E Imene ma te Rekareka!

“E mea meitaki oki te imene akameitaki i to tatou Atua.”—SALAMO 147:1.

AU IMENE: 9, 138

AKAPEEA KOE ME PAU?

Eaa te tuanga a te imene i roto i te akamori anga mou?

Akapeea koe me apii i te imene akapaapaa ia Iehova ma te ngakau tae?

Eaa te au taui anga tei raveia i roto i te puka imene ou, e akapeea koe me puapinga mei te reira?

1. Eaa ta te imene ka tauturu ia tatou kia rave?

KARANGA tetai tata imene rongonui e: “Akatupu te au kupu ia koe kia akamanako. Akatupu te akatangianga i te manako maana. Ka akatupu ra te imene kia pakia te manako.” Ka akapaapaa ta tatou au imene i te aroa no to tatou Metua i te rangi, ko Iehova. Ka akapiri vaitata ia tatou kiaia. E māmā, i reira, kia mārama te tumu i riro ei te imene ei tuanga puapinga i roto i te akamori anga mou, noatu me ka imene tatou ko tatou anake me kore ki to tatou au taeake e te au tuaine.

2, 3. (a) Eaa to tetai pae manako no te imene maata i roto i te putuputuanga? (e) Eaa te au uianga ta tatou ka uriuri i teia atikara?

² Eaa ra toou manako i te imene maata i roto i te putuputuanga? E mea akamā ainei kia koe? I etai au peu, kare te tane e reka ana i te imene i mua i te katoatoa. E tu tau kore teia ki rungao i te putuputuanga, me emiemi tikai te aronga pakari i te imene me kore e maata roa ta ratou angaanga i te tuatau o te au imene.—Salamo 30:12.

³ E tuanga te imene no ta tatou akamori anga kia Iehova. Kare tatou e inangaro i te akaruke i te tuatau tikai o te imene me kore te kape i te reira tuanga o te uipaanga. No reira, ka tau kia ui kia tatou uaorai: ‘Eaa toku manako i te imene i ko i te au uipaanga? Eaa taku ka rave me emiemi au i te imene i mua i te katoatoa? E akapeea au me imene i te au imene ma te ngakau tae?’

E TUANGA PUAPINGA TE IMENE NO TE AKAMORI ANGA MOU

4, 5. Eaa te au akapapaanga no te imene anga i ko i te iero i Iseraela taito?

⁴ I te tuatua enua i aereia mai, e taangaanga ana te aronga akamori ia Iehova i tetai akatangianga imene ei akapaapaa iaia. Ma te tau, te vai tiratiratu anga te ngati Iseraela kia Iehova, kua riro te imene anga ei tuanga puapinga o ta ratou akamori anga. Ei akaraanga, te akapapaanga a Davida i te iero, kua akaaere aia e 4,000 ngati Levi ei akapaapaa ia Iehova ma te imene. I teia, e 288 “tei apiiia i te imene ia Iehova ra, ko te aronga katoa i karape ra.”—1 Paraleipomeno 23:5; 25:7.

⁵ Kua riro katoa te akatangianga e te imene anga ei tuanga puapinga o te akatapuanga i te iero. Te akakite maira te Pipiria kia tatou: “Te akono ra te kau taunga i ta ratou taoonga: e te au ngati Levi ma te au mea tangi na Iehova ra, i angaia e te ariki ra e Davida, ka imene ei a Davida ia ratou ei akameitaki ia Iehova, . . . kua ki oki te are o te Atua ki te kakā o Iehova.” Akamanako ana te riro anga teia atianga ei akamaroiroi i te akarongo o te ngati Iseraela!—2 Paraleipomeno 5:13, 14; 7:6.

6. Eaa te au akapapaanga no te akatangianga e te imene anga ta Nehemia i rave iaia ei kavana o Ierusalema?

⁶ Ko Nehemia, tei akaaere i te ngati Iseraela no te akatu akaou i te patu takapini ia Ierusalema, kua akaaere katoa aia i te ngati Levi no te imene e te akatangianga imene. Kua riro ta ratou imene ei rekareka anga maata ki te akatapuanga o te au patu. Kua akataka atura a Nehemia “e rua pupu [imene] mamaata ei akameitaki.” Kua aaere te pupu imene na runga i te au patu oire tikoti i tetai e tae ua atu kia aravei ratou ki ko i te patu vaitata ki te ngai o te iero. No te tangi maata ka rongoia te reira mei te ngai mamao. (Nehemia 12:27, 28, 31, 38, 40, 43) Ka papu ia tatou e kua mareka a Iehova i te akarongo i tona aronga akamori te imene anga i te au imene akapaapaa iaia ma te oraora.

7. Akapeea a Iesu te akaari anga e ka riro te imene anga ei tuanga puapinga o te akamori anga na te au Kerititiano?

⁷ I to Iesu tuatau, kua riro te akatangianga imene ei tuanga puapinga o te akamori anga mou. Akamanako ana i tei tupu i te po puapinga rava atu o te tuatua enua o te tangata nei. I muri ake te akono anga a Iesu i te Kaikaianga Aiai a te Atu ma tana au pipi, kua imene ratou i te au imene akapaapaa ia Iehova.—E tatau ia Mataio 26:30.

8. Akapeea te au Kerititiano mua te akanoo anga i tetai akaraanga o te akapaapaanga i te Atua ma te imene?

⁸ Kua akanoo te au Kerititiano mua i tetai akaraanga meitaki te akapaapaaanga i te Atua ma te imene. Kare mei te au ngati Iseraela, tei aere ki te iero no te akamori ia Iehova, kua aravei taua au Kerititiano i te au ngutuare takake. Noatu e kare teia au ngutuare e manea ana ma te umere mei te iero, kua imene rai te au taeake ma te oraora. Te tika, akakite te apotetoro ko Paulo ki tona au taeake Kerititiano: “I te apii anga e te ako anga tetai ki tetai ma te salamo e te imene e te peʼe a te vaerua, i te imene anga ma te aroa ua i roto i to kotou ngakau i te Atu.” (Kolosa 3:16) Kia imeneia te au imene i roto i ta tatou puka imene “ma te aroa ua.” E tuanga ia no ‘te kai i te ora mou’ ta “te tavini akono meitaki e te pakari” i oronga mai kia tatou.—Mataio 24:45.

AKAPEEA KOE ME IMENE MA TE PAPU?

9. (a) Eaa etai ka emiemi ei i te imene maata ma te rekareka i ko i ta tatou au uipaanga e te au akaputuputuanga? (e) Akapeea tatou me imene ma te akapaapaa ia Iehova, e koai tei tau kia akanoo i te akaraanga? (Akara i te tutu mua.)

⁹ Eaa etai au tumu ka emiemi koe i te imene? Penei kare te imene anga i te mea matauia i toou ngutuare tangata me kore peu. Me kore ra, penei kua akarongo koe i te aronga imene karape i runga i te ratio me kore te avata tutu, e me akaaite koe i taau imene anga ki ta ratou, ka akamā koe me kore ka poitirere. Inara e apainga ta tatou kia imene ma te akapaapaa ia Iehova. No reira e mou i taau puka imene ki runga, e nana i toou katu ki runga, e imene ma te oraora! (Ezera 3:11; e tatau ia Salamo 147:1.) E maata te Are Uipaanga Patireia i teia rā e avata tutu tetai tei akaari i te au kupu o ta tatou au imene, e ka tauturu teia ia tatou kia imene maata. E rave katoaia ana te imene i te au imene Patireia ei tuanga no te Apii Orometua Patireia na te aronga pakari. Te akaari ra teia i te puapinga no te aronga pakari kia akanoo i te akaraanga no te imene anga i roto i te au uipaanga putuputuanga.

10. Eaa ta tatou ka akamaara me mataku tatou i te imene ma te reo maata?

¹⁰ E manganui te mataku ra i te imene ma te reo maata no te mea te manako ra ratou e e maata roa to ratou reo me kore ra kare to ratou reo e meitaki ana. Inara, akamanako ana i teia. Me tuatua tatou, e “apa anake nei tatou i te au mea katoa e manganui,” inara kare te reira e arai ana ia tatou kia tuatua. (Iakobo 3:2) No reira eaa tatou ka tuku ei i to tatou au reo taka kore kia arai ia tatou mei te imene anga i te au imene akapaapaa ia Iehova?

11, 12 Akapeea tatou me akameitaki atu i ta tatou imene anga?

¹¹ Penei mataku tatou i te imene no te mea kare tatou e kite akapeea i te imene. Inara te vaira etai au mea ngoie ka rauka ia tatou te rave kia meitaki atu ta tatou imene anga.a—Akara i te tataanga rikiriki i raro.

¹² Ka rauka ia koe te imene ma te reo maata e te matutu na te apiianga i te akaea meitaki. Mei te uira tei oronga i te ririnui ki te mori, na taau akaea anga e akaririnui i toou reo ia koe e tuatua ra me kore e imene ra. Kia imene maata koe mei taau e tuatua ra e kia maata atu. (Akara i te au manako o te Benefit From Theocratic Ministry School Education, kapi 181 ki te 184, i raro ake i te manako tuatua rikiriki “Properly Control Your Air Supply.”) Te tika, tetai taime ka akakite mai te Pipiria ki te aronga akamori ia Iehova “e [ava ma te] rekareka” me imene ma te akapaapaa.—Salamo 33:1-3.

13. Akamārama mai akapeea tatou me imene ma te papu.

¹³ I te tuatau o te akamorianga ngutuare me kore ra ko koe anake ua, e rave i teia: E iki i tetai o taau au imene reka i roto i ta tatou puka imene. E tatau maata i te au kupu ma te reo matutu e te papu. E oti, ma te reo maata rai, e tuatua i te au kupu i roto i te aerenga tuatua okotai i roto i te akaea anga okotai. E oti, e imene i te aerenga tuatua te taangaanga anga i taua reo matutu ra. (Isaia 24:14) Ka ririnui maata atu toou reo imene, e e mea meitaki te reira. Auraka e akariro i te reira kia tamataku ia koe me kore kia taakama ia koe!

14. (a) Akapeea te amama maata anga i to tatou vaa me tauturu i ta tatou imene anga? (Akara i te pia “Kia Meitaki Atu Taau Imene Anga.”) (e) Eaa te au manako te ka tauturu ia koe kia meitaki atu toou reo?

¹⁴ E rauka ai tetai reo imene ririnui, ka anoanoia koe kia akapae i tetai ngai i roto i toou vaa. No reira me imene koe, e amama i toou vaa kia maata atu i taau i matauia me tuatua koe. Inara eaa taau ka rave me manako koe e e reo maru toou me kore e reo teitei toou? Ka kitea te au manako tauturu i roto i te pia “Overcoming Specific Problems,” i roto i te Benefit From Theocratic Ministry School Education, kapi 184.

E IMENE AKAPAAPAA MA TE NGAKAU TAE

15. (a) Eaa te akakiteanga tei orongaia i ko i te uipaanga mataiti 2016? (e) Eaa tetai au tumu i uri akaouia ai te puka imene?

¹⁵ Rekareka te katoatoa tei tae ki te uipaanga mataiti 2016 te akakite anga te Taeake Stephen Lett o te Pupu Akaaere i tetai puka imene ou ma te tumu tuatua, Imene ma te Rekareka kia Iehova. Mei ta te Taeake ko Lett i akamārama, tetai tumu i anoanoia ai te puka imene ou no te mea kua uri akaouia te New World Translation of the Holy Scriptures. Kua taui te au kupu kia kiriti i te au tuatua kare i roto akaou i te New World Translation. Pera katoa, kua taruia te au imene ou no te angaanga tutu aere e te atinga oko. Tetai katoa, no te mea e tuanga puapinga te imene anga no ta tatou akamori anga, kua inangaro te Pupu Akaaere i te nenei i tetai puka imene meitaki tikai. No reira kua aiteite rai te maani anga o te puka imene ki te New World Translation.

16, 17 Eaa etai au taui anga i roto i te puka imene ou?

¹⁶ Kia māmā atu i te taangaanga i te puka imene, kua akapupuia te au imene ki raro ake i te tumu manako okotai. Ei akaraanga, te 12 imene mua no Iehova, te 8 imene tei aru mai no Iesu e te atinga oko, e te vai atura. Te vaira te akapapaanga tumu manako katoatoa i te akamataanga o te puka imene. Ei akaraanga, ka tauturu teia i te taeake kia iki i tetai imene no te ako na te katoatoa.

¹⁷ Ei tauturu i te katoatoa kia imene ma te ngakau tae, kua tauiia tetai au kupu kia taka meitaki te karere o te au imene. Te au kupu kare e taangaanga maataia ana mei te kupu papaa “shall,” kua tupauia te reira. Ma te aiteite, te imene “Akakoromakianga Roa” i teianei “E Akakoromaki,” e kua akatanotano katoaia te au kupu o te imene. E tau katoa kia taui i te imene “E Tapapa Mari i to Ngakau” ei akaueanga ki te akakiteanga “Tapapa Mari i to Tatou Ngakau.” No teaa ra? No te mea i mua atu ana, me imene tetai tangata i te au kupu o teia imene, te akakite ra aia ki tetai ke kia rave i te reira. Ka manga tuke rai teia ki te aronga ou, te aronga tei inangaro, te au mapu, e te au tuaine i ko i ta tatou uipaanga, akaputuputuanga, e te uruoaanga. No reira kua tauiia te ingoa e te au kupu.

18. No teaa tatou ka apii ei i te au imene i roto i ta tatou puka imene ou? (Akara i te tataanga rikiriki i raro.)

¹⁸ E maata te au imene i roto i te Imene ma te Rekareka Kia Iehova mei te pure rai. Ka tauturu teia au imene ia koe kia akakite kia Iehova i toou manako. Ka tauturu tetai atu au imene ia tatou kia akakeu ia tatou “kia maata te aroa, e i te angaanga memeitaki ra.” (Ebera 10:24) Ka inangaro tatou kia kite i te au tangi anga, te tiunu, e te au kupu o ta tatou imene. Ka rauka ia tatou teia na te akarongoanga ki te au rekotianga a te au taeake e te au tuaine e imene ra i te au imene. Tei runga teia au rekotianga i te jw.org. Me apiipii koe i te au imene i te kainga, ka rauka ia koe te imene i te reira ma te papu e te ngakau tae.b—Akara i te tataanga rikiriki i raro.

19. Akapeea te katoatoa i roto i te putuputuanga te akamori anga ia Iehova?

¹⁹ E akamaara e tuanga puapinga te imene anga no ta tatou akamori anga. E mataara ririnui teia te akaari kia Iehova e te inangaro ra tatou iaia e te mareka tikai ra tatou i tana i rave no tatou. (E tatau ia Isaia 12:5.) Me imene koe ma te oraora, ka akamaroiroi koe i tetai ke kia pera katoa. Ka rauka i te katoatoa i roto i te putuputuanga, te mapu, te ruaine, me kore te aronga ou i roto i te tuatua mou, i te akamori ia Iehova na teia tu. No reira, auraka e emiemi i te imene ma te ngakau tae. E akarongo i te aratakianga a te tata salamo: “E imene ia Iehova!” Ae, e imene ma te rekareka!​—Salamo 96:1.

[Au Tataanga Rikiriki i Raro]

[Pia i te kapi 5]

KIA MEITAKI ATU TAAU IMENE ANGA

(Akara i te parakarapa 11-14)

Tu tika ki runga

Akaea maata ki roto

Amama i toou vaa e te karaponga

Imene ma te reo maata

[Pia i te kapi 8]

TETAI AU TUATUA I URIURIIA

Me imene ma te ngakau tae, ka imene tatou ma te manako ngakau e te papu. Kia rave i teia, ka anoanoia tatou kia kite i ta tatou imene e kia imene meitaki i te reira

[Tutu i te kapi 6, 7]

E apiipii i te au imene i te tuatau o te akamori anga ngutuare (Akara i te parakarapa 18)