Akangateitei no te Vaine i Roto i te Akanoonooanga a te Atua

Ia Iesu i te enua nei, kua aru vaitata tikai aia i te tu e te aerenga o tona Metua i te rangi. Karanga aia: “Kare aku peu rave ua; ko ta taku Metua ra i apii mai iaku ra, ko taku ïa e tuatua nei . . . kare oki au i tukumoe i te rave i te mea e mareka mai ei aia.” (Ioane 8:​28, 29; Kolosa 1:​15) No reira me akamanako tatou i te tu i akono ei a Iesu i te vaine e tona manako ia ratou, ka mārama tatou i to te Atua manako no runga i te vaine e tana e tapapa ra ia ratou.

Kia tau ki te au Evangelia, kua akapapu te aronga kimi kite e e tuke takiri ta Iesu akono anga i te vaine ki tei mātauia i tera tuatau. Akapeea ra? E tei puapinga atu, te riro ra ainei tana apiianga ei akarangatira i te au vaine o teia tuatau?

Te Tu i Akono ei a Iesu i te Vaine

Kare a Iesu i manako ana i te vaine ei mea akanavenave. Kia tau ki te manako o tetai au arataki akonoanga ngati Iuda, me amiri ua ake tetai i te vaine, ka taki ua rai te reira ki te akainangaro. No te mataku e ka timataia ratou, kare te au vaine i akatikaia kia tuatua ki te tane i te ngai tangata e ka anoanoia ratou kia aao i te arai mata me aere ki vao. I tetai tua, kua ako a Iesu i te au tane kia akatere i to ratou au anoano pae kopapa e kia akangateitei i te vaine, eiaa kia kopae takiri atu ia ratou i te ngai tangata.​—Mataio 5:​28.

Karanga katoa a Iesu: “Ko te kopae atu i tana vaine, ka akaipoipo ei i tetai, kua akaturi aia iaia.” (Mareko 10:​11, 12) Kare a Iesu i aru ana i te akonoanga a te au rabi tei oronga i te tika ki te au tane kia kopae i ta ratou vaine “i te au apa katoa nei.” (Mataio 19:​3, 9) Ki te ngati Iuda, e mea manako koreia e ka akaturi te tane i tana vaine. Kua apii ta ratou rabi e kare e rauka i te tane i te akaturi​—ko te vaine anake ua ka akaturi i tana tane! Mei ta tetai tataanga Pipiria i karanga, “Te tuku anga a Iesu i te apainga aiteite ki runga i te tane e te vaine no te rave i te tika, kua tāki aia i te turanga e te akangateitei no te vaine.”

Te puapinga o tana apiianga i teia tuatau: I roto i te putuputuanga Kerititiano a te Au Kite o Iehova, ka kapiti maoraora ua te vaine e te tane i ko i te au uipaanga. Inara, kare te au vaine e mataku e ka akaraia ratou ma te tau kore me kore ka akameamea mai tetai kia ratou, no te mea ka matakite te au tane Kerititiano kia akono i “te au vaine pakari ra, mei te metua vaine, e te au vaine ou ra, ei tuaine ïa, ma te akono meitaki.”​—1 Timoteo 5:2.

Apii a Iesu i te vaine. E tuke to Iesu tu ki te au rabi tei manako e e kite kore ua te vaine. Kua apii a Iesu ia ratou e kua akamaroiroi ia ratou kia akakite i to ratou manako. Te akapapu anga a Iesu eiaa a Maria e ngere i te mataora no te akarongo ki tana apiianga, akaari mai aia e kare i te angaanga ua na te vaine ei tamā ngutuare e te tunu kai. (Luka 10:​38-​42) Kua puapinga katoa te tuakana o Maria ko Mareta mei ta Iesu au apiianga, tei akaariia mai e tana au pauanga meitaki kia Iesu i muri ake i te mate anga a Lazaro.​—Ioane 11:​21-​27.

E puapinga te manako o te vaine kia Iesu. I tera tuatau, kua irinaki te maataanga o te au vaine ngati Iuda e ka mataora ratou me anau i tetai tamaiti rongonui, tetai tamaiti tikai te ka riro mai ei peroveta. I tetai atianga, kua kapiki tetai vaine: “E ao to te kopu i apai ia koe.” Kua taangaanga a Iesu i te reira atianga ei akakite i tetai mea meitaki atu ki taua vaine ra. (Luka 11:​27, 28) Te karanga anga a Iesu e e puapinga atu te akarongo ki te Atua, kua akaari aia i tetai mea ke te ka apai mai i te mataora maata ki te vaine, kare ko te anau tamariki ua.​—Ioane 8:​32.

Te puapinga o tana apiianga i teia tuatau: Ka inangaro te au puapii i roto i te putuputuanga Kerititiano i te akarongo ki te paupau anga a te au vaine i ko i te au uipaanga a te putuputuanga. Akangateitei ratou i te au vaine pakari no te riro anga “ei aronga apii atura i te tuatua memeitaki” i roto i to ratou ngutuare e na roto i to ratou akaraanga. (Tito 2:3) Ka irinaki katoa ratou ki te au vaine no te akakitekite aere i te nuti meitaki o te Patireia o te Atua.​—Salamo 68:11; akara i te pia “Kua Ture Ainei te Apotetoro ko Paulo i te Vaine e Auraka Kia Tuatua?”

Akaperepere a Iesu i te vaine. I te tuatau Pipiria, e puapinga ake te tamariki tamaroa i te tamariki tamaine. Te akaata ra te au tataanga ngati Iuda i teia irinakianga i te na ko anga: “E ao to te tangata e tamariki tamaroa tana, e ae oki tona e tamariki tamaine tana.” Kua manako tetai au metua e e apainga teiaa te utuutu i te tamaine​—ka anoanoia raua kia kimi i tetai tokorua nona e te oronga i te tutaki akaipoipo, e kare e rauka i te irinaki iaia kia tiaki ia raua me ruaine.

Akaari mai a Iesu e puapinga katoa te oraanga o te tamaine mei to te tamaiti rai​—kua akatuakaou aia i te tamaine a Iairo, e pera katoa te tamaiti a te vaine takaua i Naina. (Mareko 5:​35, 41, 42; Luka 7:​11-​15) Te rapakau anga aia i tetai vaine tei mamae no “tetai vaerua maki, e okotai ngauru ma varu akera mataiti,” kapiki a Iesu iaia e “uanga no Aberahama,” e tuatua kare e taangaangaia ana no te vaine i roto i te au tataanga ngati Iuda. (Luka 13:​10-​16) Na roto i teia tuatua akangateitei e te takinga meitaki, kua akariro a Iesu i teia vaine ei mema puapinga no te iti tangata e kua āriki katoa i tona akarongo maata.​—Luka 19:9; Galatia 3:7.

Te puapinga o tana apiianga i teia tuatau: Te karanga ra tetai tuatua i Asia: “Mei te pîpî anga i te tiare a tetai ke, koia rai te utuutu anga i te tamaine.” Kare te au metua tane Kerititiano e āriki i teia aerenga manako mari ra ka akono meitaki e ka akaperepere i ta ratou tamariki pouroa, te tamariki tamaroa e te tamaine. Akapapu te au metua Kerititiano kia apii meitakiia ta ratou tamariki e kia meitaki ua to ratou oraanga kopapa.

Irinaki a Iesu i te vaine. I roto i te au akavaanga ngati Iuda, e aiteite ua te tuatua kite a te vaine ki to te tuikaa rai. Karanga te tata tuatua enua o te anere mataiti mua ko Josephus: “Auraka e akatikaia tetai akapapuanga mei te vaine, no te tu papu kore e te viviki ua ia ratou kia akakite i to ratou manako.”

Kareka a Iesu, kua iki aia e na te vaine e akakite i tona tuakaouanga. (Mataio 28:​1, 8-​10) Noatu kua kite mata teia au vaine tiratiratu i te tamate anga e te tanumanga a to ratou Atu, e ngata rai i te au apotetoro i te irinaki i ta ratou tuatua. (Mataio 27:55, 56, 61; Luka 24:​10, 11) Inara na te mama anga na mua ki te au vaine, kua akaari a Iesu tei akatuia mai e ka tau te au vaine kia akakitekite aere i te tuatua mou, mei tana au pipi ke rai.​—Angaanga 1:​8, 14.

Te puapinga o tana apiianga i teia tuatau: I roto i te putuputuanga a te Au Kite o Iehova, ka akamanako meitaki te au tane e apainga ta ratou i te manako o te au vaine. Pera katoa te au tane akaipoipo Kerititiano, ka akapapu ratou i “te akangateitei anga i te vaine” na te akarongo meitaki ki ta ratou vaine.​—1 Petero 3:7; Genese 21:12.

Ka Tauturu te au Kaveinga Pipiria i te Vaine Kia Mataora

Me aru te au tane ia Karaiti, ka rauka i te vaine te tu ngateitei e te rangatira ta te Atua i akakoro no ratou. (Genese 1:​27, 28) Kare te au tane Kerititiano e manako e e meitaki atu ratou i te vaine, mari ra ka aru ratou i te au kaveinga Pipiria te ka tauturu i to ratou au tokorua kia mataora.​—Ephesia 5:​28, 29.

Te akamata anga a Yelena i te apii i te Pipiria, te takinokinoia ra aia e tana tane. Kua utuutuia tana tane i tetai ngai kino, e mea mātau te apai i te vaine ka inangaro aia i te akaipoipo e pera te takinokino i te vaine. Karanga a Yelena: “Kua oronga mai taku apii Pipiria i te maroiroi noku. Kua mārama au e te vai ra tetai tei akaperepere maata iaku e te akono meitaki ra iaku. Kua mārama katoa au e me apii taku tane i te Pipiria, ka taui tona tu kiaku.” I muri mai kua tupu tona inangaro te āriki anga tana tane kia apii i te Pipiria e kua papetitoia ei Kite no Iehova. Karanga a Yelena: “Kua riro mai aia ei akaraanga no te tu akono meitaki e te akatere iaia uaorai. Kua apii maua kia akakore ua i te ara a tetai e tetai.” Eaa tana i kite mai? “Kua tauturu tikai te au kaveinga Pipiria iaku kia inangaroia e kia paruruia i roto i toku oraanga akaipoipo.”​—Kolosa 3:​13, 18, 19.

Kare ko Yelena ua tei kite i teia tupuanga. E mirioni ua atu au vaine Kerititiano te mataora nei no te mea te tauta kapiti ra te vaine e te tane i te taangaanga i te au kaveinga Pipiria i roto i to ratou oraanga akaipoipo. Ka kite katoa ratou i te akangateitei, te pumaana e te tu rangatira no te kapiti anga ki te au taeake Kerititiano.​—Ioane 13:34, 35.

Kua kite te au tane e te vaine Kerititiano e aronga ara e te apa ua ratou e ko ratou tetai tuanga o te au mea angaia a te Atua tei “akariroia . . . ei puapinga kore ua.” Inara, na te akavaitata atu anga ki to ratou Atua e te Metua aroa ko Iehova, e manakonakoanga to ratou “kia akaora katoaia . . . i te tapeka o te mate” e “kia rauka te rangatira meitaki o te tamariki a te Atua.” E manakonakoanga manea teia no te au tane e te vaine i roto i te akanoonooanga a te Atua!​—Roma 8:​20, 21.