reo Epera i teia. I roto i te Theological Lexicon of the Old Testament, te reo Epera tei uriia no teia aerenga manako ‘taku nei au mea kitea koreia’ i roto ia Maseli 30:​18, te taiku ra i te “au angaanga umereia.”

Akapapu mai te tangata kite ko Crawford H. Toy o te Harvard University i Marike e te akataka ra teia irava i te au angaanga meitaki. Karanga aia: “Te taiku ra teia nga irava i te au angaanga umereia.”

I roto ia Maseli 30:​18, 19 te akataka ra te reira i te au angaanga meitaki tei umereia. Mei te tata Pipiria, ka mataora tatou i te kite i te aeto e rere ra i te mareva, me kore te ovi e totoro ra na runga i te toka, te paî e teretere ra i te moana e tetai mapu tane tei akainangaro i tetai mapu vaine e kua noo kapiti raua ma te mataora.