‘E Ao to Kotou Tei Kite i Teianei au Tuatua, e te Akono i te Reira’
“Teia taku kai, ko te akono i tona anoano, to tei tono mai iaku ra, ma te akaoti i tana angaanga.”—IOANE 4:34.
1. Akapeea te tu kino o teianei ao me akakeu i to tatou tu akaaka?
NO TEAA ra ka ngata ei i te taangaanga i ta tatou ka apii mai mei te Tuatua a te Atua? Te tumu mua, ka anoanoia tatou kia akaaka, kia rave i tei tau. I teia “tuatau openga,” e ngata kia vai akaaka ua, no te mea te riro ra te tangata takapini ia tatou “ei akaperepere ia ratou uaorai, ei noinoi, ei akatietie, ei nengonengo” e “ei mako kore.” (2 Timoteo 3:1-3) Ei au tavini no te Atua, kua kite tatou e e au tu kino teia, e te akara anga e te manuia ra e te mataora ra te oraanga o teia aronga mei teia te tu. (Salamo 37:1; 73:3) Penei ka manako katoa tatou: ‘Te pauna ra ainei toku taime kia tuku i te au anoano o tetai ke ki mua ake i toku? Me taakaaka au iaku, ka akangateitei mai ainei tera tangata iaku? (Luka 9:48) Me akatika tatou i te tu kino o teianei ao kia akakeu ia tatou, ka takinoia to tatou pirianga meitaki ki te au taeake e ka ngata i tetai pae kia kite mai e e au Kerititiano tatou. Inara me akara tatou i te akaraanga o te au tavini akaaka o te Atua ma te aru ia ratou, ka puapingaia tatou.
2. Eaa ta tatou ka apii mai mei te au tavini tiratiratu o te Atua i mua ana?
2 Eaa tei tauturu i te au tavini tiratiratu o te Atua i mua ana, kia riro ei oa nona? Akapeea ratou te akamareka anga iaia? Noea mai to ratou maroiroi no te rave i te mea tau? Me tatau tatou i to ratou akaraanga i roto i te Pipiria ma te akamanako oonu i te reira, ka ketaketa atu to tatou akarongo.
KIA KETAKETA UA ATU TE AKARONGO
3, 4. (a) Akapeea a Iehova me apii ia tatou? (e) Eaa ra i anoano maataia ai kia ketaketa ua atu to tatou akarongo?
3 Te oronga maira a Iehova tei anoanoia kia ketaketa ua atu to tatou akarongo. Ka rauka te ako anga e te tereni anga meitaki a te Pipiria, te au puka Kerititiano, ta tatou website, te JW Broadcasting, e ta tatou uipaanga e te akaputuputuanga. Inara, karanga a Iesu e e maata atu ta tatou ka anoano i te kite ua. Karanga aia, “Teia taku kai, ko te akono i tona anoano, to tei tono mai iaku ra, ma te akaoti i tana angaanga.”—Ioane 4:34.
4 Kua aite te rave anga i to te Atua anoano mei te kai kia Iesu. Ka riro te kai memeitaki ei akamatutu i to tatou kopapa. Pera katoa te rave anga i to te Atua anoano, ka akamatutu ïa i to tatou akarongo. Ei akaraanga, kua aere ana ainei koe ki tetai uipaanga tutu aere ma te roiroi e i muri mai kua oki koe ki te kainga ma te mataora?
5. Akapeea tatou e puapinga ai me rauka te tu pakari?
5 Me rave tatou i ta Iehova i pati mai ia tatou kia rave, e tu pakari to tatou. (Salamo 107:43) E ka tupu te au mea meitaki ki te aronga tu pakari. “E te au mea katoa i inangaroia e koe ra, kare rava ïa e aite kiaia. . . . Ko te rakau ora aia i te aronga e opu iaia; e ko tei tāpu iaia, e ao tona.” (Maseli 3:13-18) Karanga a Iesu: “E ao to kotou, te aronga i kite i teianei au tuatua, kia akono kotou i te reira.” (Ioane 13:17) Ka mataora ua ta Iesu au pipi me rave ratou i ta Iesu i akakite kia ratou kia rave. Na te aruanga i tana au apiianga e te akaraanga, ko to ratou oraanga ïa.
6. No teaa tatou ka anoanoia ai kia taangaanga ua atu i ta tatou e apii ra?
6 I teia tuatau, ka anoano katoaia tatou kia taangaanga i ta tatou e apii maira. Ka akamanako ana i tetai mechanic e tana au apinga, e tona kite. Ka riro te reira au apinga ei tauturu iaia ei mechanic meitaki. Penei e tu karape tona, inara ka anoanoia rai aia kia taangaanga i tana i apii mai me ka inangaro aia kia riro mai ei mechanic meitaki. Mei tera te tu, i to tatou apii mua anga i te tuatua mou, kua mataora tatou no te mea kua taangaanga tatou i ta tatou i tatau mei te Pipiria. Inara, e rauka ai te mataora mutu kore, ka taangaanga ua atu tatou i ta Iehova i apii mai.
7. Eaa ta tatou ka rave kia apii mai mei te au akaraanga Pipiria?
7 I teia atikara, ka uriuri tatou i tetai au turanga, e ngata ana ia tatou kia vai akaaka ua. Ka apii tatou akapeea te aronga tiratiratu i mua ana te vai akaaka anga. Inara e maata atu ta tatou ka rave i te tatau ua i te reira. Kia akamanako tatou ma te taangaanga i te reira.
AITEITE TE TURANGA O TE KATOATOA
8, 9. Eaa ta tatou ka apii mai mei te tu akaaka o Paulo ia Angaanga 14:8-15? (Akara i te tutu mua.)
8 Ka inangaro te Atua i te au tu tangata katoatoa “kia ora, e kia rauka te kite i te tuatua-mou.” (1 Timoteo 2:4) Eaa toou manako i te au tangata katoatoa kare i kite ake i te tuatua mou? Kua tutu aere te apotetoro ko Paulo ki te iti tangata ngati Iuda tei kite takere ia Iehova. E kua tutu aere katoa aia ki te aronga tei akamori i te au itoro pikikaa. Kua riro teia ei timata i to Paulo tu akaaka. Akapeea ra?
9 I te tere mitinari mua o Paulo, kua aere raua ko Banaba ki te oire o Lusetera. Kua āriki mai te iti tangata Lukaonia ia Paulo raua ko Banaba ei nga tangata ririnui e kua kapiki ia raua ma te ingoa o to ratou atua pikikaa ko Dia e Ereme. Kua reka ainei a Paulo raua ko Banaba i teia? Kua manako ainei raua e e manga taui anga meitaki teia ki te takinokino anga ta raua i kite i te nga oire openga e rua tei atoroia e raua? Kua manako ainei raua e ka riro teia akaepaepa anga ei tauturu i te maata anga o te tangata kia akarongo mai ki te nuti meitaki? Kare! Mareka kore raua i teia, te kapiki anga: “Eaa kotou i pera mai ei? E tangata katoa oki maua, mei ia kotou katoa na te tu.”—Angaanga 14:8-15.
10. No teaa ra a Paulo e Banaba i kore ei i manako maata ki rungao i te iti tangata Lukaonia?
10 Te karanga anga a Paulo e Banaba e e tangata katoa oki raua, te aiteanga e tu apa ua to raua. Kare e, e aiteite ta raua akamorianga ki ta te iti tangata Lukaonia. Kua tuku te Atua ia Paulo e Banaba ei mitinari. (Angaanga 13:2) Kua akatainuia raua ki te vaerua tapu ma te manakonakoanga manea. Inara kare raua i manako parau ana ia raua uaorai. Kua kite raua e ka rauka rai i te iti tangata te manakonakoanga no te rangi, naringa ratou i āriki i te nuti meitaki.
11. Akapeea tatou me aite mei ia Paulo rai te akaaka, i ta tatou angaanga tutu aere?
11 Teia te mataara mua kia akaari tatou i te tu akaaka mei ia Paulo rai. Auraka rava tatou e manako e e aronga akatakakeia tatou, no ta tatou angaanga tutu aere me kore te au mea ta Iehova i oronga mai. Ka ui tatou kia tatou uaorai: ‘Eaa toku manako i te tangata i teia ngai? E tu papakitai ainei toku i tetai au tu tangata?’ Te tauta nei te Au Kite o Iehova i teianei ao, kia kitea te aronga te ka akarongo mai i te nuti meitaki. Te tauta katoa nei tetai pae i te apii i te reo me kore te au peu a te iti tangata e turanga akaaka to ratou. Inara kare rava ratou e manako ana e e meitaki atu to ratou turanga i te tangata ta ratou e tutu aere atura. Mari ra, ka tauta ratou i te mārama i te tangata tataki tai kia tauturu i te maata anga kia āriki i te karere o te Patireia.
E PURE MA TE TAIKU I TE INGOA O TETAI KE
12. Akapeea a Epaphera te akaari anga e kua akaperepere tikai aia i te au taeake?
12 Tetai mataara ka akaari tatou i te tu akaaka, na te pure anga no te au taeake e te au tuaine, “te aronga i rauka katoa ia ratou taua akarongo meitaki mei ia matou nei.” (2 Petero 1:1) Kua rave a Epaphera i te reira. E toru taime tona taikuia anga e te Pipiria. Te tapeka angaia a Paulo i tona kainga i Roma, kua tata aia ki te au Kerititiano i Kolosa, te taiku anga ia Epaphera: “Te tauta marie anga i te pure ia kotou kare e tivata.” (Kolosa 4:12) Kua kite meitaki a Epaphera i te au taeake, e kua akaperepere tikai aia ia ratou. Kapiki a Paulo iaia e ko “taku oa tapeka katoaia,” no reira e au manamanata ke atu rai to Epaphera. (Philemona 23) Inara kua akono rai aia i te au taeake, e kua tauturu ia ratou. Kua pure a Epaphera no tona au taeake e te au tuaine, te taiku anga i to ratou ingoa, kia pera rai tatou. E akakeu anga ririnui tikai teia au tu pure.—2 Korinetia 1:11; Iakobo 5:16.
13. Ia koe e pure ra akapeea koe me aru i te tu o Epaphera?
13 Akamanako ana e koai taau ka pure atu, te taiku anga i tona ingoa. Penei kua kite koe i te au taeake i roto i te putuputuanga me kore te au ngutuare tangata e manamanata to ratou. Penei e au ikianga me kore e au timata anga ngata ta ratou e na roto atura. Ka rauka katoa ia koe i te pure no te au taeake tei roto to ratou ingoa i te atikara jw.org “Jehovah’s Witnesses Imprisoned for Their Faith.” (Akara i raro ake i te NEWSROOM > LEGAL DEVELOPMENTS.) Ka rauka katoa ia koe i te pure no te aronga akaperepereia tei takake atu, te aronga tei ora mai i te au tumatetenga me kore te au tamaki i ou ake nei, e te aronga e manamanata turanga moni to ratou. E manganui te au taeake e te au tuaine te anoano maira i ta tatou au pure! Me pure tatou no ratou, te akapapu ra tatou e te maaraara atura tatou i to ratou au anoano kare i to tatou anake. (Philipi 2:4) Te rongo ra a Iehova i teia au tu pure.
‘KIA RAPURAPU I TE AKARONGO’
14. Mei teaa to Iehova tu akarongo meitaki?
14 Tetai akaou mataara ka akaari tatou i te tu akaaka, na te akarongo meitaki anga. Akakite mai a Iakoba 1:19 kia tatou ‘kia rapurapu i te akarongo.’ E akarongo meitaki ua ana a Iehova. (Genese 18:32; Iosua 10:14) Ei akaraanga, e tatau i te pukapuka anga i roto ia Exodo 32:11-14. (E tatau.) Noatu e kare aia i anoano i to Mose manako, kua akatika a Iehova ia Mose kia akakite i tona manako. Ka akarongo meitaki ainei koe ki tetai tei tarevake ana i mua ana e ka aru i tona manako? Ka akarongo meitaki ua a Iehova ki te au tu tangata katoatoa tei pure ma te akarongo.
15. Akapeea tatou me aru i to Iehova tu, te akangateitei anga i tetai ke?
15 E ui kia koe uaorai: ‘Me e tu akaaka to Iehova ma te akarongo ki te tu tangata mei ia Aberahama, Rahela, Mose, Iosua, Manoa, Elia, e Hezekia, kia tauta katoa ainei au kia akapera? Ka akangateitei maata atu ainei au i toku au taeake katoatoa na te akarongo anga kia ratou ma te aru i to ratou manako i te ngai ka rauka? E tangata ainei tetai i roto i taku putuputuanga me kore ngutuare tangata ka anoanoia kia akarongo atu? Eaa taku ka rave?’—Genese 30:6; Te Au Akava 13:9; 1 Ariki 17:22; 2 Paraleipomeno 30:20.
“E RIRO PAĀ IEHOVA I TE AKARA MAI I TOKU NEI TUMATETENGA”
Karanga a Davida: “E vaoo ua atu” iaia! Eaa taau ka rave? (Akara i te parakarapa 16, 17)
16. Akapeea te Ariki ko Davida te ariu anga atu ki ta Simei takinokino anga?
16 Ka tauturu katoa te tu akaaka ia tatou kia akaari i te tu akono meitaki me takinokinoia tatou e tetai ke. (Ephesia 4:2) E akaraanga meitaki tetai ia 2 Samuela 16:5-13. (E tatau.) Kua takinokino e kua tamaki atu a Simei, e kopu tangata no te Ariki ko Saula, ia Davida e tona au tavini. Ka rauka rai ia Davida i te tāpu ia Simei, inara kua akakoromaki marie ua aia i tana takinokino anga. Akapeea a Davida te akono meitaki anga i te reira? Ka tatau tatou i te toru o te Salamo.
17. Eaa tei tauturu ia Davida kia rauka te tu akono meitaki, e akapeea tatou me aru i tona tu?
17 Na Davida i tata i te toru o te Salamo, te tauta anga tana tamaiti ko Abasaloma i te tamate iaia. Ko te tuatau teia te takinokino anga a Simei ia Davida, inara kua vai maru ua a Davida. Akapeea? Ia Salamo 3:4, ka tatau tatou i ta Davida tuatua: “Te kapiki nei toku reo kia Iehova, e te akarongo maira aia iaku i tona maunga tapu ra.” Me takinokinoia tatou, ka anoanoia tatou kia pure mei ia Davida rai. I reira a Iehova e oronga mai ei i tona vaerua tapu kia rauka ia tatou i te akakoromaki. Kia maata atu ainei toou tu akono meitaki e kia akakore maata atu i te ara a tetai tei takinokino mai ia koe? Te papu ainei ia koe e te manako maira a Iehova i toou mamae e ka tauturu ma te akameitaki mai ia koe?
“KO TE PAKARI RAI TE MEA MEITAKI”
18. Akapeea tatou e puapinga ai me taangaanga i te ikuiku anga a Iehova?
18 Me rave tatou i te mea meitaki, ka rauka ia tatou te tu pakari e ka akameitaki a Iehova ia tatou. Ia Maseli 4:7, karanga te Pipiria: “Ko te pakari rai te mea meitaki.” Noatu e kua akatumuia te tu pakari ki runga i te kite, e maata atu te ō maira i te mārama ua i te au tika. Ka ō mai ta tatou iki anga ki roto i te tu pakari. E tu pakari rai to te rō me akapapa i ta ratou kai no te tuatau anu. (Maseli 30:24, 25) E akamareka ua ana a Karaiti, tei kapikiia ko “te pakari o te Atua” i tona Metua. (1 Korinetia 1:24; Ioane 8:29) Ka tutaki mai te Atua ia tatou me akaari katoa tatou i te tu pakari na te iki anga kia rave i te meitaki e kia vai akaaka. (E tatau ia Mataio 7:21-23.) No reira e angaanga pakari kia riro te putuputuanga ei ngai ka rauka i te katoatoa i te tavini ia Iehova ma te tu akaaka. Ka anoanoia te tuatau e te tu akakoromaki kia taangaanga i te mea meitaki. Kia rave i te reira ka anoanoia te tu akaaka, ka mataora tatou i teianei e tuatau ua atu.