Ripoti a te Aronga Tutu Patireia
Kua Akarangatira te Tuatua Mou Puka Tapu i Tetai Paretenia i Porivia
E MANGANUI te aronga ngakau tiratiratu i akaruke i te akonoanga pikikaa, e te apiianga i te Puka Tapu mou, e te aereanga mai i te akamori ia Iehova, te Atua mou ra. E maata atu i te 7,600 e rave ra i te reira i Porivia, e kapiti katoa i tetai paretenia.
E iva rai ona mataiti i aravei ei a M—— i te Au Kite o Iehova no te taime mua. Kua pau aia te ngutupa te atoro anga mai tetai o te Au Kite i tona kainga, e no te taime mua, kua akarongo aia i te ingoa o te Atua, ko Iehova, te tuatua angaia. E kua vai ki roto i tona manako no te au mataiti e manganui.
E i te mea kua tamanakoia ana e kia riro mai aia ei paretenia no te mea koia anake te tamaine i roto i te ngutuare tangata. “Mei teaa te mataora taku i kite e ka aere tikai au ka tavini i te Atua—tera ra, taku te reira i manako,” na M—— ei. Inara kua uriia tona rekareka ki te maromaroa mei te kite anga aia te tika kore e te pae ke te raveia ra i roto i te are paretenia. Kua karanga aia e: “Penei kare e ngaropoina iaku te au taime o te taitaia e taua au papaanga i te kopapa e te pae vaerua e mamaeanga kino tikai te reira, e kua akamata au kia manako i te Atua, kare mei Tetai o te Aroa, inara mei Tetai tei tamamae ma te aroa kore.”
E kua tuatua ra aia: “Mei te taime i riro mai au ei paretenia, kare au i manuia ana te kimianga i te ingoa o Iehova i roto i te Puka Tapu. Kua kite ua rai au e ko ‘Iaue,’ e kua oripu tikai au. I tetai ra kua aere au ki vao i te kimi i taua au tangata ra tei tuatua ra ia Iehova, tera ra kare au i kite ana ia ratou.
“E kua pati te tuatau, e i tetai ra iaku e aere atura ki te kainga o toku kopu tangata, kua kite au i tetai tutu, ‘Are Uipaanga Patireia o te Au Kite o Iehova.’ Kua inangaro au i te akakite atu kia ratou e e au peroveta pikikaa ratou, inara kare e tangata i roto i te are. Kua oki akaou au i te Tapati. Kua akamata takere te uipaanga e kua akara anga poitirere te maata anga no tei kite mai i tetai paretenia i tona kakau katoa te tae anga mai. I muri ake i te uipaanga, kua tauta au i te aere ki vao ma te viviki. Tera ra, kua aravei mai tetai o te Au Kite iaku, no reira kua ui atu au kiaia e: ‘Eaa ra kotou i akakino ei i Tei Tapu ra na te apaianga i tona ingoa?’ Kua arataki atu taku uianga ki tetai uriuri anga manako no runga i te Puka Tapu, e kua rave au i te akapapaanga no tona atoro anga iaku i te kainga o toku kopu tangata. Kua akaateaia aia e toku nga metua ki vao. Inara kua aravei akaou maua e rua marama i muri mai e kua pati mai aia iaku kia aere mai ki tona kainga no tetai apii Puka Tapu. Kua poitirere tikai au no te au akakite anga tana i akaari mai kiaku, te akapapuanga te reira e e tau tikai no te au Kerititiano kia taangaanga i te ingoa o te Atua. Kua oronga mai tera tika anga te maroiroi kia akakore te au apinga puapinga kore taku e apii ana ei tetai paretenia.
“E maara ana au e manganui te apinga no toku ora anga i roto i te are paretenia. No te akatauanga, ka inangaro au kia maata te kai no te kaikai. No reira, kua tata au e te pati atu ki toku nga metua kia tuku mai tetai, kare au i manako ana e ka tatau ratou i taku reta i te are paretenia. I te kaikai anga i muri mai, e maata roa te varaoa e te tieri i tuku i mai ki mua iaku, e kua maro ia au kia kai pouroa i te reira. I teia nei e maata roa taku kai. Kua akakite au i teia ki toku au oa, e kua karanga atura tetai e kia akapueu rikiriki te varaoa tei kore i rauka iaku i te kai ki runga i te taua. Te rave anga au i te reira, kua mouria mai au e te paretenia e kua pei ririnui iaku ki te taua, ma tetai akauenga pakari kia miti au i te taua katoa kia ma, ma toku arero. E maata tikai te ngai. Koi akarongo ei i te akauenga, kua rongo au i te kerere kata aere e te katakata maata—kare tikai e aroa i akaariia mai.
“Kua kite au i teia nei te rekareka anga kia matara mai mei te reira au mea. Kua kite au e, kapiti atu ki teia matara anga ka o mai te au atinga. Ko tetai, kua akaateaia au e toku papa mei te kainga. Tera ra, i mua ake i te akarukeanga i te are paretenia, e akameitaki anga toku i te tauturu i etai au paretenia ou kia apii i te tuatua mou. Kua rekareka au i te kite e ko etai ia matou kua akatapu i to matou ora anga ki te Atua ko Iehova!
“I muri mai i te akaruke anga au i te are paretenia, e ngata tikai no toku papa kia marama te tumu i ariki kore ei au i te angaanga tutaki maata e te akapou i te ora. Inara kua inangaro au te maata o te tuatau no te tavini i te Atua. I teia nei kua angaanga au ei painia tamou, ma te oraanga manamanata kore e inara e oraanga puapinga tikai. Ma toku rekareka anga maata e, kua kapiti katoa mai toku mama e te au tuakana ki te angaanga a Iehova.”
E tika tikai, ko te tuatua mou Puka Tapu ka akarangatira te reira i tetai mei te akatereanga a te au akonoanga pikikaa o teia nei ao, e ka rauka mai te rekareka e te mataora mutu kore.—Ioane 8:32.