Apiianga Mei ta Petero Nga Reta

1. I mua ua ake ka mate ei te apotetoro ko Petero, eaa tana i akauruia kia rave?

KUA kite te apotetoro ko Petero kare e roa ka mate aia. I te tuatau i tona tavini anga tiratiratu, kua aaere aia ma Iesu, kua akamata i te au ngai tutu aere, e kua tavini ei mema no te pupu akaaere. Inara kare tana tavini anga i oti ake. Mei te 62-64 T.N., kua akauruia aia kia tata e rua reta—te puka Pipiria 1 e te 2 Petero. Kua manakonako atu aia e ka tauturu teia nga reta i te au Kerititiano i muri ake i tona mate anga.—2 Pete. 1:​12-15.

2. Eaa ta Petero nga reta i tau meitaki ei?

² Kua tata a Petero i tana nga reta i te tuatau i rokoia ai tona au taeake irinaki e “te au timataanga tu ke ke.” (1 Pete. 1:6) Te akatotoa ra te aronga kino i te au apiianga pikikaa e te au peu viivii i roto i te putuputuanga. (2 Pete. 2:​1, 2, 14) Kare e roa ka tupu ki te au Kerititiano i Ierusalema “te openga o te au mea ravarai nei”—ka takore te au vaeau Roma i teia oire e te akatereanga ngati Iuda. (1 Pete. 4:7) Kare e ekoko kua tauturu ta Petero nga reta i te au Kerititiano kia akakoromaki i te au manamanata e kia akapapa no te tuatau ki mua.b

3. Eaa tatou ka akara matatio ei i ta Petero nga reta akauruia?

³ Noatu kua tata a Petero i tana nga reta ki te au Kerititiano o te anere mataiti mua, kua tuku a Iehova i teia ki roto i Tana Tuatua. Kua puapingaia tatou i teia ra. (Roma 15:4) Te noo nei tatou ki roto i tetai ao ma te au peu viivii, e ka tupu te manamanata e ka ngata i te tavini ia Iehova. Kare e roa atu ana ka maata atu te kino mei tei tupu i te openga o te akatereanga ngati Iuda. E au akamaaraanga tetai i roto i ta Petero nga reta. Ka tauturu teia ia tatou kia tapapa atu i to Iehova ra, te autu i te mataku tangata, e te akaperepere i tetai e tetai. Ka tauturu katoa teia au akamaara anga i te aronga pakari kia akono meitaki i te mamoe.

E TAPAPA UA ATU

4. Ia 2 Petero 3:​3, 4, eaa te ka akaparuparu i to tatou akarongo?

⁴ Kua koropiniia tatou e te tangata kare e irinaki i te totou Pipiria. Penei ka aviri te aronga patoi ia tatou no te mea kua tapapa ua rai tatou i te openga no tetai tuatau roa. Karanga te aronga akaapa e kare rava te reira e tupu. (E tatau ia 2 Petero 3:​3, 4.) Me rongo tatou i teia mei te pu ngutuare, te oa angaanga, e te pamiri, ka paruparu to tatou akarongo. Kua akakite mai a Petero i te tauturu no tatou.

5. Eaa te ka tauturu ia tatou kia akamanako meitaki i te openga o teia akatereanga? (2 Petero 3:​8, 9)

⁵ Penei ka manako tetai pae e taroaroa a Iehova te takore i teia akatereanga kino. Ka tauturu ta Petero au tuatua ia tatou, ma te akamaara ia tatou e e tuke to Iehova manako o te tuatau ki ta te tangata. (E tatau ia 2 Petero 3:​8, 9.) Kia Iehova okotai ra kiaia te tauatini mataiti. E tu akakoromaki to Iehova, kare aia e inangaro i tetai ua atu kia takoreia. Me tae mai tona ra, ka takoreia teia akatereanga. Mei teaa atura te akameitakianga kia vaio i te taime e toe nei kia tutu aere ki te tangata katoatoa.

6. Akapeea tatou me ‘tatari e kia rapurapu’ i to Iehova ra? (2 Petero 3:​11, 12)

⁶ Te raurau nei a Petero ia tatou kia ‘tatari e kia rapurapu’ i to Iehova ra. (E tatau ia 2 Petero 3:​11, 12.) Akapeea? E akamanako oonu tatou—i te au ra, e tikai—no te au akameitakianga o te ao ou. E akamanako ia koe e akaea ra i te reva ma, te kai i te au kai matutu, te turou mai i te au akaperepere e akatuia maira, e te apii i te tangata mei te anere ua atu mataiti no te tupuanga o te au totou Pipiria. Ka tauturu teia ia koe kia tapapa ua atu e te paruru ia koe kia kore e akavareia. Me “kite” tatou i to tatou oraanga ki mua, “kore [i reira tatou] e riro i te pikikaa.”—2 Pete. 3:17.

KIA AUTU I TE MATAKU TANGATA

7. Akapeea te mataku tangata me akakeu ia tatou?

⁷ Me ‘tatari tatou e kia rapurapu’ i to Iehova ra, ka tutu aere tatou i te nuti meitaki ki te katoatoa. I tetai au taime ka tapupu tatou i te reira. Eaa te tumu? Penei kua mataku tatou i te tangata. Kua tupu te reira kia Petero. I te po i to Iesu timata anga, kare a Petero i akakite ana e pipi aia na Iesu e kua pikikaa maata iaia. (Mata. 26:​69-75) Inara, ma te papu i muri mai karanga teia apotetoro: “Auraka e mataku i ta ratou i akamataku mai, auraka oki e tumatetenga.” (1 Pete. 3:14) Te akapapu maira ta Petero tuatua e ka autu tatou i te mataku tangata.

8. Eaa te ka tauturu ia tatou kia autu i te mataku tangata? (1 Petero 3:15)

⁸ Eaa te ka tauturu ia tatou kia autu i te mataku tangata? Karanga a Petero: “Ka akatapu i te Karaiti ei Atu i roto i to kotou ngakau.” (E tatau ia 1 Petero 3:​15, NW.) Pera te akamanako oonu i te taoonga e te mana o to tatou Atu e te Ariki, ko Iesu Karaiti. Me te ru ra koe me kore mataku i te tutu aere ki tetai ua atu, e akamaara i to tatou Ariki. E akamanako iaia e tutara ra i te rangi tei koropiniia e te au angera. E akamaara e “mana katoa [tona] o to te rangi e te ao katoa nei” e te “vaitata ua ra [aia] ia kotou, e tae ua atu ki te openga o teianei ao.” (Mata. 28:​18-20) Te raurau maira a Petero ia tatou “kia tika ua rai” te paruru i to tatou akarongo. Ka inangaro ainei koe te tutu aere i te angaanga, te apii, e i tetai ua atu ngai? Akamanako i mua ake ana me ka rave koe i te reira, e oti e akapapa i taau ka tuatua. E pure no te tu ngakau toa, ma te irinaki e ka tauturu a Iehova ia koe kia autu i te mataku tangata.—Anga. 4:29.

‘KIA MAATA TE AROA’

9. I tetai atianga, akapeea to Petero aroa i paruparu ei? (Akara katoa i te tutu.)

⁹ Kua kite a Petero akapeea me akaari i te aroa. Tei reira aia te na ko anga a Iesu: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai.” (Ioa. 13:34) Noatu rai, kua mataku a Petero e kare i inangaro i te kai manga ki te au taeake e te au tuaine o te au Enua Ke. Kua kapiki te apotetoro ko Paulo i ta Petero i rave e e “tapikipiki,” me kore e tu pikikaa. (Gala. 2:​11-14) Kua ariki a Petero i ta Paulo akatikatika anga e kua apii i te reira. I roto i tana nga reta, kua akakite aia e kia kite tatou i te aroa e kia akaari katoa i te aroa no te au taeake e te au tuaine.

10. Eaa te akatupu ana i “te aroa taeake pikikaa kore”? Akamarama mai. (1 Petero 1:22)

¹⁰ Karanga a Petero kia rauka “te aroa taeake pikikaa kore” no te au taeake irinaki. (E tatau ia 1 Petero 1:22.) No roto mai teia aroa i “te akarongo anga i te tuatua-mou.” Te kapiti maira teia tuatua mou te apiianga “kare te Atua e akono i te tu o te tangata.” (Anga. 10:​34, 35) Kare tatou e akarongo ra ki ta Iesu akaueanga me aroa ua tatou i tetai pae i roto i te putuputuanga e kua matapiko i tetai pae. Ae, e piri vaitata atu tatou ki tetai pae, mei ia Iesu katoa. (Ioa. 13:23; 20:2) Inara te akamaara maira a Petero ia tatou kia tauta i te “aroa taeake”—ei pirianga kopu tangata te tu—no te au taeake e te au tuaine katoatoa.—1 Pete. 2:17.

11. Eaa te “aroa maata” i te au taeake?

¹¹ Kua raurau mai a Petero ia tatou kia ‘aroa maata ma te ngakau kinokino kore.’ Te aiteanga, o te aroa “maata” koia oki kia akamaata atu i te au kotinga o to tatou aroa natura. Ei akaraanga, akapeea me akariri mai e me tamamae mai tetai taeake ia tatou? Penei ka akariri atu tatou e kare e akaari i te aroa. Inara, kua apii a Petero mei ia Iesu e kare te akariri atu e akamareka i te Atua. (Ioa. 18:​10, 11) Tata a Petero: “Auraka e tutaki atu te kino i te kino, e te akakino i te akakino: ei mea ke ra, ei akameitaki ta kotou.” (1 Pete. 3:9) E tuku i te aroa maata kia akakeu ia koe kia takinga meitaki ma te aroa atu i te aronga tei tamamae mai ia koe.

12. (a) Eaa atu ta te aroa maata ka akakeu ia tatou kia rave? (e) Eaa taau ka inangaro i te rave, mei tei akaariia e te vitio Preserve the Precious Gift of Unity?

¹² I roto i tana reta mua, kua taangaanga a Petero i te tuatua “aroa maata.” Te tapoki ra teia aroa, i te au ara rikiriki, e “te apa e manganui.” (1 Pete. 4:8) Penei kua maara ia Petero te apiianga a Iesu iaia kia akakore i te ara i te au mataiti i mua atu ana. I te reira taime, penei kua manako a Petero e te meitaki ua ra aia “kia taki itu” te akakore i te ara a tona taeake. Inara kua apii a Iesu iaia—e tatou—kia akakore i te ara “kia itu ra ngauru i te taki itu anga,” te aiteanga kare e kotinga. (Mata. 18:​21, 22) Me kua ngata ia koe te taangaanga i teia akoanga, e akamaroiroi! Kua ngata rai i te au tavini apa ua o Iehova te akakore i te ara. Te mea puapinga i teianei kia tauta i te akakore i te ara a toou taeake e kia akamoeau iaia.c

E TE ARONGA PAKARI, AKONO I TE MAMOE

13. Eaa te ka ngata i te aronga pakari te tiaki i te au taeake e te au tuaine?

¹³ Kare rava a Petero i ngaropoina ana i ta Iesu i akakite kiaia i muri ake i tona tuakaouanga: “Ka tiaki i taku au mamoe.” (Ioa. 21:16) Me e tangata pakari koe, kua tau rai teia au ikuiku anga kia koe. Ae, e ngata rai i tetai tangata pakari te akono i tana angaanga puapinga. Ka akono te aronga pakari i to ratou pamiri na mua, i te pae kopapa, te manako ngakau, e te pae vaerua. Ka arataki katoa ratou i te angaanga tutu aere e pera te akapapa no te au uipaanga, te akaputuputuanga, e te uruoaanga. E apainga ta tetai pae ei mema no te au Kumiti Are Maki me kore te angaanga na te Local Design/Construction Department. E au tane maroiroi tikai ratou!

14. Eaa te ka akakeu i te aronga pakari kia akono i te mamoe? (1 Petero 5:​1-4)

¹⁴ “Ka angai i te anana a te Atua,” i akamaroiroi ei a Petero i te aronga pakari. (E tatau ia 1 Petero 5:​1-4.) Me e tangata pakari koe, kite matou e te akaperepere ra koe i toou au taeake e te au tuaine e te akono ua ia ratou. I tetai taime ka manako koe e maata roa taau angaanga e kua roiroi koe. Eaa taau ka rave? E akakite i toou manako kia Iehova. Tata a Petero: “Kia tuatua tetai tangata ra, kia tau ïa i te tuatua a te Atua.” (1 Pete. 4:11) Te tupu ra te manamanata ki toou au taeake e te au tuaine kare e rauka i te akatikatikaia i teia akatereanga. E akamaara ka rauka ua i “te tiaki maata,” ko Iesu Karaiti te tauturu ia ratou. I teianei e i te ao ou. Te pati maira te Atua i te aronga pakari kia akaperepere i to ratou au taeake, kia akono ia ratou e kia riro ei ‘akaraanga ki te mamoe.’

15. Akapeea tetai tangata pakari me akono i te mamoe? (Akara katoa i te tutu.)

¹⁵ Kua kite a William, e tangata pakari i te puapinga kia akono i te au mamoe. Te tupuanga te maki COVID-19, kua aravei atu aia e te aronga pakari i te au taeake tataki tai i roto i ta ratou pupu i te au epetoma ravarai. Kua akamārama mai aia i te tumu: “E maata te au taeake i te kainga penei te tupu ra te manako mirimiri ngata.” Me taitaia tetai taeake, ka akarongo ua a William. E oti ka kimi aia i te tauturu, pera te au vitio mei ta tatou website. Akakite aia: “Te anoano maataia nei tatou kia akono i te au taeake. Ka tauta maroiroi tatou i te tauturu i te tangata kia kite ia Iehova; kia pera rai tatou i te akono i te au mamoe, te tauturu i ta Iehova mamoe kia vai ua ki roto i te tuatua mou.”

E ARIU KIA IEHOVA KIA AKAOTI I TAAU APIIANGA

16. Eaa tetai au mataara ka taangaanga tatou i te au apiianga mei ta Petero nga reta?

¹⁶ Kua uriuri ana tatou i te apiianga mei ta Petero nga reta. Kua kite mai koe e ka anoanoia te akatikatika anga. Ka inangaro ainei koe i te akamanako putuputu i te au akameitaki anga i te ao ou? Kua akakoro ainei koe i te tutu aere i te angaanga, te apii, e tetai ua atu tuatau? Te kite ra ainei koe i te ngai kia akamaata i toou aroa taeake e te au tuaine? E te aronga pakari, te inangaro ra ainei koe i te akono ua i ta Iehova mamoe? Na te akara tika anga ia koe uaorai e akaari mai e e tu paruparu toou kia akatikatikaia, inara eiaa e taitaia. E ‘takinga-meitaki te Atu,’ nana koe e tauturu. (1 Pete. 2:3) Akapapu maira a Petero kia tatou: “Ko te Atua ra . . . kia akameitaki rava aia ia kotou, kia tauturu mai, kia akamaroiroi mai, e kia akatinamou rava aia ia kotou.”—1 Pete. 5:10.

17. Me aruaru tatou ma te apiiia e Iehova, eaa te ka tupu?

¹⁷ I tetai atianga kua manako puapinga kore a Petero i mua i te Tamaiti a te Atua. (Luka 5:8) Ma te aroa takinga meitaki o Iehova e Iesu, kua aruaru a Petero ei pipi na Karaiti. Kua arikiia a Petero “ki roto i te basileia mutu kore o to tatou Atu o Iesu Mesia to tatou Ora.” (2 Pete. 1:11) E akameitakianga tikai! Me aruaru koe mei ia Petero kia apiiia e Iehova, ka rauka ia koe te tutaki o te ora mutu kore. Ka ‘rauka ia koe te openga o toou akarongo, koia te ora.’—1 Pete. 1:9.