Ripoti a te Aronga Tutu Patireia

Kiteaia e Ia Tetai Akakoro Anga i te Oraanga

TE KARANGA ra a Iesu e kua kite aia i tana mamoe. (Ioane 10:14) Me e ngakau meitaki to tetai tangata e e aroa tona no te tu au e te tu tika, ka akakeuia aia ki te au pipi a Iesu. Ka kite teia tu tangata i tetai akakoro anga i te oraanga, mei tetai vaine rai i Peretiumu. Teia tana tua:

“I te topapa anga mai te Au Kite o Iehova i toku ngutupa, te taitaia tikai ra au e te manako ra i te akaope atu i toku oraanga. Kua reka au i ta te Au Kite i tuatua no runga i te pau anga ki te au manamanata o teianei ao maki inara kare i reka ana i te manako e kua o mai te Atua ki roto i te reira. Kua akamutu au i te aere ki te pure e varu mataiti i topa, no te mea kua makitakita au i te tu pikikaa taku i kite i reira. Ma te Au Kite, kua kite au i te tuatua mou i roto i ta ratou i karanga e kua kite mai e e aka angaanga rai i te noo ua ma te kore te Atua.

“Ma te mataora kore, i muri ake i tetai au atoro anga, kua ngaro te aravei anga ma te Au Kite ra. Kua kinokino tikai au. Kua puipui au e rua paoke avaava i te ra okotai e kua akamata i te kai apinga akakona. Te inangaroanga i te komunikeiti ki toku papa ruau tei mate ra, kua piri au i te kanga atu ki te au mea purepure. Mei teaa atura toku mataku me kite au i te au temoni i te kaitamaki anga mai iaku me noo au ko au anake ua i te po! E roa te au marama i tupu ei teia. I te au aiai takitai kua mataku au i te manako o te noo ua anga ko au anake ua.

“I reira, i tetai ra kua aaere au, te aruanga i tetai mataara ke mei taku i matau ra, e kua tae mai au ki tetai ngai akatuanga maatamaata. I toku poitirere kua kite au i tetai urupu i reira. Te tapiri anga atu ki te pae, kua kite au e ko te Au Kite o Iehova te akatu ra i tetai Are Uipaanga Patireia. Kua maara iaku te au atoro anga a te Au Kite tei atoro mai i toku kainga, e kua manako au e mei teaa atura te vavaria me ka rauka i te ao katoa i te noo ua mei teia au tangata rai.

“Kua anoano tikai au kia oki akaou mai te Au Kite ki toku kainga, no reira kua tuatua atu au ki etai o te aronga e angaanga ra i runga i te are uipaanga. Kua pure au ki te Atua, e tai ngauru ra i muri mai kua tae mai te tangata tei aravei mua mai iaku ki toku ngutupa. Kua tamanako aia e kia rave ua atu maua i te apii Puka Tapu, e kua akatika au ma te rekareka. I te reira taime rai kua pati mai aia kia aere au ki te au uipaanga i ko i te Are Uipaanga Patireia. Kua ariki au. Kare rava au i kite ana i tetai akara anga mei teia te tu! Kua kimi ana au i te au tangata tei aroa ra i tetai e tetai e te mataora no tetai tuatau roa. E ina teia ratou!

“I muri mai kua aere au ki te au uipaanga katoatoa. I muri ake i te toru epetoma, kua akamutu au i te tu kino o te puipui avaava. Kua pei au i taku au puka akarakara etu e taku au rekoti ma te au imene satani, e kua rauka iaku i te kite e te ngaro atura ta te au temoni mou ki runga iaku. Kua tuku au i toku oraanga kia aru i tau ki te au turanga Puka Tapu a Iehova, e i muri ake i te toru marama kua akamata au i te tutu aere i te tuatua meitaki. I muri ake i te ono marama kua papetitoia au. E rua ra i muri ake i toku papetito anga, kua akamata au i te painia tauturu.

“Te akameitaki nei au ia Iehova no te au mea meitaki tana i rave noku. E akakoro anga ta toku oraanga i teianei. Ae, kua riro to Iehova ingoa ei punanga ketaketa koia oki kua kitea e au te akapuanga e te paruru anga. (Maseli 18:10) Te kite tikai nei au mei te tata taramo rai i tona tata anga ia Salamo 84:10: ‘E meitaki maata to te rā okotai i roto i te au paepae noou ra, i to te au rā e tausani ua atu. E anoano maata toku i te tiaki i te ngutupa i te are o taku Atua, i te noo i te au puakapa o te aronga kino ra.’”

Kua kiteaia e teia vaine ngakau akaaka tetai akakoro anga i te oraanga. No reira ka rauka rai i tetai ua atu tei kimi ra ia Iehova ma te ngakau meitaki.