“Kia Aere au i Taau ra Tuatua-Mou”

1-3. (a) Eaa to tatou manako no runga i te tuatua mou o te Pipiria? (Akara i te tutu mua.) (e) Eaa ta tatou ka uriuri i roto i teia atikara?

TEIA tuatau, e mea matau ua no te tangata i te oko i tetai apinga i roto i te toa e oti kua akaoki i te reira. E me oko te tangata i tetai apinga i runga i te initaneti, ka akaoki rai ratou i te reira. Penei kare ratou i mareka i ta ratou i oko mai me kore kua kino te reira. No reira kua iki ratou kia tauiia ki tetai apinga ke me kore kia akaoki mai i ta ratou moni.

² Kare rava tatou e rave i teia ki te tuatua mou o te Pipiria. Me “oko” tatou i te reira, kare rava tatou e inangaro i te “oko” akaou atu i te reira, koia oki, me apii tatou i te tuatua mou, kare rava tatou e inangaro i te akaruke i te reira. (E tatau ia Maseli 23:23; 1 Timoteo 2:4) Mei ta tatou i uriuri i te atikara i mua ake nei, ka akapou tatou i te taime no te apii i te tuatua mou. Pera katoa, penei kua akaatinga tatou i tetai angaanga kia rauka maata ta tatou moni. E penei kua taui to tatou au pirianga ki tetai ke, to tatou aerenga manako e ta tatou i rave, e kua akamutu i te rave i te au peu e te au angaanga ka akamareka kore ia Iehova. Papu tikai ia tatou e e puapinga atu te au akameitakianga tei rauka mai mei te tuatua mou i tetai au atu apinga ta tatou i akaruke.

³ Kua oronga mai a Iesu i te akatutuanga o te tangata oko tei kimi i te poe memeitaki ra. Te kiteaia anga tetai poe meitaki maata roa, kua oko atu aia i te au apinga katoa nana ra no te oko mai i te reira. Te akatutu maira teia poe i te tuatua mou o te Patireia o te Atua. I teia tu, kua akaari mai a Iesu i te puapinga tikai o te tuatua mou ki te aronga e kimi ra i te reira. (Mataio 13:45, 46) Te apii mua anga tatou i te tuatua mou o te Patireia o te Atua e te au tuatua mou akaperepereia i roto i te Pipiria, ka puareinga ua tatou i te akaatinga i tetai ua atu apinga kia rauka te reira. Me akaperepere ua rai tatou i te tuatua mou, kare rava tatou e akaruke i te reira. Inara te mea maromaroa, kare tetai au tavini o te Atua i akaperepere ua rai i te tuatua mou e kua akaruke ratou i te reira. Kare rava tatou e inangaro i te rave i teia! Ka rave ra tatou i ta te Pipiria e akakite maira, kia ‘aere ra [tatou] na te tuatua-mou.’ (E tatau ia 3 Ioane 2-4.) Koia oki, kia tuku tatou e ko te tuatua mou te mea mua i roto i to tatou oraanga. Eaa ra tetai tangata ka ‘oko akaou atu’ ei, me kore ka akaruke ei i te tuatua mou? Akapeea tatou me akapapu e kare rava tatou e rave i teia? Eaa te ka tauturu ia tatou kia ‘aere ua rai na te tuatua-mou’?

EAA TETAI PAE KA ‘OKO AKAOU ATU’ EI I TE TUATUA MOU?

4. Eaa ra tetai pae i to Iesu tuatau i akamutu ei i te aere ua rai i roto i te tuatua mou?

⁴ I to Iesu tuatau, ko tetai pae tei āriki ana i te tuatua mou, kua akaruke ratou i te reira. Ei akaraanga, i muri ake i to Iesu rave anga i tetai temeio e te angai anga i te urupu tangata, kua aru ratou iaia ki tetai tua mai o te Tai o Galilea. Inara kua poitirere ratou i ta Iesu i tuatua: “Kia kore kotou e kai i te kopapa o te Tamaiti a te tangata nei, e kia kore oki kotou e inu i tona toto, kare ïa e ora i roto ia kotou.” Kare oki ratou i pati ana kia Iesu kia akamārama i tana i tuatua, mari ra kua tuatua ratou e: “E tuatua rikarika teia, ka kitea ra iaai?” Tei tupu mai, kua “akaruke maira tetai papaki pipi ana i reira ra e manganui, kare maira i aru akaou iaia ra.”—Ioane 6:53-66.

5, 6. (a) Eaa ra tetai aronga i akaruke ei i te tuatua mou i teia tuatau? (e) Akapeea tetai tangata me aere ke mei te tuatua mou?

⁵ Te mea maromaroa, kua akaruke katoa tetai pae i teia tuatau i te tuatua mou. Eaa te tumu? Kua akaturoriia tetai pae e tetai akamārama anga ou o tetai irava Pipiria me kore i ta tetai taeake i tuatua me kore i rave. Kare tetai pae e reka ana me oronga tetai taeake i tetai akoanga mei te Pipiria, me kore e aka manamanata to ratou ki tetai i roto i te putuputuanga. E kua aru tetai pae i te apiianga pikikaa a te aronga tei akaruke i te tuatua mou e tei pikikaa no runga ia tatou. Ko tetai au tumu ua teia i akaruke akakoro ei tetai pae ia Iehova e te putuputuanga. (Ebera 3:12-14) E meitaki atu kia irinaki ratou ia Iesu, mei ia Petero rai! Te poitirere anga tetai pae i te au tuatua a Iesu, kua ui a Iesu ki tana au pipi me ka inangaro katoa ratou i te akaruke. Kua pau mai a Petero: “E te Atu, ka aere tika matou kiaai ra? tei ia koe te tuatua o te ora mutu kore ra.”—Ioane 6;67-69.

⁶ Tetai pae aronga, kua aere ke ratou mei te tuatua mou, penei kare ratou i kite e te tupu ra te reira. Kua aite tetai tangata tei akaruke marie i te tuatua mou ki tetai poti e panu marie atura. Te akakite maira te Pipiria e kia matakite tatou “ko te topa ua aea ia tatou a muri ake.” (Ebera 2:1) Tetai taime, me aere ke tetai tangata mei te tuatua mou, kare aia i rave akakoro i te reira. Inara kua akaparuparu aia i tona pirianga oa kia Iehova, e aere ua rai, kua ngere aia i te reira. Akapeea tatou me akapapu e kare teia e tupu kia tatou?

AKAPEEA ME AKAPAPU E KARE TATOU E OKO AKAOU ATU I TE TUATUA MOU?

7. Eaa te ka tauturu ia tatou kia kore rava e oko akaou atu i te tuatua mou?

⁷ Kia aere ua rai i roto i te tuatua mou, kia āriki e kia akarongo tatou ki te au tuatua pouroa a Iehova. Ka akariro tatou e ko te tuatua mou te mea puapinga rava atu i roto i te oraanga e ka aru tatou i te au kaveinga Pipiria. Roto i tana pure, kua taputou te Ariki ko Davida kia Iehova: “Kia aere au i taau ra tuatua-mou.” (Salamo 86:11) Kua tauta a Davida i te aere i roto i te tuatua mou, e kia pera rai tatou. Me kare tatou e pera, penei ka akamata tatou i te inangaro akaou i te au apinga tei akaruke tatou no te tuatua mou. Kare tatou e iki e ko teea te tuatua mou Pipiria ka āriki tatou e ko teea te ka kopae. Kia aere tatou i roto i te au “tuatua-mou katoatoa.” (Ioane 16:13) I te atikara i mua akenei, kua uriuri tatou e rima apinga ta tatou i akaatinga no te apii i te tuatua mou. I teianei ka akapapu tatou e kare rava tatou e oki akaou ki taua au apinga ra.—Mataio 6:19.

8. Eaa te ka akatupu i tetai Kerititiano kia aere ke mei te tuatua mou? Oronga mai i tetai akaraanga.

⁸ Taime. Kia akapapu e kare rava tatou e aere ke mei te tuatua mou, ka taangaanga meitaki tatou i to tatou taime. Me kare tatou e matakite, ka pou to tatou taime ki te au angaanga tarekareka, te akangaroi, te Initaneti, e te akarakara tivi. Noatu e kare teia au mea e kino roa ana, penei ka akapou tatou i te taime ta tatou i akanoo no te apii e te angaanga tutu aere. Kua tupu ana teia kia Emma.a (Akara i te tataanga rikiriki i raro.) Mei tona tamariki anga mai, e reka ana aia i te akaoro oroenua. Inara kua manata aia no te mea kua akapou maata roa aia i tona taime ki tana akaoro oroenua e kua taui i tana au mea puapinga. Kua kite katoa mai a Emma i tei tupu kia Cory Wells, tetai tuaine tei akaoro oroenua i mua ana.b (Akara i te tataanga rikiriki i raro.) Te akapou maata nei a Emma i tona taime i te tavini ia Iehova, ki tona kopu tangata e te au taeake e tavini katoa ra ia Iehova. Kua piri vaitata atu aia ki te Atua e te mataora nei aia i te taangaanga meitaki i tona taime.

9. Akapeea te au apinga materia te riro anga ei mea puapinga roa atu kia tatou?

⁹ Au apinga materia. Kia aere ua rai i roto i te tuatua mou, auraka tatou e akariro i te au mea materia e ko te mea puapinga roa atu. Te apii anga tatou i te tuatua mou, kua kite mai tatou e e puapinga atu te tavini anga ia Iehova i te au apinga materia, e kua akaruke tatou i te reira no te tuatua mou. Inara, penei ka kite atu tatou i tetai ke e oko ra i te au apinga electronic e tetai au apinga ou. E penei ka manako tatou e te ngere ra tatou. Penei kare tatou e mareka ana i ta tatou i rauka mai e ka akamou ki runga i te au apinga materia e kare i te tavini ia Iehova. Kua tupu ana teia kia Dema. “Kua anoano maata [aia] ki teianei ao” e kua akaruke aia i ta raua tuanga angaanga ko te apotetoro ko Paulo. (2 Timoteo 4:10) Penei e maata atu to Dema inangaro i te au apinga materia i tona inangaro i te tavini i te Atua. Me kore penei kare aia e inangaro akaou i te rave i te au akaatinga anga kia rauka i te tavini kapiti kia Paulo. Eaa te apiianga no tatou? Penei kua inangaro ana tatou i te au apinga materia i mua ana. Me kare tatou e matakite, ka tupu akaou mai tera inangaro e me pakari mai te reira, ka ngaro to tatou inangaro no te tuatua mou.

10. Eaa te akakeuanga ta tatou ka patoi atu?

¹⁰ Pirianga oa ki tetai ke. Kia aere ua rai i roto i te tuatua mou, auraka tatou e tuku i te aronga kare e tavini ana ia Iehova kia akakeu ia tatou. Te apii anga tatou i te tuatua mou, kua taui to tatou pirianga ki to tatou au taeake e te kopu tangata kare i te Au Kite. Penei kua āriki tetai pae i to tatou irinakianga ou, e penei kua patoi tetai pae. (1 Petero 4:4) E tika, ka tauta tatou i te noo ‘au ua ki to tatou kopu tangata e te akono ia ratou. Inara kare tatou e kopae i ta Iehova au turanga kia akamareka ia ratou. E mei ta tatou i kite mai ia 1 Korinetia 15:33, ko te aronga te inangaro ra ia Iehova te ka tau ei au oa mou tikai no tatou.

11. Akapeea tatou me kopae i te au manako e te au angaanga viivii?

¹¹ Au manako e te angaanga viivii. Kia aere i roto i te tuatua mou, ka anoanoia tatou kia vai tapu, me kore kia vai mā ua i roto i te mata o Iehova. (Isaia 35:8; e tatau ia 1 Petero 1:14-16.) Te apii anga tatou i te tuatua mou, kua rave tatou i te au taui anga e kua aru i te au kaveinga Pipiria. Kua rave tetai pae i te au taui anga maata tikai. Inara ka anoanoia rai tatou kia matakite kia kore rava to tatou oraanga e taui ki tetai oraanga tau kore. Eaa te ka tauturu ia tatou kia patoi i te au timataanga kia rave i te au mea tau kore? Akamanako ana i ta Iehova i oronga mai kia vai tapu ua tatou. Kua oronga mai aia i tana Tamaiti akaperepere kia mate no tatou! (1 Petero 1:18, 19) I te tauturu ia tatou kia vai mā ua i roto i te mata o Iehova, ka anoanoia tatou kia akamaara ua rai i te atinga oko maata o Iesu.

12, 13 (a) Eaa ra tatou ka akamanako ei i te au orote mei ia Iehova rai? (e) Eaa ta tatou ka uriuri i teianei?

¹² Au peu e te angaanga te ka akamareka kore i te Atua. Penei ka tauta te kopu tangata, au oa angaanga, e te au oa apii kia piri atu tatou ki ta ratou tamataora anga. Eaa te ka tauturu ia tatou kia kore e piri atu ki te au peu e te au orote te ka akamareka kore ia Iehova? Ka anoanoia tatou kia akamaara meitaki tikai i te au tumu kare a Iehova e āriki ana i teia au orote. Ka rave tatou i te au kimikimi anga i roto i ta tatou au puka kia akamaara ia tatou uaorai e i akapeea teia au orote te akamataanga mai. Me akamanako oonu tatou i te au tumu a te Pipiria kare tatou e akono i teia au orote, kua papu ia tatou e te aere nei tatou na te au tu e “mareka na te Atu.” (Ephesia 5:10) Me irinaki tatou ia Iehova e tana Tuatua, kare tatou e mataku i te manako o tetai ua atu tangata.—Maseli 29:25.

¹³ Ka inangaro tatou i te aere ua rai i roto i te tuatua mou e tuatau ua atu. Eaa te ka tauturu ia tatou kia tauta ua rai kia aere i roto i te tuatua mou? Ka rauka ia tatou i te rave e toru apinga.

TAUTA UA RAI I TE AERE I ROTO I TE TUATUA MOU

14. (a) Akapeea te apii putuputu anga i te Pipiria me tauturu ia tatou kia kore e akaruke i te tuatua mou? (e) Eaa ra tatou ka anoano ei i te pakari, te ako, e te kite?

¹⁴ Mea mua, e apii ua atu rai i te Pipiria e kia akamanako oonu i taau i apii mai. Akanoo i te taime no te rave putuputu i te reira. Ko te maata atu taau apii, ko te maata atu ïa toou inangaro i te tuatua mou e kare rava koe e akaruke i te reira. Akakite mai a Maseli 23:23 ia tatou kia “oko i te tuatua-mou” e kia oko katoa i “te pakari, e te ako, e te kite.” Kare e rava ua kia kite i te tuatua mou o te Pipiria. Ka anoanoia tatou kia taangaanga i te reira. Me rauka mai tetai mārama ou, ka akamaata te reira i ta tatou i kite mai. Ka akakeu te pakari ia tatou kia rave i ta tatou i kite. Tetai taime ka ako mai te tuatua mou ia tatou kia rave i te au taui anga ka anoanoia. Kia viviki tatou i te akarongo ki teia akoanga, ta te Pipria i karanga e e meitaki atu i te ario.—Maseli 8:10.

15. Akapeea te tuatua mou me paruru ia tatou mei te tatua rai?

¹⁵ Te rua, e taangaanga i te tuatua mou i roto i toou oraanga. Akaaite te Pipiria i te tuatua mou ki te tatua o tetai vaeau. (Ephesia 6:14) I te tuatau Pipiria, ka tauturu e ka paruru te tatua i tetai vaeau i te tuatau tamaki me tamou piriia te reira. Me kare te tatua e piri meitaki, kare te reira e tauturu iaia. Akapeea te tuatua mou me paruru ia tatou mei te tatua rai? Me mou piri tatou i te tuatua mou o te Pipiria i te au rā ravarai, ka paruru te reira ia tatou mei te au manako tarevake e ka tauturu ia tatou kia rave i te au ikianga meitaki. Me e manamanata kino to tatou me kore me timataia tatou kia rave i te tarevake, ka tauturu te tuatua mou o te Pipiria ia tatou kia rave i te meitaki. Mei te vaeau rai te ka kore rava e aere ki te tamaki me kare ona tatua, kare rava tatou e akaruke i te tuatua mou. Ka akapapu tatou i te taangaanga i te tuatua mou o te Pipiria i roto i to tatou oraanga. Ka apai katoa te vaeau i tana koke ki runga i tona tatua. Akara tatou akapeea me rave i te reira.

16. Akapeea te apii anga atu i te Pipiria ki tetai ke me tauturu ia tatou kia aere ua rai i roto i te tuatua mou?

¹⁶ Te toru, e apii putuputu atu i te tuatua mou o te Pipiria ki tetai ke. Akaaiteia te Pipiria ki tetai koke. Mei tetai vaeau rai tei mou piri i tana koke, ka anoanoia tatou kia mou piri i te Tuatua a te Atua. (Ephesia 6:17) Ka riro mai tatou pouroa ei au puapii meitaki, kia “tika oki i te tua i te tuatua-mou ra.” (2 Timoteo 2:15) Me apii tatou i te Pipiria ki tetai ke, ka maata atu to tatou kite e te inangaro no te tuatua mou. E ka maata atu to tatou inangaro i te aere ua rai i roto i te tuatua mou.

17. Eaa koe ka akaperepere ei i te tuatua mou?

¹⁷ E apinga aroa maata te tuatua mou mei ko mai ia Iehova. Ka tauturu te reira i te akavaitata atu ia tatou ki to tatou Metua i te rangi. Ko te mea akaperepere maata roa atu teia kia tatou. E maata ta Iehova i apii mai kia tatou, inara ko te akamataanga ua teia! Kua taputou mai aia i te apii ua rai ia tatou e tuatau ua atu. No reira e akaperepere i te tuatua mou mei tetai poe oko maata rai. E tauta ua rai i te “oko i te tuatua mou e auraka e oko akaouia atu” te reira. Mei ia Davida rai, ka akono rai koe i teia taputou kia Iehova: “Kia aere au i taau ra tuatua-mou.”—Salamo 86:11.