Apii i Taau Tamariki no te Pirianga Āinga

TE MANAMANATA

I mua ana, te maata anga o te taime ko te nga metua te ka na mua i te komakoma ki ta raua tamaiti me kore tamaine no runga i te pirianga āinga. I te tuatau ka aereia, ka akamaata atu raua i ta raua akamārama anga i te pirianga āinga kia tau ki te mataiti e te mārama o ta raua tama.

Inara kua taui te reira. Akakite te puka The Lolita Effect: “I teia tuatau te kite nei te au tamariki rikiriki i te au karere no te āinga, e te maata atura te au akakiteanga no te āinga i roto i te au teata a te tamariki.” Ka tauturu ainei teia i taau tamariki, me ka takino ia ratou?

TAAU KA ANOANOIA KIA KITE

Tei te au ngai pouroa te āinga. I roto i tana puka Talk to Me First, akakite a Deborah Roffman e i roto i te au “pukapukaanga, tuatua akakite, teata, puka, imene, porokaramu tivi, tuku karere, vitio kangakanga, papa akakitekite, tereponi apaipai e te komupiuta, ka kitea te au akaariari anga tutu, tataanga e te tuatua no te āinga, e ka akamata te [au mapu, tamariki e te tamariki rikiriki] i te manako e ko te pirianga āinga . . . te mea puapinga roa atu.”

Akaapaia te aronga okooko. Ka okooko te au toa e te aronga akakitekite i te au tu kakau akameamea no te tamariki. Ka tereni teia i te tamariki mei to ratou rikiriki anga mai kia akariro i tona akamanea e tona tu akaraanga ei mea puapinga. Karanga te puka So Sexy So Soon, “Kite meitaki te aronga okooko i te tu paruparu o te tamariki rikiriki, e ka taangaanga pu tikai i te reira. Kare te akakoroanga o teia au tutu e te kakau akameamea ei akakeu i te tamariki kia rave i te pirianga āinga” mari ra “kia okooko i te reira.”

Kare e rava te kite. E tuke te kite akapeea tetai motoka me tere e akapeea me riro ei tangata mako i te akaoro. Mei te reira katoa, e tuke tetai i te kite no runga i te pirianga āinga e te taangaanga i teia kite no te rave i te au ikianga meitaki.

Te tika openga: I teia tuatau tikai, ka anoanoia koe kia apii i taau tamariki e “kite ei to ratou ngakau i te meitaki e te kino.”​—Ebera 5:14.

TAAU KA RAVE

Komakoma ki taau tamariki. Noatu e kare i te mea māmā i te komakoma ki taau tamariki no runga i te pirianga āinga, naau teia apainga. Āriki i te reira.​—Kaveinga Pipiria: Maseli 22:6.

Iki i te au atianga meitaki. Eiaa e rave e tai akoanga roa, mari ra taangaanga i te au atianga meitaki no te karangaranga ki taau tamaiti, penei ia korua i roto i te motoka me kore ia korua e angaanga kapiti ra i te kainga. Ei tauturu i taau tamaiti kia tuatua, ui i tona manako. Ei akaraanga, eiaa e ui, “E reka ana koe i tera tutu?” mari ra, penei ka ui koe, “Eaa te aronga okooko i taangaanga ai i teia au tutu no te akaariari i ta ratou e oko ra?” Me oti taau tamaiti i te pau mai, penei ka ui koe, “Eaa toou manako i te reira?”​—Kaveinga Pipiria: ­Deuteronomi 6:6, 7.

Kia tau taau apii ki to ratou mataiti. Mea meitaki kia apii i te tamariki rikiriki i te ingoa o te mero āinga, e akapeea me paruru ia ratou uaorai mei te aronga kino tei piri āinga atu ki te tamariki. Muri mai, apii i te tamariki no runga i te ravenga anau tamariki. Me mapu ake ratou, tauturu ia ratou kia mārama meitaki no runga i te pirianga āinga e te meitaki e te kino te ka tupu no te reira.

Apii i te au kaveinga meitaki. Apii i taau tamaiti​—mei tona rikiriki anga mai—​kia rave i te mea tika, kia tiratiratu e kia akangateitei i tetai ke. Me rave koe i te reira, ka akamou koe i tetai tango meitaki no te uriuri i te āinga. Pera katoa, e akakite i te kaveinga e aru ana koe. Ei akaraanga, me irinaki koe e mea tarevake te pirianga āinga i mua ake i te akaipoipo, akakite i toou manako kiaia. Akamārama i te tumu i tarevake ei e i kino ei te reira. Karanga te puka Beyond the Big Talk: “Te au mapu tei karanga e kare to ratou nga metua e āriki ana kia rave te au mapu i te pirianga āinga, kare katoa ratou e rave i te pirianga āinga.”

Akanoo i te akaraanga meitaki. Akono i te au kaveinga taau e apii ra. Ei akaraanga, e kata ana koe i te au tuatua kangakanga viivii? mea akaariari ainei toou akamanea? te kapiti tau kore ra koe ki tetai tane me kore vaine? Ka riro teia au mea ei akakore i te au kaveinga taau e tauta ra i te apii ki taau tamariki.​—Kaveinga Pipiria: Roma 2:​21.

Ei tuatua meitaki taau. E apinga aroa te pirianga āinga no ko mai i te Atua, e me akono i tana ture no te āinga​—i roto i te akaipoipo​—ka apai mai te reira i te rekareka maata. (Maseli 5:​18, 19) Akakite ki taau tamaiti e ka mataora aia i teia apinga aroa a tetai tuatau ki mua, e kare aia e mamae ngakau e ka apiapi mei tei tupu ana ki te aronga tei rave i te pirianga āinga i mua ake ka akaipoipo ei.​—1 Timoteo 1:​18, 19.