“E Oko i te Tuatua-Mou, e Auraka Rava e Oko Akaouia Atu”

1, 2. (a) Eaa te mea puapinga rava atu i roto i toou oraanga? (e) Eaa te au tuatua mou ka akaperepere tatou, e no teaa ra? (Akara i te tutu mua.)

EAA te mea puapinga rava atu i roto i toou oraanga? Ei iti tangata no Iehova, ko te mea puapinga rava atu koia oki ko to tatou pirianga kiaia. Kare rava tatou e oko atu i te reira no tetai apinga ke. E puapinga katoa te tuatua mou i roto i te Pipiria, no te mea ka tauturu te reira ia tatou kia riro mai ei oa no Iehova.—Kolosa 1:9, 10.

² Ko Iehova te Puapii Maata Rava Atu, tei apii mai i te au tuatua mou akaperepereia i roto i te Pipiria. Te apii maira aia i te puapinga o tona ingoa e te akakite maira i tona au tu manea. Kua akaari mai aia i tona aroa na te akaatinga anga i tana Tamaiti akaperepere no tatou. Kua akakite mai a Iehova i te Patireia o te Mesia. Te oronga maira aia i tetai manakonakoanga no te tuatau ki mua, ki runga i te rangi no te aronga akatainuia me kore i te Parataito i te enua nei no te au “mamoe ke atu.” (Ioane 10:16) Te apii maira a Iehova akapeea e rauka ai tetai oraanga meitaki. E au tuatua mou akaperepereia teia, no te mea ka akavaitata teia ia tatou ki Tei Anga mai e ka puapingaia to tatou oraanga.

3. Ka pati ainei a Iehova ia tatou kia tutaki i te tuatua mou ki te moni?

³ E Atua oronga ua a Iehova. Kua akaatinga aia i tana uaorai Tamaiti no tatou. Me kite a Iehova i tetai tangata e kimi ra i te tuatua mou, ka tauturu aia iaia kia kitea te reira. Kare rava aia e pati ia tatou kia tutaki i tetai moni kia apii i te tuatua mou. Kua oronga tetai tangata, ko Simona tona ingoa, i tetai moni ki te apotetoro ko Petero no te tikaanga kia oronga i te vaerua tapu ki etai ke. Kua karanga a Petero e kua tarevake tona aerenga manako e kua tuatua e: “Kia riro katoa atu taau moni ki te mate e ko koe katoa, ko koe i manako e, e oko na ta te Atua i oronga ua maira ki te moni.” (Angaanga 8:18-20) No reira, eaa te aiteanga kia “oko i te tuatua mou”?

EAA TE AITEANGA KIA “OKO I TE TUATUA-MOU”?

4. I roto i teia atikara, eaa ta tatou ka apii mai no runga i te tuatua mou?

⁴ E tatau ia Maseli 23:23. Ka tauta tatou i te apii i te tuatua mou o te Pipiria. Ka akaruke tatou i tetai au apinga ke. E me ‘oko tatou i te tuatua-mou,’ koia oki me apii tatou i te reira, kia matakite e auraka rava kia “oko akaouia atu,” koia oki kia akaruke i te reira. Akapeea tatou me “oko” i te tuatua mou? Eaa te maata ta tatou ka tutaki? Ka tauturu te pauanga ki teia nga uianga ia tatou kia akaperepere i te tuatua mou e kia kore rava e akaruke i te reira. Ka kite tatou eaa i puapinga maata ai te tuatua mou a Iehova i tetai ua atu apinga.

5, 6. (a) Akapeea tatou me oko i te tuatua mou ma te kore e moni? Akamārama mai. (e) Akapeea tatou e puapingaia ai mei te tuatua mou?

⁵ Noatu e au apinga oronga ua mai tetai, kare te aiteanga e ka rauka ua te reira. Te tuatua Epera tei uriia e “oko” i roto ia Maseli 23:23, koia oki kia “rauka” mai. Te akaari maira teia nga tuatua, e ka tauta tetai tangata me kore ka akaruke aia i tetai apinga kia rauka tetai apinga meitaki atu. Kia mārama akapeea tatou me oko i te tuatua mou, e akamanako ana e te orongaia ra te meika kare e tutaki i ko i te makete. Ka tapapa ainei tatou e ka aere ua mai te meika ki runga i ta tatou kaingakai? Kare, ka aere tatou ki te makete e ka apai mai i te reira. No reira, noatu e kare e moni i pou no te oko i te meika, ka tauta tatou i te tiki mai i te reira. Mei te reira rai, kare e anoanoia te moni kia apii i te tuatua mou, mari ra ka anoanoia te tauta anga e tetai akaatinga anga.

⁶ E tatau ia Isaia 55:1-3. Ta Iehova i tuatua, ka tauturu te reira ia tatou kia mārama i te aiteanga kia oko i te tuatua mou. I teia au irava, kua akaaite a Iehova i tana tuatua mou ki te vai, te u, e te wina. Mei te vai anu rai te ka akaoraora i tetai tangata kaki vai, ka akaoraora te tuatua mou ia tatou. E mei te u rai te ka akamatutu i tetai tamaiti, ka akamatutu te tuatua mou i to tatou pirianga kia Iehova. Akaaite katoa a Iehova i tana tuatua ki te wina. Eaa te tumu? Karanga te Pipiria e ka rekareka te tangata me inu i te wina. (Salamo 104:15) No reira me karanga mai a Iehova kia “oko i te wina,” te akakite ra aia e ka mataora tatou me aru i tana aratakianga. (Salamo 19:8) Ka tauturu teia au akaaiteanga ia tatou kia kite i te puapinga o te apii e te akono anga i te tuatua mou. I teianei, ka uriuri tatou e rima apinga, penei ka akaruke tatou no te oko i te tuatua mou.

EAA TAAU I AKARUKE NO TE OKO I TE TUATUA MOU?

7, 8. (a) No teaa ra ka pou ei te taime no te apii i te tuatua mou? (e) Eaa ta tetai tuaine i akaatinga, e eaa tei tupu mai?

⁷ Taime. Ka akapou tetai tangata i tona taime kia akarongo ki te karere Patireia, tatau i te Pipiria e te au puka Pipiria, kia apii i te Pipiria ki te Au Kite o Iehova, akapapa no te au uipaanga, e kia tae ki te reira. Kia rave i teia au mea pouroa, ka anoanoia tatou kia taangaanga i te taime ta tatou e akapou ana no te au angaanga ke, kare e puapinga roa ana. (E tatau ia Ephesia 5:15, 16.) Eaa te maata o te taime ka anoanoia no te apii i te Pipiria? Tukeke te turanga o te tangata. Kare i kotingaia ta tatou ka apii no runga i to Iehova pakari, tona au aerenga, e tana au angaanga i rave. (Roma 11:33) Kua akaaite te Watch Tower mua i te tuatua mou ki “tetai tiare meangiti ua” na te karanga anga: “Auraka e mareka ua i te okotai ua tiare o te tuatua mou. Naringa ka rava ua e okotai, kua pou rai ïa. E koi e e kimi ua rai i te reira.” No reira e ui kia koe uaorai, ‘Eaa te maata taku i kite no runga ia Iehova?’ Noatu me ka ora tatou e tuatau ua atu, e maata ua atu rai ta tatou ka apii no runga ia Iehova. I teia tuatau, e mea puapinga kia taangaanga tatou i te taime e vai nei kia apii maata ua atu rai. Ko teia ta tetai vaine i rave.

⁸ Ko Mariko,a (Akara i te tataanga rikiriki i raro.) e vaine mapu no Tiapani mai, tei neke atu ki Marike no te aere ki te apii i New York City. Tetai rā, kua akaari tetai tuaine i te nuti meitaki kiaia i tona kainga. E akonoanga rai ta Mariko, inara kua akamata aia i te apii i te Pipiria ki teia tuaine. Kua reka tikai aia i tana i apii mai e kua pati kia apii raua e rua rā i te epetoma. Noatu e kua pou tona taime ki tana apii teitei e ki tana ngai angaanga, kua akamata aia i te aere ki te au uipaanga. Kua akaiti mai aia i tona taime ki te au tarekareka kia maata atu tona taime i te apii i te tuatua mou. Na te akaatinga anga i teia, kua akapiri vaitata a Mariko iaia uaorai kia Iehova, e kare i pou ana te mataiti, kua papetitoia aia. E ono marama i muri mai, i te mataiti 2006, kua riro mai aia ei painia, e te painia nei rai aia i teia rā.

9, 10 (a) Akapeea te apii anga i te tuatua mou me taui i to tatou aerenga manako no te au mea materia? (e) Eaa ta tetai vaine mapu i akaruke, e eaa tona manako no te reira?

⁹ Au apinga materia. E rauka ai i te apii i te tuatua mou, penei ka akaruke tatou i tetai angaanga tutaki meitaki, me kore tetai turanga puapinga i roto i teia akatereanga. Ei akaraanga, e nga tangata tautai a Petero raua ko Anederea, inara te pati anga a Iesu ia raua kia riro mai ei pipi nana, kua akaruke raua i ta raua angaanga tautai. (Mataio 4:18-20) Kare te aiteanga e me apii koe i te tuatua mou, ka anoanoia koe kia akaruke i taau ngai angaanga. Ka anoanoia te tangata kia angaanga no te akono i tona uaorai ngutuare. (1 Timoteo 5:8) Inara me apii koe i te tuatua mou, ka taui toou aerenga manako no runga i te au apinga materia. Ka kite koe eaa te mea puapinga rava atu i roto i te oraanga. Karanga a Iesu: “Auraka e akaputu i te apinga na kotou i teianei ao.” E kua akamaroiroi mai aia: “Ka akaputu ra i te apinga na kotou ki runga i te rangi.” (Mataio 6:19, 20) Ko ta Maria teia i rave.

¹⁰ E reka ana a Maria i te pā poro golf mei tona meangiti anga mai. Iaia i te apii tua rua, kua meitaki tikai aia i te reira. No teia, kua tutakiia tana apii e kia aere aia ki te apii university. Kua akakoro a Maria kia riro mai aia ei vaine rongonui i te golf e kia tutakiia aia ki te moni. Inara, kua akamata aia i te apii i te Pipiria. Kua reka tikai aia i tana i apii mai e kua taangaanga i te reira i roto i tona oraanga. Karanga aia, “Te tauianga au i toku oraanga e toku tu kia tau ki te au turanga o te Pipiria, kua kite mai au i te mataora.” Kua kite mai a Maria e ka ngatā iaia i te akamou ki runga i tona pirianga kia Iehova e ki tana pā poro golf. (Mataio 6:24) No reira kua iki aia i te akaruke i tana i akakoro kia tutakiia ei vaine rongonui i te golf no tetai apinga meitaki atu. Teia rā, te painia nei aia, e kua karanga e kua rauka iaia “te oraanga mataora e te puapinga rava atu.”

11. Me apii tatou i te tuatua mou, eaa te ka tupu ki tetai o to tatou au pirianga?

¹¹ Pirianga oa ki tetai ke. Me taangaanga tatou i ta tatou i apii mai mei te Pipiria, penei ka taui to tatou pirianga oa e te kopu tangata. Kua tauturu mai a Iesu kia mārama tatou i teia, te pure anga aia no tana au pipi: “Ka akatapu koe ia ratou i te tuatua-mou naau, ko te tuatua aau na te tuatua-mou.” (Ioane 17:17) Tetai aiteanga o te “akatapu,” koia oki kia “akatakake.” Me akamata tatou i te taangaanga i te tuatua mou i roto i to tatou oraanga, ka akatakakeia tatou mei teianei ao no te mea te aru nei tatou i te au turanga Pipiria. Noatu ka tauta tatou kia meitaki to tatou pirianga oa e te kopu tangata, penei kare tetai pae e reka mai ia tatou, e penei ka patoi i ta tatou e irinaki ra. Kare tatou e poitirere i teia. Karanga a Iesu: “E kitea oki to te tangata nei enemi i roto i tona uaorai ngutuare.” (Mataio 10:36) Taputou katoa mai a Iesu e noatu te maata ta tatou ka akaruke no te tuatua mou, e maata atu ta tatou ka rauka mai!—E tatau ia Mareko 10:28-30.

12. Eaa ta tetai tangata ngati Iuda i akaruke no te tuatua mou?

¹² I tona oraanga katoa, kua irinaki a Aarona, e tangata ngati Iuda, e kua tarevake te tuatua anga i te ingoa o te Atua. E kua inangaro tikai aia i te kite i te tika no runga i te Atua. Tetai rā, kua akaari tetai Kite o Iehova kiaia e me tuku aia i te au vouvera ki roto i te au reta Epera o te ingoa o te Atua, ka tatauia te reira e ko “Iehova.” Kua mataora a Aarona i te kite i teia e kua akakite i te reira ki te au rabi i ko i te sunago! Manako aia e ka mataora ratou i te kite i te tika no runga i te ingoa o te Atua, inara kare ratou i mataora ana. Kua tutuaia mai aia ki te uavare e kua tuaruia ki vao. Kua mareka kore katoa te ngutuare o Aarona. Inara kare teia i tāpu iaia kia apii maata atu no runga ia Iehova. Kua riro mai a Aarona ei Kite no Iehova e kua tavini tiratiratu ia Iehova no te toenga o tona oraanga. Kia tapapa katoa tatou e penei ka taui to tatou pirianga oa ki tetai ke me apii tatou i te tuatua mou.

13, 14 Eaa te tauianga ki to tatou aerenga manako e ta tatou ka rave ka anoanoia me apii tatou i te tuatua mou? Oronga mai i tetai akaraanga.

¹³ Au manako e te angaanga viivii. Me apii e me taangaanga tatou i te tuatua mou o te Pipiria, kia puareinga ua tatou i te akatano i to tatou aerenga manako e ta tatou ka rave. Tata te apotetoro ko Petero: “Mei te tamariki akarongo ra, auraka e akaarite ia kotou uaorai i te au inangaro taito i to kotou kamakura anga ra.” Tata katoa aia: “Kia tapu katoa kotou i ta kotou tuatua ravarai ra.” (1 Petero 1:14,15) I Korinetia i taito, e maata te tangata tei rave i te ainga tau kore. Kua anoanoia ratou kia rave i te au tauianga maata kia vai mā ratou i roto i te mata o Iehova. (1 Korinetia 6:9-11) Teia tuatau, e maata te tangata tei rave i te au tauianga te apii anga ratou i te tuatua mou. Tata a Petero: “To tatou oki manga tuatau i topa ake i to tatou ora anga nei, oti ra ua ïa i te rave anga i to te etene inangaro, ka rave ei oki i te peu kanga ra, te inangaro tika kore, te inu nui i te wina ra, te kapiti anga kanga ra, te akakonā kava ra, e te au ravenga viivii a te idolo ra.”—1 Petero 4:3.

¹⁴ E kai kava ua ana a Devynn raua ko Jasmine no tetai au mataiti. Noatu e tangata kite a Devynn i te akono i te au rekoti moni, kare e mou ana tana ngai angaanga no te kai kava oki. E vaine riri ua e te kino tikai a Jasmine. Tetai rā, kua kona aia, kua aravei atu aia e rua nga Kite mitinari i runga i te mataara. Kua pati mai raua iaia kia apii i te Pipiria. Inara te aere atu anga raua i tera mai epetoma, kua kona a Jasmine raua ko Devynn. Kare raua i irinaki ana e ka inangaro teia nga mitinari i te aere mai ki to raua kainga. Te oki akaou mai anga teia nga mitinari, kua tuke te turanga i teianei. Kua inangaro tikai a Jasmine raua ko Devynn i te apii i te tuatua mou o te Pipiria, e kua taangaanga viviki i ta raua i apii mai. I roto i te toru mārama, kua akamutu raua i te kai kava, e i muri mai kua akaipoipo raua. E maata te aronga i to raua oire tei kite i te tauianga i roto ia Jasmine e Devynn, e kua akamata ratou i te apii katoa i te Pipiria.

15. Eaa tetai tauianga ngata rava atu ka rave tatou no te tuatua mou, e no teea ra?

¹⁵ Au peu e te angaanga te ka akamareka kore i te Atua. Ko tetai tauianga ngata rava atu i te rave, koia oki ko te akamutu i te piri atu ki te au peu e te au angaanga te ka akamareka kore ia Iehova. Noatu kua apii tetai pae i to Iehova manako no runga i teia au apinga, te ngata nei rai ia ratou i te akamutu. Ka manata ratou eaa ta te kopu tangata, te au oa angaanga e te au taeake ka rave. Kua kite ratou e mou piri ana tetai pae i ta ratou au peu, mei te akangateitei anga i te au akaperepere tei takake. (Deuteronomi 14:1) No reira, eaa te ka tauturu ia tatou kia rave i te au tauianga ka anoanoia? Ka apii tatou i te au akaraanga meitaki o te au taeake i taito tei rave i te au tauianga te apii anga ratou i te tuatua mou, mei te au Kerititiano mua rai i Ephesia.

16. Eaa ta tetai pae i Ephesia i akaatinga?

¹⁶ I Ephesia i taito, e mea matau ua te angaanga purepure. Eaa ta te aronga purepure i rave te riro anga mai ratou ei Kerititiano? Akamārama mai te Pipiria: “E manganui oki te aronga peu tu ke i apai mai i ta ratou au buka, kua tutungi iora i te ai ki mua i te aroaro o te tangata ravarai: kua tatau iora i te moni i te oko i taua au buka ra, e kitea iora, e rima ngauru anga te tausani i te moni ario. I te maata oki i te tupu anga e te autu anga te tuatua a te Atu ra.” (Angaanga 19:19,20) Kua puareinga ua te au Kerititiano tiratiratu i te akaruke i ta ratou au puka oko maata, e kua akameitaki a Iehova ia ratou no te reira.

17. (a) Eaa te au apinga penei kua akaruke tatou kia rauka te tuatua mou? (e) Eaa te au uianga ka pauia i roto i te atikara ka aru mai?

¹⁷ Eaa taau i akaatinga kia rauka i te apii i te tuatua mou? Kua akaatinga tatou pouroa i to tatou taime. Tetai pae, kua akaruke i te au mea kia puapingaia i te pae moni. E penei kua taui to tatou au pirianga oa ki tetai ke. Kua akatano te maata anga i to ratou aerenga manako e ta ratou i rave, e kua kopae i te au peu e te au angaanga te ka akamareka kore ia Iehova. Inara kua papu meitaki ia tatou e e puapinga maata atu te tuatua mou o te Pipiria i tetai ua atu apinga ta tatou i akaruke. Kua tauturu te tuatua mou o te Pipiria ia tatou kia akatupu i tetai pirianga vaitata kia Iehova, ko teia te mea puapinga rava atu kia tatou. Me akamanako tatou i te au akameitakianga tei rauka mai, e mea ngatā tikai i te mārama eaa tetai tangata ka “oko” atu ei i te reira. Akapeea teia e tupu ei? Akapeea tatou me kopae i te rave i teia tarevake kino? Ka pauia teia au uianga i roto i te atikara ka aru mai.