Eaa te Mate Maata?

Te pauanga a te Pipiria

Ka apai mai te mate maata i te au tumatetenga kino tikai ki te tangata. Kia tau ki te totou Pipiria, ka tupu te reira i te au “tuatau openga.” (2 Timoteo 3:1; Daniela 12:4) “E mate maata oki tei te reira tuatau, kare ïa i aite mei muatangana mai o te au mea katoa ta te Atua i anga, e tae rava akenei i teianei rā, e kare rai oki a muri ake.”​—Mareko 13:19; Daniela 12:1; Mataio 24:21, 22.

Au tupuanga i te tuatau o te mate maata

• Takoreia te au akonoanga pikikaa. Ma te tu poitirere e te viviki, ka takoreia atu te au akonoanga pikikaa. (Apokalupo 17:1, 5; 18:​9, 10, 21) Ka akakeu te Atua i te au mana tutara poritiki, koia te United Nations kia akatupu i tona akakoroanga.​—Apokalupo 17:​3, 15-​18.a

• Takinoia te akonoanga mou. Ko te au pupu enua i roto i ta Ezekiela orama, kapikiia e ko “Goga i te enua o Magoga,” ka tauta ratou i te tamate i te aronga e akamori ra ia Iehova. Inara, ka paruru te Atua i tona au tavini kia kore ratou e tamateia.​—Ezekiela 38:​1, 2, 9-​12, 18-​23.

• Akavaanga i te au tangata i te enua. Ka akava a Iesu i te au tangata ravarai e “nana e akataka[ke] ia ratou, mei te tiaki mamoe e akataka[ke] i te mamoe e te puaka-nio ra.” (Mataio 25:31-​33) Inara, ka akatumuia tana akavaanga ki te tu e turuturu ra tetai tangata me kore te patoi ra tetai i to Iesu au “taeake,” ko ratou oki ka tutara kapiti kiaia i te rangi.​—Mataio 25:34-​46.

• Akaputuputu i te au tutara Patireia. Ko te aronga tiratiratu tei ikiia kia tutara ma Karaiti, ka akaoti ratou i ta ratou tavini anga i te enua e ka akatuia ratou ki te rangi.​—Mataio 24:31; 1 Korinetia 15:50-​53; 1 Tesalonia 4:​15-​17.

• Aramagido. Ko “te tamaki i taua rā maata o te Atua mana katoatoa,” kua kapiki katoaia e ko te “rā o Iehova.” (Apokalupo 16:14, 16; Isaia 13:9; 2 Petero 3:​12) No reira, ko te aronga ta Iesu i akava tei rave i te ara kino, ka takore takiriia ratou. (Zephania 1:​18; 2 Tesalonia 1:​6-​10) Te ō maira te takore anga o te akatereanga poritiki i teia ao, te akatutuia ra i roto i te Pipiria ko te puaka taae e itu mimiti.​—Apokalupo 19:19-​21.

Au tupuanga i muri ake i te mate maata

• Tapekaia a Satani e te au temoni. Ka uri te angera maata ia Satani e te au temoni “ki raro i te vaarua takere kore,” e akairo mei te mea atura e kua mate ratou. (Apokalupo 20:​1-3) Kua akaaiteia te tu i tapekaia ai a Satani e tei roto aia i te vaarua takere kore, kare aia e rauka i te pikikaa atu i te tangata.​—Apokalupo 20:7.

• Akamata te Tauatini Mataiti. Ka akamata i reira te tutaraanga tauatini mataiti o te Patireia o te Atua e ka apai mai i te au akameitakianga ki te tangata. (Apokalupo 5:​9, 10; 20:4, 6) Ko te “aronga maata rava” atu kare e rauka kia tāreia, ka “aere mai [ratou] mei roto i te mate maata,” ka ora mai e ka kite ratou i te akamataanga o te Tauatini Mataiti i te enua nei.​—Apokalupo 7:​9, 14; Salamo 37:​9-​11.