E Rekareka i te Manakonakoanga

1. Eaa a Aberahama i tatari ei kia rauka mai tetai tamaiti nana?

KUA taputou a Iehova ki tona oa ko Aberahama e ka akameitakiia te pa enua katoa o te enua nei na roto i tana uanga. (Gene. 15:5; 22:18) No tona akarongo ketaketa, kua papu ia Aberahama e ka tupu ta Iehova i taputou, inara e 100 ona mataiti e e 90 o Sara e kare rai a raua tamaiti. (Gene. 21:​1-7) Noatu te reira, karanga te Pipiria: “Akarongo atura [a Aberahama] ma te tatari e, ka riro aia ei metua no te pa enua e manganui, mei tei karangaia maira.” (Roma 4:18) Kua tupu rai tana i tatari. Kua anau ta raua tamaiti ko Isaaka. Eaa a Aberahama i papu ei ka tupu ta Iehova i taputou?

2. Eaa i papu ei ia Aberahama e ka tupu ta Iehova i taputou?

² No tona pirianga vaitata kia Iehova, “kua kite tikai oki [a Aberahama] e, ko [ta te Atua] i tuatua maira, ka tika iaia kia akatupu.” (Roma 4:21) No to Aberahama akarongo, kua mareka a Iehova iaia e kua riro aia ei oa no te Atua. (Iako. 2:23) Karanga a Roma 4:18 e, “kua akarongo atura [a Aberahama] ma te tatari.” I teianei, ka uriuri tatou i ta Paulo i tuatua ia Roma pene 5 no te tatari anga, koia oki te manakonakoanga.

3. Eaa ta Paulo i akamārama no te manakonakoanga?

³ Akamārama mai a Paulo e kare te manakonakoanga e taki atu ki te akama. (Roma 5:5) Tauturu katoa aia ia tatou kia kite akapeea me akaketaketa i to tatou manakonakoanga. Ia tatou e uriuri ra ia Roma 5:​1-5, e akamanako i toou turanga. Mea papu ka kite mai koe kua ketaketa atu toou manakonakoanga i te tuatau i aereia mai. I teianei, ka uriuri tatou i tetai manakonakoanga kakā ta Paulo i taiku mai.

“TE TATARI ANGA I TE KAKĀ O TE ATUA”

4. Eaa tei uriuriia ia Roma 5:​1, 2?

⁴ E tatau ia Roma 5:​1, 2. Kua tata a Paulo i teia irava ki te putuputuanga i Roma. Kua apii te au taeake e te au tuaine o reira no runga ia Iehova e Iesu, kua akatupu i te akarongo e kua riro mai ratou ei Kerititiano. “Kua akatikaia [ratou] e te Atua no te akarongo” e kua akatainuia ratou ki te vaerua tapu. Kua rauka i reira ia ratou tetai manakonakoanga manea.

5. Eaa te manakonakoanga no te aronga akatainuia?

⁵ I muri mai, kua tata a Paulo ki te au Kerititiano akatainuia i Ephesia no runga i to ratou manakonakoanga. Karanga a Paulo, kua rauka ia ratou te manakonakoanga “i akonoia na te aronga tapu.” (Ephe. 1:18) Te tataanga a Paulo ki to Kolosa, kua akakite aia i te ngai ka akatupuia to ratou manakonakoanga. Kapiki aia i te reira “ko te irinakianga i vaioia no kotou i te ao,” koia oki i te rangi. (Kolo. 1:​4, 5) No reira, ko te manakonakoanga o te au Kerititiano akatainuia, ka akatuia ratou ki te rangi e ka tutara kapiti ma Iesu e tuatau ua atu.—1 Tesa. 4:​13-17; Apo. 20:6.

6. Eaa te manako o tetai taeake akatainuia no tona manakonakoanga?

⁶ Akaperepere te aronga akatainuia i to ratou manakonakoanga. Teia ta tetai taeake akatainuia ko Frederick Franz i tuatua no tona manakonakoanga: “E mea papu to tatou manakonakoanga e ka akatupuia.” Karanga katoa aia e ka rauka i te 144,000 te tutaki ta te Atua i taputou kia ratou. Ka meitaki rava atu te reira mei ta ratou i manako. Kua roa te Taeake Franz i te tavini anga i te Atua e kua akapapu aia i tona manakonakoanga na te karanga anga: “Kua maroiroi roa atu tatou no te reira manakonakoanga. . . . E apinga puapinga maataia no te tiaki anga, noatu [ka pou e tai mirioni mataiti]. Te akaperepere maata nei au i to tatou manakonakoanga.”

7-8. Eaa te manakonakoanga no te maata anga o te au tavini o Iehova? (Roma 8:​20, 21)

⁷ E manakonakoanga ke to te maata anga o te au tavini o Iehova. Ko teia ta Aberahama i tatari—koia oki te ora mutu kore i te enua i raro ake i te Patireia o te Atua. (Ebe. 11:​8-10, 13) Kua tata a Paulo no runga i te reira manakonakoanga manea. (E tatau ia Roma 8:​20, 21.) Te apii mua anga koe i te taputou a te Pipiria no te tuatau ki mua, eaa taau i reka? Ko te kite anga ainei e ka apa kore koe e kare aau ara? Me ko te kite anga e ka akatu akaouia mai toou au akaperepere i roto i te Parataito? Mea papu e maata te akameitaki anga manea taau ka tapapa atu no toou manakonakoanga.

⁸ Me te tapapa nei tatou i te ora mutu kore i te rangi me kore i te enua, e tumu anga ïa kia rekareka i to tatou manakonakoanga. E ka akaketaketa te reira ia tatou. Akamārama a Paulo akapeea me rave i teia. Ka uriuri tatou i tana i tata no runga i te manakonakoanga. Ka tauturu te reira ia tatou kia irinaki papu e ka tupu to tatou manakonakoanga.

AKAKETAKETA I TO TATOU MANAKONAKOANGA

9-10. Eaa ta te au Kerititiano ka apii mai mei to Paulo akaraanga? (Roma 5:3) (Akara katoa i te au tutu.)

⁹ E tatau ia Roma 5:3. Me rokoia tatou e te tumatetenga, ka akaketaketaia to tatou manakonakoanga. Penei ka poitirere tatou i teia. Inara karanga a Iesu e ka rokoia tana au pipi e te tumatetenga. Akamanako ana i to Paulo akaraanga. Karanga aia ki te au taeake i Tesalonia: “Ia matou oki i noo ia kotou na, kua akakite atea ua matou ia kotou, e e rokoia matou e te tumatetenga.” (1 Tesa. 3:4) E kua tata aia ki to Korinetia: “Kare oki matou i inangaro, e te au taeake, e kia kore kotou e kite i to matou mate . . . E kare rava matou i manako e e ora.”—2 Kori. 1:8; 11:​23-27.

¹⁰ Ka tupu rai te tumatetenga ki te au Kerititiano i teia tuatau. (2 Timo. 3:12) Akapeea koe? Ia koe e aru ra ia Iesu, kua tupu ainei te tumatetenga kia koe? Penei kua aviriia koe e te au oa me kore te kopu tangata. Penei kua akakino ratou ia koe. Kua rokoia ainei koe e te manamanata i te ngai angaanga no toou tu tika? Kua patoiia ainei koe e te kavamani no taau angaanga tutu aere? (Ebe. 13:18) Noatu eaa te tumatetenga taau i na roto ana, karanga a Paulo kia rekareka tatou. No teaa ra?

11. Eaa tatou ka akakoromaki ei i te tumatetenga?

¹¹ Ka rekareka tatou me na roto i te tumatetenga no te mea ka tauturu te reira ia tatou. Karanga a Roma 5:​3, “Na te au tumatetenga e akatupu i te akakoromaki.” Ka rokoia te au Kerititiano pouroa e te tumatetenga no reira, ka anoanoia te tu akakoromaki. Me pera tatou, ka ketaketa atu to tatou manakonakoanga. Kare tatou e inangaro kia aite mei te aronga ta Iesu i karanga e kua ruruia ki runga i te ngai tokatoka. Kua āriki rekareka ratou i te tuatua mou inara, “kia rokoia oki e te tumatetenga, e kia takinga-kinoia,” kua turoriia ratou. (Mata. 13:​5, 6, 20, 21) No reira, kare i te mea mataora me rokoia tatou e te tumatetenga, inara me akakoromaki i te reira ka puapingaia tatou. Akapeea ra?

12. Eaa te puapinga me akakoromaki tatou i te tumatetenga?

¹² Akakite te tata Pipiria ko Iakobo i te puapinga me akakoromaki tatou i te tumatetenga. Karanga aia: “E tuku atu i ta te akakoromaki ra angaanga kia tika rava, kia meitaki rava kotou, ma te apa kore, auraka e ape toe.” (Iako. 1:​2-4) Akakite mai a Iakobo e ka akatupu te akakoromaki i tetai angaanga. Eaa ta te akakoromaki angaanga? Ka akaketaketa te reira i toou tu tiaki marie, toou akarongo e toou irinaki i te Atua. Inara e apinga ke atu ta te akakoromaki ka akatupu.

13-14. Eaa ta te akakoromaki ka akatupu, e eaa te pirianga o te reira ki te manakonakoanga? (Roma 5:4)

¹³ E tatau ia Roma 5:4. Kua taiku a Paulo e ka akatupu te akakoromaki i te kite, koia oki ka akamareka te reira ia Iehova. Kare ko te aiteanga e te mareka ra a Iehova kua rokoia koe e te tumatetenga. Mari ra, te mareka ra aia ia koe. Ka rekareka aia ia koe no toou tu akakoromaki. E akameitakianga tikai!—Sala. 5:12.

¹⁴ E akamaara, kua rokoia a Aberahama e te tumatetenga e kua mareka te Atua iaia. Kua kapiki a Iehova iaia ei oa nona e kua akonoia te reira ei tuatua tika nana. (Gene. 15:6; Roma 4:​13, 22) Pera katoa ia tatou. Kare te Atua e mareka ana i te maata o te angaanga ta tatou ka rave e ta tatou au apainga. Mari ra, te mareka ra aia ia tatou no to tatou tu akakoromaki marie. E ka rauka ia tatou pouroa i te akakoromaki noatu to tatou mataiti, turanga e te kite karape. Te akakoromaki ra ainei koe i tetai tumatetenga i teianei? Me koia ïa, e akamaara e te mareka ra te Atua ia koe. Ka akamaroiroi te reira ia koe e ka papu tikai toou manakonakoanga.

TE MANAKONAKOANGA MOU TIKAI

15. Eaa tetai au manako ke atu ta Paulo i taiku mai, e eaa tetai pae i ekoko ei i te reira?

¹⁵ Mei ta Paulo i tuatua, ka mareka a Iehova me vai tiratiratu tatou i te akakoromaki i te tumatetenga. Akara ana i ta Paulo i tuatua: “Na te kite e akatupu i te tatari, kare oki te tatari e taakama mai.” (Roma 5:​4, 5) Penei ka ekoko tetai pae i teia irava. No teaa ra? No te mea ia Roma 5:​2, kua taiku takere a Paulo e e manakonakoanga to te au Kerititiano i Roma: “te tatari anga i te kakā o te Atua.” No reira penei ka ui tetai pae, ‘Me e manakonakoanga to te au Kerititiano, eaa i reira a Paulo i taiku akaou ei i te reira?’

16. Akapeea te manakonakoanga me akaketaketa ia tatou? (Akara katoa i te au tutu.)

¹⁶ Ka mārama tatou i ta Paulo i tuatua me kite tatou e ka ketaketa atu to tatou manakonakoanga. Ei akatutuanga: Te maara ra ainei ia koe te taime mua i akarongo ei koe i te au taputou i roto i te Pipiria? Penei kua manako koe e e moemoea ua te ora mutu kore i te enua Parataito. Inara te maata atu taau i apii no runga ia Iehova e tana au taputou, kua papu ia koe e ka tupu teia manakonakoanga.

17. Akapeea toou manakonakoanga me akaketaketa atu ia koe i muri ake i toou papetito anga?

¹⁷ Noatu kua papetitoia koe, te maata atu i taau i kite no runga ia Iehova e te akavaitata atu kiaia, ka ketaketa roa atu toou manakonakoanga. (Ebe. 5:13–6:1) Kua kite ana koe i te tupuanga o Roma 5:​2-4. Kua na roto koe i te tumatetenga, kua akakoromaki koe e kua kite koe e te mareka ra te Atua ia koe. I teianei, kua papu roa ia koe e ka tupu pouroa tana au taputou. No reira kua ketaketa atu toou manakonakoanga mei to mua ana. E mea mou ïa e ka akaperepere koe i te reira. Ka akakeu katoa tera i toou oraanga, taau au ikianga, te tu me akono koe i toou ngutuare e me akapou i toou taime.

18. Eaa te akapapuanga ta Iehova i oronga mai?

¹⁸ Kua taiku katoa a Paulo i tetai manako puapinga no te manakonakoanga no ko mai i te Atua. Akapapu mai aia e ka akatupuia toou manakonakoanga. Eaa i papu ei te reira? Akakite mai aia i teia akapapuanga no ko mai i te Atua: “Kare oki te tatari e taakama mai, no te mea kua riringiia mai te anoano o te Atua ki roto i to tatou ngakau e te vaerua tapu i orongaia mai kia tatou nei.” (Roma 5:5) Ae, e mea papu tikai toou manakonakoanga.

19. Eaa koe i papu ei e ka akatupuia toou manakonakoanga?

¹⁹ E akamanako i ta Iehova i taputou kia Aberahama e akapeea te Atua te akatika anga iaia e te kapiki anga iaia ei oa nona. Kua tupu to Aberahama manakonakoanga. Akakite te Pipiria: “E roa akera tona akakoromaki marie anga, rauka iora iaia tei tuatuaia maira.” (Ebe. 6:15; 11:​9, 18; Roma 4:​20-22) E mea papu, kare aia i taakamaia. Ka papu katoa ia koe e ka akatupuia toou manakonakoanga me vai tiratiratu koe. E manakonakoanga mou toou, kia rekareka i te reira! (Roma 12:12) Tata a Paulo: “Kia akakiia mai kotou i te rekareka ravarai e te au i te akarongo anga, e te Atua e rauka’i te irinakianga; kia maata to kotou irinaki i te mana o te vaerua tapu.”—Roma 15:13.