Riro te au Paretenia ei Tuaine i te Pae Vaerua

Felisa: Kua utuutuia mai au ma te ngutuare tangata akaaka i Paniora. E Katorika toku ngutuare tangata, e aronga irinaki akonoanga matou. E 13 oku kopu tangata e orometua e te angaanga ra na te akonoanga. Ka akatungane toku mama i tona taeake orometua, e puapii katoa aia i ko i te apii Katorika. I muri ake i tona mate anga, kua akangateiteiia aia e te Pope ko John Paul II ma te taoonga teitei. E taunga tupaki auri toku papa, e angaanga ana toku mama ki roto i te aua kai. E varu matou te katoatoa anga, e ko au te mataiapo.

I toku 12 anga mataiti, kua akamata tetai tamaki i Paniora. I muri ake i te tamaki, kua apainaia toku papa ki te are auri no te mea kare te kavamani e reka ana i tona au manako poritiki. E ngata tikai no mama kia rauka te manga na matou katoatoa. No reira kua tono aia i toku au teina ko Araceli, Lauri, e Ramoni, kia noo kapiti ki te au paretenia i te oire o Bilbao. Ka rava i reira te manga ei kai na ratou.

Araceli: E 14 oku mataiti i te reira taime, e 12 o Lauri, e 10 o Ramoni. Kua maaraara tikai matou i te ngutuare tangata. E tāmā ta matou angaanga i ko i te are paretenia. E rua mataiti i muri mai, kua tuku te au paretenia ia matou ki tetai are paretenia maata atu i Zaragoza tei akono i te aronga pakarikari. Kua anoanoia matou kia angaanga pakari te tāmā anga i te are tunu kai, e kua roiroi tikai matou.

Felisa: Te aere anga toku au teina ki te are paretenia i Zaragoza, kua inangaro toku mama e tona tungane, e orometua aia i te tuku katoa iaku ki reira. Kua inangaro raua i te akamamao atu iaku mei tetai tamaiti tei akainangaro iaku. No toku inangaro i te Atua kua tapapa au i te akapou i tetai taime i ko i te are paretenia. Kua aere putuputu au ki te pure i te au rā ravarai, e kua inangaro kia riro mai au ei mitinari Katorika mei toku taeake i Aperika.

Inara i te reira are paretenia, kare i rauka iaku i te rave i te au mea taku e inangaro ra. Kare te au paretenia i akamaroiroi ana iaku kia tavini i te Atua i te enua ke, mei taku i manako atu. No reira i tera mai mataiti, kua oki au ki te kainga te akono i te tungane o toku mama, te orometua. Kua akono au i tona are e e pure ana maua i te au aiai katoa. Kua reka katoa au i te akamanea i te tiare i roto i te are pure e kua akamanea i te tiki o Maria e te “aronga tapu.”

Araceli: Iaku i Zaragoza, kua rave au i te au tia kia riro mai ei paretenia. E oti kua akatakake te au paretenia ia matou toko toru. No reira kua tuku ratou iaku ki tetai are paretenia i Madrid, e Lauri ki Valencia. Kua noo mai a Ramoni ki Zaragoza. Kua rave au i te tuanga rua o taku tia kia riro mai ei paretenia. E maata tei aere mai i te noo i ko i te are paretenia, mei te aronga apii e te aronga pakarikari. No reira e maata te angaanga. Kua angaanga au i roto i te are maki.

Kua tapapa au i te oraanga paretenia. Manako au i te akapou i te taime no te tatau e te apii i te Pipiria. Inara kua ati ngakau au. Kare i taangaangaia ana te Pipiria e kare e tuatua no runga i te Atua e Iesu. Kua tamou au i te reo Latino, kua apii i te oraanga o te “aronga tapu” Katorika e kua akamori ia Maria. Inara te maata anga o te taime, kua angaanga pakari matou.

Akamata au i te manamanata. Kua manako au e e ngari ake i te angaanga moni ei tauturu i toku ngutuare tangata i te mea ka angaanga i ko i te are paretenia kia puapingaia tetai aronga ke. No reira kua akakite au ki te paretenia maata e ka akaruke au. Inara kua roka aia iaku ki roto i tetai pia tapeka anga. Te manako anga e ka riro teia ei akanoo mai iaku.

Kua tuku te au paretenia iaku ki vao, inara te kite anga ratou e te inangaro ra au i te akaruke, kua roka akaou ratou iaku. I muri ake i te toru o te taime, karanga ratou e ka akaruke au me tata au i teia: “Te akaruke nei au no te mea te inangaro nei au i te tavini ia Satani, kare i te Atua.” Kua poitirere tikai au. Inangaro tikai au i te akaruke inara kare au e tata i te reira tuatua. I te openga, kua inangaro au i te tuatua ki tetai orometua, e kua akakite au kiaia eaa tei tupu. Kua rauka iaia te tika anga mei te epitikopo kia tukuia au ki te are paretenia i Zaragoza. I tetai nga marama i reira, kua akatikaia au kia akaruke. Kare i roa, kua akaruke katoa a Lauri raua ko Ramoni.

E PUKA TEI AKATAKAKE IA MATOU

Felisa: I muri roa mai, kua akaipoipo au e kua aere ki Cantabria, e ngai i Paniora. Kua aere putuputu rai au ki te pure. I tetai Tapati i te pure, kua ava riri ua mai te orometua, “Akara i teia puka!” Kua akaari mai aia i te puka Te Tuatua-Mou te ka Arataki ki te Ora Mutukore. Karanga aia, “Me oakeia atu tetai puka naau, e oake mai kiaku me kore e titiri i te reira!”

Kare aku puka, inara inangaro au i tetai naku. I nga mea rā i muri mai, kua aere mai tetai nga vaine ki to matou kainga. E Au Kite raua no Iehova, e kua oronga mai i te puka naku. Kua tatau au i te reira i taua po rai. Te oki anga mai te nga vaine, kua ui mai raua me ka inangaro rai au i te apii i te Pipiria, karanga atu au ae.

E inangaro ua ana rai au i te akamareka i te Atua. E oti kua apii au i te tuatua mou no runga ia Iehova e kua akamata i te inangaro oonu iaia. Kua inangaro au i te akakite ki te katoatoa no runga iaia. I te 1973, kua papetitoia au. I te ngai ka rauka iaku, kua tauta au i te akakite i te tuatua mou ki toku ngutuare tangata. Inara kua akakite mai toku ngutuare tangata e toku teina tikai ko Araceli, e tarevake taku e irinaki ra.

Araceli: No te mea e takinokinoia ana au i ko i te are paretenia, kua mareka kore au ma te riri tikai i taku akonoanga. Inara kua aere ua au ki te pure i te au Tapati, e kua pure i te au rā ravarai. Kua inangaro rai au i te mārama i te Pipiria, e kua pati tauturu au ki te Atua. E oti kua akakite mai a Felisa i tana e apii ra. Kua rekareka tikai aia i tana e irinaki ra, kua manako ra au e e neneva aia. Kare au i akatika ana i tana e tuatua ra.

I muri mai, kua oki au ki Madrid e kua akaipoipo. I te mataiti i aereia mai, kua kite mai au kare te aronga aere pure e irinaki tikai ana i te au apiianga a Iesu. No reira kare au i aere akaou ki te pure. Kare au e irinaki akaou i te “aronga tapu” me kore te “aʼi tamamaeanga,” e kare au i manako ana e ka rauka i te orometua i te akakore i te ara. Kua titiri au i taku au tiki akonoanga katoatoa. Kare au i kite me e tika rai taku e rave ra. Kua ati ngakau au, inara kua pure ua atu au ki te Atua: “Ka inangaro au i te kite ia koe. E tauturu mai koe iaku!” Kua maara iaku te Au Kite o Iehova te topapa anga mai i toku ngutupa e maata ua atu te taime, inara kare au i vaʼi mai ana i te pā. Kare au i irinaki ana i tetai ua atu akonoanga.

Te noo ra toku teina ko Lauri i Varani, ko Ramoni i Paniora. I te 1980, kua akamata raua i te apii i te Pipiria ki te Au Kite o Iehova. Kua papu iaku, mei ia Felisa rai, kare raua i kite ana e te apii ra raua i te au pikikaa. I muri mai, i toku aravei anga ia Angelines, e noo ra i te pae mai, kua riro mai maua ei oa piri. Koia tetai o te Au Kite o Iehova. E maata ta Angelines e tana tane ui anga mai me ka inangaro au i te apii i te Pipiria kia raua. Kua kite raua e noatu kare au e manako ana i te akonoanga, kua inangaro tikai au i te kite i te Pipiria. I te openga, akakite au kia raua: “Ka akatika au kia apii tatou me taangaanga au i taku uaorai Pipiria!” E Pipiria reo Nácar-Colunga taku.

TAOKOTAI TE PIPIRIA IA MATOU

Felisa: I toku papetito anga i te 1973, e 70 Au Kite i Santander, te oire maata o Cantabria. Kua aere mamao matou i te tutu aere ki te au tangata i te anere ua atu vira i te reira ngai. No reira kua aere matou na runga i te bus e i muri mai na runga i te motoka mei tetai vira ki tetai.

I te au mataiti i aereia mai, kua apii au i te Pipiria ki tetai 11 tangata tei papetitoia. Te maata anga ia ratou e Katorika. Kua anoanoia te tu akakoromaki. Mei iaku rai, kua anoanoia te tuatau kia kite ratou e te tarevake ra to ratou irinakianga. Kua kite au e na te Pipiria anake e te vaerua tapu o Iehova e tauturu i tetai tangata kia taui i tona manako e kia mārama i te tuatua mou. (Ebera 4:12) Kua papetitoia taku tane ko Bienvenido i te 1979, e akava aia i mua ana, e kua akamata toku mama i te apii i te Pipiria i mua ake ka mate ei aia.

Araceli: I toku akamata anga i te apii i te Pipiria ki te Au Kite o Iehova, kare au i irinaki ana ia ratou. Inara i muri mai kare au i manako akapera akaou. Kua apii tikai te Au Kite i te Pipiria e kua akono i te au apiianga. Kua akamata toku akarongo kia Iehova e te irinaki i te Pipiria i te tupu, e kua mataora mai au. Kua kite te tangata i te pae mai i toku taui anga e kua akakite mai, “E Araceli, e rave ua rai i taau i iki!”

Kua maara iaku te pure anga, “Meitaki e Iehova no tei kore koe i akamutu i te tauturu iaku e no te au tuatau kia kitea taku e kimi ra​—koia te tuatua mou o te Pipiria.” Kua pati katoa au i toku tuakana ia Felisa kia akakore mai i taku tuatua akakino iaia. Mei te reira taime mai, kare maua e tauetono akaou mari ra ka rekareka ua maua i te uriuri i te Pipiria. Kua papetitoia au i te 1989, i toku 61 anga mataiti.

Felisa: E 91 oku mataiti i teianei. Kua mate taku tane, kare e rauka ana iaku i te rave angaanga. Inara te tatau nei au i te Pipiria i te au rā ravarai, e aere ana au ki te au uipaanga e te tutu aere i te ngai ka rauka.

Araceli: E reka ana au i te tuatua no runga ia Iehova ki te au orometua e te au paretenia katoatoa taku ka aravei, no te mea i paretenia ana au i mua ana. E reka tikai taku pukapuka anga ki etai ia ratou, e kua apai ratou i te au puka e te makatini. Kua maara iaku tetai orometua. I muri ake i te tuku taime anga i te tuatua kiaia, kua akatika aia i taku e tuatua ra. I reira kua akakite mai aia: “Ka aere ra au kiea i toku pakari anga? Eaa ta te tangata e te kopu tangata ka manako?” Pau atu au: “Eaa ta te Atua ka manako?” Kua kite aia e tika rai taku, e kua maromaroa aia. Te akara anga kare ona tu ngakau toa i te taui.

Kare rava e ngaropoina iaku te akakite anga mai taku tane e ka inangaro aia i te aru iaku ki te uipaanga. E tere atu i te 80 ona mataiti i tona aere mua anga ki te uipaanga, e kare rava aia i topa ana i tetai uipaanga mei te reira taime mai. Kua apii aia i te Pipiria e kua akamata i te tutu aere. E maata toku maaraara anga i to maua angaanga kapiti anga e te tutu aere. Kua mate aia e rua marama i mua ake ka papetitoia ai.

Felisa: I toku akamata anga i te tavini ia Iehova, kua patoi toku ai teina iaku. I muri mai, kua āriki rai ratou i te tuatua mou. Ko te apinga meitaki rava atu ïa tei tupu kiaku. I muri mai, kua rekareka matou i te piri kapiti te tuatua anga no runga i to tatou Atua akaperepere ko Iehova, e tana Tuatua! Teianei, te akamori katoatoa ra matou ia Iehova.a