I tona maata anga, kua akamata te Ariki ko Iosia i te akaou i te iero. I te tuatau o te angaanga, kua kitea mai “te buka ture a Iehova i te rima o Mose.” Te rongo anga i te tatau anga o te reira, kua akakeuia te ariki kia rave i tana i tatau. (2 Para. 34:​14, 19-21) Ka inangaro ainei koe i te tatau putuputu i te Pipiria? Me te tauta ra, te peea maira koe? Te akamanako ra ainei koe i te au irava te ka tauturu ia koe? E 39 o Iosia mataiti, kua rave aia i te tarevake e kua mate atura. Kua irinaki aia iaia uaorai e kare i pati i te arataki anga a Iehova. (2 Para. 35:​20-25) Teia te apiianga. Noatu to tatou mataiti e te roa i to tatou apiianga i te Pipiria, kia kimi ua rai tatou ia Iehova. Na te pure putuputu anga no tana arataki anga, te apii i tana Tuatua, e kia puapinga mei te akoanga a te au Kerititiano pakari. Kare i reira tatou e rave i te au tarevake maata e ka rekareka ua tatou.—Iako. 1:25. w23.09 12 ¶15-16

E maata te au vaine umere i roto i te Pipiria tei akaperepere e tei tavini ia Iehova. Kua akaari ratou i te au tu meitaki e te ‘tu maroiroi e te pikikaa kore i te au mea katoa.’ (1 Tim. 3:11) Pera katoa, ka kite te au tuaine mapu i te akaraanga meitaki no te au vaine tukatau i roto i te putuputuanga. E te au tuaine mapu, kua kite ainei kotou i tetai au tuaine tei riro ei akaraanga meitaki no kotou? Akara i to ratou tu manea e akapeea koe me akaari i te reira. Ko te tu akaaka tetai tu puapinga no te au Kerititiano tukatau. Me e tu akaaka to te vaine, ka mataora aia i tetai pirianga meitaki kia Iehova e tetai ke. Ei akaraanga, ka turuturu tetai vaine akaaka i te kaveinga no te taoonga upoko ta Iehova i akanoo. (1 Kori. 11:3) Ka aru aia i te reira i roto i te putuputuanga e te oraanga ngutuare. w23.12 18-19 ¶3-5

Inangaro a Iehova i te tane kia aroa i tana vaine e te akono iaia i te pae kopapa, te pae manako e te pae vaerua. Ka riro te tu akono, te akangateitei i te vaine, e te tu irinakiia ei tauturu ia koe kia riro mai ei tane meitaki. Me kua akaipoipo koe, penei ka riro mai koe ei metua tane. Eaa taau ka apii mei ia Iehova no runga i teia? (Ephe. 6:4) Kua akakite a Iehova ki tana Tamaiti ko Iesu e kua akaperepere e kua mareka rava Aia iaia. (Mata. 3:17) Me riro mai koe ei metua, e akakite putuputu ki taau tamariki e te akaperepere ra koe ia ratou. E akameitaki ia ratou no ta ratou angaanga meitaki i rave. Me aru te au metua i te akaraanga o Iehova, ka tauturu tera i ta ratou tamariki kia riro mai ei au Kerititiano tukatau. E akapapa ia koe i teianei kia riro mai ei metua meitaki na te aroa anga i toou ngutuare e te au taeake i roto i te putuputuanga e te akameitaki ia ratou e e akakite e te akaperepereia ra ratou.—Ioa. 15:9. w23.12 28-29 ¶17-18