“Kia Kore Kotou e Rokoia e te Timataanga”

“E ara, e e pure oki kia kore kotou e rokoia e te timataanga.”​—MATAIO 26:41.

E PAKARI tikai te taomianga​—kare mei tana rai i kite ana i mua ana. Te vaitata ra a Iesu Karaiti, te Tamaiti a te Atua, ki te openga o tona oraanga i te enua nei. Kua kite a Iesu e kare e roa atu ana ka opuia aia, ka akautungaia ki te mate, e ka patitiia ki runga i tetai rakau tamamae anga. Kua kite aia e ko tana ikianga e te angaanga ravarai te akaata maira ki runga i te ingoa o tona Metua. Kua kite katoa a Iesu e ko te au manakonakoanga no te oraanga ki mua o te au tangata ra te tautau ra i runga i te arite. Kua aro atura i teia au taomi anga ravarai, eaa tana i rave?

² Kua aere atu a Iesu ki te kainga i Getesemane ma tana au pipi. E ngai reka anga tikai ia na Iesu. I reira kua akaatea atu aia ki tetai ngai mamao mei tana au pipi. Koia ua, kua anga atu aia ki tona Metua i te rangi ra no te maroiroi, i te akakite oonu anga i tona au manako na roto i te pure akatenga​—kare e okotai ua taime mari ra e toru taime. Noatu e apa kore ua, kare a Iesu i manako ana e ka rauka iaia i te aro atu i te taomi anga koia anake ua.​—Mataio 26:36-44.

³ I teia tuatau, tei raro katoa tatou i te taomianga. I te akamataanga o teia poroutia, kua akamanako ana tatou i te akapapu anga e te noo nei tatou i roto i te au ra openga o teia akatereanga o te au mea kino. Te pakari ua atura te au timataanga e te au taomianga o te ao o Satani. Te au ikianga e te au angaanga ta tetai ia tatou te karanga ra e te tavini ra i te Atua mou te akaata ra ki runga i tona ingoa e e akakeu anga oonu to te reira ki runga i te au manakonako anga no tatou tataki tai no te ora i roto i tona ao ou. Te anoano ra tatou ia Iehova. Te inangaro ra tatou kia ‘tamou marie e tae ua atu ki te openga’​—te openga o to tatou oraanga me kore te openga o teia akatereanga, noatu e eaa te ka aere na mua mai. (Mataio 24:13, NW) Inara akapeea e rauka ai ia tatou i te tamou i to tatou tu rapurapu e kia vai matakite ua atu rai?

⁴ I te kite anga i tana au pipi​—o to reira tuatau e i teia tuatau—​te ka aere katoa mai i raro i te taomianga, kua raurau a Iesu e: “E ara, e e pure oki kia kore kotou e rokoia e te timataanga.” (Mataio 26:41) Eaa te aite anga o teia au tuatua kia tatou i teia tuatau nei? Eaa te timataanga taau ka aro atu? E akapeea e rauka ai ia koe “kia vai matakite ua atu”?

Timataanga i te Rave i Teaa?

⁵ Te aro katoatoa atura tatou i te au ra ravarai i te timataanga kia tuku ua ki “te ereere a te diabolo ra.” (2 Timoteo 2:26) Te akamatakite maira te Pipiria kia tatou e ko te aronga akamori i te Atua ta Satani e takete tikai maira. (1 Petero 5:8; Apokalupo 12:12, 17) No teea akakoroanga? Kare e anoanoia kia tamateia to tatou oraanga. Kare te reira ei autu anga kia Satani me mate tiratiratu tatou ki te Atua. Kua kite a Satani e ka akakore a Iehova, i Tona tuatau tau ra, i te mate na roto i te tuakaouanga.​—Luka 20:37, 38.

⁶ Te inangaro ra a Satani i te takore i tetai apinga tei puapinga maata atu i to tatou ora i teianei​—to tatou tiratiratu ki te Atua. Te inangaro maata ra a Satani i te akapapu mai e ka rauka iaia i te akaanga ke atu ia tatou mei ia Iehova. No reira, me akakeuia tatou kia tiratiratu kore ra​—kia akamutu i te tutu aere anga i te tuatua meitaki me kare kia akaruke i te au turanga Kerititiano ra—​e autu anga te reira kia Satani! (Ephesia 6:11-13) No reira, te tuku maira “taua Timata ra” ki mua ia tatou i te au timataanga.​—Mataio 4:3.

⁷ E tuke tuke ta Satani “au ravenga kikite.” (Ephesia 6:11, Jewish New Testament) Penei ka timata mai aia ia tatou ma te apinga materia, te mataku, te ekoko, me kare i te kimi anga i te au tamataora anga. Inara ko tetai o tana au ravenga meitaki roa atu te kapiti maira ko te akamaroiroianga kore. Ko tetai kimikimi anga ravenga, kua kite aia e ka rauka i te maromaroa i te taparuparu ia tatou, i te akariro anga ia tatou kia topa ua. (Maseli 24:10) Tera tikai me “akapakia” mai tatou i te pae manako ngakau, te timata maira aia ia tatou kia tuku ua i te au.​—Salamo 38:8.

⁸ Ia tatou e tomo oonu atura ki roto i te au tuatau openga, i te akara anga te akatupu ra te reira i te akamaroiroianga kore kia tupu mai, e kare tatou i paruruia mei te reira. (Akara i te pia “Etai Au Tumu te Akatupu ra i te Akamaroiroianga Kore.”) Noatu e eaa te tumu, ka rauka i te akamaroiroianga kore i te akakore i to tatou maroiroi. “Ma te taporoporo marie i te tuatau” no te au apainga i te pae vaerua​—kapiti mai te apiianga i te Pipiria, te aere anga ki te au uipaanga Kerititiano, e te piri anga atu ki roto i te angaanga orometua—​ka riro ei akaaoanga me te roiroi ra tatou i te pae kopapa, i te pae manako, e i te pae manako ngakau. (Ephesia 5:15, 16) Kia maara e te inangaro ra Tei Timata ra kia akamutu koe. Inara kare ko teia te taime i te akamarie mai me kare i te tangaro i toou tu rapurapu no runga i te au tuatau e noo nei tatou! (Luka 21:34-36) Akapeea e rauka ai ia koe i te patoi i te timataanga e kia vai matakite ua atu? E akamanako ana i te au tuatua anga e a te ka tauturu mai.

Kia “Pure Oki”

⁹ E irinaki ki runga ia Iehova na roto i te pure. E akamaara i to Iesu akaraanga i roto i te kainga i Getesemane. I raro ake i te taitaia pakari tikai i te pae manako ngakau, eaa tana i rave? Kua anga atu aia kia Iehova no te tauturu, i te pure akatenga anga “e mei te toto kurukuruatu ra tona ou i te topa anga ki raro i te one.” (Luka 22:44) E akamanako ana i te reira. Kua kite meitaki a Iesu ia Satani. Kua akara mai ana a Iesu mei te rangi maira i te au timataanga katoatoa ta Satani i taangaanga ana i tana au tauta anga i te akapuereere i te au tavini o te Atua. Inara, kare a Iesu i manako ana e ka rauka ngoie ua iaia i te autu i tetai ua atu apinga ta Tei Timata ra ka tuku mai ki mua iaia. Me te manako ra te Tamaiti apa kore a te Atua e te anoanoia ra te pure no te tauturu tu-Atua e te maroiroi ra, mei teaa ra kia rave tatou i te reira!​—1 Petero 2:21.

¹⁰ Kia maara, katoa, e i muri ake i te raurau anga i tana au pipi kia “pure oki,” kua tuatua a Iesu e: “Kua tika oki i te vaerua, te parukaua nei ra te kopapa.” (Mataio 26:41) Noai te kopapa ta Iesu e taiku ra? Papu e kare ko tona uaorai kopapa; kare e apinga paruparu i roto i tona kopapa tangata apa kore. (1 Petero 2:22) Inara e tuke te reira ki tana au pipi. No te tu apa akatuangaia e te au manako tu ara ra, te anoano tikai ra ratou i te tauturu i te patoi atu i te timataanga. (Roma 7:21-24) No reira aia i raurau mai ei ia ratou​—e te au Kerititiano mou katoatoa i muri ake ia ratou—​kia pure no te tauturu i te aro anga atu i te timataanga. (Mataio 6:13) Te pau maira a Iehova i taua au pure. (Salamo 65:2) Akapeea ra? Na roto i nga mataara e rua.

¹¹ Te mea mua, te tauturu maira te Atua ia tatou kia kite i te au timataanga. Mei te puereere rai te au timataanga a Satani tei ruru aereia i runga i tetai mataara poiri. Me kare koe e kite i te reira, penei ka opuia koe. Na roto i te Pipiria e te au puka tei akatumuia ki runga i te Pipiria, te akakite maira a Iehova i te au ereere a Satani, i te tauturu anga ia tatou kia kore e topa atu ki roto i te timataanga. I te au mataiti i topa, kua akamatakite putuputu mai te au puka neneiia e te au porokaramu uruoaanga e te akaputuputuanga kia tatou i taua au kino ra mei te mataku anga i te tangata, te ainga tau kore, te apinga i te pae materia, e tetai ua atu au timataanga a Satani. (Maseli 29:25; 1 Korinetia 10:8-11; 1 Timoteo 6:9, 10) Kare ainei koe e rekareka ana ia Iehova no te akamatakite anga mai kia tatou i ta Satani au parani? (2 Korinetia 2:11) Ko taua au akamatakite anga katoatoa ra e pau anga ia ki taau au pure no te tauturu i te patoi anga i te timataanga.

¹² Te rua, te pau maira a Iehova i ta tatou au pure na te oronga anga mai i te maroiroi kia tatou kia akakoromaki i te timataanga. Te na ko maira tana Tuatua e: “Te Atua . . . kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.” (1 Korinetia 10:13) Kare roa te Atua e akatika i tetai timataanga kia riro ei mea maata roa atu e ka ngere ia tatou te maroiroi pae vaerua i te patoi atu​—me irinaki ua atu tatou ki runga iaia ra. Akapeea aia i te ‘akatupu katoa anga i te akapuanga’ no tatou? Te ‘oronga ra aia i te vaerua tapu ki te aronga e pati atu kiaia ra.’ (Luka 11:13) Penei ka tauturu taua vaerua ra ia tatou kia akamaara i te au kaveinga Pipiria te ka akaketaketa i to tatou manako tikai kia rave i te mea tika e te tauturu anga ia tatou kia rave i te au ikianga pakari. (Ioane 14:26; Iakobo 1:5, 6) Ka rauka te reira i te tauturu ia tatou kia akaari i te au tu tikai ta tatou e anoano ra kia rauka i te autu i te au manako tarevake. (Galatia 5:22, 23) Penei ka akakeu katoa to te Atua vaerua i te au taeake irinaki kia ‘akapumaana mai ia tatou nei.’ (Kolosa 4:11) Kare ainei koe e mareka ana e te ariu maira a Iehova na roto i taua au ravenga aroa ki taau au pure no te tauturu?

Kia Tau Tikai i Taau Au Tapapaanga

¹³ Kia vai matakite ua atu, te anoanoia ra tatou kia tau tikai i ta tatou au tapapaanga. No te au taomianga o te oraanga, pouroa tatou ka roiroi i tetai au taime. Inara e tika kia maara tatou e kare rava te Atua i taputou mai ana e kare o tatou manamanata i roto i te oraanga i roto i teia akatereanga taito. I roto katoa i te au tuatau Pipiria, kua aro atu te au tavini o te Atua i te au tu kino, kapiti mai te takinga kino, te putaua, te taitaia, e te maki.​—Angaanga 8:1; 2 Korinetia 8:1, 2; 1 Tesalonia 5:14; 1 Timoteo 5:23.

¹⁴ I teia tuatau, e maata katoa to tatou au manamanata. Penei ka aro atu tatou i te takinga kino, ka kite i te au apiapi i te pae moni, ka putoto i te taitaia, ka makiia, e ka mamae i roto i tetai au tu. Me ka paruru temeio a Iehova ia tatou mei te kino ravarai ra, kare ainei te reira e oronga i tetai tumu no Satani i te akakino atu ia Iehova? (Maseli 27:11) Te akatika ra a Iehova i tana au tavini kia timataia, i etai au turanga katoa i te tamateia anga tikai na roto i te au rima o te aronga patoi ra.​—Ioane 16:2.

¹⁵ Eaa, i reira, ta Iehova i taputou mai? Mei ta tatou i kite ana i mua akenei, kua taputou mai aia e ka akariro aia kia rauka ia tatou i te patoi i tetai ua atu timataanga ta tatou ka aravei atu, me te irinaki tikai ra tatou ki roto iaia. (Maseli 3:5, 6) Na roto i tana Tuatua, tona vaerua, e tana akaaerenga, te paruru ra aia ia tatou i te pae vaerua, i te tauturu anga ia tatou kia paruru i to tatou pirianga kiaia ra. Ma taua pirianga taui koreia, noatu e ka mate tatou, kua re tatou. Kare tetai apinga​—kare katoa te mate​—e arai i te Atua i te tutaki anga mai i tana au tavini tiratiratu. (Ebera 11:6) E i roto i te ao ou te vaitata maira i teianei, kare e poka ia Iehova i te akatupu pouroa i te toenga o tana au taputou umere no te akameitakianga i te aronga tei aroa iaia.​—Salamo 145:16.

E Maara i te Au Maroanga

¹⁶ Kia tamou marie e tae ua atu ki te openga, e tika kia maara tatou i te au maroanga puapinga maata te kapiti maira i te tuku ua anga te Atua i te ravenga kino. Me akara anga maata roa to tatou uaorai manamanata i tetai au taime e te timataia ra tatou kia akamutu, e mea meitaki kia akamaara tatou ia tatou uaorai e kua akaao a Satani i te tu tika o to Iehova tu ngateitei. Kua akaapa katoa Tei Akavare i te akono tau e te tiratiratu o te aronga akamori o te Atua. (Iobu 1:8-11; 2:3, 4) E maata ua atu taua au maroanga e te mataara ta Iehova i iki kia akatikatika te reira i tetai ua atu ia tatou tataki tai. Akapeea ra?

¹⁷ To te Atua tuku poto ua anga i te turanga ngata kua akatikaia mai te tuatau kia ariki mai tetai i te tuatua mou. E akamanako ana i teia: Kua mamae a Iesu kia rauka ia tatou te ora. (Ioane 3:16) Kare ainei tatou e mareka ana no te reira? Inara ka ariki akakoromaki ua ainei tatou i te turanga ngata no tetai manga tuatau kia rauka rai i tetai ua atu te ora? Kia tamou marie e tae ua atu ki te openga, e tika e kia kite tatou e e maata atu to Iehova pakari i to tatou. (Isaia 55:9) Nana e akaope i te ravenga kino i te tuatau te meitaki ra no te akatikatika anga i te au maroanga e tuatau ua atu e no to tatou uaorai meitaki mutu kore ra. E tika tikai, akapeea atu oki? Kare e tuatua kino kore ki te Atua!​—Roma 9:14-24.

“Akavaitata Atu ki te Atua”

¹⁸ Kia vai tamou i to tatou tu rapurapu, te anoanoia ra tatou kia noo vaitata kia Iehova. Auraka e ngaropoina e te rave katoa ra a Satani ma tona mana maroiroi i te akakore i to tatou pirianga kia Iehova. Te inangaro ra a Satani kia irinaki tatou e kare roa te openga e tae mai e no reira kare e tumu anga kia tutu aereia te tuatua meitaki me kare te akono anga i te au turanga Pipiria. Inara “e pikikaa aia, e e metua oki no te pikikaa.” (Ioane 8:44) E mea tika kia tauta tatou kia “patoi atu i te diabolo.” To tatou pirianga kia Iehova ko tetai apinga ia auraka roa tatou e akono puapinga kore ua. Te raurau aroa maira te Pipiria ia tatou e: “E akavaitata atu ki te Atua, e nana e akavaitata mai kia kotou na.” (Iakobo 4:7, 8) Akapeea e rauka ai ia koe i te akavaitata atu kia Iehova?

¹⁹ E mea puapinga te pure manakonako anga oonu. Me akara anga maata roa te au taomianga o te oraanga, e riringi i toou ngakau kia Iehova. Me te taka meitaki tikai ra koe, e mea ngoie ua i reira kia kite i tana pau anga ki taau au pati anga. Penei kare te pau anga ko taau tikai e manako ra, inara me te anoano ra koe i te akangateitei iaia e kia vai tiratiratu, ka oronga mai aia i te tauturu taau e anoano ra kia rauka ia koe i te autu tamou marie. (1 Ioane 5:14) Ia koe e kite ra i tana arataki anga i roto i toou oraanga, ka akavaitata atu koe kiaia. Te tatau anga e te manakonako anga no runga i to Iehova au tu e te au mataara, mei tei akakiteia mai i roto i te Pipiria, e mea puapinga katoaia. Ka tauturu taua manako oonu ra ia koe kia kite meitaki atu iaia; te akakeu ra te reira i toou ngakau e te akaoonu anga i toou aroa nona ra. (Salamo 19:14) E ko taua aroa ra, e maata atu i tetai ua atu apinga, ka tauturu ia koe kia patoi atu i te timataanga e kia vai matakite ua atu.​—1 Ioane 5:3.

²⁰ Kia piri vaitata kia Iehova, e mea puapinga katoa e kia piri vaitata tatou ki to tatou au taeake irinaki. Ka uriuri manakoia teia i roto i te tuanga openga o teia poroutia.

AU UIANGA NO TE APII

• Eaa ta Iesu i rave i raro ake i te taomianga pakari roa atu i te vaitata anga ki te openga o tona oraanga, e eaa ra tana i raurau mai ana kia rave tana au pipi? (Para. 1-4)

• Eaa ra a Satani i takete ei i te aronga akamori o Iehova, e i na roto i teea au mataara e timata maira aia ia tatou? (Para. 5-8)

• E patoi atu ei i te timataanga, eaa ra tatou ka pure putuputu ua atu ei (Para. 9-12), kia tau ta tatou au tapapaanga (Para. 13-15), kia maara i te au maroanga (Para. 16-17), e kia “akavaitata atu ki te Atua” ra (Para. 18-20)?

[Pia i te kapi 25]

Etai Au Tumu te Akatupu ra i te Akamaroiroianga Kore

Oraanga kopapa/ruaineanga. Me te mamae ra tatou i tetai maki kino me kore te tuku maira te ruaineanga i te au kotingaanga, penei ka taitaia tatou no te mea kare e rauka ia tatou i te rave maata i te tavini anga i te Atua.​—Ebera 6:10.

Mareka koreanga. Penei ka ngakau taitaia tatou me kite tatou e e iti ua te ariu maira ki ta tatou au tauta anga i roto i te tutu aere anga i te Tuatua a te Atua.​—Maseli 13:12.

Au manako ngakau no te puapinga kore. No te au mataiti takinga kino anga, penei kua irinakiia e tetai tangata ra e kare aia e inangaroia mai ana, e ia Iehova katoa rai.​—1 Ioane 3:19, 20.

Au manako ngakau mamae. Me kua akariri tikaiia tetai tangata e tetai taeake irinaki, penei ka manamanata tikai aia e ka timataia mai aia kia akamutu i te aere ki te au uipaanga Kerititiano me kare kia piri ki roto i te angaanga koro.​—Luka 17:1.

Takinokinoanga. Ko tetai papaki kare e ariki mai ana i toou akarongo penei ka patoi mai, ka takinokino mai, me kare ka aviri mai ia koe.​—2 Timoteo 3:12; 2 Petero 3:3, 4.

[Tutu i te kapi 26]

Kua raurau maira a Iesu ia tatou e e “pure oki” no te tauturu kia akakoreia atu te timataanga