Kia Rotai to Tatou Oraanga ki te Pure a te Atu​—Tuanga 2

1-3. Eaa ra tetai tuaine i papu roa ai e kua kite a Iehova i tana i anoano?

KARE a Lana, e painia tamou, e ngaropoina i tei tupu i tona tere ki Tiamani i te 2012. Te irinaki nei aia e kua pau mai a Iehova i tana nga pure e rua. Iaia i runga i te rerue e aere ra ki te ngai akatoanga pairere, kua pati aia ia Iehova kia tauturu iaia kia kitea tetai tangata ei tutu aere atu nana. I te tae anga aia ki te ngai akatoanga pairere, kua kite mai aia e kua taroaroa tona pairere e ka akaruke a tera mai ra. Kua pati a Lana kia Iehova no te tauturu no te mea kua pou te maata anga o tana moni e kua anoanoia tetai ngai nooanga nona no taua po ra.

² Te akamutu anga a Lana i tana pure kua rongo aia i tetai tangata e karanga ra e, “Kia Orana e Lana, eaa taau angaanga i konei?” E mapu tane aia ko raua i aere ana ki te apii. Te karanga ra tona mama e te mama ruau kiaia e, e aere ra no te mea te akaruke ra aia no Aperika Apatonga. I te akakite anga a Lana i tona turanga, kua pati te mama e te mama ruau ia Lana kia noo mai ki to raua kainga. E maata ta raua uianga no runga i tona au irinakianga e tana angaanga painia.

³ I tera mai popongi i muri ake i te kaikai popongi, kua pau a Lana i te maata anga o ta raua au uianga no runga i te Pipiria. Kua pati a Lana i to raua ngai nooanga e rauka ai i tetai tangata i te atoro ua atu ia raua no te paupau i ta raua au uianga. Kua oki atu a Lana ki te kainga ma te meitaki e te painia nei rai aia. Te irinaki nei aia e kua rongo mai a Iehova i tana au pure, kua kite i tana e anoano ra, e kua tauturu iaia.​—Salamo 65:2.

4. Eaa te au anoano ta tatou ka uriuri?

⁴ Me tupu poitirere ua mai tetai au manamanata, e mea māmā ua i te pure no ta Iehova tauturu, e te mataora nei aia i te akarongo mai i ta tatou au pure. (Salamo 34:15; Maseli 15:8) Inara te apii maira te pure a te Atu e te vaira te au anoano puapinga atu ta tatou ka tau kia pure. I roto i teia atikara, ka uriuri tatou e akapeea te au patianga e a i roto i te pure a te Atu te tauturu anga ia tatou kia vai tiratiratu kia Iehova.​—E tatau ia Mataio 6:11-13.

“O MAI I TE KAI E TAU IA MATOU I TEIANEI RĀ”

5, 6. Eaa ra a Iesu i apii mai ei ia tatou kia pati i te kai na “matou” noatu e e maata ta tatou kai?

⁵ Kua apii mai a Iesu ia tatou kia pati i te kai na “matou” kare e ko te kai “naku.” Akamārama mai a Victor, e akaaere kotinga i Aperika e: “E akameitaki ua ana au ia Iehova e kare maua ko taku vaine e taitaia roa ana e noea mai te kai ta maua ka kai, e kare maua e manamanata e naai e tutaki i te are tarau. Na te au taeake e akono aroa mai ia maua i te au rā ravarai. Inara e pure ana au no te au taeake e tauturu maira ia maua kia rauka i te akono i to ratou uaorai au taomi anga i te pae puapinga.”

⁶ Penei e maata ta tatou kai, inara e manganui te au taeake putaua. Pera katoa, kua rokoia tetai pae e te au tumatetenga. Ka rauka ia tatou i te pure no ratou pera katoa te rave i tetai mea ei tauturu ia ratou. Ei akaraanga, ka rauka ia tatou i te oronga i ta tatou au apinga kia ratou. Ka rauka katoa ia tatou i te oronga putuputu i te moni no te angaanga a te iti tangata o Iehova i te ao katoa. Kua kite tatou e ka tauturu ta tatou moni oronga ua i te akono i te au anoano o te au taeake.​—1 Ioane 3:17.

7. Akapeea a Iesu i te apii mai anga kia tatou e “auraka e apiapi i to apopo ra”?

⁷ I muri ake i te apiianga a Iesu i te pure a te Atu, kua apii aia ia tatou auraka e akamou ki runga i te au mea o te kopapa. Kua karanga aia e mei te mea e te akono ra a Iehova i te au tiare ngangaere, kare ainei aia e “pera oki i te akamanea . . . ia kotou, e kotou, te aronga akarongo mea ngiti nei! E teianei, auraka kotou e apiapi ua, ka na ko ei ra, . . . e, Eaa to matou kakau kia kakau?” I reira kua karanga akaou aia e: “Auraka e apiapi i to apopo ra.” (Mataio 6:30-34) Kare tatou e manamanata i to tatou anoano no te tuatau ki mua. Mari ra, kia mareka ua tatou i to tatou au anoano no te au rā tataki tai. Ei akaraanga, ka tau tatou kia pure no tetai ngai nooanga, tetai angaanga i te akono i to tatou ngutuare tangata, e te pakari kia rave i te au ikianga meitaki i te pae o te oraanga kopapa. Inara te vaira tetai mea puapinga atu ta tatou ka tau kia pure.

8. Eaa ta Iesu tuatua no ta tatou kai i te au rā e akamaara maira ia tatou? (Akara i te tutu mua o teia atikara.)

⁸ Te akamaara maira ta Iesu tuatua no ta tatou kai i te au rā i tetai mea ke atu tana i tuatua: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mataio 4:4) No reira ka tau tatou kia pure kia apii tamou mai a Iehova ia tatou e kia oronga mai i te ka anoanoia kia noo vaitata kiaia.

E AKAKORE MAI I TA MATOU KAIOU

9. No teaa ra ta tatou ara i aite ei ki te kaiou?

⁹ Kua karanga a Iesu e: “E akakore mai i ta matou [kaiou, NW].” (Mataio 6:12) I tetai atianga ke mai, kua karanga aia e: “E akakore mai i ta matou ara.” (Luka 11:4) Kua akaaite aia i ta tatou ara ki te kaiou. I te 1951, kua akamārama Te Punanga Tiaki e me ara tatou, mei te mea rai e e kaiou ta tatou kia Iehova. Ka kaiou tatou kia Iehova i to tatou aroa e te akarongo. No reira me ara tatou i te Atua, kare tatou e oronga i ta tatou i kaiou kiaia. Kua akakite mai Te Punanga Tiaki e me inangaro aia, ka rauka ia Iehova i te takore i tona pirianga oa kia tatou. Te akakite katoa ra e: “E mea aroa kore te ara ki te Atua.”​—1 Ioane 5:3.

10. No teaa ra ka rauka ai ia Iehova i te akakore mai i ta tatou au ara, e eaa to tatou manako i te reira?

¹⁰ Mei teaa atura to tatou rekareka e kua oronga mai a Iehova i te atinga oko o Iesu ei akakore i ta tatou au ara! Ka anoano tatou ia Iehova kia akakore mai i ta tatou ara i te au rā ravarai. Noatu e kua mate a Iesu no tatou vaitata i te 2,000 mataiti i teianei, te puapinga nei rai tatou mei te atinga oko i teia tuatau. Ka tau tatou kia akameitaki ua rai ia Iehova no teia apinga aroa akaperepereia. Kare tetai ua atu ia tatou e rauka i te tutaki i te oko tei anoanoia kia akamatara mai ia tatou mei te ara e te mate. (E tatau ia Salamo 49:7-9; 1 Petero 1:18, 19) Ko te au tuatua i roto i te pure a te Atu “e akakore mai i ta matou ara,” te akamaara maira ia tatou e mei ia tatou rai e anoano nei i te atinga oko, ka anoano katoa to tatou au taeake e te au tuaine i te reira. Te inangaro katoa ra a Iehova ia tatou kia akamanako atu ia ratou e to ratou pirianga kiaia. Te kapiti maira teia i te akakore viviki anga i ta ratou ara. Te maata anga o te taime e au mea rikiriki ua teia, inara me akakore tatou i te ara a to tatou au taeake, te akapapu ra te reira e te inangaro ra tatou ia ratou. Te akapapu katoa ra e te rekareka ra tatou e te akakore maira a Iehova i ta tatou au ara.​—Kolosa 3:13.

11. Eaa ra i puapinga ai kia akakore i te ara a tetai atu?

¹¹ No to tatou tu apa ua, penei e ngata ana i tetai au taime kia akakore i te ara a te aronga tei ara mai ia tatou. (Levitiku 19:18) Me akamata tatou i te tuatua no runga i ta ratou i rave mai kia tatou, penei ka piri mai tetai pae i roto i te putuputuanga e ka riro teia ei takino i te tu taokotai o te putuputuanga. Me tuku ua atu tatou i teia kia tupu, ka akaari mai teia e kare tatou e akaperepere ana i te apinga aroa a te Atua koia te atinga oko, e kare tatou e puapingaia. (Mataio 18:35) Me kare tatou e akakore atu i te ara a tetai atu, kare katoa e rauka ia Iehova i te akakore mai i ta tatou ara. (E tatau ia Mataio 6:14, 15) Pera katoa, me ka inangaro tatou ia Iehova kia akakore mai i ta tatou ara, auraka tatou e rave i tetai ua atu apinga tana e rikarika ra.​—1 Ioane 3:4, 6.

“AURAKA E AKARUKE IA MATOU KIA TIMATAIA MAI”

12, 13 (a) Eaa tei tupu kia Iesu i muri ake i tona papetito anga? (e) No teaa ra kare tatou e akaapa i tetai ua atu me tuku ua atu tatou ki te timata anga? (ng) Eaa ta Iesu e akapapu maira na te vai tiratiratu anga e tae ua atu ki tona mate anga?

¹² Te au tuatua i roto i te pure a te Atu “auraka e akaruke ia matou kia timataia mai” te akamaara maira ia tatou i tei tupu kia Iesu i muri poto ake i tona papetito anga. Kua aratakiia a Iesu e te vaerua o te Atua ki te metepara “kia timataia e te diabolo.” (Mataio 4:1; 6:13) Eaa ra a Iehova i akatika ai i teia kia tupu? Kua tono mai a Iehova ia Iesu ki te enua nei ei akatikatika i tetai maroanga tei tupu mai te patoi anga a Adamu raua ko Eva i ta Iehova tutara. Kua riro ta raua meameaau anga ei akatupu i te au uianga te ka anoanoia tetai tuatau kia pauia. Ei akaraanga, e apinga tarevake ainei tetai i te anga mai anga a Iehova i te tangata? Ka rauka ainei i tetai tangata apa kore kia vai tiratiratu kia Iehova me timataia aia e te vaerua kino? E e mea meitaki atu ainei me tutara te tangata ia ratou uaorai? (Genese 3:4, 5) A te tuatau ki mua e pau ei a Iehova i teia au uianga kia tau ki tona mareka anga, ka kite te aronga katoatoa i te rangi e te enua nei e na Iehova te tutara meitaki roa atu.

¹³ E tapu a Iehova, no reira kare rava aia e timata i tetai kia rave i te au mea kino. Ko Satani “taua Timata ra.” (Mataio 4:3) Te tauta ra a Satani i te timata ia tatou na tetai au mataara ke. Inara e ikianga ta tatou tataki tai. Ka rauka ia tatou i te patoi i te timata anga e me kare. (E tatau ia Iakobo 1:13-15.) I te timata angaia aia e Satani, kua viviki a Iesu i te kopae iaia na te taikuanga i te Tuatua na te Atua. Kua vai tiratiratu a Iesu ki te Atua. Inara, kare a Satani i tuku ana i te au. Kua “akaruke maira iaia i tetai tuatau iti” no te timata ia Iesu. (Luka 4:13) Inara noatu e eaa ta Satani i rave, kua akarongo ua rai a Iesu i te Atua ei Tutara nona. Kua akapapu mai aia e ka rauka i tetai tangata apa kore kia vai tiratiratu kia Iehova noatu me ka na roto aia i te au turanga ngata tikai. Inara, te tauta ra a Satani i te timata i te au pipi a Iesu, kapiti mai ia koe, kia akarongo kore kia Iehova.

14. Eaa ta tatou ka anoanoia kia rave no te patoi atu i te au timata anga?

¹⁴ Te au uianga tei uiia no runga i te tutara a Iehova te anoanoia nei kia pauia. I teianei, te akatika ra a Iehova ia Satani kia timata ia tatou. Kare a Iehova ‘e akaruke ia tatou kia timataia mai.’ Ko te tika, te irinaki nei aia e ka vai tiratiratu tatou kiaia, e te inangaro nei aia i te tauturu ia tatou. Inara kare rava aia e maro ia tatou kia rave i te tika. Te akangateitei ra aia i to tatou tu rangatira. No reira te akatika ra aia ia tatou kia iki me ka vai tiratiratu tatou kiaia e me kare. Kia kore tatou e tuku ua atu ki te timata anga, ka anoanoia tatou kia rave e rua nga apinga: e noo vaitata kia Iehova e kia pure pututuputu no tana tauturu. Akapeea a Iehova i te pau anga mai i ta tatou au pure no te patoi atu i te au timata anga?

15, 16 (a) Eaa etai au timata anga ka anoanoia tatou kia patoi? (e) Koai te ka akaapaia me tuku ua atu tatou ki te timata anga?

¹⁵ Te oronga maira a Iehova i tona mana ririnui o te vaerua tapu kia tauturu ia tatou kia tamaki atu i te au timata anga a Satani. Kua oronga katoa mai a Iehova i te Pipiria e te putuputuanga ei akamatakite ia tatou i te au kino. Ei akaraanga, te akamatakite maira aia ia tatou e auraka e kaimoumou i to tatou taime, te moni, e te maroiroi ki runga i te au mea kare tikai tatou e anoano ana. E noo ana a Espen raua ko Janne i tetai enua apinganui i Europa. Kua roa akenei te mataiti, e nga painia tamou raua i tetai tuanga ngai o te enua te anoano maataia ra te au papuritia. I te anau anga mai ta raua pepe, kua akamutu raua i te painia, e i teianei e rua a raua nga tamariki. Te karanga ra a Espen e: “E pure putuputu ana maua kia Iehova kia kore maua e topa ki roto i te timata anga e i teianei kare e rauka ia maua i te akapou i te maata anga o te taime mei tei matauia e maua i te rave i roto i te angaanga tutu aere. Te pati nei maua kia Iehova kia tauturu mai i te akono tamou i to maua turanga pae vaerua e te maroiroi i roto i te angaanga tutu aere.”

¹⁶ Tetai atu timata anga ka anoanoia tatou kia patoi ko te akarakara anga i te au ravenga ainga viivii. Me tuku ua atu tatou ki teia timata anga, auraka tatou e akaapa ia Satani. No teaa ra? No te mea kare e rauka ia Satani e tona ao i te maro mai ia tatou kia rave i tetai ua atu angaanga tarevake. Te akarakara ra etai pae i te ravenga ainga viivii no te mea kare ratou e kopae ana i te au manako tau kore. Inara e manganui to tatou au taeake e te au tuaine tei patoi i teia timata anga, e ka rauka katoa ia tatou.​—1 Korinetia 10:12, 13

E AKAORA IA MATOU MEI TE VAERUA KINO

17. (a) Akapeea tatou i te akaari anga e ka inangaro tatou ia Iehova kia ‘akaora ia tatou mei te vaerua kino’? (e) Eaa te rekareka anga e vaitata mai nei?

¹⁷ Akapeea tatou te akaari anga e ka inangaro tatou ia Iehova kia ‘akaora ia tatou mei te vaerua kino’? Auraka tatou e riro “i to teianei ao” e “auraka e anoano i teianei ao, e te au mea ravarai o teianei ao.” (Ioane 15:19; 1 Ioane 2:15-17) Mei teaa atura te rekareka me akaatea a Iehova ia Satani e te takore atu i teia ao kino! Kia tae roa ki te reira taime, ka anoanoia tatou kia akamaara e “e riri maata oki [to Satani], no te mea kua kite aia e e manga tuatau poto ua tona e toe nei.” Ka rave aia i te au mea ravarai tana ka rauka no te tāpu ia tatou mei te tavinianga ia Iehova. No reira kia tamou ua rai tatou i te pure kia paruru mai a Iehova ia tatou mei ia Satani.​—Apokalupo 12:12, 17

18. Me ka inangaro tatou kia ora mai i te openga o to Satani ao, eaa ta tatou ka rave?

¹⁸ Ka inangaro ainei koe i te noo i roto i tetai ao kare a Satani i reira? E pure ua rai no te Patireia o te Atua kia tae mai, no te ingoa o te Atua kia akatapuia, e kia akonoia tona anoano i te enua nei. E irinaki ua rai kia Iehova kia akono ia koe e kia oronga i te au mea ravarai taau e anoano ra kia vai tiratiratu kiaia. Ae, e rave i te au mea ravarai kia rotai toou oraanga ki te pure a te Atu.