Au Tuaine Mapu​—Kia Riro Mai ei Kerititiano Tukatau

1. Kia riro mai ei Kerititiano tukatau, eaa ta tatou ka rave?

KA UMERE tatou me tupu viviki tetai tamaiti ei tangata mapu. Inara kia tupu mai ei Kerititiano tukatau, ka anoanoia te angaanga pakari.b (1 Kori. 13:11; Ebe. 6:1) E rauka ai teia akakoroanga, ka anoanoia te pirianga vaitata kia Iehova. Ka anoano katoaia tona vaerua tapu kia tatanu i te au tu akono Atua, kia rauka te kite karape e te akapapa no te angaanga a te tuatau ki mua.—Mase. 1:5.

2. Eaa ta tatou ka apii i roto ia Genese 1:​27, e eaa ta tatou ka uriuri i roto i teia atikara?

² Kua anga a Iehova i te tangata ei tane e te vaine. (E tatau ia Genese 1:27.) Taka meitaki, e tuke to raua turanga pae kopapa e to raua tu. Kua anga a Iehova i te tane e te vaine kia rave i ta raua tuanga. No reira, ka anoanoia te au tu e te kite karape ei tauturu ia raua kia akono i ta raua apainga. (Gene. 2:18) I teia atikara, ka uriuri tatou akapeea tetai tuaine mapu me riro mai ei Kerititiano tukatau. E i te atikara ka aru mai, ka uriuri tatou i ta te au taeake mapu ka rave.

AKATUPU I TE AU TU TEI AKAMAREKA IA IEHOVA

3-4. Ka kite te au tuaine mapu i te akaraanga meitaki no te au vaine tukatau kiea? (Akara katoa i te tutu.)

³ E maata te au vaine umere i roto i te Pipiria tei akaperepere e tei tavini ia Iehova. (Akara i te atikara i runga i te jw.org “Au Vaine i Roto i te Pipiria—Eaa te au Apii Anga no Tatou?”) Kua akaari ratou i te au tu meitaki i roto i te tumu irava: “Ei tu maroiroi ra e te pikikaa kore i te au mea katoa.” Pera katoa, ka kite te au tuaine mapu i te akaraanga meitaki no te au vaine tukatau i roto i te putuputuanga.

⁴ E te au tuaine mapu, kua kite ainei kotou i tetai au tuaine tei riro ei akaraanga meitaki no kotou? Akara i to ratou tu manea e akapeea koe me akaari i te reira. I te au parakarapa ka aru mai, ka uriuri tatou e toru tu puapinga tei anoanoia e te au vaine tukatau.

5. Eaa i puapinga ai te tu akaaka no te au vaine Kerititiano?

⁵ Ko te tu akaaka tetai tu puapinga no te au Kerititiano tukatau. Me e tu akaaka to te vaine, ka mataora aia i tetai pirianga meitaki kia Iehova e tetai ke. (Iako. 4:6) Ei akaraanga, ka turuturu tetai vaine akaaka i te kaveinga no te taoonga upoko ta Iehova i akanoo. (1 Kori. 11:3) Ka aru aia i te reira i roto i te putuputuanga e te oraanga ngutuare.c

6. Eaa ta te au tuaine mapu ka apii mei te tu akaaka o Rebeka?

⁶ Akamanako i te akaraanga o Rebeka. E vaine kite aia e te ngakau toa tei rave i te mea tika i tona oraanga katoa. (Gene. 24:58; 27:​5-17) Noatu ra, kua kauraro aia ki te aratakianga. (Gene. 24:​17, 18, 65) Me akaari koe i te tu akaaka e me turuturu i ta Iehova akanoonooanga mei ia Rebeka, ka riro koe ei akaraanga meitaki no toou kopu tangata e te putuputuanga.

7. Akapeea te au tuaine mapu me aru i te tu tau o Esetera?

⁷ Ko te tu tau tetai tu ka anoanoia e te au Kerititiano tukatau. Karanga te Pipiria: “Tei te aronga akaaka ra te pakari.” (Mase. 11:2) E tavini tiratiratu a Esetera no te Atua tei akaari i te tu tau. Kua paruru te reira iaia mei te tu parau. Kua akarongo aia ki te ako a tetai o tona kopu tangata ko Moredekai. (Esete. 2:​10, 20, 22) Ka rauka katoa ia koe te tu tau me pati e me taangaanga koe i te ako.—Tito 2:​3-5.

8. Kia tau ia 1 Timoteo 2:​9, 10, akapeea te tu tau me tauturu i tetai tuaine kia iki meitaki i tona kakau e te akamanea anga?

⁸ Kua akaari katoa a Esetera i te tu tau na roto i tetai mataara ke. “E vaine manea i te tupu anga e te mata reka” tona, kare ra aia i akamou ana ki runga iaia uaorai. (Esete. 2:​7, 15) Akapeea tetai vaine Kerititiano me aru i te akaraanga o Esetera? Kua taikuia tetai ravenga ia 1 Timoteo 2:​9, 10. (E tatau.) Karanga a Paulo kia akamanea te au vaine ma te kakau tau, te akatietie kore e te akono meitaki. Ko te aiteanga o te tuatua Ereni, kia akangateitei te akamanea o tetai vaine i te tangata e kia akamanako ia ratou. Akaperepere matou ia kotou e te au tuaine no ta kotou akamanea anga tau!

9. Eaa ta tatou ka apii mai mei te akaraanga o Abigaila?

⁹ Ko te kite pakari tetai tu puapinga ka anoanoia e te au tuaine tukatau. Eaa te tu kite pakari? Ko te tu akono meitaki—te kite i te mea tika mei te tarevake e kia rave i te ikianga meitaki. Akamanako i te akaraanga o Abigaila. Kua rave tana tane i tetai ikianga kino tei riro ei tumatetenga no tona kopu tangata. Kua rave viviki a Abigaila i tetai angaanga. E kua riro tona tu akono meitaki ei akaora i tona kopu tangata. (1 Samu. 25:​14-23, 32-35) Ka tauturu katoa te tu kite pakari ia koe kia kite i te taime tau no te tuatua e te noo muteki ua. Ka tauturu katoa ia koe kia akaari i te inangaro e kia akamareka i tetai ke.—1 Tesa. 4:11.

APII I TE AU TU KITE KARAPE

10-11. Akapeea koe e tetai ke e puapingaia ai me tatau e te tata meitaki? (Akara katoa i te tutu.)

¹⁰ Ka anoanoia tetai tuaine kia apii i te au tu kite karape. Ka riro te reira ei tauturu iaia i roto i tona oraanga. Akamanako ana i teia au akaraanga.

¹¹ Apii i te tatau e te tata meitaki. I tetai au enua, kare i te mea puapinga no te vaine kia kite i te tatau e te tata meitaki. Inara e puapinga teia no te au Kerititiano pouroa.d (1 Timo. 4:13) No reira noatu te ngata, e tauta kia karape koe i te tatau e te tata. Eaa te puapinga ka rauka mai? Ka tauturu ia koe kia rauka te ngai angaanga. Ka riro mai koe ei puapii meitaki no te Tuatua a te Atua. E tei maata atu, ka akavaitata atu ia koe kia Iehova me tatau e me akamanako koe i tana Tuatua.—Iosu. 1:8; 1 Timo. 4:15

12. Akapeea a Maseli 31:26 me tauturu ia koe kia riro mai ei vaine karangaranga meitaki?

¹² Apii i te karangaranga meitaki. Ka anoanoia te au Kerititiano kia karangaranga meitaki. Ka tauturu maata te akoanga a Iakobo ia tatou. Karanga aia: “Kia rapurapu ua te tangata ravarai i te akarongo, kia tavarevare i te tuatua.” (Iako. 1:19) Me akarongo meitaki koe ki tetai ke e tuatua ra, te akaari ra koe i te tu tangi aroa e te “aroa taeake.” (1 Pete. 3:8) Me kare i papu ia koe eaa tana e tuatua ra e tana e manako ra, ui i te au uianga. E oti, akamanako meitaki i mua ake ka tuatua ai koe. (Mase. 15:​28, ftn.) E ui kia koe uaorai: ‘Ka riro ainei taku tuatua ei akamaroiroi iaia? Ka akaari ainei te reira i te tu akangateitei e te takinga meitaki?’ E apii mei te au tuaine tukatau tei karangaranga meitaki ki tetai ke. (E tatau ia Maseli 31:26.) E akarongo ki ta ratou ka tuatua e akapeea ratou me tuatua. Me karape koe i te karangaranga ki tetai ke, ka meitaki atu toou pirianga kia ratou.

13. Eaa tei anoanoia kia kite koe akapeea me akono i te ngutuare? (Akara katoa i te tutu.)

¹³ Apii i te akono i te ngutuare. I te au ngai ravarai, na te vaine e akono i te ngutuare. Penei na toou metua vaine me kore tetai vaine tukatau e tauturu ia koe kia rave i te reira. Karanga tetai tuaine ko Cindy: “Ko tetai mea puapinga taku i apii mei toku mami, koia oki kia rekareka i te angaanga pakari. Kua apii mai aia iaku i te tunu kai, te tamā, tui kakau e te oko i te apinga no te ngutuare. Kua tauturu teia tu kite karape iaku i roto i toku oraanga, e kua akamaata i taku angaanga na Iehova. Apii katoa toku mami iaku kia akaari i te aroa no tetai ke. Na roto i teia, kua aravei au i te au taeake e te au tuaine tei riro ei akaraanga meitaki noku.” (Mase. 31:​15, 21, 22) Me karape tetai vaine i te akono i tona ngutuare e te akaari i te aroa no tetai ke, ka mataora tona kopu tangata e te putuputuanga.—Mase. 31:​13, 17, 27; Anga. 16:15.

14. Eaa taau i kite mai mei te akaraanga o Crystal, e eaa taau akakoroanga ka akanoo?

¹⁴ Apii i te akono ia koe uaorai. E akakoroanga puapinga teia no te au Kerititiano pouroa. (Phili. 4:11) Karanga a Crystal: “Kua iki toku nga metua i taku apii ka rave i te apii tua rua. Kua akamaroiroi toku tati iaku kia rave i te apii no te tare moni. E āka tauturu teia noku.” Kapiti mai, e tauta kia apii i te akono e te akatere meitaki i taau moni. (Mase. 31:​16, 18) E akamou i te akakoroanga pae vaerua na te kopae anga i te kaiou e kia mareka ua koe i te oraanga māmā.—1 Timo. 6:8.

AKAPAPA NO TE TUATAU KI MUA

15-16. Akapeea te au tuaine tei kore i akaipoipo me tauturu i tetai ke? (Mare. 10:​29, 30)

¹⁵ Me tatanu koe i te au tu tei akamareka i te Atua, e te apii i te au tu kite karape, ka akapapa te reira ia koe no te tuatau ki mua. Akamanako ana i teia au akaraanga no taau ka rauka i te rave.

¹⁶ Iki koe kia kore e akaipoipo no tetai tuatau. Kia tau ki ta Iesu tuatua, kua iki tetai au vaine auraka kia akaipoipo, noatu ka aviriia ratou e tetai ke. (Mata. 19:​10-12) Penei ka iki tetai pae kia kore e akaipoipo no tetai au tumu ke. Kare a Iehova e Iesu e akavaavaa ana i te au Kerititiano kare i akaipoipo. Takapini i teia ao, e akaraanga meitaki te au tuaine kare i akaipoipo i roto i te putuputuanga. No to ratou aroa e te inangaro i tetai ke i akakeu ia ratou kia riro mai ei au tuaine pae vaerua e ei au metua vaine no te maata anga.—E tatau ia Mareko 10:​29, 30; 1 Timo. 5:2.

17. Akapeea tetai tuaine mapu me akapapa iaia no te angaanga tavini tamou?

¹⁷ Penei ka rave koe i te angaanga tavini tamou. Takapini i teianei ao, e tuanga maata ta te au vaine Kerititiano e rave nei i roto i te angaanga tutu aere. (Sala. 68:11) Ka rauka ainei ia koe i te rave i te angaanga tavini tamou? Penei ka iki koe i te tavini ei painia, te rave i te angaanga pātu, me kore te aere ki Betela. E pure no toou akakoroanga. E tuatua ki tetai ke tei rauka te reira akakoroanga, e e ui kia ratou eaa tei anoanoia no te rave i te reira. E oti e parani meitaki i taau ka rave. Me riro mai koe ei tavini tamou, e maata te au akameitaki anga ke atu taau ka rauka mai i roto i te angaanga a Iehova.

18. Eaa ta tetai tuaine ka matakite me iki aia i te akaipoipo tane? (Akara katoa i te tutu.)

¹⁸ Penei ka iki koe kia akaipoipo tane. Ka tauturu te au tu e te kite karape ta tatou i uriuri ia koe kia riro mai ei vaine meitaki. Inara, me te manako ra koe i te akaipoipo tane, e iki meitaki i toou tokorua. Ko teia tetai ikianga puapinga rava atu taau ka rave. E akamaara, ka riro taau tane akaipoipo ei upoko noou. (Roma. 7:2; Ephe. 5:​23, 33) No reira e ui kia koe: ‘E Kerititiano tukatau ainei aia? Te tuku ra ainei aia ia Iehova na mua i roto i tona oraanga? E rave ana aia i te au ikianga meitaki? Ka akakite ainei aia i tona au tarevake? E akangateitei ana aia i te vaine? Ka akono ainei aia iaku i te pae vaerua, te pae materia e te pae manako? E akono meitaki ana aia i tana au apainga? Ei akaraanga, eaa tana au apainga i roto i te putuputuanga e akapeea aia me rave i te reira?’ (Luka 16:10; 1 Timo. 5:8) Me inangaro koe i te akaipoipo i tetai tane meitaki, ka anoanoia koe kia riro ei vaine meitaki.

19. Eaa te vaine ka mataora ai me kapikiia aia ei “tauturu tau” no tana tane?

¹⁹ Karanga te Pipiria e “tauturu tau” te vaine no tana tane. (Gene. 2:18) Ka taakaaka ainei teia i te vaine? Kare! Mari ra, ka akangateitei te reira iaia. Te akataka ra te Pipiria e ko Iehova “te tauturu.” (Sala. 54:4; Ebe. 13:6) Ka tauturu tetai vaine i tana tane na te turuturu anga iaia. Ei akaraanga, me rave te tane i tetai ikianga ka tauturu tana vaine iaia kia akatupu i te reira. E no tona inangaro ia Iehova, ka tauturu aia i tetai ke kia kite i te au tu meitaki o tana tane. (Mase. 31:​11, 12; 1 Timo. 3:11) E akapapa ia koe kia riro mai ei vaine meitaki na te akamatutu anga i toou inangaro ia Iehova e te tauturu i toou kopu tangata e te putuputuanga.

20. Eaa te au tu meitaki ka anoanoia no tetai metua vaine?

²⁰ Penei ka riro mai koe ei metua vaine. Me akaipoipo korua, penei ka anau tamariki koe. (Sala. 127:3) No reira, e mea meitaki kia akapapa koe no teia apainga puapinga. Ka tauturu te au tu e te kite karape i roto i teia atikara ia koe kia riro mai ei vaine e ei metua meitaki. Me akaari koe i te aroa, te takinga meitaki e te akakoromaki, ka mataora toou oraanga ngutuare. Pera katoa, ka paruruia e ka akaperepereia taau tamariki.—Mase. 24:3.

21. Eaa to tatou manako no te au tuaine, e no teaa ra? (Akara i te kapi mua.)

²¹ Akaperepere matou ia kotou e te au tuaine no ta kotou angaanga i rave no Iehova e tona iti tangata. (Ebe. 6:10) Te angaanga pakari nei kotou i te tatanu i te au tu tei akamareka i te Atua, te apii i te kite karape te ka tauturu ia koe e tetai ke e te akapapa no te tuatau ki mua. Ae, te akaperepereia ra kotou e te akaaerenga a Iehova!